সমগ্ৰ দেশজুৰি অহা ৭ ডিচেম্বৰত সশস্ত্র বাহিনীৰ পতাকা দিৱস উদযাপন কৰা হব। দেশৰ সম্মান ৰক্ষাৰ্থে সীমান্তত যিসকল সেনাই সাহসেৰে যুঁজ দি শ্বহীদ হৈছে তেওঁলোকক স্মৰণাৰ্থে ১৯৪৯ চনৰ পৰা প্রতিবছৰে এই দিনটো উদযাপন কৰি অহা হৈছে। আজি নতুন দিল্লীত সশস্ত্র বাহিনীৰ ফ্লেগ পিনিং" অনুষ্ঠানত অংশ লৈ প্রতিৰক্ষা মন্ত্রী ৰাজনাথ সিঙে দেশবাসীক স্বেচ্ছানুসৰি সশস্ত্র বাহিনী অর্থাৎ এএফএফডিৰ-পুঁজিলৈ দান দিয়াৰ আহ্বান জনায়। তেওঁ কয়, দেশৰ সার্বভৌমত্ব ৰক্ষাৰ বাবে সশস্ত্র বাহিনীয়ে সদায়ে বীৰত্বৰ সৈতে যুঁজ দি আহিছে। বহু ক্ষেত্রত তেওঁলোকে তেওঁলোকৰ পৰিয়ালৰ কথা পাহৰি গৈ দেশৰ স্বার্থত যুদ্ধ কৰি জীৱন বলিদান দিছে। দেশৰ প্রাক্তন সেনাসকলৰ পুনৰসংস্থাপন আৰু কল্যাণৰ বাবে দেশৰ নাগৰিকসকলৰ কর্তব্যৰ কথা সোঁৱৰাই দি প্রতিৰক্ষা মন্ত্রীয়ে কয়, এএফএফডি নিধিলৈ দান দি শ্বহীদসকলৰ প্রতি দায়িত্ব পালনৰ এক সুযোগ দিয়ে পতাকা দিৱসে। প্রতিৰক্ষা মন্ত্রীয়ে কয়, ২০১৯-২০ বিত্তীয় বৰ্ষত দেশৰ নাগৰিকসকলৰ স্বেচ্ছা অনুসৰি কৰা দানৰ ফলত এএফএফডি পুঁজিত মুঠ ৪৭ কোটি টাকা জমা হৈছিল। তেওঁ আশা প্ৰকাশ কৰে যে এই বছৰতো দেশৰ নাগৰিকসকলে একেই মনোভাৱ প্রদৰ্শন কৰিব।

প্রতিৰক্ষা মন্ত্রীয়ে কয়, এই এএফএফডি পুঁজিৰ ধন শ্বহীদ সেনাসকলৰ পৰিয়ালৰ পুনৰ সংস্থাপন আৰু কল্যাণত ব্যৱহাৰ হয়। ইয়াৰ উপৰি এই ধন সেনাসকলৰ পৰিয়ালৰ লৰা-ছোৱালীৰ পঢ়া-শুনাৰ পৰা আৰম্ভ কৰি চিকিৎসা, বিধৱাসকলৰ ভৰণ-পোষণ, কন্যাৰ বিবাহ নাইবা বিভিন্ন ক্ষেত্রত ব্যৱহাৰ কৰা হয়।

সশস্ত্র বাহিনীৰ পতাকা দিৱসত যি পুঁজি গঠন কৰা হৈছে তাৰ পৰা এই পর্যন্ত ৩২লাখ প্রাক্তন সেনা কর্মীয়ে সুযোগ লাভ কৰিছে। প্রতি বছৰে ৬০ হাজাৰকৈ প্রাক্তন সেনা কর্মী এই ব্যৱস্থাৰ সৈতে জড়িত হৈ পৰে বুলি জনায় প্রতিৰক্ষা মন্ত্রীয়ে।

সশস্ত্র বাহিনীৰ কল্যাণৰ অৰ্থে এই পুঁজিলৈ বেংক একাউন্টৰ জৰিয়তে ধন পঠিয়াব পাৰি। পঞ্জাৱ নেশ্যনেল বেংকৰ একাউন্ট নম্বৰ-৩০৮৩০০০১০০১৭৯৮৭৫, আইএফএছচি কোড-পিইউএনবি-৩০৮৩০০, সেৱা ভৱন, আৰ কে পুৰম শাখা। ইয়াৰ উপৰি ষ্টেট বেংক অৱ ইণ্ডিয়াৰ একাউন্ট নম্বৰ-৩৪৪২০৪০০৬২৩, আইএফএছচি কোড-এছবিআইএন-০০০১০৭৬, আৰ কে পুৰম শাখা। নাইবা আইচিআইচিআই বেংকৰ একাউন্ট নম্বৰ-১৮২৪০১০০১৩৮০, আইএফএছচি কোড- আইচিআইচি০০০১৮২৪, আৰ কে পুৰম শাখা।

 *******************************************************

ABB/Nampi/KA/Rajib /KG