খুঙ্গঙ চাউখৎ থৌরাং, লৌউ-শিংউ অমদি লৌমীশিংগী য়াইফ থৌরাং, পঞ্চায়তি রাজ অমসুং ফুদ প্রোসেসিং ইন্দস্ত্রিজকী কেন্দ্র মন্ত্রী শ্রী নরেন্দ্র সিংহ তোমারনা ওপরেসন গ্রীন তোপতগী তোতেল ফাওবগী মখাদা পীরিবা সবসিদী অসি মরোমদোম লেপচবা ভারতকী মায়কৈদা খোঙথাঙ অমনি হায়না হায়খ্রে‍। প্রধান মন্ত্রী শ্রী নরেন্দ্র মোদীগী মীৎয়েং শাল্লবা লুচিং মখাদা ফুদ প্রোসেসিং ইন্দস্ত্রিজ মন্ত্রালয়না ভারতকী লৌমীশিংগী তোঙান তোঙানবা স্কিম কয়া পুরকখ্রে‍। আত্ম নিরভর ভারত অভিয়ানগী মখাদা ওপরেসন গ্রীন স্কিম তোপ তু তোতেলনা লাউথোকখ্রবা উহৈ অমসুং মনা মশিং পুথোক পুশিন অমদি থম্বদা হায়রিবা উহৈ অমসুং মনা মশিংশিং অসি ত্রিগর মমলদগী তাথরবদি চাদা ৫০গী সবসিদী পীরি‍। হৌজিক্তি এম.ও.এফ.পি.আই.দা ওনলাইন ক্লেম হকথেংননা থাজিনবগী মথক্তা, কিসান রেল স্কিমগী মখাদা পোৎ পুথোক পুশিনগী সবসিদী লায়থোকহল্লবা মওং অমগী মখাদা ফংহনগনি‍। লৌমী য়াওনা মীওই অমা হেক্তনা কিসান রেলগী খুত্থাঙদা লাউথোকখ্রবা উহৈ-ৱাহৈ অমসুং মনা মশিংশিং পুথোক পুশিন তৌবা য়াগনি‍। রেলৱেজনা হায়রিবা উহৈ অমসুং মনা মশিংশিং অসি পুথোক পুশিন তৌবগী মমলগী চাদা ৫০খক্তমক লৌগনি‍। লেমহৌরিবা চাদা ৫০ অদু এম.ও.এফ.পি.আই.না ওপরেসন গ্রীন স্কিমগী মখাদা ইন্দিয়ন রেলৱেজদা সবসিদী ওইনা পীগনি‍। নৌনা শেমদোক্লবা চৎন-পথাকশিং মন্ত্রালয়গী ৱেবসাইততা ১২.১০.২০২০দা থাগৎখ্রে‍‍।

কিসান রেল স্কিমগী খুত্থাঙদা পোৎ পুথোক পুশিন তৌবগীদমক ওপরেসন গ্রীন – তোপ তু তোতেল স্কিমগী অতৈ ফীভমশিং কোমথোকপগী মতাঙদা, লাউথোকখ্রবা উহৈ অমসুং মনা মশিং পুম্নমক পোৎকা চাং অমসুং মমলগী খেন্নবা থমদনা চাদা ৫০গী পোৎ পুবগী সবসিদী পীগনি‍। হৌজিক রেলৱেজনা কিসান রেল অহুম দেবলালি (মহারাস্ত্র) অমসুং মুজফ্ফরপুর (বিহার), অন্ধ্র প্রদেশকী অনন্তপুরদগী দিল্লী, বেঙ্গলোরদগী দিল্লী চলাইরি অমদি মরিশুবা কিসান রেল মহারাস্ত্রগী নাগপুর অমসুং ৱারুদ ওরেঞ্জ সিতীদগী দিল্লিফাওবা হৌদোক্নবা থৌরাং তৌরি‍।

পুবা য়াবা মহৈ মরোংশিং:-

উহৈ (১৯) – হৈনৌ, লফোই, পুংথোন, কিৱি, লিতচি, মৌসম্বি, কোম্লা, কিন্নো, চম্প্রা, অৱাথবী, কিহোম, কফোই, থৈবোং, সেম, অওনলা, সিতাফল অমসুং নাসপতি;

মনা মশিং (১৪):- কোলি হৱাই, খোঙদ্রুম, খামেন, কেপসিকম, গজর, কোবি থমচেৎ মানবী, মোরোক (অশংবা), ভেলন্দ্রি, থবী, হৱাই থরাক, তিল্হৌ, অলু অমসুং খামেন অশিনবী‍।

***