ওলিম্পিক কোর গ্রুপ সুতরশিংগী থা অনিগী কোচিং কেম্প নই দিল্লীদা লৈবা দোক্তর কর্নি সিংহ সুতিং রেঞ্জতা ওক্তোবর ১৫ দগী দিসেম্বর ১৪ ফাওবা পাঙথোক্লগনি‍।

কেম্প অদুদা সুতর ৩২ (নুপা ১৮ অমসুং নুপী ১৪), কোচ ৮, মপান লমগী কোচ ৩ অমসুং সপ্পোর্ত স্তাফ অনি য়াওরি‍। ওলিম্পিক কোতা ফংলবা ১৫মক পুন্না লুপা করোর ১.৪৩ চঙনা শীনগদৌরিবা কেম্পা অসিদা শরুক য়াগনি‍।

“কেম্প হায়বসি ওলিম্পিককুম্বা থৌরম অমগী শেম শাবগী নুংগী ওইবা শরুক অমা ওইবা মরম্না মসি শীনবসি মতৌ তাই‍। কেম্প অসি সাইগী এস.ও.পি. ইন্দুনা পাঙথোক্কদবনি,” হায়না স্পোর্তস ওথোরিতী ওফ ইন্দিয়ানা চেরোল অমদা হায়রি‍।

২০১৮ ৱর্ল্দ চেম্পিয়নসিপ্তা লুপাগী মেদল ফংদুনা তোকিয়ো ওলিম্পিক কোতা ফংখ্রবা রাইফল সুতর অঞ্জুম মৌদগিলনা মহাক্না লৈরিবা ফীভম য়েংশিনগদবা কেম্প এনভাইরনমেন্ত অমদা অমুক হঞ্জিল্লকপদা নুংঙাইবা ফোঙদোক্লদুনা হায়খিবদা, “ওলিম্পিক থা ১০খক্তা ঙায়রবা মতমসুদা ঐখোয়দা মথৌ তাবা প্রেক্তিসকী খুদোংচাবা পীগদৌরিবা কেম্প অসি সাই অমসুং এন.আর.এ.আই.না শীন্বিরকপসি য়াম্না ফৈ‍। কেম্প এনভাইরনমেন্ত অমদা চাং নাইনা নোংমৈ কাপ্পা তম্বনা ঐখোয়না লৈরিবা খোঙফম অসিগী মতাঙদা ঐখোয়দা হেন্না ময়েক লাবা মশক অমা উবা ফংহনগনি‍।”

সুতরশিং অসি কোরোনাভাইরস লাইচৎকী মতমসিদা মখোয়গী হোম রেঞ্জতা প্রাক্তিস তৌদুনা লাকপনি অমদি মসিনা লোকদাউন লাউথোকখ্রবা মতুংদগী ওলিম্পিক কোর গ্রুপগী অহানবা মপুং ফাবা কেম্প ওইগদৌরিবনি‍। কেম্প অসিদা লৈবাক্কী তীম কোচনা মখোয়গী ফীভম য়েংশিনবনা শান্নরোয়শিং অদুনা মখোয়গী ওলিম্পিক্কী শেম শাবদা মতেং ওইগনি‍।

নুপাগী মিতর ১০গী এয়র রাইফলদা মালেমগী মকোক ওইরিবা দিব্যন্স সিংহ পনৱরনা নেসনেল কোচশিং য়াওগদৌরিবা কেম্প অসিদা হল্লকপা খৌরাংনা ঙাইরি, “লোকদাউন মনুংসিদা ঐ ত্রেনিং তৌজরবসু, কেম্প অমদা সুতর মরূপ মপাঙশিংগা পুন্না ত্রেনিং তৌমিন্নবনা অমদি নেসনেল কোচশিংনা ঐখোয়গী ফীভম য়েংশিন্দুনা লৈবনা মসিনা শেম শারিবা অসিগীদমক্তা য়াম্না হেন্না অফবা ওইগনি‍। ঐ কেম্প অসি য়াওননবা ঙাইদুনা লৈরি‍।”

কেম্প অসিগী মতাঙদা ৱা ঙাঙলদুনা, নেসনেল রাইফল এসোসিএসন ওফ ইন্দিয়া মিস্তর রানিন্দর সিংহনা হায়খিবদা, “ঐখোয়গী সুতরশিং লোকদাউন মনুংদা য়ুমদা ত্রেনীং তৌদুনা লাক্লি অদুবু কেম্প অমদা পুন্না ত্রেন তৌবনা মখোয়দা হেন্না মতেং ওইগনি‍। লোকদাউন মমাঙদা লৈরমবা মখোয়গী পর্ফোর্মেন্সকী চাং ফংবা ঙম্নবা হোৎনবদা ঐখোয়গী সুতরশিংদা মতেং ওইগদবা থা অনিগী ত্রেনিং কেম্প অসি সাইনা অয়াবা পীবিরকপসি ঐখোয় য়াম্না নুংঙাই‍।”

ভারতনা রেকোর্দ ওইনা তোকিয়ো ওলিম্পিক্সকীদমক কোতা ১৫ ফংখি অমদি মালেমগী রেঙ্কিংগী মখা পোন্না কোতা মখা তানা ফংবা য়ারি‍।

*******