ভিদিও কনফরেন্সকী খুৎথাংদা শ্বামিত্ব স্কিমগী মখাদা প্রোপর্তি কার্দশিং য়েন্থোকপা প্রধান মন্ত্রী শ্রী নরেন্দ্র মোদীনা হৌদোকখ্রে অমসুং য়োজনা অসিগী মখাদা কান্নবা ফংলবশিংগা ৱারি শানখ্রে।

ঙসি মখোয়গী য়ুমশিংগী প্রোপর্তি কার্দশিং ফংলবা ‘শ্বামিত্ব স্কিম’গী কান্নবা ফংলবশিংদা প্রধান মন্ত্রীনা য়াইফ-পাউজেল পীখ্রে অমসুং মহাক্না হায়খি হৌজিক কান্নবা ফংলবশিংগী হক অমা, মখোয়গী য়ুমশিংগী আইনগী ওইবা চে-চাং অমা ফংলগনি। য়োজনা অসিনা লৈবাক অসিদা পুৱারি ওইরবা অহোংবা অমা পুরক্লগনি। য়োজনা অসিনা মশাগী ওক্নবা পুথোকচবা ভারতকী খুঙ্গং শেমগৎপদা মতেং পাংদুনা, অত্মনির্ভর ভারত অমগীদমক লৈবাক অসি অতোপ্পা অচৌবা খোঙথাং অমা থাংজিল্লগনি।

মহাক্না হায়খি ঙসি হরিয়ানা, কর্নাতাকা, মৈধ্য প্রদেস, মহারাস্ত্রা, উত্তরখান্দ অমসুং উত্তর প্রদেসকী কান্নবা ফংলবা মীওই লাখ ১দা মখোয়গী য়ুমশিংগী আইনগী ওইবা চে-চাংশিং খুৎশিন্নখ্রে অমসুং লৈবাক অসিগী খুঙ্গং খুদিংদা মথং চহি ৩-৪দা য়ুমথোঙ খুদিংদা অসিগুম্বা প্রোপর্তি কার্দশিং পীনবা ৱাশক্লি।

অচৌবা লুচিংবা অনি, জয় প্রকাস নরায়ন অমসুং ননাজি দেসমুখকী মপোক নুমিৎশিংদা প্রোপর্তি কার্দশিং য়েন্থোকপদা প্রধান মন্ত্রী হরাওবা ফোঙদোকখি। মহাক্না হায়খি অচৌবা মীওই অনি অসিগী মপোক নুমিৎশিং চপ মান্নবা তারিক্তা তাবা খক নত্তনা মখোয়গী লান্থেং অমসুং ফিদমশিংসু মান্নৈ। ভারতকী খুঙ্গং অমসুং লায়রবশিং শক্তি পীনবা ননাজি অমসুং জে.পি অনিমক মখোয়গী মপুন্সি চুপ্পা লান্থেংনখি।

“খুঙ্গংগী মীয়াম ৱাথোকশিংদা চপতুনা লৈরবা মতমদা, মখোয়না মখোয় মশামক অমসুং খুন্নাই চাউখৎহনবা ঙম্লোই” হায়বা ননাজিগী ৱাহৈশিং নিংশিংলদুনা শ্রী মোদীনা হায়খি লন-থুমগী মপু ওইহনবা অসিনা ঐখোয়গী খুঙ্গংশিংদা লৈরিবা ৱাথোকশিং লোইশিন্নবা অচৌবা পাম্বৈ অমা ওইরগনি।

প্রধান মন্ত্রীনা হায়খি লম অমসুং য়ুমগী মপু ওইহনবা অসিনা লৈবাক অসি চাউখৎনবা মরুওইবা থৌদাং অমা লৌরে। লন-থুমগী রেকোর্দ অমা লৈবা মতমদা মীয়াম থাজবা হেনগৎহল্লে অমসুং শেন থাদনবগী অনৌবা খুদোংচাবশিং লৈহল্লে। লন-থুমগী রেকোর্দশিং শীজিন্নদুনা বেঙ্কতগী লাইনা লোন লৌবা য়ারে, থবক ফংবা অমসুং ইশানা ইশাবু থবক পীজবগী খুদোংচাবশিং লৈরে। অদুবু খুদোংথিবদি ঙসি মালেম অসিদা অপুনবা মীশিংগী শরুক অহুম থোকপগী শরুক অমা খক মখোয়গী লন-থুমগী আইনগী ওইবা রেকোর্দ লৈরে। 

মহাক্না মখা তানা হায়খি খুঙ্গংশিংদা য়েৎনবা অমতা লৈতনা লন-থুম লৈবা অমসুং য়োনবগী নাখৈ শেংলবা লম্বী প্রোপর্তি কার্দনা পীরগনি। ঙসিদি খুঙ্গংদা নহারোল কয়া মখোয় মশাগী ওইবা করিগুম্বা খরা পাংথোকপা পাম্লে। প্রোপর্তি কার্দ ফংলবা মতুংদা, মখোয়গী য়ুমশিং অদুনা বেঙ্কশিংদগী য়াম্না লাইনা লোন লৌরবা য়ারগনি। মেপ য়েকপা  অমসুং সর্ভেদা অনৌবা তেক্নোলোজিশিং হায়বদি দ্রোনশিং শীজিন্নদুনা খুঙ্গং খুদিংগী লমগী রেকোর্দশিং চপ চানা শেম্বা ঙম্লগনি। অচুম্বা লমগী রেকোর্দশিং অসিনা মরম ওইদুনা, খুঙ্গংশিংদা চাউখৎ-থৌরাংগী থবকশিং পায়খৎপা লাইরগনি, মসিনা হায়রিবা প্রোপর্তি কার্দশিংগী অতোপ্পা কান্নবা অমা ওইরগনি।

প্রধান মন্ত্রীনা হায়খি ‘শ্বামিত্ব স্কিম’ অসিনা হৌখিবা চহি ৬ অসিদা থবক পায়খৎতুনা লাক্লিবা পঞ্চায়তি রাজগী থবকশিং মপাঙ্গল কনখৎহনবদা মতেং পাংলগনি। হৌখিবা চহি ৬ অসিদা গ্রাম পঞ্চায়ৎশিং মপাঙ্গল কনখৎহন্নবা পায়খৎলিবা থবকশিং পল্লদুনা মহাক্না হায়খি মিউনিসিপালিতিশিং অমসুং মিউনিসিপাল কোর্পোরেসনশিংগুম থবক ফজনা পাংথোক্নবা, শ্বামিত্ব স্কিম অসিনা ঐখোয়গী গ্রাম পঞ্চায়ৎশিংনা খুঙ্গংগী থবক লাইনা পাংথোকপা ঙমহনগনি। খুঙ্গংশিংদা মতম কয়াগী মমাংগী লৈরক্লবা অৱাৎপশিং লৈহন্দনবা হৌখিবা চহি ৬ অসিদা মখা তানা থবকশিং পায়খৎলে।  

মহাক্না হায়খি নিংতম্বা ফংবদগী হৌখিবা চহি ৭০ অসিদা পাংথোকখিদ্রিবা মমাংদা অমুক্তা ওইখিদ্রিবা চাংগী চাউখৎ-থৌরাংগী থবকশিংদা হৌখিবা চহি ৬ অসিদা খুঙ্গংশিংদা পায়খৎলে। হৌখিবা চহি ৬ অসিদা খুঞ্জাশিং বেঙ্ক একাউন্ত হাংলে, মৈ ফংহল্লে, তোইলেৎ ফংলে, গ্যাস ফংলে, চেক্কী য়ুম অমা ফংলে অমসুং থক্নবা তোতি ঈশিং শম্লে। লৈবাক অসিগী খুঙ্গং খুদিংমক ওপ্তিকেল ফাইবর শম্নবা অচৌবা খোঙজং অমা য়াম্না য়াংনা পায়খৎলি।

ওপোজিসন চৈরদুনা প্রধান মন্ত্রীনা হায়খি ঐখোয়গী লৌমীশিং মশাগী ওক্নবা পোৎথোক পুথোকপা পামদবশিংনা লৌউ-শিংউগী লমদা অহোংবা পুরকপদা অয়েৎপা পীরে। অপীকপা লৌমীশিং, শন লোইবশিং অমসুং ঙামীশিংদা কিসান ক্রেদিৎ কার্দ পীবদগী, ব্রোকরশিং অমসুং মিদলমেনশিং খুদোংচাবা ফংদ্রে, মখোয়গী আইন্না য়াদবা শেন্থোক লেপখ্রে। নিম তৈরবা য়ুরিয়া ফংহনবা, লৌমীশিংগী বেঙ্ক একাউন্তশিংদা দাইরেক্ত বেনিফিৎ ত্রান্সফরগী থবকশিং অসি পায়খৎপদগী নারোলদা লৌথোকপা লেপখ্রে অমসুং নারোলদা লৌথোকপা থিংখিবদগী শোকহল্লবা মীওইশিং অদুনা ঙসি লৌউ-শিংউগী অওনবশিং পুরকপদা অথিংবা পীরে। মখোয়না মরম ওইদুনা লৈবাক অসিগী চাউখৎ-থৌরাং লেপ্লোই অমসুং খুঙ্গংশিং অমসুং লায়রবশিং মশা মরোমদোম হিংজবা ঙম্নবা মখা তানা থবক পায়খৎকনি। মসিগী ৱারেপ অসি থবক ওইনা পাংথোকপদা ‘শ্বামিত্ব স্কিম’গী থৌদাংসু য়াম্না মরুওই ।  

*****