ইনকম তেক্স দিপার্তমেন্তনা থবক লৌখৎপা য়াবা ঈ-পাউ ফংবদগী মাইনিং অমসুং হোতেল ইন্দস্ত্রীগী লল্লোন ইতিক্কী লমদা থবক পায়বা মীওই অমগী মরমদা পত্না, সসরম অমসুং ভরানসিদা ০৬-১০-২০২০দা থিবা হুম্বগী থবক চত্থদুনা পোৎ-চৈ ফাগৎখি‍। অচৌবা কোওপরেতিব বেঙ্ক অমগী চেয়রমেন অমগী মরমদসু থিবা হুম্বগী থবক চত্থখি‍।

থিবা হুম্বগী থবক অদুদা হায়রিবা মীশক অসিগী কার অমদগী লুপা লাখ ৭৫গী শেনফম ফংখি‍। মখা তারকপা থিজিন হুমজিনবা চত্থবদা হায়রিবা শেনফম অসি মরী মখোঙ লৈতবনি অমদি কোওপরেতিব বেঙ্ক অমগী চেয়রমেনগা মরী লৈনৈ হায়বা ফংবা ঙমখি‍। থিখিবা অদুদা মরী মখোঙ লৈতবা শেনফম অমসুং মশীং য়াম্লবা কেস ত্রাঞ্জেক্সনগী চে-চাংশিং ফংদুনা ফাগৎখি‍। হায়রিবা ত্রাঞ্জেক্সনশিং অসি রিতর্ন ওফ ইনকমদা পল্লমদে‍।

আই.তি. দিপার্তমেন্তনা মীশক অসিগী য়ুম কৈ, হোতেলশিং অমদি য়াম্লবা গারীশিংদা শেন থাদবসু থিগৎলি‍। থিবদা ফংখিবা চে-চাংশিং অদুনসু কাঙবু অদুনা মরী মখোঙ লৈতবা অমদি আইন্না য়াদবা মওংদা নুং পেকপগী থবক চত্থৈ হায়বসু তাক্লি‍। মখা তানা, একাউন্ত বুকশিংদা লুপা করোর কয়াগী ক্রেদিতশিং য়াওরমবা থেংনখি অমদি মদুশিংদুগী মরী মখোঙ থিজিল্লি‍।

মরী মখোঙ লৈতবা অপুনবা শেনফম লুপা করোর ১.২৫ ফাগৎখি‍, অদুগা লুপা করোর ৬গী ওইগদবা এফ.দি.আর.শিংসু থিংজিন্দুনা থমখ্রে‍।

মখা তানা থিজিন হুমজিনবগী থবক চত্থরি‍।

****