কেন্দ্রীয় জাহাজ পৰিবহন ৰাজ্যমন্ত্রী শ্রী মনসুখ মাণ্ডভিয়াই ভিডিঅ’ কনফাৰেন্সৰ মাধ্যমেৰে ভি অ’ চিদামবৰনৰ বন্দৰ ট্ৰাষ্ট ফলকৰ আৱৰণ উন্মোচন কৰি বন্দৰত প্ৰত্যক্ষ প্রৱেশ ব্যবস্থা(ডিপিই)ৰ শুভাৰম্ভ কৰে।

শুভাৰম্ভণি অনুষ্ঠানত ভাষণ দি শ্রী মাণ্ডভিয়াই কয়, পৰিবহন খণ্ডত ব্যয় সংকোচন কৰা আৰু সামগ্ৰী পৰিবহনৰ ক্ষেত্ৰত আৰু গতি সঞ্চাৰ কৰিবলৈ ই এক গুৰুত্বপূর্ণ পদক্ষেপ। বন্দৰত পোনপটীয়া প্রৱেশ ব্যৱস্থাই ৰপ্তানিকৰ্তাসকলৰ বাবে ব্যৱসায় অনুকূল বাতাবৰণ প্রদান কৰিব। সামগ্ৰী পৰিবহনৰ ক্ষেত্ৰত সময় ৰাহি কৰাৰ লগতে পৰিবহন শুল্ক হ্ৰাস কৰিব। ইয়ে আন্তর্জাতিক বাণিজ্যত জাহাজত সামগ্ৰী নিয়াৰ ক্ষেত্রতো প্রতিযোগিতা বৃদ্ধি কৰিব।

বন্দৰত পোনপটীয়া প্রৱেশৰ অত্যাধুনিক এই ব্যৱস্থাৰ ফলত উৎপাদন কেন্দ্রৰ পৰা কন্টেইনাৰসমূহ সহজতে বন্দৰত প্ৰৱেশ কৰিব। ইয়াৰ ফলত, জাহাজত সামগ্ৰী ভৰ্তি কৰাৰ ক্ষেত্রত আৰু গতি বৃদ্ধি হোৱাৰ লগতে ৰপ্তানিকৰ্তাসকলে পোনপটীয়াকৈ কন্টেইনাৰ টার্মিনেললৈ সামগ্রী লৈ যাব পাৰিব। সাগৰমালা কাৰ্যসূচীৰ অধীনত ভি অ’ চিদামবৰনৰ বন্দৰ ট্রাক পার্কিং টার্মিনেলৰ ভিতৰত ১৮,৩৫৭ বৰ্গ মিটাৰ এলেকাত এই ব্যৱস্থা গঢ়ি তোলা হৈছে।

অত্যাধুনিক এই ব্যবস্থাৰ উদ্বোধনী অনুষ্ঠানত মন্ত্ৰালয়ৰ সচিব ডঃ সঞ্জীব ৰঞ্জনে কয়, বন্দৰসমূহত তথ্য প্রযুক্তি পৰিচালিত পৰিকাঠামোই বন্দৰৰ কাম-কাজ পৰিচালন ব্যৱস্থাক বিশ্ব মানৰ কৰি তোলাত সহায় কৰাৰ লগতে মন্ত্রালয়ে ২০৩০ চনৰ ভিতৰত বন্দৰসমূহত বিশ্ব মানৰ পৰিকাঠামো গঢ়ি তোলাৰ যি পৰিকল্পনা হাতত লৈছে, সেয়া বাস্তৱায়িত কৰিবলৈ এইধৰণৰ উদ্যোগে সহায় কৰিব।

মন্ত্রালয়ৰ উচ্চ পদস্থ বিষয়াসকলৰ উপৰি ভি অ’ চিদামবৰনৰ বন্দৰ ট্রাষ্টৰ অধ্যক্ষ শ্রী টি কে ৰামচন্দ্রন, চেণ্ট্ৰেল ৱেৰ হাউছিং কর্প’ৰেশ্যনৰ পৰিচালন সঞ্চালক শ্রী অৰুণ কুমাৰ শ্রীবাস্তৱ প্রমুখ্যে বন্দৰৰ বিষয়াসকলে আভাসী মাধ্যমেৰে অনুষ্ঠিত উদ্বোধনী অনুষ্ঠানত অংশ গ্ৰহণ কৰে।

 *******

YB/AP/JK/KG