মন্ত্রীমন্দল

মেনলেন্দ (কোচি)গা লক্সদ্বীপ ইথৎশিংগা (কে.এল.আই. প্রোজেক্ত) অনিগী মরক্তা সবমেরিন ওপ্তিকেল ফাইবর কেবল কন্নেক্তিবিতী পীননবা ৱাফম মন্ত্রী মন্দলনা অয়াবা পীখ্রে

Posted On: 09 DEC 2020 3:45PM by PIB Imphal

প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রী মন্দলনা মেনলেন্দ (কোচি) অমসুং লক্সদ্বীপ ইথৎশৎং (কে.এল.আই. প্রোজেক্ত) অনিগী মরক্তা সবমেরিন ওপ্তিকেল ফাইবর কেবল শম্নহন্নবা ৱাফম অয়াবা পীখ্রে‍।

প্রোজেক্ত অসিদা কোচি অমসুং লক্সদ্বীপকী ইথৎ ১১ হায়বদি কাবরত্তি, কাল্পেনি, অগতি, অমিনি, অন্দ্রোথ, মিনিকোই, বঙ্গরাম, বিত্রা, চেতলত, কিল্তান অমসুং কদমতগী মরক্তা অখন্নবা সবমেরিন ওপ্তিকেল ফাইবর কেবল (ও.এফ.সি.)গী খুত্থাঙদা হকথেংনবা কম্ম্যুনিকেসনগী মরী অমা থম্নবা ৱাফম য়াওরি‍।

শেলথুমগী পোৎলুম:

থবক ওইনা পায়খৎনবগী চাউরাকপা শেন্ফম চহী ৫গী ওপরেসনেল এক্সপেন্স য়াওরগা লুপা করোর ১০৭২নি‍। প্রোজেক্ত অসি য়ুনিভর্সেল সর্ভিস ওব্লিগেসন ফন্দনা শেল থাদগদবনি‍।

শাফু:

তেলিকোম ইন্ফ্রাস্ত্রকচর চাউখৎলকপগা শেন্মিৎলোন অমদি খুন্নাই চাউখৎলকপগা য়াম্না নক্না মরী লৈনৈ হায়বসি তশেংলবা ৱাফম্নি‍। তেলিকম্ম্যুনিকেসন কন্নেক্তিবিতীনা থবক পীবদা মরুওইবা থৌদাং লৌই‍। প্রোভিজন ওফ সবমেরিন ওপ্তিকেল ফাইবর কেবল কন্নেক্তিবিতী অসি অয়াবা পীরিবা অসিনা বেন্দৱাইদ চাউনা পীদুনা লক্সদ্বীপ ইথৎশিংদা তেলিকম্ম্যুনেকসনগী খুদোংচাবা য়াম্না হেনগৎহল্লগনি‍।

সবমেরিন কন্নেক্তিবিতী প্রোজেক্ত অসিনা মী্য়ামদা ই-গভর্নেন্স সর্ভিস পীবদা, ঙা য়োকপা, য়ুবীদা য়ুম্ফম ওইবা ইন্দস্ত্রীশিং অমসুং মমল ৱাংবা তুরিজম চাউখৎহনবদা, তেলি-এজুকেসনগী লমদা মহৈ মশিংগী চাউখৎপা পুরকপদা অমদি তেলিমেদিসিনগী খুদোংচাবদা হকশেলগী ফীভম চাউখৎহনবদা মরুওইবা থৌদাং লৌগনি‍। মসিনা মশিং য়াম্লবা লল্লোন ইতিকশিং লিংখৎপদা, ই-কম্মর্স থৌওংশিং হেন্না মপুং ফাহনবা অমদি ৱাখল লৌশিং তাথোক তাশিন তৌননবগীদমক এজুকেসনেল ইন্সতিত্যুৎশিংদা মতিক চানা ঙাক্লৌ পীবদা মতেং ওইগনি‍। লক্সদ্বীপ ইথৎ অসি লোজিস্তক সর্ভিসকী মকোন অমা ওইনবগী মঙম লৈ‍।

পায়খৎনবগী লাল্লোং অমসুং পান্দমশিং:

য়ুনিভর্সেল সর্ভিস ওব্লিগেসন ফন্দ, দিপার্তমেন্ত ওফ তেলিকম্ম্যুনিকেসনদা মতেং পাংননবা ভারত সঞ্চার নিগম লিমিতেদ (বি.এস.এন.এল.)বু প্রোজেক্ত একজেক্যুসন এজেন্সী ওইনা অমসুং তেলিকম্ম্যুনিকেসন কন্সল্তেন্ত ইন্দিয়া লিমিতেদ (তি.সি.আই.এল)পুনা তেক্নিকেল কন্সলতেন্ত ওইনা খল্লে‍। প্রোজেক্ত অসিগী মখাদা মচাক মরলশিংগী মপু দি.ও.তি.গী মখাদা লৈবা ফন্দিং এজেন্সী ওইরিবা য়ু.এস.ও.এফ.না ওইগনি‍। প্রোজেক্ত অসি মে ২০২৩ ফাওবগী মনুংদা লোইশিন্নবা পান্দম থম্লি‍।

বেকগ্রাউন্দ:

ইথৎ কয়ানা শেমবা লক্সদ্বীপ য়ুনিয়ন তেরিতরী অসি অরাবিয়ন সমুদ্রদা লৈ অমদি ভারতকী লাল্লোংগী য়াম্না মরুওইবা মফম্নি‍। শাফবা, অচৌবা, থাজনিংঙাই ওইবা অমদি পু-থাংবা ঙমবা তেলিকোমগী খুদোংচাবা পীবা হায়বসি ইথৎসিদা লৈরিবা মীয়ামগীদমক অমদি লৈবাক পুম্বগী ওইনা লাল্লোং য়াৎপগী মীৎয়েঙদগীসু য়াম্না মরুওই‍।

হৌজিক্কী ওইনা লক্সদ্বীপ্তা তেলিকোম কন্নেক্তিবিতী পীননবা অমত্তা ঙায়রবা মেদিয়মদি সেত্তলাইতকী খুত্থাঙদনি, অদুবু বেন্দৱাইদতি জি.বি.পি.এস. ১ খক্তনি‍। বেন্দৱাইদ ৱাৎপা অসি খুন্নাইনা মপুং ফানা চাউখৎনবগীদমক ই-গভর্নেন্স, ই-এজুকেসন, ই-বেঙ্কিংনচিংবদা চঙদ্রবা য়াদ্রবা দেতা সর্ভিস পীবদা চাউনা অপনবা অমনি‍।

মসিগী মতুং ইন্না লৈঙাক অসিনা সবমেরিন ওপ্তিকেল ফাইবর কেবল তিংদুনা লক্সদ্বীপ ইথত্তা তেলি-কম্ম্যুনিকেসনগী খুদোংচাবা পীননবা মতম খরগী মমাঙদগী খন্নদুনা থৌরাং অসি পায়খৎনবা খোঙফম চেৎনা লেপ্পি‍। লক্সদ্বীপ্তা বেন্দৱাইদ য়ামবা কম্ম্যুনিকেসন ফেসিলিতী পীবা হায়বসি ই-গভর্নেন্স সর্ভিস মপাঙ্গল কনখৎহন্নবা অমদি দিজিতেল ইন্দিয়াগী মঙলান মঙফাওননবা লৈবাকসিগী পান্দম অসি ফংননবা হোৎনরিবসিগাসু চাননা পায়খৎপনি‍।

****

 



(Release ID: 1679427) Visitor Counter : 3