কেন্দ্রগী মাইনোরিতী এফিয়র্স মন্ত্রী শ্রী মুখতার অব্বাস নাকবিনা ঙসি মফম অসিদা হায়খিবদা শোত্থরবা অমসুং মাইনোরিতী য়াম্না লৈবা মফমশিংদা পুৱারীদা অহানবা ওইনা লৈবাক শিনবা থুংবগী ওইনা জৱাহর নবোদয়া ভিদ্যালয় ৯৯ কেন্দ্রগী এজুকেসন মন্ত্রালয়না শাগনি হায়খ্রে। অমসুং মসিগী জে.এন.ভি. অয়াম্বদি কেন্দ্রগী এজুকেসন অমসুং মাইনোরিতী এফিয়র্স মন্ত্রালয় অনিনা খুৎশম্নদুনা শারি।

শ্রী নাকবিনা কেন্দ্রগী এজুকেসন মন্ত্রী শ্রী দাঃ রমেশ পোখ্রিয়াল ‘নিশাঙ্ক’কা লোয়ননা ঙসি ভিদিও কনফরেন্সিংগী খুত্থাংদা ঝারখন্দগী পাকুরদা অনৌবা জৱাহর নবোদয়া ভিদ্যালয় অমগী উরেপ উয়ুং তমখ্রে। মসিগী স্কুল অসি “প্রধান মন্ত্রী জন বিকাস কারয়ক্রম” (পি.এম.জে.ভি.কে.)গী মখাদা মাইনোরিতী এফিয়র্স মন্ত্রালয়না শাবনি।

শ্রী নাকবিনা হায়খিবদা কেন্দ্রগী এজুকেসন অমসুং মাইনোরিতী এফিয়র্স মন্ত্রালয়না পুন্দুনা নোঙচুপ বেঙ্গোলগী উত্তর দিনাজপুর অমসুং হৌরাদা; অরুনাচল প্রদেশকী নোংচুপ কামং; মনিপুরগী মমিত্তা জৱাহর নবোদয়া ভিদ্যালয় ৪ শাগনি হায়খি। মসিগী স্কুলশিং অসি শানবা মাইনোরিতী এফিয়র্স মন্ত্রালয়না লুপা করোর ২৪৪গী তেংবাং পীগনি। মসিগী মথক্তা মাইনোরিতী এফিয়র্স মন্ত্রালয়না এজুকেন মন্ত্রালয়গা পুন্দুনা অতোপ্পা মফমশিংদসু জৱাহর নবোদয়া ভিদ্যালয় কয়া অমা শাগনি।

শ্রী নাকবিনা হায়খিবদা মাইনোরিতী এফিয়র্স মন্ত্রালয়না শোত্থবা অমসুং মাইনোরিতী য়াম্না লৈবা মফমশিংগী জে.এন.ভি.শিংদা স্মার্ত ক্লাসরুম ১১৭৩ লৈহন্নবা লুপা করোর ৩৬কী শেম্ফম পীখ্রে হায়খি।

শ্রী নাকবিনা হায়খিবদা মসিগী জৱাহর নবোদয়া ভিদ্যালয়শিং অসিনা লৈবাক অসিগী খুঙ্গংদগী লাকপা অমসুং শোত্থরবা অমসুং মাইনোরিতীগী কাঙলুপকী মহৈরোয়শিংদা মগুন লৈবা অমসুং শেল পুথোকপা ঙম্বা মহৈ-তম্বগী কান্নবা ফংহনবদা মরু ওইবা থৌদাং লৌগনি হায়খি।

শ্রী নাকবিনা হায়খিবদা হৌখিবা চহি ৬কী মনুংদা প্রধান মন্ত্রী শ্রী নরেন্দ্র মোদীনা লুচিংবা সরকার অসিনা লৈবাক অসিগী শোত্থরবা, মীরায়বীরবা অমসুং মাইনোরিতী য়াম্না লৈবা মফমশিংদা “প্রধান মন্ত্রী জন বিকাস কারয়ক্রম”গী মখাদা সোসিও-ইকোনোমিকেল-এজুকেস্নেল অমসুং থবক পীবগী থৌওংদা মিৎয়েং চঙবা ইনফ্রাসস্ত্রকচর কয়া অমা শেমগৎখ্রে হায়খি।

শ্রী নাকবিনা হায়খিবদা খুন্নাই অসিদা লৈরিবা লৈত-লায়রবা মীওই খুদিংদা মান্নবা খুদোংচাবা পীনবা হায়দুনা স্কুল, কোলেজ, হোস্পিতাল, কম্ম্যুনিতী সেন্তর, কম্মন সর্ভিস সেন্তর, আই.তি.আই., পোলীতেক্নিক, নুপীশিংগী হোস্তেল, সদভাবনা মান্দপ, হুনর হবনচিংবা য়াওনা ইনফ্রাস্ত্রকচর প্রোজেক্ত ৩৪০০০ অসি লৈবাক অসিগী শোত্থরবা, মীরায়বীরবা অমসুং মাইনোরিতী য়াম্না লৈবা মফমশিংদা “প্রধান মন্ত্রী জন বিকাস কারয়ক্রম”গী মখাদা হৌখিবা চহি ৬কী মনুংদা পাঙথোকখ্রে হায়খি। ইং ২০১৪গী মমাংদা অসিগুম্বা প্রোজেক্ত ২২০০০ খক্তং থবক ওইনা পাঙথোকখি। ইং ২০১৪গী মমাংদা মাইনোরিতী খুন্নাইগী চাউখৎনবা হায়দুনা লৈবাক অসিগী জিলা ৯০খক্তং মশক খঙলম্বা অদু মোদী সরকারনা লাক্লবা মতুংদা পাকথোক-চাউথোক্তুনা প্রোগ্রাম অসিগী ওইনা লৈবাক অসিগী জিলা ৩০৮ শক-খঙখ্রে।

শ্রী নাকবিনা হায়খিবদা ইং ২০১৪গী মমাংদা মাইনোরিতী মহৈরোয় করোর ২গা লাখ ৯৪দা স্কোলার্শিপ পীরম্বা অদু মোদী সরকারনা লাক্লবা মতুংদা “ইনক্লুসিব ইম্পাৱর্মেন্ত”কী থৌওংদা মিৎয়েং চঙবা ওইনা হৌখিবা চহি ৬তা মাইনোরিতী মহৈরোউ করোর ৪গা লাখ ৬০দা স্কোলার্শিপ ফংহনখি।

শ্রী নাকবিনা হায়খিবদা মসিগী স্কোলার্শিপ স্কিম অসিগী বেনিফিশরীগী ৫০% হেনবদি নুপীমচাশিংনি হায়খি। ঐখোয়না পুন্না হোৎনমিন্নবদগী মাইনোরিতী মহৈরোয়শিংগী মরক্তা স্কুলদগী তোকপগী চাং অসি, মরু ওইনা নুপীমচাশিং, য়াম্না হন্থরে অমসুং লায়রবা ইমুংশিংগী মহৈরোয়শিংসু অফবা মহৈ-মশিং তম্বা ফঙলে।

*****