ঙসি নিউ দিল্লিদা কেমিকেল অমসুং ফর্তিলাইজরগী য়ুনিয়ন মিনিস্তর শ্রী দি.ভি সদানন্দা গৌরানা প্রধান মন্ত্রী ভারতিয়া জনঔসাধি পরিয়োজনা(পি এম বি জে পি) হন্না য়েংশিনবগী মীফম অমা পাংথোকখ্রে।

চৎলিবা শেনবা চহি(ওক্তোবর ৩১ ফাওবদা)অসিগী অহানবা থা ৭গী মনুংদা জন ঔসাধি দুকান ৬৬০০দা প্রধান মন্ত্রী ভারতিয়া জনঔসাধি পরিয়োজননা লুপা করোর ৩৫৮(শেনবা চহি ২০১৯দা লুপা করোর ৪৩৩ য়োনখিবা অদুগী মথক্তা) য়োনখি অমসুং অপুনবা শেনবা চহি অসিদা লুপা করোর ৬০০ হেন্না য়োল্লবা য়ারি।

কোবিদ-১৯গী ৱারবা মতম মনুংদা মীয়ামদা অহোংবা মমলদা মাক্সশিং য়াওনা হিদাক-লাংথকশিং ফংহনবগীদমক মীফম অদুদা শ্রী গৌরানা বি.পি.পি.আই কাংবু থাগৎখি।

শ্রী গৌরানা হায়খি প্রধান মন্ত্রী শ্রী নরেন্দ্র মোদীগী পান্দমদি খুন্নাইগী লায়রবা মীওইশিং হিদাক-লাংথকশিং লৈবদা চঙবা শেনফম হন্থহনবনি। অনৌবা থবকশিং পায়খৎতুনা হিদাক-লাংথকশিং ফংহনবগী থবক ফগৎহন্দুনা হায়রিবা পান্দমশিং অসি ফংনবা বি.পি.পি.আই কাংবুনা থবক পায়খৎকদবনি।

মহাক্না হায়খি মনুং-হুঞ্জিনবা মফমশিং অমসুং খুঙ্গংশিংদা দুকান মশিং য়াম্না হাংদোক্তুনা অমসুং জন ঔসাধি দুকানশিং হিদাক-লাংথকশিং ফংহন্দুনা জন ঔসাধিগী হিদাকশিংগী মগুনশিং অমসুং কান্নবগী মতাংদা মীয়াম খঙবা হেনগৎহন্নবা থবক পায়খৎপা হেনৎহনবা দরকার ওইরে। মসিগী পান্দম অসি ফংনবা থবক পায়খৎনবা অকুপ্পা থৌরাং অমা শেম্নবা অমসুং পীশিল্লক্নবা মহাক্না বি.পি.পি.আইদা খঙহনখি।

পি.এম.বি.জে.পি য়োজনাগী থবকশিংগী মতাংদা বি.পি.পি.আইগী সি.ই.ও, শ্রী সচিন কুমার সিংহনা শম্লপ্না পাউদমখি।

অহোংবা মমলদা মগুন লৈবা জেনেরিক হিদাক-লাংথকশিং ফংহন্দুনা ভারতকী মীওই খুদিংমক্কী অনা-লায়েংদা চঙবা শেনফম হন্থহন্নবা পান্দমদা শ্রী নরেন্দ্র মোদীগী লমজিং মখাদা ২০১৫-১৬দা মীয়ামদা অহোংবা মমলদা হিদাক-লাংথকশিং ফংহন্নবা য়োজনা অসি প্রধান মন্ত্রী ভারতিয়া জনঔসাধি পরিয়োজনা(পি এম বি জে পি) হায়না নৌথোকহনখি। মতম অদুদা, ২০১৪-১৫দা শুপ্নগী দুকান ৯৯ খক লৈরম্বদগী হৌজিক দুকান ৬৬০০ রোম লৈরে। ২০১৪-১৬দা লুপা করোর ৭.২৯ রোম য়োনবদা ২০১৯-২০দা লুপা করোর ৪৩৩ য়োনখি।

মীফম অদুদা সেক্রেতরি(ফার্মাসিউতিকেলস) এস.অর্পনা অমসুং জোইন্ত সেক্রেতরি শ্রী রাজনিস তিঙ্গালসু শরুক য়াখি।

*****