উন্সাগা মরী লৈনবা ভাইরসকী লায়নাশিংগী কেসশিংদা হোমিওপেথিনা অঙকপা কয়া পাংথোকপা ঙম্লে হায়না উৎপা ঙম্বা কয়া লৈরে। মসিগী মতাংদা নোর্থ ইস্তর্ন ইন্সতিতুৎ ওফ অয়ুর্বেদা এন্দ হোমিওপেথি, শিল্লোংগী রিছর্স জর্নেল অয়ুহোমদা হন্দক কেস স্তদি অমা ফোঙখ্রে। কেস স্তদি অদু কোলকাতা হোমিওপেথি মেদিকেল কোলেজ এন্দ হোস্পিতালগী ওর্গনন ওফ মেদিসি দিপার্তমেন্তগী রিদর সঙ্গিতা সাহ অমসুং প্রাক্তিস ওফ মেদিসিন দিপার্তমেন্তগী পোস্ত গ্রেজুয়েত ত্রেনি মহাকাস মন্দাল অমসুং নেসনেল ইন্সতিতুৎ ওফ হোমিওপেথি, কোলকাতাগী পোস্ত গ্রেজুয়েত ত্রেনি কৌসিক বারনা পুন্না ইবনি।

তোঙান তোঙানবা উন্সাগী লায়না মখল মঙাগী অনাবা লৈবা মীওই মঙা হোমিওপেথিনা লায়েংবদা ফগৎলকপা উখি অমসুং অসিগুম্বা উন্সাগী লায়নাশিং অসিদা হোমিওপেথি হিদাক্কী অফবা কান্নবশিং অদুগী থাজবা হেনগৎহল্লে।

উন্সাগী লায়নাশিং অসিনা ভারত খক নত্তনা মালেমগী ওইনা চহি কাংলুপ খুদিংমক্কী মীওইশিংদা মশিং য়াম্না অমসুং তোইনা থেংনবা হকশেলগী খুদোংচাদবা থোকহল্লি। গ্লোবেল বর্দন ওফ দিজিজ প্রোজেক্কী মতুংইন্না উন্সাগী লায়নাশিং অসি মালেম শীনবা থুংনা শিনিংঙাই ওইদবা লায়নাশিং নাহনবগী ৪সুবা খ্বাইদগী চাউবা মরম ওইরি হায়রি। হোমিওপেথিগী অখঙ-অহৈশিংগী মতুংইন্না য়াম্না তোইনা থেংনবা ভাইরসকী উন্সাগী লায়নাশিং অসি হোমিওপেথিনা লায়েংবনা মশিং য়াম্লবা মীয়ামদা মমল হোংবা অমসুং অফবা লাইয়েং ফংহন্নবগী অচৌবা অহোংবা অমা ওইগনি হায়রি।

কেস স্তদি অদু ৱার্ত, হার্পস জোস্তর অমসুং মোল্লুস্কান কন্তাজিওসম অনাবা মীওই মঙাদা পাংথোকখি। স্কিন ৱার্তশিং অসি কেরাতিনোসাইদশিং শোকপদগী থোকহনবা বেনাইন তুমরশিংনি। চিক্কনপোক্সসু থোকহনবা ভারিসেল্লা-জোস্তর ভাইরস অমুক হিঙ্গৎলকপদগী হার্পস জোস্তর থোকহল্লি। অমরোমদা, মোল্লুস্কান কন্তাজিওসম অসি পোক্স ভাইরসনা থোকহনবা ভাইরসকী উন্সাগী অনাবনি অমসুং মসি মরুওইনা অশাবা মফমদা লৈবা মালেমগী অঙাংশিংদা তোইনা নাগল্লি। হোমিওপেথিনা অনাবশিং লায়েংবনি, লায়না লায়েংবা নত্তে হায়বা মীয়াম্না খঙনরে। হায়রিবা উন্সাগী লায়নাশিং অসি হোমিওপেথি লায়েংগী মতুংইন্না হিদাকশিং চাদুনা লায়েংলে। মসিগী ফলশিং য়াম্না পুক্নিং থৌগৎনিঙাই ওইরে।

ওর্গনন ওফ মেদিসিনগী চৎন-পথাপশিংগী মতুংইন্না হিদাকশিং থারবা মতুংদা অমসুং অনাবা মীওই অমদা তোঙান তোঙানবা তাঙ্ককশিংদা, হিদাকশিং অদুনা উন্সাগী অনাবশিং ফহনবতা নত্তনা অনাবা মীওই অদুনা থেংনবা লাইওংশিংসু ফহল্লে। লায়েংলিঙৈ মনুংদা অনাবশিংনা অতোপ্পা অনাবশিং থেংনবগী ৱাকৎ অমতা লাক্তে।

কেস স্তদি অসি পাইলোৎ প্রোজেক অমনি। ভাইরসনা থোকহনবা উন্সাগী লায়নাশিং লায়েংবদা হোমিওপেথিগী ফহনবা ঙম্বগী শক্তি অদু চপ চানা খঙবা ঙম্নবা মথংগী তাঙ্কক্তা অনাবা মীওই মশিং য়াম্না চাংয়েং পাংথোকপা য়াগনি।

*****