প্রধানমন্ত্রী শ্রী নৰেন্দ্র মোদীয়ে কাইলৈ, অৰ্থাৎ ১০ ডিচেম্বৰত নতুন দিল্লীৰ সংসদ মার্গত নতুন সংসদ ভৱনৰ আধাৰশিলা স্থাপন কৰিব। নতুন এই সংসদ ভৱন হ’ব আত্মনির্ভৰ ভাৰতৰ এক উল্লেখযোগ্য অংশ। য’ত দেশৰ স্বাধীনতাৰ পাছত প্রথমবাৰলৈ জনতাৰ সংসদ হিচাপে গঢ় দিয়াৰ এক যুগান্তকাৰী সুযোগ হ’ব। যি নতুন ভাৰতৰ চাহিদা আৰু আশা আকাংক্ষাৰ লগত সংগতি ৰাখি ২০২২ চনৰ স্বাধীনতা দিৱসৰ ৭৫সংখ্যক বৰ্ষপূৰ্তি স্মৰণীয় হৈ পৰিব৷

নতুন সংসদ ভৱনটো অত্যাধুনিক আৰু উন্নতমানৰ হ’ব। বর্তমানৰ সংসদ ভৱন সংলগ্ন ত্রিভুজাকৃতিৰ ভৱন হিচাপে গঢ়ি লৈ উঠিব, য’ত এক অভেদ্য সুৰক্ষা ব্যৱস্থা থাকিব। প্রস্তাৱিত নতুন ভৱনৰ লোকসভা কক্ষ বর্তমান কক্ষতকৈ তিনিগুণ ডাঙৰ আৰু ৰাজ্যসভাৰ কক্ষও যথেষ্ট বিশাল পৰিসৰৰ হ’ব। নতুন ভৱনৰ ভিতৰত ভাগত ভাৰতীয় সংস্কৃতি আৰু আঞ্চলিক শিল্প, কাৰুশিল্পকে ধৰি বৈচিত্র্য দাঙি ধৰা হ’ব। ইয়াৰ সমান্তৰালভাৱে এক কেন্দ্রীয় সাংবিধানিক গেলাৰী নিৰ্মাণ কৰা হ’ব, য’ত জনসাধাৰণৰ প্রৱেশৰ অধিকাৰ থাকিব৷

নতুন সংসদ ভৱন নির্মাণত পৰিৱেশ অনুকূল আৰু আধুনিক প্রযুক্তিৰ ব্যৱহাৰৰ ওপৰত গুৰুত্ব দিয়া হ’ব। ইয়াৰ ভিতৰত উচ্চমানৰ শব্দ আৰু অডিঅ’-ভিজুৱেল সুবিধাসমূহ বজাই ৰখা হ’ব। ইয়াত আৰামদায়ক আসনৰ ব্যৱস্থা থাকিব৷ ইয়াৰ ৰক্ষণাবেক্ষণ আৰু পৰিচালনা সহজভাৱে কৰাৰ বাবে সেইদৰেই নক্সা প্ৰস্তুত কৰা হৈছে৷

আধাৰশিলা স্থাপন অনুষ্ঠানত লোকসভাৰ অধ্যক্ষ শ্রী ওম বিৰলা, সংসদীয় পৰিক্ৰমা মন্ত্রী শ্রী প্রহ্লাদ ভেংকটেশ যোশী, আবাস মন্ত্ৰালয় (স্বতন্ত্ৰ দায়িত্ব)ৰ ৰাজ্যিক মন্ত্রী হৰদীপ সিং পুৰী, ৰাজ্যসভাৰ উপাধ্যক্ষ শ্রী হৰিবংশ নাৰায়ণ সিঙকে ধৰি প্রায় দুশগৰাকী অতিথি উপস্থিত থাকিব৷ এওঁলোকৰ ভিতৰত বিভিন্ন বিভাগৰ মন্ত্রী, সাংসদ আৰু দূতাবাসসমূহৰ প্রতিনিধি উপস্থিত থাকিব৷ আধাৰশিলা স্থাপন অনুষ্ঠান ৱেব কাষ্টিঙৰ জৰিয়তে পোনপটীয়াকৈ সম্প্রচাৰৰ ব্যৱস্থা কৰা হৈছে।

****

DS/SH/DB