কিসান রেলগী থবকশিং শীজিন্নদুনা লৌমীশিং মখা তানা শৌগৎপা অমসুং মতেং পাংবা ওইনা, ফুদ প্রোসেসিং ইন্দস্ত্রিগী ‘ওপরেসন গ্রিনস-তোপ তু তুতেল’ স্কিমগী মখাদা মশক খঙলবা উহৈশিং অমসুং ইন্সাং-নাপীশিং পুবদা চাদা ৫০ সবসিদি পীনবা রেলৱেজ মিনিস্ত্রি অমসুং ফুদ প্রোসেসিং ইন্দস্ত্রি মিনিস্ত্রিনা ৱারেপ লৌখ্রে। কিসান রেলদা হকথেংন্না পীগদবা সবসিদি অসিগী দরকার ওইবা ফন্দশিং ফুদ প্রোসেসিং ইন্দস্ত্রি মিনিস্ত্রিনা রেলৱেজ মিনিস্ত্রিদা পীরগনি।

কিসান রেল ত্রেনশিংদা সবসিদি পীবা অসি ২০২০গী ওক্তোবর ১৪গী চৎনবা হৌরে।

সবসিদি ফংবা য়ারবা পোৎলমশিং:

উহৈশিং : হৈনৌ, লফোই, পুংদোল, কিৱি, লিতচি, অৱাথবী, মৌশাম্বী, কোম্লা, কিন্নৌ, লাইম, চম্প্রা, কিহোম, কফোই, থৈবোং, এপ্পল,অলমোন্দ, অওনলা, পেসন ফ্রুইদ অমসুং নাস্পতি;

ইন্সাং-নাপীশিং: ফ্রেঞ্জ বিন, কারোদ অখাবী, খামেন, কেপসিকম, গজর, কোম্বীলৈ, মোরোক অতেকপা, ওক্রা, থবী, হৱায়শিং, চনম, তিলহৌ, অলু অমসুং খামেন অশিনবা।

এগ্রিকলচর মিনিস্ত্রি নৎত্রগা রাজ্য সরকারনা খঙহল্লকপগী মতুংইন্না তুংদা অতোপ্পা উহৈশিং/ইন্সাং-নাপীশিং হাপচিনবা য়াগনি।

কিসান রেলনা লৈবাক অসিগী কাচিন অমদগী কাচিন অমা ফাওবা লৌউ-শিংউগী পোৎথোকশিং য়াম্না য়াংনা পুদুনা লৌমীশিং অমসু পোৎ লৈরিবশিং অনিমক কান্নবা পীরে। মসিনা লৌমীশিংগী শেন্থোক হেনগৎহন্দুনা পুন্সিগী অহোংবা অমা পুরক্তুনা কিসান রেলনা লৌমীশিং অমসুং ললোন-ইতিক মচা-মচা তৌরিবশিংগী দরকার ওইবশিং ফংহনবা ঙম্লে।

মমল ৱাংনা য়োন্দুনা অমসুং অথুবদা অমসুং য়াম্না য়াংনা পুথোক-পুশিন তৌদুনা, অতৎ-অখম লৈতনা ফংহন্দুনা অমসুং ইঙ্খোলগী পোৎথোকশিং পৎতুনা মাঙবদগী ঙাকথোক্তুনা লৌমীশিংগী শেন্থোক হেনগৎহন্দুনা কিসান রেলনা লৌমীশিংগী পুন্সিদা অহোংবা পুরক্লে।

কিসান রেলগী ফিবম:

• অহানবা কিসান রেল, চয়োলগী ত্রেন ওইনা ২০২০গী অগস্ত ৭দা দেবলালি(নাসিক, মহারাস্ত্রা)দগী দানাপুর(পাতনা, বিহার)ফাওবা চেনবা হৌখি। ত্রেন অসি পাম্নবা হেনগৎলকপদগী মুজাফফরপুর(বিহার) ফাওবা শাংদোকখি অমসুং চয়োল অমদা অনিরক চেনখি। মসিগী মথক্তা,সঙ্গলা অমসুং পুনেদগী লিঙ্ক কোচশিং হৌদোক্তুনা মনমাদতা কিসান রেল অসিগা শম্নখি।
• অনিসুবা কিসান রেল-চয়োলগী ত্রেন ওইনা ২০২০গী সেপ্তেম্বর ৯দা অনন্তপুর(অন্ধ্র প্রদেস)দগী অর্দস নগর(দিল্লি) ফাওবা চেনবা হৌখি।
• অহুমসুবা কিসান রেল-চয়োলগী ত্রেন ওইনা ২০২০গী সেপ্তেম্বর ৯দগী বেঙ্গলুরু(কর্নাতাকা)দগী হাজরাত নিজামুদ্দিন(দিল্লি) ফাওবা চেনবা হৌখি।
• মরিশুবা কিসান রেল- নাগপুর অমসুং ৱারুদ ওরেঞ্জ সিতি(মহারাস্ত্রা)দগী অর্দস নগর দিল্লি ফাওবা ২০২০গী ওক্তোবর ১৪দগী চেনবা হৌখি।

পনবা য়াবা অমদি ভারত রেলৱেজনা লৌউ-শিংউগী পোৎথোকশিং ফ্রেদ ত্রেনশিংদা পুনবা লেপ্তনা থবক পায়খৎলি। লোকদাউন মনুংদা ফাওবা ভারত রেলৱেজগী ফ্রেদ ত্রেনশিংনা তঙাইফদবা পোৎলমশিং লেপ্তনা পুথোক-পুশিন তৌবদগী লৈবাক অসিগী মতম অমতা অৱাবা মায়োক্নখিদে। অহেনবা রেকশিংদা গেহুশিং, হৱাইশিং, উহৈশিং অমসুং ইন্সাং-নাপীশিং পুবা শিংথানিঙাই ওইনা হেনগৎখি।

*****