‘ভাৰতীয় বতৰ বিজ্ঞান বিভাগ’(আইএমডি)য়ে যোৱা ৬ অক্টোবৰত বিভাগটোৰ সঞ্চালক প্ৰধান ড০ মৃত্যুঞ্জয় মহাপাত্ৰৰ অধ্যক্ষতাত ‘অনলাইন’ ব্যৱস্থাৰে প্ৰাক-ঘূৰ্ণী সম্পৰ্কীয় এখন সভা অনুষ্ঠিত কৰে। সভাত আগন্তুক সময়ৰ বাবে চলোৱা বিভাগটোৰ প্ৰস্তুতি পৰ্যালোচনা কৰাৰ লগতে প্ৰয়োজনীয় সা-সামগ্ৰীৰ সমীক্ষা কৰাৰ উপৰি অক্টোবৰ-ডিচেম্বৰ ২০২০ত আহিব পৰা ধুমুহা-পৰিস্থিতিৰ বাবে পৰিকল্পনা যুগুতোৱা হয়। সভাত ‘আইএমডি’-ৰ তৰফৰ পৰা সংশ্লিষ্ট পক্ষসমূহৰ মাজত নতুনকৈ গ্ৰহণ কৰিব খোজা পদক্ষেপ সন্দৰ্ভত তথ্যৰ বিনিময়ো কৰা হয়।

সভাখনত ‘আইএমডি’-ৰ বিশেষজ্ঞসকলৰ উপৰি ‘নেশ্যনেল চেণ্টাৰ ফৰ মিডিয়াম ৰেঞ্জ ৱে’ডাৰ ফ’ৰকাষ্টিং’(এনচিএমআৰডব্লিউএফ), ‘ভাৰতীয় বায়ু সেনাবাহিনী’(আইএএফ), ‘ভাৰতীয় নৌ-সেনাবাহিনী’(আইএন), ‘চেণ্ট্ৰেল ৱাটাৰ কমিশ্যন’(চিডব্লিউচি), ‘আইআইটি-দিল্লী’, ‘ইণ্ডিয়ান নেশ্যনেল চেণ্টাৰ ফৰ অ’চেন ইনফৰ্মেশ্যন ছাৰ্ভিচ’(আইএনচিঅআইএছ), ‘নেশ্যনেল ডিজেষ্টাৰ মেনেজমেণ্ট এজেন্সী’(এনডিএমএ), ‘নেশ্যনেল ডিজেষ্টাৰ ৰেচপঞ্চ ফ’ৰ্চ’(এনডিআৰএফ), মীন বিভাগ, ‘পাংচুৱেলিটী চে’ল’, আৰু ‘ভৰতীয় ৰে’লৱে’-ৰ প্ৰতিনিধিবৰ্গই অংশগ্ৰহণ কৰে।

সভাত ভাষণ প্ৰদান কৰি ‘আইআমডি’-ৰ সঞ্চালক প্ৰধান ড০ মৃত্যুঞ্জয় মহাপাত্ৰই ধুমুহাকালীন পৰিস্থিতিৰ আগতীয়া জাননীৰ পৰা ই সৃষ্টি কৰিব পৰা সংকট আৰু ইয়াৰ পৰিত্ৰাণৰ বাবে গ্ৰহণ কৰিব পৰা বিধি-ব্যৱস্থাসমূহৰ উত্তৰণ আদি প্ৰসংগত আলোকপাত কৰে। প্ৰসংগক্ৰমে তেওঁ শেহতীয়াকৈ ধুমুহাৰ গতিবিধি অনুসৰণ, ভূমিপতন, তীব্ৰতা আৰু মুষলধাৰ বৰষুণ, প্ৰচণ্ড ধুমুহা, ঘূৰ্ণীৰ দৰে প্ৰতিকূল বতৰৰ আগলি বতৰা দিয়াৰ ক্ষেত্ৰত ‘আইআমডি’-য়ে উল্লেখনীয় উত্তৰণ সাধন কৰিবলৈ সক্ষম হৈছে বুলি অভিমত ব্যক্ত কৰে।

সভাত ‘আইএমডি’-ৰ ‘চাইক্লোন ৱাৰ্নিং ডিভিজন’ৰ মূৰব্বী শ্ৰীমতী সুনীতা দেৱীয়ে শেহতীয়া বছৰচেৰেকত বতৰৰ আগলি বতৰা দিয়াৰ বাবে গ্ৰহণ কৰা বিভিন্ন উদ্যোগ আদিৰ লগতে ভৱিষ্যতৰ পৰিকল্পনা সন্দৰ্ভত এক তথ্যগধুৰ ব্যাখ্যা দাঙি ধৰে।

*****

NB/KGS/(IMD inputs)/KB