ঙসি ইনফোর্মেসন অমসুং ব্রোদকাস্তিংগী য়ুনিয়ন মিনিস্তর শ্রী প্রকাস জাবরেকারনা সিবিল এভিএসন অমসুং হাওসিং অমসুং অর্বান এফেয়ার্সকী য়ুনিয়ন মিনিস্তর শ্রী হরদিপ সিংহ পুরিগা লোয়ন্না ‘প্রধান মন্ত্রী মোদী অমসুং সিখশিংগা মহাক্কী সরকারগা লৈনবা অখন্নবা মরী’ হায়না মমিং থোনবা লাইরিক অমা ফোঙখ্রে। লাইরিক অসি হিন্দি, পঞ্জাবী অমসুং ইংলিস লোনশিংদা ফোঙখি।

থৌরম অদুদা লাইরিক অসি পুথোকপগীদমক শ্রী হরদিপ সিংহ পুরিনা শ্রী জাবরেকার অমসুং ইনফোর্মেসন অমসুং ব্রোদকাস্তিং মিনিস্ত্রি থাগৎখি। ঙসি ফোঙখিবা লাইরিক অদুদা য়াওরিবা শ্রী গুরু নানক দেব জিগী চহি ৫৫০সুবা মপোক কুমওন থৌরম পাংথোক্নবগীদমক চহি অমগী মমাংদা লৌখিবা শিংথানিংঙাই ওইরবা ৱারেপশিং অদু শ্রী পুরিনা পাথোকখি।

ৱারেপশিং অদুগী মতাংদা মিনিস্তরনা হায়খি য়ুনাইতেদ কিংদমগী য়ুনিভর্সিতি অমদা অমসুং কনাদাদা গুরু নানক দেব জিগী পাউতাকশিংগী চিয়র অমা লিংখৎনবা ৱারেপ লৌখি অমসুং মসি কনাদাদা লিংখৎনবা ৱারি শানবা মখা চৎথরি। লৌখিবা ৱারেপ খুদিংমক অপীবা মতমগী মনুংদা থবক ওইনা পাংথোক্লে। খ্বাইদগী পীকপা থবকশিং মশামক্না য়েংশিনবগীদমক অমসুং মশামক্না কারতারপুর কোরিদোরদা অহানবা জাতথা লমথাবগীদমক মহাক্না প্রধান মন্ত্রী থাগৎখি।

অতোপ্পা মরুওইবা ৱারেপশিংগী মনুংদা য়াওরিবা লঙ্গরশিংদা তেক্স লৌদনবা ৱারেপ, শ্রী হরমান্দির সাহিব এফ.সি.আর.এ রেজিস্তার তৌবা, মালেমগী ওইনা সঙ্গাত শরুক য়ানবা অয়াবা পীবা, সিখ মীয়াম্না পাম্বা মতুংইন্না ‘ব্লেকলিস্ত’ হন্না য়েংশিনবগী ৱাফম মিনিস্তরনা ফোঙদোকখি।

তুংকোইনা চৎনগদবা চাউখৎ-থৌরাংগী থবকশিং অমসুং নুপীশিংদা শক্তি পীবগী মতাংদা গুরু নানক দেব জিগী পাউতাকশিংদা কেন্দ্র সরকারনা পীরিবা থাজবশিং অমুক হন্না পল্লদুনা মিনিস্তরনা হায়খি সরকারগী পান্দমদা গুরু মহারাজগী পাউতাকশিং য়াওরে।

থৌরম অদুদা ইনফোর্মেসন অমসুং ব্রোদকাস্তিং মিনিস্ত্রিগী সেক্রেতরি, শ্রী অমিত খারেসু শরুক য়াখি। ইনফোর্মেসন অমসুং ব্রোদকাস্তিং মিনিস্ত্রিগী মখাদা লৈবা বিউরো ওফ আউদরিচ কম্মুনিকেসন্না পুথোকপা লাইরিকমচা অদু শ্রী গুরু নানক দেব জিগী মপোক কুমওন থৌরমদা ফোঙখ্রে। 

লাইরিক অদু মসিদা ফংগনি

https://static.pib.gov.in/WriteReadData/userfiles/English.pdf

*****