প্রধানমন্ত্রীগী লোইশঙ

ভারত-উজবেকিস্তান ভর্চুএল সমিৎতা পীখিবা পি.এম.গী হৌদোক ৱারোল

Posted On: 11 DEC 2020 12:01PM by PIB Imphal

এক্সিলেন্সী, খুরুমজরি।

অহানবদা ঐ দিসেম্বর ১৪দা অদোমগী থবক পাইরকপা ৫শুবা চহিদা খোং থাংজিল্লকপগীদমক্তা নুংঙাইবা অমদি য়াইফ-পাউজেল পীজরি।

ঐ চহি অসিদা উজবেকিস্তান্দা লাকপা পামজখি।

কোবিদ-১৯গী লাইচৎনা মরম ওইদুনা ঐ লাকপদি ঙমখিদ্রে অদুবু “ৱর্ক ফোর্ম এনিৱেয়র”গী মতম অসিদা ঐখোয় ঙসি ভর্চুএল ওইনা উন্নবা অসিদা ঐহাক নুংঙাইবা ফাওই।

এক্সিলেন্সী,

ভারত অমসুং উজবেকিস্তানগী ৱাৎত-পাদবা সিবিলাইজেসনশিং লৈজৈ। ঐখোয়গী থাইনা মমাংঙৈদগী হৌনা মরী লৈনরক্লি।

ঐখোয়গী লমদমগী শিংনবশিং অমসুং তাঞ্জাশিংগী মতাংদা ঐখোয়না খঙবা অমসুং এপ্রোচ অদু য়াম্না মান্নৈ। অমসুং মরম অসিনা ঐখোয়গী মরী অসি মতম পুম্নমক্তা মপাঙ্গল কন্দুনা লৈরি।

২০১৮ অমসুং ২০১৯দা অদোমগী ভারতকী খোংচৎশিংগী মনুংদা ঐখোয়না ৱাফম কয়ামরুমদা খন্ন-নৈনবগী তাঞ্জা ফংজখি, মদুনা ঐখোয়গী মরীদা অনৌবা খোংজেল অমা উবা ফংলে।

এক্সিলেন্সী, এক্সত্রিমিজম, ফন্দামেন্তেলিজম অমসুং সেপরেতিজমগী মতাংদা ঐখোয়না মান্ননা অৱাবা মায়োক্নরি।

ঐখোয় অনিমক্না তেরিরিজমগী ময়োক্তা অচেৎপা খোংফমদা পুন্না লেপমিন্নরি। লমদম অসিগী ঙাক-শেলগী মতাংদসু ঐখোয়গী মান্নবা মিৎয়েং লৈরি।

ঐখোয়না অমত্তা ওইনা য়ারি মদুদি অফগানিস্তান্দা শান্তি হঞ্জিল্লক্নবা অফগানিস্তান্না লুচিংবা, মপু ওইবা অমসুং লাকশিনবা থৌওং অমগী মথৌ তাই। হৌখিবা চহি তরাগী খুজিং অনিদা ফংলকখিবশিং অদু চেকশিন্না থম্বসু তঙাইফদে।

ভারত অমসুং উজবেকিস্তান্না পুন্না ইন্দিয়া-সেন্ত্রেল এসিয়া দাইলোগ হৌদোকখি। মসি হৌখিবা চহিদা হৌদোকখি।

এক্সিলেন্সী,

হোখিবা চহি খরদা ঐখোয়গী শেন্মিৎলোনগী পার্তনরশিপসু মপাঙ্গল কনশিনখি।

ঐখোয়না উজবেকিস্তানগা লোইননা ঐখোয়গী দিবেলপমেন্ত পার্তনরশিপসু হেন্না চেৎশিলহনবা পাম্মি।

ঐনা মসি খঙবদা য়াম্না নুংঙাইবা ফাওই মদুদি ভারতকী লাইন ওফ ক্রেদিৎকী মনুংদা প্রোজেক্ত কয়ামরুমদা খন্নরি।

অধোমগী চাউখৎ-থৌরাংদা মরুওইবা ওইনা লৌদুনা ঐখোয় ভারতকী এক্সপর্তাইজ অমসুং এক্সপিরিএন্স শিয়র তৌনবগীদমক্তা শেম-শাদুনা লৈরি।

ইনফ্রাস্ত্রকচর, আই.তি., মহৈ-মশিং, হকশেল, ত্রেনিং অমসুং কেপাসিতী বিল্দিং অসিনচিংবা লমশিংদা ভারত্তা তেলেন্ত য়াম্না লৈ, মসি উজবেকিস্তান্দা কান্নবা ওইবা য়াই। ঐখোয়গী মরক্তা লৌউ-শিংউগা মরী লৈনবা জোইন্ত ৱর্কিং গ্রুপ লিংখৎখিবা অসি য়াম্না মরুওইবা অফবা খোংথাং অমনি। মসিদগী ঐখোয়না ঐখোয়গী লৌউ-শিংউগী ললোন-ইতিক হেনগৎহন্নবগী তাঞ্জা থিবা য়ারগনি মসিনা লৈবাক অনিগী লৌমীশিংনা মতেং ফংলগনি।

এক্সিলেন্সী,

ঐখোয়গী ঙাক-শেলগী শরুক য়ামিন্নরিবা লৈবাক অনিগী ওইবা মরী অসি অচেৎপা য়ুম্বী অমা ওইরক্লি।

হৌখিবা চহিদা ঐখোয়গী আর্ম ফোর্সশিংগী খ্বাইদগী চাউবা অহানবা জোইন্ত মিলিতরী এক্সসর্সাইস পাংথোকখি।

স্পেস অমসুং এতোমিক ইনর্জীগী লমদসু ঐখোয় পুন্না হোৎনমিন্নবা হেনগৎলি।

মসি পেন্নীং ঙাই ওইবা ৱাফম্নি মদুদি কোবিদ-১৯ লাইচৎকী অরুবা মতম অসিদা লৈবাক অনিনা অমনা অমগী মতেং নীংথিজনা পাংনরি। হিদাক-লাংথক সপ্লাই তৌববু ওইরো নত্ত্রগা অমনা অমগী মীওইশিং শোইদা ঙামদনা য়ুমদা থিনববু ওইরো।

ঐখোয়গী লৈবাকশিংগী মরক্তসু তেংবাং পীনবা হেনগৎলক্লি। গুজরাৎ অমসুং অন্দিজোংনা মায় পাক্না শরুক য়াবগী মোদেলদা হরিয়ানা অমসুং ফরগনাগী মরক্তা তেংবাং পীনবগী মশক-মতৌ শেম্লি।

এক্সিলেন্সী,

অদোমগী লমজিং মখাদা উজবেকিস্তান্দা মরুওইবা অহোংবা পুরক্লি, অমসুং ভারত্তসু ঐখোয় রিফোর্মগী লম্বীদা খোঙ থাংজিল্লি।

মসিদগী পোস্ত-কোবিদকী মতমদা ঐখোয়গী মরক্তা অমনা অমগী তেংবাং পীনবগী ওইথোকপশিং অমুক্কা হেনগৎলগনি।

ঐনা থাজৈ মদুদি ঙসিগী ঐখোয়গী ৱারী-ৱাতাই অসিদগী হোৎনরিবশিং অসিদা অনৌবা মায়কৈ অমসুং থৌনা ফংলগনি।

এক্সিলেন্সী,

হৌজিক ঐনা অদোম্বু হৌদোক ৱারোল পীবীরনবা কৌশিঞ্জরি।

***



(Release ID: 1679963) Visitor Counter : 220