উপ-রাস্ত্রপতিগী লোইশঙ

উপ রাস্ত্রপতিনা নহারোলশিংদা মপাঙ্গল কনবা, মরোমদোম লেপচবা ঙমবা অমদি পুম্নমক কোনশিনবা ভারত অমা শেমগৎনবগীদমক দোক্তর কলামগী মতৌ তমজনবা ৱাফম থমখ্রে

ভারতপু চাউখৎলবা লৈবাক অমা ওইহন্নবা থবক পায়খৎনবা ঐখোয় ৱাশকমিন্নরসি

উপ রাস্ত্রপতিনা খুঙ্গঙ অমদি অপীকপা ময়োল্লমশিংদা থবক অমদি শেন্মিৎলোনগী খুদোংচাবা শেমগৎপগী তঙায় ফদবা ৱাফম থমখি

নহাশিংনা তোঙান তোঙানবা শেন্মিৎলোন অমদি খুন্নাইগী শিংনবশিংগী পাম্বৈ পুথোক্নবগীদমক লৈনরিবা ৱাখল্লোনগী ৱাংমদা খনবা মথৌ তাই: ভি.পি.

দোক্তর কলাম শেংলবা থবক্কী মীনি অমদি ভারত মচা পুম্নমক্কী পুক্নিং থৌগৎনিংঙাইনি হায়না উপ রাস্ত্রপতিনা হায়রি

দোক্তর কলামগী পাউতাক ইন্দুনা তুং কোইগদবা অমদি মহৌশাগী অকোয়বগী ফীভমগা চুনবা মওংদা চাউখৎ লম্বীদা চৎপা মতম ওইরে: উপ রাস্ত্রপতি

রাস্ত্রপতি ওইনা দোক্তর কলামনা ইকায় খুম্নবা অমদি অফবা ৱাখল্লোনবু মশক থোকহল্লম্মি: উপ রাস্ত্রপতি

হান্নগী রাস্ত্রপতি দোক্তর এ.পি.জে. অব্দুল কলাগী মরমদা ইবা ‘অব্দুল কলামগা লোয়ননা চহী ৪০ – লিথোকখিদ্রিবা ৱারীশিং’ অমা ফোঙখ্রে

Posted On: 03 DEC 2020 12:41PM by PIB Imphal

উপ রাস্ত্রপতি শ্রী এম. ভেঙ্কয়া নাইদুনা নহারোলশিংদা হান্নগী রাস্ত্রপতি দোক্তর এ.পি.জে. অব্দুল কলামগী মতৌ তমদুনা মপাঙ্গল কনবা, মরোমদোম লেপচবা ঙমবা অমদি পুম্নমক কোনশিনবা ভারত অমা শেমগৎনবগীদমক থবক পায়খৎনবা ৱাফম থমখ্রে‍। ভারতকী মীয়ামগী য়াম্লবা শরুক অমদা চৈথেং পীরিবা তোঙান তোঙানবা শেন্মিৎলোন অমদি খুন্নাইগী শিংনবশিংগী পাম্বৈ পুথোক্নবগীদমক নহাশিংনা দোক্তর কলামগুম্না হান্না লৈনরিবা ৱাখল্লোনগী ৱাংমদা ৱাখল খন্দুনা তোক্নোলোজী শীজিন্নগদবনি‍।

দোক্তর সিবথানু পিল্লাইনা ইবা ‘অব্দুল কলামগা লোয়ননা চহী ৪০ – লিথোকখিদ্রিবা ৱারীশিং’ হায়না মিংথোনবা লাইরিক অমা ভর্চুএল ওইনা ফোঙবগী থৌরমদা ৱা ঙাঙলদুনা লাইরিক অসিনা দোক্তর কলামগী পুন্সিগী হকথেংনবা মশক অমা পীরি হায়রদুনা শ্রী নাইদুনা নুংঙাইবা ফোঙদোকখি‍। “দোক্তর কলামগী পুন্সিনা ৱাখল পরিং চুম্লবদি খুদোংথিবা অমদি নীংহন্ননিংঙাই ওইবা ৱাফমশিংনা মীওইবগী লমচৎ অমদি পুক্নিংবু মপাঙ্গল কলহন্নবা মরুওইবা মচাকশিং ওইহনবা ঙম্মী হায়বা মতিং লৈরবা পাউজেল অমা পীরি,” হায়না মহাক্না মখা তাখি‍।

হান্নগী রাস্ত্রপতিগা লোয়নবদা মহাক্না থেংনহৌবা ৱাফম খরা নীংশিংলদুনা শ্রী নাইদুনা হায়খিবদা “দোক্তর কলাম্না দি.আর.দি.ও.দা লৈরিঙৈ অমদি মতুংদা ভারতকী রাস্ত্রপতি ওইনা লৈরিঙৈ মতমদা ঐনা মহাক্কা ৱারী ৱাতায় শানবগী তাঞ্জা কয়া ফংখি অদুগা মতম পুম্নমক্তা ঐবু মহাক্কী ৱাখল লৌশিং অমদি মীচম মীয়ামগী পুন্সিদা অহোংবা পুরক্নিংবগী পুকচেল শেংলবা অপামবদুনা ঙকহনখি‍।”

দোক্তর কলামবু তশেং তশেংলবা থবক্কী মীশক অমনি হায়না তাক্লদুনা উপ রাস্ত্রপতিনা মহাক ভারত মচা পুম্নমক্কী পুক্নিং থৌগৎনিংঙাইগী মশক্নি হায়না হায়খি‍। ভারত মচা পুম্নমক, মরুওইনা নহাশিংবু নুংশিখিবা দোক্তর কলাম তশেংনমক ‘মীয়ামগী রাস্ত্রপতি’ অমনি হায়না শ্রী নাইদুনা হায়খি‍। “মহাক ইচম চমবা, মপুকচেল শেংবা অমদি লৌশিংগী অথোইবা য়ুম্বী ওইখি‍। ভারতকী ঙাকশেল অমসুং তরংগী মতিং মপাঙ্গল কনখৎহনবদা মহাক্না লৌরমবা থৌদাং মমল নাইদে,” হায়না মহাক্না মখা তাখি‍।

উপা রাস্ত্রপতিনা হায়খিবদা দোক্তর কলাম্না ইকায় খুম্নবা অমদি অফবা ৱাখল খনবা হায়বসি ভারত পুম্বদা অমদি মপান লৈবাকশিংদা মশক থোকহল্লম্মি অমদু মহাকপু মরুপ মপাং ওইবা অমদি ৱাখল লৌশিংবু খ্বাইদগী কন্না য়োকখৎলমবা মীওই অমা ওইনা লৌনরি‍। হান্নগী রাস্ত্রপতিনা লৌরমবা থৌদাংশিং শকখঙদুনা নাসানা ইন্তরনেসনেল স্পেস স্তেসনদা নৌনা থেংনখিবা ওর্গানিজম অদুবু দোক্তর কলামগী মমীং লৌদুনা মমীং থোনখি হায়নসু মহাক্না নীংশিংখি‍।

দোক্তর কলামগী ভারতকী মঙলানগী মতাঙদা পল্লদুনা শ্রী নাইদুনা হায়খিবদা, “হান্নগী রাস্ত্রপতি অসিনা লৈবাকসিগী পাক চাউরবা মহৌশাগী মচাক মথুমশিং অমদি তোঙান তোঙানবা লমশিংদা হৈথোই শিংথোইরবা মীওইশিংগী ফীভম য়েংলগা ভারতনা চাউখৎলবা লৈবাক অমা ওইবগী তঙাই ফদবা মতম পুম্নমক্তা ফোঙদোকখি‍। তেল্লবা মতমদা ভারতনা চাউখৎলবা লৈবাক অমা ওইনবগী মতিক অমদি মতিং লৈ হায়না মহাক্না থাজখি‍।”

উপ রাস্ত্রপতিনা হায়খিবদা দোক্তর কলামনা খ্বাইদগী পামজখিবদি স্কুল অমদি কলেজশিংগী মহৈরোইশিংবু লৈবাক শেমগৎপগী থৌওংশিংদা পামজনা থবক পায়খৎনবা পুক্নিং থৌগৎপনা ওইখি‍। “মহাক ৱাখল চেৎপা মরৈবাক নীংবা, পুক্নিং থৌগৎপা ঙম্বা ৱাঙাঙলোয় অমদি মমিং লৈবা অইবা অমা ওইরম্মি‍। মহাকপু পুক্নিং থৌগিৎনিংঙাই ওইরবা অমদি মীয়াম্না নুংশিনবা লুচিংবা অমা ওইহল্লিবসি মীওই কয়াগী পুন্সিদা মমি তাখিবা কলামগী মীওইবগী মচৎ অদুননি,” হায়না মহাক্না মখা তাখি‍।

কোবিদ-১৯না লংফৈদা লৈবা শিন্মীশিংদা পীবা চৈথেংগী মতাংদা পল্লদুনা উপ রাস্ত্রপতিনা খুঙ্গঙ অমদি অপীকপা ময়োল্লমশিংদা থবক্কী অমদি শেন্মিৎলোনগী খুদোংচাবশিং শেমগৎপগী মথৌ তাবা ৱাফম থমখি‍। “ঐখোয়গী খুঙ্গঙশিং অমদি ময়োল্লমশিং চাউখৎপগী মফম ওইরক্নবগীদমক্তা ঐখোয়না থৌরাং য়াৎপগী থবক চাইথোকহন্নবা, লোকেল বোদীশিংগী মতিং হেনগৎহন্নবা অমদি কোত্তেজ ইন্দস্ত্রীশিং পাক্তক্ননা য়োকখৎপদা মীৎয়েঙ চঙবা মথৌ তাগনি,” হায়না মহাক্না মখা তাখি‍। মসিগীদমক্তা শ্রী নাইদুনা লোকেল বোদীশিংবু মখোয়গী মরমদমদুদা চাউখৎপা পুরক্ননবা ইনোৎ পীহন্নিংবগী অপাম্বা ফোঙদোকখি‍। দোক্তর কলাম্না মহাক্কী পুরা মোদেলগী খুত্থাঙদা খুঙ্গঙ অমদি ময়োল্লমশিংগী মরক্তা লৈরিবা খেন্নবা শমজিন্নবগী মথৌ তাবা ৱাফম ফোঙদোক্লম্মি হায়বা ৱাফম পল্লদুনা উপ রাস্ত্রপতিনা ৱাফম অসি মীপুম খুদিংমক্কী খ্বাইদগী মকোক থোংবা থৌদাং ওইফম থোকই হায়না ফোঙদোকখি‍।

লৈবাকসিগী ময়ায় ওইবা চহী ৩০দগী তাবা ওইদুনা ভারতনা মালেমগী খ্বাইদগী নহা ওইবা লৈবাক ওইরি হায়না থম্লদুনা শ্রী নাইদুনা হায়রিবা নহাগী মতিং অসিবু লৈবাক শেমগৎপদা মায় ওনশিনহন্নিংবগী অপামবা ফোঙদোকখি‍। হায়রিবা ৱাফম অসি লুচিংবা খুদিংমক্কী থৌদাং ওইগদবনি হায়না পল্লদুনা উপ রাস্ত্রপতিনা মহাক মশামক লৈবাক শিনবা থুংনা চত্তুনা নহাশিংগা উনদুনা মখোয়বু পুক্নিং থৌগৎলি অমদি নহা ওইরিবা মীওইশিংদগী অনৌবা ৱাখল্লোনশিংসু লৌরি হায়না হায়খি‍।

হৌজিক লৈরিবা লাইচৎ মনুংসিদা সাইন্তিফিক কম্ম্যুনিতীনা পুথোরক্লিবা ইনোভেসন কয়াসিদা হরাওবা ফোঙদোক্লদুনা, ভারত লাইচৎ অসি হৌরকপগী মতমদা পি.পি.ই. পুথোকপগী মঙম অমত্তা লৈরমদ্রবসু হৌজিক্তি মালেমদা পি.পি.ই. খ্বাইদগী য়াম্না পুথোকপা অনিসুবা লৈবাক ওইরে হায়না উপ রাস্ত্রপতিনা হায়খি‍। হায়রিবা মায় পাকপগী ৱারী অসি অতোপ্পা হীরমশিংদসু মতৌ তমদুনা ঙাকশেল অমদি তরংগী তেক্নোলোজীশিংগী হীরমদা ভারতপু মরোমদোম লেপচবা ঙমবা লৈবাক ওইহন্নবগীদমক মপুন্সি চুপ্পা কত্থোক্লমখিবা দোক্তর কলামগী মঙলানসু ওইরিবা তশেং তশেংবা ‘আত্মনিরভর ভারত’ অমা শেম্নবগীদমক্তা হোৎনবা মথৌ তাই হায়না উপ রাস্ত্রপতিনা ফোঙদোকখি‍।

দোক্তর কলাম্না আই.আই.এম. সিলোংদা পীখিবা মহাক্কী ইকোন কোনবা ৱারোলদা অকোয়বগী ফীভমগী মতাঙদা নুংনাংবা ফোঙদোক্লমখিবা মহাক্কী ৱাহৈশিং ঐখোয় নীংশিংশি‍। ঐখোয়গী সোলার সিস্তেমসিদা ঐখোয়না হিংবা য়াবা গ্রহ অমখক্তনি অদুগা মালেম অসিবু ঙাক্তুনা ঐখোয়গী তুংগী মীরোলগীদমক হিংবা য়াবা গ্রহ অমা থম্বিরমবা হায়বসি ঐখোয়গী থৌদাংনি হায়না মহাক্না হন্না হন্না ফোঙদোকখি‍। ঐখোয়না চাউখৎপগী লমজেলদা মীৎ তাংবগুম্না থাংজিল্লিবা খোঙথাঙশিং অসিনা মহৌশাদা শোকহল্লিবশিংগী মতাঙদা মহাক্না মীওইবা খুন্নাইগী মফমদা চেকশিনৱা ফোঙদোক্লমখি‍।

দোক্তর কলামগী মুৎনাইররোইদবা পাউতাক ইন্দুনা তুং কোইগদবা অমদি মহৌশাগী অকোয়বগী ফীভমগা চুনবা চাউখৎ লম্বীদা চৎপা মতম ওইরে হায়না উপ রাস্ত্রপতিনা হায়খি‍। “ঐখোয়গী সাইন্তিস্তশিং অমদি ইঞ্জিনিয়রশিংনা ইনর্জী য়াম্না চঙদবা, তরু তরুবা অমদি পু-থাংবা ঙমগদবা অনৌবা মওংগী তেক্নোলোজিগী পাম্বৈশিং পুথোক্নবা হোৎনবা মথৌ তাই,” হায়না মহাক্না মখা তাখি‍।

মহাক্না দোক্তর পিল্লাইবু মচল শুরবা লাইরিক অসি পুথোকপিরকপগীদমক্তা থাগৎখি অমদি অতৈ কয়ানসু মখোয়না দোক্তর কলামগা লোয়ননা থেংনহৌবা ৱাফমশিং তাকপা অসিগুম্বা লাইরিক কয়া পুথোরক্তুনা মহাক্না মতম পুম্নমক্তা লৈবাকসিগীদমক্তা কমদৌনা খঞ্জরমবগে হায়বসু হৌজিক্কী মীরোলসিদা তাক্লকখিগনি হায়না থাজবা ফোঙদোকখি‍।

লাইরিক অদুগী অইবা দোক্তর এ সিবথানু পিল্লাই, আই.এস.আর.ও. প্রোফেসর দোক্তর ৱাই.এস. রাজন, পেন্তাগোন প্রেসকী এম.দি. অমদি সি.ই.ও. শ্রী রাজন আর্য়া য়াওনা মীওই কয়ানা ভর্চুএল থৌরমদুদা শরুক য়াখি‍।

মপুং ফাবা ৱারোল মখাদা পীরি –

“নুংশিরবা ইচিল ইনাউশিং,

“অব্দুল কলামগী লোয়ননা চহী ৪০ – লিথোকখিদ্রিবা ৱারীশিং” হায়না মিংথোনবা মহাক্কা মতম শাংনা লোয়নরমবা দোক্তর সিবথানু পিল্লাইনা ইবা লাইরিক অসি ফোঙবগী থৌরমসুদা অদোম পুম্নমক্কা লোয়নবা অসিদা নুংঙাইবা ফাওই‍।

দোক্তর কলাম তশেং তশেংবা থবক্কী মীশক অমনি অমদি ভারত মচা খুদিংমক্কী পুক্নিং থৌগৎনিংঙাইনি‍। ভারত মচা পুম্নমক, মরুওইনা মহাশিংবু নুংশিজখিবা মহাক তশেংনমক “মীয়ামগী রাস্ত্রপতি” অমা ওইখি‍। মহাক ইচম চমবা, পুকচেল শেংবা অমদি ৱাখল লৌশিংগী অথোইবা য়ুম্বী অমা ওইরম্মি‍। ভারতকী ঙাকশেল অমদি তরংগী মতিং মপাঙ্গল কনখৎহনবদা মহাক্না লৌরমদা থৌদাং মমল নাইদে‍।

দোক্তর কলাম্না দি.আর.দি.ও.দা লৈরিঙৈ অমদি মতুংদা ভারতকী রাস্ত্রপতি ওইনা লৈরিঙৈ মতমদা ঐনা মহাক্কা ৱারী ৱাতায় শানবগী তাঞ্জা কয়া ফংখি অদুগা মতম পুম্নমক্তা ঐবু মহাক্কী ৱাখল লৌশিং অমদি মীচম মীয়ামগী পুন্সিদা অহোংবা পুরক্নিংবগী পুকচেল শেংলবা অপামবদুনা ঙকহনখি‍।

ঐনা দোক্তর কলামগী মরমদা শ্রী এ.বি. বাজপায়ি জীনা, মখোয়না মথংশিৎনা রাস্ত্রপতি অমদি প্রধান মন্ত্রী ওইরিঙৈ মতমদা, হায়রমবা ৱাফম অমখক পঞ্জনিংই: “দোক্তর কলামবু ভারতকী রাস্ত্রপতি ওইনা থাগৎলবা মতুংদা মহাক্না ফম অদুবু ফজরবা মশক থোকহনখি অমদি মহাক্কী ওইবা পান্দমগী অনৌবা ৱাখল্লোন অমা পুরকখি‍। মফম অমদি ফম্না মীওই অমগী মশক শেমদে‍। মীওই অমগী মশক হায়বসি মহাক্কী মচৎ মওংনা শেমবনি‍। মহাক্কী সংবিধানগী থৌদাং ইকায় খুম্নবগা লোয়ননা মোং হাদনা তৌবগী মথক্তা দোক্তর কলাম্না রাস্ত্রপতি ভৱনবু লৈবাক্কী অচৌবা ৱাফম ওইরিবা মহৈ মশিং, সাইন্স অমসুং তেক্নোলোজী চাওখৎহনবা, খুঙ্গঙ চাওখৎহনবা, অমদি খ্বাসদগী মমল লৈবা লন ওইরিবা ঐখোয়গী অঙাঙশিংবু হীরম খুদিংদা চাওখৎহনবা অসিনচিংবা মহাক্না নীংজরিবা ৱাফমশিংগী থবক পায়খৎফম ওন্থোকখি‍। মফমদুদগী মহাক্না ভারতপু চাওখৎলবা লৈবাক অমা ওইহন্নবগী মঙলান পরিংদা থবক তৌখি‍।”

রাস্ত্রপতি ওইনা দোক্তর কলাম্না ইকায় খুম্নবা অমদি অফবা ৱাখল খনবা হায়বসি ভারত পুম্বদা অমদি মপান লৈবাকশিংদা মশক থোকহল্লম্মি অমদু মহাকপু মরুপ মপাং ওইবা অমদি ৱাখল লৌশিংবু খ্বাইদগী কন্না য়োকখৎলমবা মীওই অমা ওইনা লৌনখি‍। মহাক্না লৌরমবা থৌদাংশিং শকখঙদুনা নাসানা ইন্তরনেসনেল স্পেস স্তেসনদা নৌনা থেংনখিবা ওর্গানিজম অমবু ইং ২০১৭দা দোক্তর কলামগী মমীং লৌদুনা মমীং থোনখি‍।

রাস্ত্রপতি ভৱনদা দোক্তর কলাম্না লৈকোলদা বাইও-দাইভর্সিতী পুক্নিং থৌগৎখি, হিদাক পাম্বীশিং য়োকখৎখি অমদি হর্বল অমসুং স্পিরিচুএলগী লৈকোল অমা শেমগত্তুনা মীওই লীশিং কয়া, মরুওইনা মহৈ তম্লিবা অঙাঙ কয়াগী পুক্নিং চিংশিনখি‍।

হান্নগী রাস্ত্রপতি অসিনা লৈবাকসিগী পাক চাউরবা মহৌশাগী মচাক মথুমশিং অমদি তোঙান তোঙানবা লমশিংদা হৈথোই শিংথোইরবা মীওইশিংগী ফীভম য়েংলগা ভারতনা চাউখৎলবা লৈবাক অমা ওইবগী তঙাই ফদবা মতম পুম্নমক্তা ফোঙদোকখি‍। তেল্লবা মতমদা ভারতনা চাউখৎলবা লৈবাক অমা ওইনবগী মতিক অমদি মতিং লৈ হায়না মহাক্না থাজখি‍।

তশেংবদি, দোক্তর কলাম্না স্তেত খুদিংমক্কী মঙলান দিস্প্লে চার্ত ওইনা শেম্লমখি‍। মহাক্না এম.পি.শিং রাস্ত্রপতি ভৱনদা কৌদুনা মখোয়গী স্তেতশিংগী মমল, নুংগী ওইবা মতিং অমদি চাওখৎ থৌরাংশিংগী মতাঙদা তাকখি‍। মহাক্না খ্বাইদগী পামজখিবদি স্কুল অমদি কলেজকী মহৈরোয়শিংবু লৈবাক শেমগৎনবগী থৌওংশিং পামজনা পায়খৎনবা পুক্নিং থৌগৎপনা ওইখি‍।

লৈবাকসিগী ময়ায় ওইবা চহী ৩০দগী তাবা ওইদুনা ভারতনা মালেমগী খ্বাইদগী নহা ওইবা লৈবাক ওইরি‍। হায়রিবা নহাগী মতিং অসিবু লৈবাক শেমগৎপদা মায় ওনশিনহনগদবনি‍। হন্দক্তা নৌনা হৌদোকখিবা নিউ এজুকেসন পোলিসী অসি অচুম্বা মায়কৈদা থাংজিনবা খোঙথাং অমনি অদুগা মসিনা ভারতবু মশাগী মহৈরোয়শিংবু ২১শুবা চহিচাগী মথৌ তাবশিং ফংবা ঙম্নবগীদমক্তা তাকপি তম্বিগনি হায়না ঐনা থাজৈ‍।

দোক্তর কলাম্না পামজনা হায়রমবা অতোপ্পা ৱাফম অমনা খুঙ্গঙ অমসুং ময়োল্লমশিংগী মরক্তা লৈরিবা খেন্নবা শমজিন্নবা অসিনি‍। মহাক্কী পি.য়ু.আর.এ. মোদেল – প্রোভাইদিং অর্বান এমেনিতিজ ইন রুরেল এরিয়াজ – অসিনা ঐখোয়গী শেন্মিৎলোন চাওখৎনবগী লম্বী থোং ফগৎহনবা অমদি খুলশিংগী ক্লস্তর শেমগৎপগী মথৌ তাবা ৱাফম ফোঙদোক্লি‍। হান্নগী প্রধান মন্ত্রী শ্রী অতল বিহারি বাজপায়িগী মতমদা হৌদোক্লমবা প্রধান মন্ত্রী গ্রাম সরক য়োজনা অমসুং হৌজিক্কী প্রধান মন্ত্রী শ্রী নরেন্দ্র মোদীগী লুচিং মখাদা পায়খৎওইবা ভারত নেত প্রোজেক্ত ঐখোয়গী খুঙ্গঙশিংবু মেনস্ত্রীমগা শম্নহন্নবা পান্দম থম্লিবা মীৎয়েং শানবা থৌরাং অনিনি‍।

কোবিদ-১৯ লাইচৎনা মরম ওইরগা লংফৈদা লৈবা শিন্মীশিং পাক্তক্ননা লাঞ্জেন্নবগী অৱাবা অসিনা খুঙ্গঙ অমদি অপীকপা ময়োল্লমশিংদা থবক্কী অমদি শেন্মিৎলোনগী খুদোংচাবশিং শেমগৎপগী তঙাই ফদবা ৱাফম ঐখোয়দা নীংশিংহল্লে‍। মসিগীদমক্তা ঐখোয়না ঐখোয়গী খুঙ্গঙশিং অমদি ময়োল্লমশিং চাউখৎপগী মফম ওইরক্নবগীদমক্তা ঐখোয়না থৌরাং য়াৎপগী থবক চাইথোকহন্নবা, লোকেল বোদীশিংগী মতিং হেনগৎহন্নবা অমদি কোত্তেজ ইন্দস্ত্রীশিং পাক্তক্ননা য়োকখৎপদা মীৎয়েঙ চঙবা মথৌ তাগনি‍।

দোক্তর কলাম্না ভারত মচাশিংগী পুক্নিংদা মীয়ামগী রাস্ত্রপতি ওইনা তোপ তোপ্পা মফম অমা কনখি‍। মহাক ৱাখল চেৎপা মরৈবাক নীংবা, পুক্নিং থৌগৎপা ঙম্বা ৱাঙাঙলোয় অমদি মমিং লৈবা অইবা অমা ওইরম্মি‍। মহাকপু পুক্নিং থৌগিৎনিংঙাই ওইরবা অমদি মীয়াম্না নুংশিনবা লুচিংবা অমা ওইহল্লিবসি মীওই কয়াগী পুন্সিদা মমি তাখিবা কলামগী মীওইবগী মচৎ অদুননি‍।

সাইন্স অমসুং তেক্নোলোজিগী মপুং ওইবা পান্দমদি মীওইবগী পুন্সিবু হেন্না মশক থোকহনবনি হায়না ঐনা থাজৈ‍। নোংমা মহাক্না হায়দরবাদতা লৈবা নিম্সদা চৎপা মতমদা পোলিও নাবা অঙাঙশিংনা শউন, উ অমসুং স্তীলনা শাবা অরুমবা কেলিপরশিংগা লোয়ননা ৱানা চৎপা উবদা দোক্তর কলামগী পুক্নিং ৱাহনখি‍। মঙোন্দা য়াওরিবা স্পেস সাইন্তিস্ত অদুনা রোকেত শাবদা শীজিন্নবা কম্পোজিত মেতরিএলশিং শীজিন্নদুনা কেলিপরগী অরুমবা কিলোগ্রাম ৩দগী গ্রাম ৩০০দা হন্থহনবা ঙমগনি হায়বা মহাক্না খঙখি‍।

তুংদা দোক্তর কলাম্না হায়খি, “ঐখোয়না মওং মতৌ পুথোক্তুনা শাবা খুৎশেমগী খোঙশিংগা লোয়ননা অঙাঙশিংনা চেন-চোংবা শান্নবা অমদা সাইকল থৌবা উবদা ঐনা তশেংনা পেঞ্জখি‍।”

মসিদসু নত্তনা মহাক্না কার্দিওলোজিস্ত সোমা রাজুগা লোয়ননা থবক তৌমিন্নদুনা ‘কলাম-রাজু স্তেন্ত’ কৌবা মমল হোঙবা কোরোনরী স্তেন্ত অমা শেমখি‍। মহাক্না মতম পুক্নমক্তা ঙাকশেল অমসুং তরংগী তেক্নোলোজীগী থৈদোরকপা মচাকশিংনা খুন্নাইদা কান্নবা পীবা পামখি‍।

হৌজিক লৈরিবা লাইচৎ মনুংসিদা সাইন্তিফিক কম্ম্যুনিতীনা পুথোরক্লিবা ইনোভেসন কয়াসিনা ঐবু হরাওহল্লি‍। ভারত লাইচৎ অসি হৌরকপগী মতমদা পি.পি.ই. পুথোকপগী মঙম অমত্তা লৈরমদ্রবসু হৌজিক্তি মালেমদা পি.পি.ই. খ্বাইদগী য়াম্না পুথোকপা অনিসুবা লৈবাক ওইরে‍। শিংনবা কয়া লৈখি, অদুম ওইনমক লৈঙাক, লল্লোন ইতিকশিং অমদি অতৈ স্তেকহোল্দরশিংনা ইচঙ থৌনা হোৎনবনা ঙসিদি নোংমদা পি.পি.ই. কিত লাখ ৫গী মথক্তা পুথোকপা ঙম্লে‍। ঙসিদি ঐখোয় লৈবাক কয়াদা পোৎ থাদোকপা ঙমবগী ফীভমদা লৈরে‍।

তশেং তশেংবা ‘আত্মনিরভর ভারত’ অমা ওইহন্নবগীদমক হায়রিবা মায় পাকপগী ৱারী অসি অতোপ্পা হীরমশিংদসু মতৌ তমবা মথৌ তাই‍। মসি দোক্তর কলামগী মঙলান্নি অমদি মহাক্না মহাক্কী মপুন্সি চুপ্পা ঙাকশেল অমদি তরংগী তেক্নোলোজীগী লমদা মরোমদোম লেপচবা ঙমবা ভারত ওইহন্নবা কত্থোকখি‍।

অসুম্না মহাক্না অকোয়বগী ফীভমগী মতাঙদসু নুংনাংখি‍। ঐখোয়গী সোলার সিস্তেম অসিদা ঐখোয়না হিংবা য়াবা গ্রহ অমখক্তনি হায়না মহাক্না হন্না হন্না হায়রম্মি‍। মালেম অসিবু ঙাকথোক্তুনা ঐখোয়গী তুংগী মীরোলগীদমক হিংবা য়াবা গ্রহ অমা থম্লমবা অসি ঐখোয়গী থৌদাংনি‍। মহাক্কী পুন্সিগী অরোইবা নুমিত্তসু, আই.আই.এম., সিলোংদা “ক্রিএতিং এ লিভেবল আর্থ” হায়বা হীরমদা ৱা ঙাঙবা মতমদা, চাওখৎ লমজেলদা ঐখোয়না মীৎ তাঙবগুম্না থাংজিল্লিবা খোঙথাংসিনা মহৌশাগী ফীভমদা ঐখোয়না মাঙ তাকহল্লিবা অসিগী মতাঙদা মহাক্না মীওইবা খুন্নাইগী মফমদা চেকশিনৱা থম্লমখি‍।

দোক্তর কলামগী মুৎনাইররোইদবা পাউতাক ইন্দুনা তুং কোইগদবা অমদি মহৌশাগী অকোয়বগী ফীভমগা চুনবা চাউখৎ লম্বীদা চৎপা মতম ওইরে‍। ঐখোয়গী সাইন্তিস্তশিং অমদি ইঞ্জিনিয়রশিংনা ইনর্জী য়াম্না চঙদবা, তরু তরুবা অমদি পু-থাংবা ঙমগদবা অনৌবা মওংগী তেক্নোলোজিগী পাম্বৈশিং পুথোক্নবা হোৎনবা মথৌ তাই‍।

দোক্তর পিল্লাইনা ‘অব্দুল কলামগা লোয়ননা চহী ৪০ – লিথোকখিদ্রিবা ৱারীশিং’ হায়না মিংথোনবা লাইরিক লাইরিক অসিদা দোক্তর কলামগী পুন্সিগী হকথেংনবা মশক অমা পীবসিদা ঐঙোন্দা নুংঙাইবা ফাওই‍।

দোক্তর কলামগী পুন্সিনা ৱাখল পরিং চুম্লবদি খুদোংথিবা অমদি নীংহন্ননিংঙাই ওইবা ৱাফমশিংনা মীওইবগী লমচৎ অমদি পুক্নিংবু মপাঙ্গল কলহন্নবা মরুওইবা মচাকশিং ওইহনবা ঙম্মী হায়বা মতিং লৈরবা পাউজেল অমা পীরি‍। ঙসিগী মীরোলনা মহাক্কী মফমদগী তমজদুনা মপাঙ্গল কনবা, মরোমদোম লেপচবা অমদু পুম্নমক কোনশিল্লবা ভারত অমা শেমগৎনবগীদমক কত্থোকপগা লোয়ননা থবক তৌগদবনি‍।

ভারতকী মীয়ামগী য়াম্লবা শরুক অমদা চৈথেং পীরিবা তোঙান তোঙানবা শেন্মিৎলোন অমদি খুন্নাইগী শিংনবশিংগী পাম্বৈ পুথোক্নবগীদমক নহাশিংনা দোক্তর কলামগুম্না হান্না লৈনরিবা ৱাখল্লোনগী ৱাংমদা ৱাখল খন্দুনা তোক্নোলোজী শীজিন্নগদবনি‍।

লৈবাক অমা ওইনা মরুওইবা ইন্দস্ত্রীশিংদা মরোমদোম লেপচবা ঙমবা হায়বসি মরুওইবা ৱাফম অমসুনি‍। লাইরিক অসিনা কমদৌনা ইন্দস্ত্রিএল সেক্তরদা আত্মনিরভর ভারত ফংবা ঙমগদগে হায়বা ৱাফমসু তাক্লি‍।

ভারতকী হান্নগী রাস্ত্রপতি, লৈখিদ্রবা শ্রী প্রনাব মুখর্জীনা লাইরিক অসিগী ৱামাঙ য়ানবা ৱারোল ইরম্মি খঙবদা হেন্না নুংঙাইহল্লি‍। ভারতকী সুপরসোনিক ক্রুজ মিসাইল প্রোগ্রাম – ব্রহ্মোসগী অর্কিতেক্ত অমা ওইনা দোক্তর পিল্লাই মশামকসু ভারতকী ঙাকশেল অমসুং এরোস্পেসকী মঙমদা থৌদাং চাউনা লৌরি‍। মহাক্কী তুংগী থবক থৌরমশিংদা খ্বাইদগী অফবা পীনবিসনু হায়না ঐনা য়াইফ-পাউজেল পীজরি‍।

ময়ামবু থাগৎচরি‍।

জয় হিন্দ!”

*****



(Release ID: 1678006) Visitor Counter : 3