সাইন্স অমসুং তেক্নোলোজী মন্ত্রালয়

সি.এস.আই.আর.-আই.আই.তি.আর., সি.আই.এস.ও. অমসুং আই.এম.দি.না মীয়ামদা খঙহন্নবগীদমক আই.আই.এস.এফ.-২০২০ য়ুখল হাইদোকপগী থৌরম পাঙথোকখ্রে

ইন্দিয়া ইন্তরনেসনেল সাইন্স ফেস্তিভেল-২০২০দা ভারতকী সাইন্স, তেক্নোলোজী অমসুং ইনোভেসনগী মায়কৈ কয়া লোঙবা মওং মতৌশিং উৎপা থৌরম ৪১ লৈগনি

Posted On: 29 NOV 2020 3:13PM by PIB Imphal

চহীসিদা ভর্চুএল ওইনা পাঙথোক্কদবা ৬শুবা ইন্দিয়া ইন্তরনেসনেল সাইন্স ফেস্তিভেল (আই.আই.এস.এফ.-২০২০)কী মরমদা মীয়ামদা খঙহন্নবগীদমক তোঙান তোঙানবা য়ুখল হাইদোকপগী থৌরমশিং পাঙথোক্লি‍।

সি.এস.আই.আর. – ইন্দিয়ন ইন্সতিত্যুৎ ওফ তোক্সিকোলোজী রিছর্চ, লখনৌদা পাঙথোকপা অসিগুমবা থৌরম অমদা দিপার্তমেন্ত ওফ সাইন্তিফিক এন্দ ইন্দস্ত্রিএল রিছর্চ (দি.এস.আই.আর.) সেক্রেতরী, কাউন্সিল ওফ সাইন্তিফিক এন্দ ইন্দস্ত্রিএল রিছর্চকী দাইরেক্তর জেনেরেল অমসুং স্তিরিং কম্মিতী, আই.আই.এস.এফ. – ২০২০গী চেয়রমেন দোক্তর সেখর সি. মন্দেনা থৌরমসি চহীসিগী খ্বাইদগী খৌরাংনা ঙাইনবা থৌরম অমনি অমসুং কোবিদ-১৯ মালেমগী লাইচৎনা পীরিবা অথিংবা কয়া লৈদুনসু থৌরম অসি পাঙথোক্লিবা অসিনা স্তেকহোল্দরশিংগী মরক্তা লৈরিবা সাইন্তিফিক তেম্পরেমেন্ত য়োকখৎপগী নমথবা ঙমদ্রবা ৱাখল্লোন অদু তাক্লিবনি‍। আই.আই.এস.এফ.-২০২০গী হীরম: “মরোমদোম লেপচবা ভারত অমসুং মালেমগী য়াইফনবগীদমক সাইন্স” হায়রিবা অসিনা আত্মনিরভর ভারত শাগৎনবা অমদি মালেমগী খুদোংচাদবা ৱাফমশিংগী ৱারোইশিন পুরক্নবগীদমক সাইন্স, তেক্নোলোজী অমসুং ইনোভেসনগী থৌদাং নৈননবা পান্দম থম্লি, হায়না মহাক্না হায়খি‍।

উত্তর প্রদেশ লৈঙাক্কী হাইয়র এজুকেসন অমসুং সাইন্স অমদি তেক্নোলোজীগী রাজ্য মন্ত্রী শ্রীমতি নীলিমা কতিয়ারনা থৌরমদুগী অথোইবা মীথুং ওইনা শরুক য়াখি অমদি লখনৌগী মেয়র শ্রীমতি সনয়ুক্তা ভাতিয়ানা ইকায় খুম্নবা মীথুং ওইনা শরুক য়াখি‍।

ঙল্লিঙৈদা শরুক য়ারিবশিংবু তরাম্না ওক্লদুনা, সি.এস.আই.আর.-আই.আই.তি.আর.গী দাইরেক্তর দোক্তর সরোজ কে. বারিকনা থৌরম অসি নহা ওইরিবা সাইন্তিস্তশিংনা মালেমগী কান্ননবগীদমক্তা ৱারী ৱাতায় শাননবা, ৱাখল্লোনশিং পুথোক্ননবা অমদি পুনশিন্ননবা তাঞ্জা অমনি হায়না হায়খি‍।

নেসনেল ওর্গনাইজিং সেক্রেতরী শ্রী জয়ন্ত সহাস্রাবুধে অমসুং অৱধ প্রান্ত, বিগ্যান ভারতিগী ওর্গনাইজিং সেক্রেতরী শ্রী শ্রেয়ান্স মন্দলোইসু শরুক য়ারিবশিংগা ওনলাইন্দা ৱারী ৱাতায় শাখি অমদি স্কুল অমসুং কলেজশিংনসু মশিং য়াম্না শরুক য়াদুনা ঐখোয়গী নুংতিগী পুন্সিদা সাইন্স অমসুং তেক্নোলোজীনা লৌরিবা থৌদাংশিংগী মরমদা মমুৎ তানা খঙননবা আই.আই.এস.এফ. ফম্পাক শীজিন্ননবা ৱাফম থমখি‍।

অতোপ্পা থৌরম অমদা, সি.এস.আই.আর.-নেসনেল বোতনিকেল রিছর্চ ইন্সতিত্যুৎ (এন.বি.আর.আই.), লখনৌনা ওনলাইন্দা য়ুখল হাইদোকপগী থৌরম অমা পাঙথোকখি‍। থৌরম অসিদা, সি.এস.আই.আর.-এন.বি.আর.আই.গী দাইরেক্তর দোক্তর এস.কে. বারিকনা হৌদোকপগী ৱারোল পীখি অমদি ভিভা-অৱধ প্রান্ত, য়ু.পি.গী ওর্গনাইজিং সেক্রেতরী দোক্তর শ্রেয়ান্স মন্দলোইনা আই.আই.এস.এফ.কী মশক মওংশিংগী মতাঙদা ৱা ঙাঙখি‍। সি.এস.আই.আর. দাইরেক্তর জেনেরেল অমসুং দি.এস.আই.আর. সেক্রেতরী দোক্তর সেখর সি. মন্দেনা মরুওইবা ৱারোল পীখি‍। উত্তর প্রদেশকী কেবিনেত মন্ত্রী শ্রী ব্রিজেশ পাথকনা থৌরমদুদা অথোইবা মীথুং ওইনা শরুক য়াখি‍।

চান্দিগরদা সি.এস.আই.আর.- সেন্ত্রেল সাইন্তিফিক ইন্সত্রুমেন্তস ওর্গনাইজেসন (সি.এস.আই.ও.)নসু আই.আই.এস.এফ.-২০২০গী মাঙওইননা য়ুখল হাইদোকপগী থৌরম অমা পাঙথোকখি‍। ভর্চুএল ওইনা পাঙথোকখিবা থৌরমদুদর আই.সি.এ.আর., নই দিল্লীগী দিপুতী দাইরেক্তর জেনেরেল দোক্তর সুরেস কুমার চৌধরিনা অথোইবা মীথুং ওইনা শরুক য়াখি‍। এস.দি. কলেজ, এলেপী, কেরলাগী এসোসিএত প্রোফেসর দোক্তর নাগেন্দ্র প্রভু অমসুং আই.সি.এ.আর.-ইন্দিয়ন ইন্সতিত্যুৎ ওফ রাইস রিছর্চ হাইদরবাদকী প্রিন্সিপাল সাইন্তিস্তনা মরুওইবা ৱারোলশিং পীখি‍। থৌরম অসিগী নুংগী ওইবা হীরমদি “তুং কোইগদবা লৌউ শিংউ অমসুং অকোইবগী ফীভমগীদমক সাইন্স” হায়বসিনি‍।

অসুম্না, ইন্দিয়া মেতিওরোলোজিকেল দিপার্তমেন্ত (আই.এম.দি.), আর্থ সাইন্স মন্ত্রালয় (এম.ও.ই.এস.)নসু য়ুত্যুব চেনেলদা আই.আই.এম.এফ.কী য়ুখল হাইদোকপগী থৌরম পাঙথোকখি‍। এম.ও.ই.এস. অসি ৬শুবা ইন্দিয়া ইন্তরনেসনেল সাইন্স ফেস্তিভেল শীল্লিবশিংগী মরক্তা অমনি‍। আই.এম.দি.গী দি.জি.এম. দোক্তর এম. মোহাপত্রানা তরাম্না ওকপগী ৱারোল পীখি‍। এম.ও.ই.এস.কী হান্নগী সেক্রেতরী দোক্তর সাইলেস নায়কনা থৌরমদুগী অথোইবা মীথুং ওইনা শরুক য়াখি‍। থৌরম অদুগী হীরমদি “মরোমদোম লেপচবা ভারত অমসুং মালেমগী য়াইফনবগীদমক ৱেদর অমসুং ক্লাইমেত সর্ভিসশিং” হায়বসিনি‍। থৌরমদুদা ৱা ঙাঙখিবা অতৈ মীওইশিংদি দোক্তর সাথি দেবী, দোক্তর দি.এস. পাই, দোক্তর আর.কে. জেনামনি, শ্রী কে.এন. মোহন, দোক্তর এ.কে. অত্রি, দোক্তর অশোক কুমার দাস অমসুং দোক্তর আর.কে. গিরিনি

ইন্দিয়া ইন্তরনেসনেল সাইন্স ফেস্তিভেল অসি হকথেংননা মওং মতৌ তাকপা, এক্সপর্তশিংগা ৱারী ৱাতায় শাবা অমসুং সাইন্তিফিক থিএতর, ঈশৈ নোংমাই অমসুং শৈরেং য়াওনা অমগা অমগা পুনশিন্নদুনা ৱারী ৱাতায় শানবগী তোঙান তোঙানবা মওংশিং য়াওরবা সেমিনার, ৱর্কসোপ, একজিবিসন, খন্ন-নৈনবা অমদি ৱায়েৎনবশিং পুনশিল্লবা তোপ তোপ্পা থৌরম অমনি‍। আই.আই.এস.এফ.-২০২০দা পাঙথোক্কদবা থৌরম ৪১ শকখঙলে‍। চহীসিগী ওইনা কুমহৈ অসি মমীং লৈরবা ভারতকী অঙ্ক হোৎপা স্রিনিবাস রামানুজনগী মপোক নুমিৎ দিসেম্বর ২২, ২০২০দগী হৌগনি অমদি লৈবাকসিগী হান্নগী প্রধান মন্ত্রী শ্রী অতল বিহারি বাজপায়িগী মপোক নুমিৎ দিসেম্বর ২৫, ২০২০দা লোইশিনগনি‍। হায়রিবা মীওই অনি অসি সাইন্স অমসুং তেক্নোলোজীনা লৈবাকসিগী চাউখৎ লমজেলগী য়াংলেন শরু ওইগদবনি হায়না চেৎনা থাজরমবা মীওইশিংনি‍।

******



(Release ID: 1677107) Visitor Counter : 34