কোবিদ-১৯ লাইচৎ মনুংদা লৈবাক অসিগী মশাগী মীওইশিং চেকশিন-থৌরাং লৌখৎনবা হোৎনবদা খুদোংচাদবা কয়া মায়োক্নরবসু অতোপ্পগী মতেং দরকার ওইবা লৈবাকশিংদা ভারতনা মতেং পাংবগীদমক ভারতকী উপ-রাস্ত্রপতি শ্রী এম.ভেনকিয়া নাইদুনা হরাওবা ফোঙদোকখ্রে। মহাক্না হায়খি অসিগুম্বা অৱাবা তারবা মতম অসিদা, ঐখোয়গী ইন্দস্ত্রিনা পুথোকপা হিদাক-লাংথকশিং য়াওনা পোৎলম কয়া মতেং দরকার ওইবা লৈবাকশিংদা পীনবা ভারতনা কাউথোক্তে।

ভর্চুএল ওইনা ইন্দিয়ান কাউন্সিল ওফ ৱার্ল্দ এফেয়ার্স(আই সি দব্লিউ এ)গী গভর্নিং কাউন্সিলগী ১৮সুবা মীফমদা উপ-রাস্ত্রপতিনা ৱা ঙাংখি। কাউন্সিল অসিগী প্রসিদেন্ত অমা ওইনা মহাক্কী হৌদোকপগী ৱারোলদা শ্রী নাইদুনা হায়খি কোরোনাভাইরসকী মায়োক্তা শোক্নরিবা মালেমগী লান্দা ভারতনা মাংজিল থারি। তিকা অমা পুথোক্নবা থিজিনবগী থবক্তসু ঐখোয়না মাংজিল য়ারি অমসুং অথুবদা নুংঙাইবা পাউ তারগনি।

উপ-রাস্ত্রপতিনা হায়খি মালেমগী লৈবাকশিংগা লৈনবা মরীশিং অমসুং মপান লৈবাকশিংগী থৌশিল অসি লাইচৎ মনুংদা ভারতকী মীচম মীয়ামগী পুন্সিদা চুনবা ওইনবা অমুক হন্না য়েংশিল্লে। মপান লৈবাকশিংদা থবক তৌদুনা লৈবা ভারতমচাশিং বন্দে ভারত মিসন্না মখোয়গী ময়ুমদা হল্লকপা ঙমহল্লে অমসুং মসিগী অচৌবা থবক অসি য়াম্না হৈশিংনা পাংথোকপগীদমক মরী লৈনবা দিপার্তমেন্তশিং অমসুং এজেন্সিশিং থাগৎলি।

অসিগুম্বা মীয়ামগী য়াইফনবা থবকশিং মখা তানা পাংথোক্নবা অমসুং লৈবাক অসিগী কান্নবা ফংদ্রিবা মীওইশিং য়ৌনবা থবক পাংথোক্নবা মহাক্না আই.সি.দব্লিউ.এদা তকশিনখি।

কোবিদ-১৯ লাইচৎনা শোকহন্দনবা লৈবাক অমত্তা লৈত্রিবা অসিগী মতাংদা মহাক্না হায়খি লাইচৎ অসিনা তোঙান-তোঙানবা মওংদা খুন্নাইশিং অমসুং শেন্মিৎলোনশিংদা চৈথেং পীরে। লাইচৎ অসিনা লৈবাক কয়াদা খ্বাইদগী ফবশিং অমসুং ফত্তবশিং মায়োক্নরে। লৈবাক অয়াম্বনা মতেং পাংনবগী থৌনা অমা ফাওরক্লবা মতম অসিদা লৈবাক খরনা মশাগীতা খনবা অখুবা মিৎয়েংদা লৈনুংদা অমুক চঙখ্রে।

শ্রী নাইদুনা হায়খি লাইচৎ অসিনা লমদম অসিদা অমসুং মালেমগী ওইরিবা ফিবম অমসুং মসিনা মালেমগী লৈবাকশিংগী মরীশিংদা পীরিবা চৈথেং থিজিল্লি অমসুং নৈনরি।হায়রিবা অচৌবা অহোঙবশিং অমসুং হৌখিবা থা ৮ অসিদা লাকখিবা অহোঙবশিং অসিনা কাউন্সিলগী থিজিনবগী থবকশিংদা অনৌবা মাইওন অমা পীরে।

লাইচৎ মনুংদা কাউন্সিলনা দিজিতেল প্লেতফোর্মশিং শীজিন্নবগীদমক উপ-রাস্ত্রপতিনা হরাওবা ফোঙদোকখি অমসুং লৈবাক মনুংগী অমসুং মালেমগী সেমিনারশিং অমসুং কনফরেন্সশিং, মপান লৈবাকশিংগী ত্রেক ২ দাইলোগ, মালেমগী মীফমশিং, ভারত অমসুং মালেমগী লৈবাকশিংগা ভারতকা ভর্চুএল এম.ও.য়ুশিং খুৎয়েক পীনবা য়াওনা ওনলাইন থৌরম ৫০ হেন্না পাংথোকখ্রে। মসিনা কাউন্সিল অসি ভারতকী মপান লৈবাকশিংগী থবক-থৌরমশিংগী মাংজিল থাবা থিং তেঙ্ক অমা ওইবগী ফিবম ফগৎহনবা ঙম্লগনি।

হৌখিবা চহিদা নেসনেল কন্সলতেসন্স ওন অফ্রিকা মনুংদা মহাক্না পীখিবা পাউতাক মতুংইন্না হন্দক অফ্রিকা লৈবাকশিংগী থৌশিল শেম্বা মীওইশিং অমসুং অখঙ-অহৈশিং য়াওনা ভর্চুএল ওইনা নুমিৎ নিনিগী মীফম পাংথোকপদা মহাক্না অপেনবা ফোঙদোকখি। কাউন্সিল অসিনা মসিগী থবকশিংগী খুৎথাংদা অখঙ-অহৈশিং অমসুং মীয়াম ৱাখল তাবা হেনগৎহনবগীদমক মহাক্না কাউন্সিল থাগৎখি অমসুং কাউন্সিলদা মতেং পাংবগীদমক মপান থৌরম মন্ত্রলয় থাগৎখি।

ভারতকী য়ুনিভর্সিতিশিংদা মালেমগী লৈবাকশিংগা লৈনবা মরীশিং থিজিনবা হেনগৎহন্নবা অমসুং নৌনা মিৎয়েং চঙনবা মীফম অদুদা এক্সতর্নেল এফেয়ার্স মিনিস্তর অমসুং আই.সি.দব্লিউ.এগী ভাইস প্রসিদেন্ত দোক্তর এস জয়সঙ্করনা তকশিনখি। মহাক্না হায়খি মালেমগী থৌদোক ৱাথোকশিং অমসুং মপান লৈবাক্কী থৌশিল খঙনবা খক নত্তনা অফবা থৌশিল শেম্নবা তোঙান-তোঙানবা লৈবাকশিংগী খুন্নাই, রাজনিতি, শেন-থুম, পুৱারি অমসুং কলচরগী লমদা ভারতকী অখঙ-অহৈশিংনা থিজিনবা হেনগৎহনগদবনি। নিতি অয়োগকী ভি.সি অমসুং আই.সি.দব্লিউ.এগী ভাইস প্রসিদেন্ত দোক্তর রজিব কুমারনা মিনিস্তরগী ৱাফম য়াখি অমসুং নিতি অয়োগ, এক্সতর্নেল এফেয়ার্স মিনিস্ত্রি, ইজুকেসন মিনিস্ত্রি, য়ু.জি.সি য়াওনা মরী লৈনবশিংগী মীফম অমা কাউন্সিলনা পাংথোক্নবা অমসুং জি.বি/জি.সিগী অখন্নবা মীফম অমদা রিপোর্ত পীনবা পীখৎনবা পাউতাক পীখি। উপ-রাস্ত্রপতিনা ৱাফম অদু অয়াবা পীখি অমসুং থবক ওইনা পাংথোক্না আই.সি.দব্লিউ.এদা খঙহনখ্রে।

মীফম অসি শ্রী নাইদুনা আই.সি.দব্লিউ.এগী প্রসিদেন্ত ওইনা কাউন্সিলগী অহুমসুবা মীফম্নি। মসিগী মমাংদা মহাক্না লুচিংদুনা আই.সি.দব্লিউ.এগী গভর্নিং কাউন্সিলগী ১৯সুবা মীফম পাংথোকখ্রে।

ভর্চুএল ওইনা পাংথোকখিবা মীফম অদুদা কাউন্সিলগী ভাইস প্রসিদেন্ত অহুম-এক্সতর্নেল এফেয়ার্স মিনিস্তর দোক্তর এস জয়সঙ্কর, স্তেন্দিং কমিতি ওন এক্সতর্নেল এফেয়ার্সকী চিয়রমেন পি.পি চৌধুরি অমসুং নিতি অয়োগকী ভাইস চিয়রমেন দোক্তর রজিব কুমার শরুক য়াখি। উপ-রাস্ত্রপতিগী সেক্রেতরি আই.ভি সুভরাও, আই.সি.দব্লিউ.এগী দি.জি দোক্তর তি.সি.এ রগবান অমসুং পর্লিয়ামেন্তগী মেম্বরশিং য়াওনা গভর্নিং কাউন্সিলগী মেম্বরশিংসু মীফম  অদুদা শরুক য়াখি।

****