২০২৪ ফাওবদা লৈবাক অসিগী খুঙ্গংগী য়ুমথোং খুদিংদা তোতি ঈশিং ফংহন্নবা পান্দমদা কেন্দ্র সরকারগী মাংজিল থাবা থবক জল জিবন মিসনগী মখাদা মী খুদিংমক কোনশিন্নবা পান্দম ফংনবা রাজ্যশিং অমসুং য়ুনিয়ন তেরিতোরিশিংদা পায়খৎলিবা থবকশিংগী ফিবম য়েংশিনবগী থবক জল শক্তি মিনিস্ত্রিনা পায়খৎলি। পায়খৎলিবা থবকশিংগী খুমাং চাউশিনবা য়েংশিন্নবা, ভিদিও কনফরেন্সকী খুৎথাংদা চহি তঙ্খাইগী হন্না য়েংশিন্নবা অমা চৎথরি। খুঙ্গংগী য়ুমথোংশিংদা তোতি ঈশিং ফংহন্নবা পায়খৎলিবা থবকশিংগী হৌজিক ওইরিবা ফিবম অমসুং ইন্সতিতুসনশিংনা পাংথোক্লিবা থবকশিং অমসুং জল জিবন মিসনগী মখাদা মী খুদিংমক ঈশিং ফংহন্নবা মাঙলোমদা চংশিল্লিবা অদু রাজ্যশিং/য়ু.তিশিংনা খঙহনখি।

চহি তঙ্খাইদা মখোয়না পাংথোকখিবা থবকশিংগী ফিবম ঙসি সিক্কিমনা নেসনেল জল জিবন মিসনদা পাউদমখি। সিক্কিমগী য়ুমথোং লাখ ১.০৫ রোমগী মনুংদা য়ুমথোং ৭০,৫২৫(চাদা ৬৭) তোতি ঈশিং শম্লে। ২০২১-২২ ফাওবগী মনুংদা য়ুমথোং চাদা ১০০ তোতি শম্নবা রাজ্য অসিনা থৌরাং তৌরি। রাজ্য অসিদা ঈশিং পীনবা অফবা মচাক-মথুমশিং লৈরি অমসুং খুঙ্গং ৪১১দা ঈশিং পীনবা স্কিমশিং লৈরে। ২০২০-২১ ফাওবদা এস.সি/এস.তিনা মশিং য়াম্বা খুঙ্গংশিং অমসুং এস্পিরেসনেল দিস্ত্রিকশিংদা লৈবা খুঙ্গংশিং ঈশিং ফংহন্নবা রাজ্য অসিনা থৌরাং তৌরি। পি.দব্লিউ.এস সিস্তেমশিং লৈরিবা খুঙ্গংশিংগী মনুংদা, খুঙ্গং ৮১ খক ‘হর ঘর জল’ খুঙ্গংগী থাক য়ৌবা ঙম্লে। য়ুমথোং ৭,৭৯৮তা তোতি ঈশিং শমদুনা অহেনবা খুঙ্গং ২১১ রোম চাদা ১০০ তোতি ঈশিং শম্বা ঙম্লগনি। মসিগী থবক অসি অথুবা মতমদা মপুংফানা পাংথোক্নবা রাজ্য অসি থৌরাং তৌবা দরকার ওই, থবক অসিদগী পি.দব্লিউ.এস খুঙ্গংশিং চাদা ১০০ তোতি ঈশিং ফংলগনি। 

মীফম অদুদা ভিলেজ এক্সন প্লানগী থৌরাং তৌবা, ভিলেজ ৱাতর এন্দ সেনিতেসন কম্মিতি(ভি দব্লিউ এস সি) শেম্বগী মতাংদা খন্নখি। ঈশিং ফংহন্নবা থবকশিং থৌরাং তৌবা, থবক ওইনা পাংথোকপা অমসুং মখা তানা য়েংশিনবগী থবকশিংদা ভোলুন্তরি ওর্গনাইজেসনশিং, এন.জি.ওশিং, নুপী সেল্প হেল্প গ্রুপশিং শরুক য়াহন্নবা মরুওইনা খন্নখি। গ্রাম পঞ্চায়তকী থৌমীশিং অমসুং অতোপ্পা মরী লৈনবশিং হৈশিংবা হেনগৎহন্নবা ত্রেনিং পীনবা রাজ্যদা খঙহনখি অমসুং ঈশিং ফংহনবগী থবকশিং পাংথোক্নবা অমসুং মখা তানা য়েংশিন্নবা খুঙ্গংগী থাক্তা ত্রেনিং ফংলবা মীওইশিংগী কাংবু অমা শেমগৎনবা স্কিল ত্রেনিং পীনবা খঙহনখি। থক্নবা ঈশিং ফংফমশিংদা তঙাইফদনা কেমিকেল তেস্ত অমসুং বেক্তোরিওলোজিকেল তেস্ত পাংথোক্নবা রাজ্যদা খঙহনখ্রে।

জল জিবন মিসন পায়খৎনবা ২০২০-২১দা সিক্কিমগী লুপা করোর ৩১.৩৬ কাইথোকখ্রে, মসিগী মনুংদা লুপা করোর ৭.৮৪ থাদোকখ্রে। অনিসুবা তাঙ্কক্কী শেনফম ফংনবা রাজ্য অসিনা মখোয়গী ফন্দ অথুবদা শীজিন্নগদবনি। ১৫সুবা ফাইনান্স কম্মিসনগী মখাদা সিক্কিমগী খুঙ্গংগী লোকেল বোদিশিংগী লুপা করোর ৪২ কাইথোকখ্রে অমসুং মসিগী চাদা ৫০ ঈশিং পীনবা অমসুং সেনিতেসনগী থবকশিং হায়বদি ঈশিং পীবা, গ্রে-ৱাতর ত্রিৎমেন্ত অমসুং ঈশিং অমুক হন্না শীজিন্নবা অমসুং ঈশিং পীনবা থবকশিং মতম শাংনা পাংথোক্নবা অমসুং মখা তানা য়েংশিন্নবা শীজিন্নগনি।

সিক্কিম অসি ঈশিং মরাং কাইনা ফংবগী মমিং চৎলি। য়াম্না য়াংনা মীশিং হেনগৎলকপা অমসুং সহর পাকথোক-চাউথোরকপদগী অফবা ঈশিং মরাংকাইনা ফংবদা অকাইবা থোকহল্লে। রাজ্য অসিদা ঈশিং ফংহন্নবা অফবা খুদোংচাবা লৈরি, মীয়ামগী পুন্সি মহিং ফগৎহন্নবা রাজ্য অসিগী খুঙ্গংগী য়ুমথোংশিং তোতি ঈশিং শম্নবা মসি শীজিন্নবা দরকার ওইরে।

*****