কে.ভি.আই.সি.না ভিদিও কনফরেন্সকী খুত্থাংদা নুমিৎ ১০নিগী ত্রেনিং পীখ্রবা খাদি এন্দ ভিলেজ ইন্দস্ত্রীস কম্মিসন (কে.ভি.আই.সি.)গী কুমহর সশক্তিকরন য়োজনাগা লোয়ননা পাইখৎপা খুমাং চাউশিনহন্নবা অচৌবা খোঙথাং অমা ওইনা য়ুশকৈশা নুমিৎতা এম.এস.এম.ই. অমসুং আর.তি.ঐচ.কী কেন্দ্রগী মন্ত্রী শ্রী নিতিন গদকরীনা মহারাস্ত্রগী নান্দেদ অমসুং পর্ভানি জিলাশিং অসিগী চফু শাবা ইমুং ১০০দা ইলেক্ত্রিক পোত্তর হ্বীলশিং য়েন্থোকখ্রে।

চফু শানবা খুৎশু-খুৎলাইশিং য়েন্থোকখিবা চফু শাবশিং অদু খুঙ্গং ১৫দগীনি – নান্দেদ জিলাগী খুঙ্গং ১০ অমসুং পর্ভানি জিলাগী খুঙ্গং ৫। খুৎশু-খুৎলাই য়েন্থোকপা অসি কাংলুপ অসিগী য়ামদ্রবদা মীওই ৪০০দা মখোয়গী পোত্থোক পুথোকপা অমসুং মখোয়গী ইনকম হেনগৎহন্দুনা কান্নবা ফংহনগনি, হায়রিবা অসি প্রধান মন্ত্রী শ্রী নরেন্দ্র মোদীগী মঙলাননি।

শ্রী গদকরীনা কে.ভি.আই.সি.গী কুমহর সশক্তিকরন য়োজনাবু থাগৎলদুনা হায়খি মসি লৈবাক অসিদা চফু শাবশিংগী পুন্সি মহিং ফগৎহন্নবা নীংখা তম্লবা মতুংদগী লম অসিদা লৌখৎপা খ্বাইদগী অহানবা থৌরাং অমনি। “শোত্থরবা চফু শাবা কাংলুপ অসি চাউকৎনবা অমসুং মুৎখ্রদবা চফু শাবগী কলা অসি হিংগৎহন্নবা হোৎনবা অসি প্রধান মন্ত্রীগী মঙলান্নি। কুমহর সশক্তিকরন য়োজনাগী মখাদা মপুং ফাবা ত্রেনিং পীবা অমসুং অনৌবা খুৎশু-খুৎলাইশিং য়েন্থোকপগা লোয়ননা চফু শাবশিংগী পোত্থোক পুথোকপা অমসুং ইনকম অসি শরুক কয়া থোক্না হেনগৎলক্কনি। স্কিম অসি মখা তানা মহারাস্ত্র অমসুং অতোপ্পা রাজ্যশিংগী খুঙ্গংগী মফমশিংদসু ইমপ্লিমেন্ত তৌরগনি,” হায়না শ্রী গদকরীনা ফোঙদোকখি।

থৌরম অসিদা কেন্দ্রগী মন্ত্রীনা সরারগী তেংবাং ফংবগী নুংঙাইবা ফোঙদোরকপা আর্তিসেন খরগা লোয়ননা ৱারী ৱাতাই শাখি। মখোয়না ইলেক্ত্রিক পোত্তর হ্বীল শীজিন্নদুনা পোত্থোক পুথোকপা হেনগৎপগা লোয়ননা মখোয়না হৌজিক মমাংদা তাল্লবা শেল অদুদগী শরুক ৩-৪ হেনগৎনবা তানবা ঙম্লে হায়না ফোঙদোরকখি।

ভিদিও কনফরেন্সকী খুত্থাংদা য়াওখিবা কে.ভি.আই.সি.গী চিয়রমেন শ্রী বনাই কুমার সক্সেনানা হায়খি কাংলুপ অসিগী মীওই ১৮,০০০গী ময়াদা কান্নবা ফংহন্দুনা লৈবাক অসিদা হৌজিক ফাওবদা ইলেক্ত্রিক চাক ১৮,০০০গী মথক্তা য়েন্থোকখ্রে। মহাক্না হায়খি কুমহর সশক্তিকরন য়োজনাগী মখাদা চফু শাবশিংগী চাংচৎতা লাকপা ইনকম অসি থা অমদা লুপা ৩০০০গী ময়া ওইরম্বদগী থা অমদা লুপা ১০,০০০গী ময়াদা য়ৌহনবা ঙমখ্রে। “লৈবাক অসিগী চফু শাবা খুদিংমক চাউখৎ হনবা হায়বা অসি প্রোগ্রাম অসিগী অমত্তা ঙাইরবা পান্দমনি অমসুং পান্দম অসি ফংনবা কে.ভি.আই.সি.না অঙম্বা থাক্তা হোৎনগনি,” হায়না মহাক্না ফোঙদোকখি।

****