লৈবাক্কী নোংচুপ, অৱাং অমসুং অৱাং-নোংপোক থংবা ঙমখৈগা নক্ননা লৈবা মরু ওইবা মফমশিংদা লৈবা শোরোক অমসুং থোংশিং শম্নহনবগী অনৌবা য়ুগ অমা পুরকপগা মরী লৈননা ঙসি শ্রী রাজনাথ সিংহনা মতম শাংনা লৈহৌরগদবা মরু ওইবা থোং ৪৪ লৈবাক্তা শিন্নখ্রে। মহাক্না অরুনাচল প্রদেশতা লৈবা নেচিফু শুরুংগী উরেপ উয়ুংসু তমখ্রে। মসিগী থোংশিং অসি স্ত্রেতজিক ওইবা অমসুং য়াম্না মরু ওইবনি অমসুং মসিনা মনুং চঙশিনবা মফম কয়া অমা শম্নহল্লি। থোং ৪৪ অসি রাজ্য/য়ু.তি. ৭তা শন্দোক্লগা লৈবনি। লৈবাক্তা থোং শিন্নবগী থৌরম অসি নই-দিল্লীদগী ভিদিও কনফরেন্সকী খুত্থাংদা কেন্দ্র মন্ত্রী দাঃ জিতেন্দ্র সিংহ; দিফেন্স স্তাফকী চীফ জেন. বিপিন রাৱৎ; আরমী স্তাফকী চীফ জেন. এম.এম. নরাবানে অমসুং দিফেন্স সেক্রেতরী শ্রী অজয় কুমার য়াওবা থৌরম অমদা পাঙথোকখিবনি। কেন্দ্র মন্ত্রী শ্রী কিরেন রিজিজু, অরুনাচল প্রদেশ, হিমাচল প্রদেশ, পঞ্জাব, সিক্কিম অমসুং উত্তরাখন্দগী মুখ্য মন্ত্রীশিং, জম্মু অমসুং কশ্মিরগী লেফতেনেন্ত রাজ্যপালগা লোয়ননা পার্লিয়ামেন্তকী মেম্বরশিং, সিবিল/মিলিতরীগী মীওইশিংগা লোয়ননা মরী লৈনবা রাজ্য/য়ু.তি.শিংগী তোঙান তোঙানবা মফমশিংগী মীয়াম্না ভিদিও লিঙ্ক অমগী খুত্থাংদা থৌরম অদুদা শরুক য়াখি।  

ঙাক-শেল মন্ত্রীনা মহাক্কী ৱারোলদা বোর্দর রোদস ওর্গনাইজেসন (বি.আর.অ.)গী দি.জি. অমসুং রেঙ্ক খুদিংগী থৌমীশিংবু মখোয়গী মাই-পাকপা থৌওং অসিগীদমক্তা থাগৎখি অমসুং অমুক্তদা থোং ৪৪বু লৈবাক্তা শিন্নবা অসি মমাংদা অমুক্তা তৌখিদ্রিবা থৌওংনি হায়খ্রে। শ্রী রাজনাথ সিংহনা হায়খিবদা কোবিদ-১৯গী লুরবা মতম অসিগী মনুংদা অমসুং পাকিস্তান অমসুং চাইনানা ঙমখৈদা চমম্নবা অমসুং অয়েৎপা থৌওং কয়া থোকহল্লবসু লৈবাক অসিনা প্রধান মন্ত্রী শ্রী নরেন্দ্র মোদীগী লুচিং মখাদা মখোয়শিং অসিবু থেংননবা খোঙফম চেৎপদা নত্তনা সেক্তর খুদিংদা চাউখৎপা পুরকপগী পুৱারী ওইরবা অহোংবা কয়া পুরক্লি হায়খি।

বি.আর.ও.না বোর্দরগী ইনফ্রাস্ত্রকচরশিং ফগৎহন্নবা পাঙথোক্লিবা থৌদাংশিং অসিবু থাগৎপা ফোঙদোক্লদুনা শ্রী রাজনাথ সিংহনা হায়খিবদা মসিগী থোংশিং অসিনা নোংচুপ, অৱাং অমসুং অৱাং-নোংপোক থংবা সেক্তরগী মনুং হঞ্জীন্না লৈবা মফমশিংবু হেন্না নীংথিজনা শম্নহন্দুনা মফমশিগী মীয়ামগী অপাম্বশিংবু মনিং থুংহল্লে হায়খি।

ঙাক-শেল মন্ত্রীনা থোং অমসুং শোরোকশিং অসিনা লৈবাক অমগী লাইফলাইন ওইরিবনি অমসুং মনুং হঞ্জীনবা মফমশিংগী সোসিও-ইকোনোমিক্কী ফিভমশিং চাউখৎহনবদা মরু ওইবা থৌদাং লৌরি হায়খি। ঙমখৈগী মফমশিং চাউখৎহনবা হায়দুনা কেন্দ্র সরকারনা খোঙফম চেৎনা লেপ্লিবা অসিবু নৌহৌননা নীংশিংলদুনা মহাক্না হায়খিবদা প্রোজেক্ত খুদিংগী হৌজিক্কী ওইরিবা ফিভম অসি চাং নাইনা য়েংশিল্লি অমসুং মতম চানা লোইশিনবা ঙম্নবা মতিক চাবা শেনফমশিংসু পীরি হায়খি।

মহাক্না হায়খিবদা বি.আর.ও.দা ইং ২০০৮-২০১৬দা লুপা করোর ৩৩০০ দগী ৪৬০০ ফাওবগী অহোংবা লৈবা চহিগী ওইনা কাইথোক্লিবা শেনফম অসি ইং ২০২০-২১দা মশক থোক্না হেনগত্তুনা লুপা করোর ১১,০০০ য়ৌখ্রবনি হায়খি। কোবিদ-১৯ লৈজরবসু মসিগী শেনফম অসিদা হন্থবগী ৱাফমদি লৈতে।

ঙাক-শেল মন্ত্রীনা বি.আর.ও.গী ইঞ্জিন্যার অমসুং থৌমীশিংদা সরকারনা অৱাংবা মফমদা শেৎ-চানবা ফিরোলসু য়েন্থোকখ্রে হায়না লাওথোকখি।

শ্রী রাজনাথ সিংহনা অরুনাচল প্রদেশকী তৱাং চৎপগী লম্বীদা লৈবা স্ত্রেতজিক অমসুং মরু ওইবা নেচিফু শুরুংগী উরেপ উয়ুংসু তমখ্রে। মসিগী মীতর ৪৫০ শাংবা, লেন অনি ওইবা শুরুং অসিনা অইং-অশাগী ফিভম খুদিংদা নেচিফু পাসকী মফমশিং শম্নহনগনি অমসুং খুদোংথীবা য়াম্না থোক্কনবা মফম অসিদা তেক্ত-কায়দবা অমসুং শাফবা লম্বী অমা পীগনি।

থৌরম অদুদা শরুক য়ারিবা মরু-ওইবা মীওইশিংদা ৱা ঙাংবদা লেফতেনেন্ত জেন. হরপাল সিংহ, দি.জি. বি.আর.ও.না হায়খিবদা মীতর ৩০দগীনা মীতর ৪৮৪ ফাওবা শাংবা তোঙানবা ময়ুংগী থোং ৪৪ অসি জম্মু অমসুং কশ্মির (১০), লদাখ (৮), হিমাচল প্রদেশ (২), পঞ্জাব (৪), উত্তরাখন্দ (৮), অরুনাচল প্রদেশ (৮) অমসুং সিক্কিম (৪)দা লৈবনি হায়খি। মখোয়শিং অসি স্ত্রেতজীগী হীরমদা য়াম্না মরু ওইবা ঙাক্তনি অমসুং মসিনা ঙমখৈগী মফমশিংদা সিবিল অমসুং মিলিতরী ত্রাফিক ময়াম অমা চত্থোক-চৎশিন তৌহনবা ঙম্নবা মওংদা শেম-শাবনি। প্রধান মন্ত্রী শ্রী নরেন্দ্র মোদীগী মীৎয়েং অসিগী মরী লৈননা মসিগী থোংশিং অসিনা মনুং হঞ্জিনবা মফমশিং অসিগী শেন্মিৎলোনগী মপুং ওইবা শাহৌ লৌবা ঙমহনবদা তেংবাংগনি অমসুং মসিনা স্ত্রেতজীগী ওইনা য়াম্না মরু ওইবা সেক্তরশিংদা আর্ম্দ ফোর্সশিং মীওইশিং অথুবা খোঙজেলদা য়ৌহনবদসু তেংবাংগনি।

মহাক্না হায়খিবদা শোরোক শেম্বগী থবক পাঙথোকপগী মথক্তা বি.আর.ও.না থোং শাবগী হীরমদসু অহেনবা মীৎয়েং চংদুনা মমাং চহিদা মরু ওইবা থোং ২৮ শাবা লোইশিনখি অমসুং হন্দক্কী চহিসিদা মরু ওইবা থোং ১০২ শাবা লোইশিন্নবা হোৎনরি। মসিগী মনুংদগী থোং ৫৪দি শাবা লোইরবনি। আর্ম্দ ফোর্স অমসুং মনুং-হঞ্জিন্না লৈবা মীওইশিংগী খুদক্কী ওইবা তঙাই ফদবশিং থেংনবা ঙম্নবা হায়দুনা বি.আর.ও.না বেলী থোং ৬০ হেন্নসু শাখ্রে।

হৌজিক চৎলিবা কোবিদ-১৯গী লায়চৎকী মনুংগী ওইবা অথিংবা কয়া লৈরবসু বি.আর.ও.না মরু ওইবা থোং অমসুং লম্বী-শোরোক শাবা, অতল শুরুং, রোহতাং সেলা শুরুংনচিংবা অমসুং স্ত্রেতজিক ওইবা চীঙজাউগী পাসশিং হাংদোক্নবা উন কোৎপগী থৌওং কয়া লেপ্তনা চত্থরি।

চহি ৬০গী মনুংদা অমুক্তা তাখিদ্রিবা মওংদা উন তাখিবগী থৌওং কয়া থোক্লবসু স্ত্রেতজিক ওইনা মরু ওইবা পাস অমসুং শোরোকশিং অসি চহিগী ওইনা চত্থোক-চৎশিন তৌবা য়াবগী মতমগী চাংচত্তগী থা অমামুক্কী মমাংদগী হান্না হাংদোকপা ঙমহনখি। মসিনা ঙমখৈগী মীয়ামদা য়াম্না নুংঙাইহনখি অমসুং লান্মীশিং অমসুং পোত্থোক-পুথোক নীংথিজনা চত্থোক-চৎশিন তৌবসু য়াহনখি। 

*****