মহাত্মা গান্ধীগী মপোক কুমওন পাঙথোকপা ওইনা তুরিজম মন্ত্রালয়না দেখো অপ্না দেশ ৱেবিনার সেরিজকী মখাদা “চরখে পে চরচা” হায়বা ৱেবিনার অমা ওক্তোবর ২, ২০২০দা শিনখ্রে। ৱেবিনার অসিনা তরেং অমসুং খাদিদা মিৎয়েং চঙগনি। লৈবাক অসিগী ৱাখল্লোনগা মরী লৈনবা ফি অমা ওইরিবা খাদি অসিনা স্বরাজ্য অমসুং স্বভলম্বমগী মহুৎ শিল্লিবনি।  লোয়লম লৈঙাক্কী মায়োক্তা লান অমবু ফি অমগী অকোয়বদা য়ুম্ফম ওইদুনা হৌখিবগী থৌদোক অসি ভারত্তা নত্তনা অতৈ মফমদা থোকখিবগী মতাংদা পুৱারীদা অমত্তা থেংনরোই। মীরমদগী পুরকপা ফি-রোল থিংবদগী হৌরগা খুৎনা লোঞ্জবা, শাজবা খদ্দর, তরেং নত্ত্রগা চরখা খুমাং চাউখৎহন্নবা হোৎনখিবা অসিনা ভারতকী রাজিনিতী অমসুং ৱাখল্লোনগী খুদম অমা ওইখি অমসুং মসিগী থৌওংশিং অসি খুঙ্গংবু মরোমদোম লেপচবা ঙমহনবা অমসুং মীয়ামগী ৱাখল শেংদোকপগী মঙলান অসিবু তরেংদা য়েৎপা লং অমদা য়ুম্ফম ওইদুনা অচৌবা মিৎয়েং য়েংখিবা মীওই, মহাত্মা গান্ধীগী খুদোলনি। ৱেবিনার অসিনা ভারতকী নিং-তম্বগী ইহৌদা খাদিনা কদায় ফাওবা তেংবাংখিববু খঙনবা হোৎনবনি অমসুং মসিনা বেঙ্গালুরুগী এন.আই.এফ.তি.না খাদিবু হৌজিক্কী মতমগা চানবা ওইহন্দুনা বাপুগী ৱাখল্লোনবু মীয়ামদা শন্দোকপগী লম্বীদা থেংনরকখিবশিং অদুবুসু নীংথিনা খঙনবা হোৎনরি।

বেঙ্গালুরুগী এন.আই.এফ.তি.গী দাইরেক্তর মিস সুসান থোমাস অমসুং বেঙ্গালুরুগী এন.আই.এফ.তি.গী দিজাইন স্পে বিভাগকী এসোসিএৎ প্রোফেসর শ্রী প্রশান্থ কোচুবীতিল চেরিয়ান্না ৱেবিনার অসিবু লান্থোকখি। লান্থোকপগী থৌওং অসি গান্ধীজিনা খা-অফ্রিকাদা উকিল ওইদুনা লৈরিঙৈদা শেৎখিবা মচং অহুমগী ফিরোলগী মতাংদগী হৌখি। মহাক্না ইং ১৯১৫দা ভারত্তা হল্লক্লবা মতুংদা মহাক্না গুজরাতকী চৎনবী ফিজোল শেৎপা হৌখি। ইং ১৯১৫দা রবিন্দ্রনাথ তেগোরনা মহাকপু ‘মহাত্মা’ হায়বা মিংথোল পীখ্রবসু মহাকপু অশেংবা মহাত্মা ওইহনখিবদি মদুরাইননি। মফম অসিদা মহাক্না নোংচুপলোমগী ফিজোল লংথোক্তুনা খাদি শেৎপা হৌখিবনি অমসুং মসিনা মহাক্না লৈখিদবা ফাওবদা মহাক্কী তোপ তোপ্পা মশক ওইদুনা লাকখ্রিবনি।

ইং ১৯১৮দা মহাত্মা গান্ধীনা খাদিগী ইহৌ অসিবু ভারতকী খুঙ্গংশিংদা লৈরিবা লায়রবা মীয়ামগী তেবাংবা থৌওং অমা ওইনা হৌদোকখিবনি। লংচাক চাকপা অমসুং ফি-শাবগী থৌওং অসিবু মরোমদোম লেপচবা অমসুং মশানা লৈঙাকচবগী ৱাখল্লোন অমা ওইহনখি। খুঙ্গং খুদিংনা লং চিংবদা তঙাই ফদনা চঙবা খুদিংমক থাবা অমসুং লোকপগী থৌওং পাঙথোকখি, নুপী অমসুং নুপা খুদিংনা লং-চাকপগী থবক তৌখি অমসুং খুঙ্গং খুদিংনা মশাগী শিজিন্নবা কোন্নজনবা ফিরোল শাজখি। গান্ধীজিনা মসিগী থৌওং অসিবু মীরমদগী পুশিল্লকপা পোত্থোকশিংদা মীপাল তাংবা লোইশিনবনি হায়না উখি অমসুং মসিনা তসেংনা নিং-খা তম্বা ফংবগী অহানবা পরা তম্বীখি। মতম অদুগী রো-মেতরিএলশিং অসি ইংলেন্দদা হকথেংননা থাদোক্লম্মি অমসুং শেম-শাবা লোইরবা ফিরোল ওইনা অমুক পুশিল্লক্লম্মি অমসুং মসিনা লমদমশিগী মীওইশিংনা ফংজগদবা থবক অমসুং শেন্দোংবু মৎপীখি। গান্ধীজিনা খাদিগী ইহৌ হৌদোকখ্রিবা অসি রাজিনিতী খক্তগী নত্তনা শেন্মিৎলোন, নাৎ অমসুং খুন্নাইগী ওইবা মরম্না হেন্দুনা হৌদোকখিবনি।

মহাক্না ইং ১৯২১গী সেপ্তেম্বর ২০দা মদুরাইদা অনিরকশুবা ওইনা চৎখিবা মতমদা গান্ধীজিনা নোংচুপ মাসি লম্বীদা লৈরমখি অমসুং মদুদা নোঙমগী খুৎশুমন তানবা মীওইশিংনা ফুরিৎ লিত্তনা থবক চৎপশিং উবদা মহাক্না য়াম্না নুংঙাইতবা ফাওখিদুনা মহাক্কী শেৎলম্বা ফিরোল থাদোক্তুনা সেপ্তেম্বর ২১দগী মীতর মরি শাংবা খাদিগী ফৈজোম শেৎপা হৌখি।

মথংগী নুমিত্তা, সেপ্তেম্বর ২২, ১৯২২, দা হৌজিক্না ‘গান্ধী পোর্তেল’ হায়না খঙনরবা মতমদুগী কামারাজ লম্বীগী মফম অমদা মহাক্না মীয়ামদা ৱা ঙাংবা চৎখিবা মতমদা মহাক্কী খাদিগী ফীজোল শেৎখিবা অদুদা মীয়াম্না করি মরমগীনো হায়না হঙখি। মহাক্না ইং ১৯২১দা লৈরম্বা মফম অদু হৌজিক্তি খাদিগী দুকান অমা ওইরে অমসুং মসিগী য়ুম অসিগী নুংদা হক্তুনা থম্বা ৱারোল অমদা মহাক্কী মফি হোঙখিবগী পুৱারী ওইবা ৱাফম ইদুনা লৈরি।

ইং ১৯৩৪দগী ৩৫ ফাওবদা মহাক্না লায়রবা মীওইশিং তেংবাংবগী ৱাখল্লোন অসিবু অপুনবা খুঙ্গংগী মরোমদোম লেপচবগী ৱাফমদা পাক চাউথোকহনখি। ইং ১৯৪২-৪৩দা মহাক্কী শিন্মীশিংগী কাঙলুপকী মীওইশিং অমসুং খুঙ্গংগী থবক শিনবা মীওইশিংগা তান্নদুনা থৌওং অসিবু লৈবাক শিনবা থুংনা পাক চাউথোকহনবগী মতাংদা হোৎনখি। মতৌ অসুম্না খাদি অসিনা ফি মচেৎ অমা ওইদনা পুন্সি মহিং অমা ওইরিবনি।

শ্রী প্রশান্থ কোচিবীতিল চেরিয়ান্না মহাক্কী ৱারোল লান্থোকপয়া অসি খাদিগী ৱারী লিদুনা হৌদোকখি। খাদিনা ভারতকী নিং-তম ইহৌগী খুদম অমা ওইবা হৌখিবা অসি সাবরমতি আশ্রমদগীনি। আশ্রম অদুদা লৈবা মীওই খুদিংমক ভারতকী লংদগী শেম্বা খুৎনা শাবা ফিরোল শেৎকদবনি হায়বগী পান্দম অমা লৈরমখি। খুৎনা ফি করম্না শাগদগে হায়বগী শিংনবা অমা মতম অদুদা থেংনরম্মি। তরেং অসিদা মতমদুদা লৈরমদে অমসুং লংচাক করম্না চাক্কনি হায়বা তম্বীনবা মীওই অমত্তসু মতম অদুদা লৈরমদে। গান্ধীজিনা ব্রোক এজুকেস্নেল কনফরেন্সতা থেংনখিবা গঙ্গাবেন মজুমদারদা আশ্রম অসিনা থেংনরিবা খুদোংচাদবশিং মতাংদা ৱারী শারুবদগী মহাক্না ৱারোইশিন পুথোকপীখি। মহাক্না বরোদা রাজ্যগী বিজয়পুরদগী তরেং পুরক্তুনা গান্ধীজিদা পীবিখি। মতৌ অসুম্না আশ্রম অসিদা তরেং য়ৌরকখি অমসুং খাদি পুথোকপগী থবক হৌখি। মদুদগী হৌদুনা গান্ধীজিনা খুৎনা শাজবা ফিদগী শেম্বা ফৈজোমতমক শেৎপা হৌখি। খাদিনা তসেংবা স্বদেশি ওইবগী অচুম্বা ৱাহন্থোক অমা ওইখি।

শ্রী প্রশান্থনা এন.আই.এফ.তি.না খাদিবু হৌজিক্কী মতম অসিদা মীয়ামদা চাউখৎহন্নবা হোৎনবদা অমসুং পোত্থোক মশক খঙদোকপা, দিজাইন তৌবগী থৌওং পাঙথোকপা, পোত্থোক মশিং য়ামহনবা, ত্রেনিং অমসুং মার্কেতিং তৌবগী থৌওং কয়াগী খুত্থাংদা করনাতকা রাজ্যগী খাদি অমসুং ভিলেজ ইন্দস্ত্রীজ বোর্দপু মপাঙ্গল কনখৎহনবগী মতাংদা লৌখিবা থৌদাংগী মতাংদা মিৎয়েং চঙখি।

ধরৱাদ অসি মচু থোকপা লশিং হৌবা করনাতকাগী অমত্তা ঙাইরবা লম অমনি। বেঙ্গালুরুগী এন.আই.এফ.তি.গী অখঙ-অহৈগী কাঙবু অমনা নীংথিনা য়েংশিন্নবা পোত্থোক ৪০০ শেম-শাখি অমসুং পোত্থোকশিং অসিবু কে.এস.কে. অমসুং ভি.আই.বি.গী চেয়রমেন অমসুং আর্তিসান কয়াগী মমাংদা য়েংশিনখি অমসুং খ্বাইদগী চানবা অমসুং অফবা পোত্থোকশিং খনগত্তুনা মদুগী মতাংদা ভার্তিসানশিংদা মখা তানা ত্রেনিং পীখি। মসিগী কারবার অসিগী মতাংদা স্তেকহোলদরশিংদগী ফংবা ফীদবেকশিং অসি য়াম্না পুক্নিং থৌগৎনিংঙাই ওইখি। মহাক্না মখা তানা হায়খিবদা কে.এস.কে. অমসুং ভি.আই.বি.গা এন.আই.এফ.তি.গা খুৎশম্নবা অসিনা ব্রান্দ খাদি অসিবু ভারতকী কৈথেলশিংদা মাই-পাক্না ফংহনবা ঙম্বতা নত্তনা মালেমগী কৈথেলশিংদসু ফংহনবা ঙমগনি হায়খি।

ৱেবিনার অসি লোইশিনবা ওইনা এদিস্নেল দাইরেক্তর জেনেরেল রুপিন্দর ব্রারনা হায়খিবদা ঐখোয়না নাৎ অমসুং চৎনবীগী মতাংদা চাউথোকচবা ফাওবতা নত্তনা খাদিগী ফি লৈদুনা অমসুং শেত্তুনা ঐখোয়গী আর্তিসানশিংবুসু শৌগৎকদবনি হায়খি। গান্ধীজিনা তাকপীরম্বা বেল্যু সীস্তেম অসিগী মগুন ঙাক্তুনা অমসুং মসিবু মীয়াম খুদিংদা শন্দোকপা অসিসু য়াম্না মরু ওইবনি। দেখো অপ্না দেশ ৱেবিনার সেরিজ অসি এক ভারত, শ্রেশ্তহ ভারতকী মখাদা ভারতকী তোঙান তোঙানবা ফজবশিংবু শক তাকপা থৌওং অমনি।

দেখো অপনা দেশকী ৱেবিনার সেরিজ অসি ইলেক্ত্রোনিক্স অমসুং ইনফোর্মেসন তেক্নোলোজী মন্ত্রালয়গী নেস্নেল ই.-গোবর্নেন্স বিভাগকা খুৎশম্নদুনা পুথোকপনি। ৱেবিনারশিং অসিগী সেসনশিং অসি https://www.youtube.com/channel/UCbzIbBmMvtvH7d6Zo_ZEHDA/featured অমসুং ভারত সরকারগী তুরিজম মন্ত্রালয়গী সোসিএল মীদিয়া হেন্দলশিংদা ফংগনি।

******