হকশেল অমসুং য়াইফ-য়ুম্বালগী কেন্দ্রগী মন্ত্রী দা. হর্শ বর্ধন্না রাজ্য ৯গী রাজ্যগী হকশেল মন্ত্রীশিং অমসুং প্রিন্সিপল সেক্রেতরীশিং/এদিস্নেল চীফ সেক্রেতরীশিংগা লোয়ননা ঙসি ৱারী শাখ্রে। রাজ্যশিং অসিদা অন্ধ্র প্রদেশ, অসাম, ৱেস্ত বেঙ্গল, রাজাস্থান, হিমাচল প্রদেশ, তেলঙ্গনা, পঞ্জাব, হরিয়ানা অমসুং কেরেলা য়াওখি। রাজ্যশিং অসিগী মহুৎ শিন্দুনা কুমারি কে. কে. শাইলেজা, হকশেল মন্ত্রী (কেরেলা), শ্রী পিয়ুশ হজারিকা, হকশেল মন্ত্রী (অসাম), শ্রী বালবির সিংহ সিধু, হকশেল মন্ত্রী (পঞ্জাব), শ্রী ইতেলা রজেন্দ্র, হকশেল মন্ত্রী (তেলঙ্গনা), শ্রী রাজিব সাইজল, হকশেল মন্ত্রী (হিমাচল প্রদেশ)না মীফম অসিদা শরুক য়াখি।

রাজ্যশিং/ রাজ্যশিং অসিগী জিলা খরদা কেসশিংগী মশিং ৱাংখৎলকপা, নুমিৎ তরেৎনিগী চাংচৎতা য়েংবদা নুংতিগী থেংনবা কেসশিংগী চাংচৎ অসি ৱাংবা, তেস্ত তৌবা হন্থরকপা, হোস্পিতালদা পুখৎলকপগী অহানবা পুং ২৪/৪৮/৭২গী মনুংদা শীবগী চাং ৱাংবা, দব্লিং রেৎ ৱাংবা, খুদোংথিবা য়াবা মীওই কাংলুপশিংগী মরক্তা শীবা হেনগৎলকপগী রিপোর্ত তোরক্লি।

দা. হর্শ বর্ধন্না লৈবাক অসিনা লাইচৎ অসিগা লোইন্দুনা লাকপা থা ১১ শুখ্রে অমদি জনুৱারী ৮দা অহানবা কোবিদকী মতাংদা মীফম ফমখি হায়না মীপুম খুদিংমক্তা নীংশিংখি। লাক্কদৌরিবা নীংথমথা অমসুং মতম শাংনা পাঙথোক্কদবা কুমহৈ অসিনা হৌজিক ফাওবদা কোবিদ-১৯দগী পুন্না ফগৎলকপা ঙমখ্রবশিং অসিদা অকাইবা পীবা য়াবা অচৌবা খুদোংথিবা অমা থোহল্লকপা য়াই হায়না মহাক্না হায়খি, “দশেরাদগী হৌরগা মখা তানা দিৱালী, চাৎ পুজা, খ্রিস্তমাস অমসুং মথংগী চহিদা মকর শঙ্ক্রাতি ফাওবা হরাও কুমহৈগী শাংলবা পন্থা অসিগী মনুংদা ঐখোয়না হেন্না চেকশিনবা মথৌ তাই। নীংথমথা মতমদা রেস্পিরেতরী ভাইরস অসিসু হেন্না য়াংনা শন্দোকই।”

লৈবাক অসিনা কোবিদ লান্থেংন্দুনা চংশিল্লিবা খোঙজং অসিগী মতাংদা মহাক্না ৱা ঙাংলদুনা লৈবাক অসিনা জনুৱারীদা পুনেগী এন.আই.ভি.দা লেব অমা খক্তমক লৈরম্বদগী ঙসি লেব মশিং ২০৭৪দা হেনগৎতুনা তেস্ত তৌবগী কেপাসিতী অসি নোংমদা মিলিয়ন ১.৫দা করম্না হেনগৎখিবগে হায়বগী মতাংদা ফোঙদোকখি। মহাক্না জেনরেল বেদ, ওক্সিজেন য়াওবা বেদ অমসুং আই.সি.য়ু. বেদশিং কোবিদ কিয়রগী মথং মনাও নাইবা মওং অসিগী থাক অমমমদা মশিং হেনগৎখিবগী মতাংদা ফোঙদোকখি। মহাক্না মীপুম খুদিংমক্তা অপুনবা এক্তিব কেসশিংগী ০.৪৪% খক্তনা ভেন্তিলেতর সপ্পোর্ত শীজিন্নরি, ২.৪৭%না আই.সি.য়ু.দা লৈরি অমসুং ৪.১৩% খক্তনা ওক্সিজেন সপ্পোর্ত বেদশিং শীজিন্নরি হায়না খঙহনখি। মহাক্না ভারত অসি মালেমগী ওইনা নাবা ফগৎলকপগী চাং খ্বাইদগী ৱাংবা অমসুং শীখিবগী মশিং খ্বাইদগী নেম্বা ওইরি হায়না পাউদমখি।

তিল্লিবা মীয়ামদা মহাক্না হন্দক উত্তর প্রদেশ, মধ্য প্রদেশ, গুজরাত, দিল্লী, তামিল নাদু, কর্নাতকা অমসুং ছত্তিসগরগী রাজ্যগী হকশেল মন্ত্রীশিং অমসুং মকোক থোংবা হকশেলগী ওফিসিএলশিংগা লোইননা ৱারী শাখিবগী মতাংদা পাউদম্লদুনা মহাক্না মীপুম খুদিংদা লাইনা অসিগী ত্রেজেক্তরী অসি প্রধান মন্ত্রীনা মশানা হকথেংননা য়েংশিল্লি হায়না থাজবা পীখি: “প্রধান মন্ত্রীনা কয়ারক হন্না কোবিদকী তোঙান তোঙানবা সমস্যাশিংগী মতাংদা লৈবাক অসিদা ৱা ঙাংখ্রে। মহাক্না সি.এম.শিং অমসুং য়ু.তি.শিংগী মকোকশিংগা লোয়ননা কুপ্না খন্ন-নৈনখি। হন্দক্কী মহাক্কী খ্বাইদগী নৌবা ৱারোল অদু মিনিৎ তরা খক্তা ওইখি অদুবু মখা তানা কোবিদকা চুনবা চৎন-লোনচৎ ঙাক্না চৎনবা অমসুং মসি জন অন্দোলন অমা ওইহন্নবা মরু ওইবা পাউজেল পীখি”। কোলর ত্যুনগী খুত্থাংদা পাউজেল পীবা অমসুং অতোপ্পা আই.ই.সি.গী থবক থৌরমশিং অসিগুম্বা জন অন্দোলন খুমাং চাউশিন্নবা সরকারনা লৌখৎখিবা খোঙথাংশিংগী মতাংদা মহাক্না কুপ্না পাউদমখি। কোবিদকা চুনবা চৎন-লোনচৎ ঙাক্না চৎপা অসিনা কোবিদকী লান্থেংনবদা খ্বাইদগী ফবা পাম্বৈ ওইরি অমসুং মসি লায়না ঙাক্না চৎপা য়াই হায়না আয়রদুনা মহাক্না ৱা ঙাংবা লোইশিনখি।

নেস্নেল সেন্তর ফোর দিজিজ কন্ত্রোল (এন.সি.দি.সি.)গী দিরেক্তর দা. সুজীৎ কে সিংহনা রাজ্যশিং অসিগী কোবিদকী ত্রেজেক্তরী অমসুং পব্লিক হেল্থ রেস্পোন্সকী খোংথাংশিংগী মতাংদা মীপুম খুদিংদা খঙহনখি। মহাক্না সমস্যাশিং অমসুং রিজনশিং/জিলাশিংদা মখা তানা মীৎয়েং চংগদবা হিরমশিংগী মতাংদা পাউদমখি।

রাজ্যগী হকশেল মন্ত্রীশিংনা কোবিদ পোজিতিব কেসশিংগী কন্তেনমেন্ত, সর্ভিলেন্স, অমসুং লায়েং চত্থনবা লৌখৎখিবা খোঙথাংশিংগী স্নেপশোৎ উৎখি। মখোয়না ঙাক্না চৎলিবা খ্বাইদগী অফবা খোঙথাংশিং অদুসু পাউদমখি।

কেন্দ্রগী হকশেলগী সেক্রেতরী শ্রী রাজেশ ভুশনন্না রাজ্য পুম্নমক্তা কোবিদ লাকশিন্নবা অমসুং ত্রেজেক্তরীদা হন্থহনবা ঙম্নবা মরু ওইবা লম তরাদা মীৎয়েং চংনবা খঙহনখি: তেস্ত তৌবা হেনগৎপা; হেন্না শন্দোকপা থুগদবা মফমশিং ওইরিবা কৈথেলশিং, থবক মফমশিং, ধর্মগী ওইবা মী পুনবদা তার্গেতেদ তেস্তিং তৌবা; তেস্ত তৌবদা আর.তি.-পি.সি.আর.গী চাং হেনগৎহনবা;  আর.এ.তি.দা নেগেতিব ওইবা লাইওংদি উৎবশিং শোইদনা তেস্ত তৌবা; অহানবা পুং ৭২গী মনুংদা কন্তেক্ত ত্রেসিং মপুং ফানা তৌবা; অনৌবা কেস অমা থেংনবদা চাংচৎতা কন্তেক্ত ১০-১৫ ত্রেসিং তৌবা; হোস্পিতালদা পুখৎলকপগী অহানবা পুং ২৪-৭২গী মনুংদা শীবগী চাং অসি হন্থহন্নবা হকশেলগী মরী লৈনবা চৎন-লোনচৎ ঙাক্না চৎনবা থৌগৎপা;  মনুংদা কন্তেক্ত ত্রেসিং মপুং ফানা লোইক্তা মরু ওইবা লম তরাদা শীবগী চাং অসি ১%গী মখাদা থম্নবা নুমিৎ খুদিংগী হোস্পিতাল অমমমগী শীবগী এনালাইসিস তৌবা অমসুং মথৌ তারবদি খোঙথাং লৌখৎপা; চহি ৬০গী মথক অমসুং কো-মোর্বিদিতী ওইবা অসিগুম্বা খুদোংথিবা য়াবা মীওই কাংলুপশিং চেকশিন্না থম্বা; পঞ্চায়তি রাজ ইন্সতিত্যুসনশিং,আর্বান লোকেল বোদীশিংগী খনগৎলবা মীহুৎশিং, এম.পি.শিং. এম.এল.এ.শিংগী অমসুং শকনাইরবা মীওইশিংনা চৎন-লোনচৎ হোংদোক্নব কেম্পেনগী খুত্থাংদা মীয়ামদা কোবিদকা চুনবা চৎন-লোনচৎ ঙাক্না চৎনবা অপীল তৌদুনা কোবিদকা চুনবা চৎন-লোনচৎ ঙাক্না চৎনবা থৌগৎপা।

মীফম অসিদা শ্রীমতি আর্তি অহুজা, এদিস্নেল সেক্রেতরী (হকশেল), শ্রী লব অগর্বাল, জোইন্ত সেক্রেতরী (হকশেল) অমসুং মন্ত্রালয় অসিগী অতোপ্পা মকোক থোংবা ওফিসিএলশিংনা শরুক য়াখি।

****