কেমিকেল অমসুং ফর্তিলাইজরগী কেন্দ্র মন্ত্রী শ্রী দি.ভি. সদানন্দা গৌদানা ভারতকী ফার্মা অমসুং মেদিকেল দিবাইসকী সেক্তরদা শেল থাদবগী খ্বাইদগী চান্নবা মতম্নি হায়খ্রে। ফার্মা সেক্তর অসিনা ইং ২০২৪ ফাওবগী মনুংদা বিলিয়ন দোল্লর ৬৫ অমসুং ইং ২০৩০ ফাওবগী মনুংদা বিলিয়ন দোল্লর ১২০গী ইন্দস্ত্রী অমসুং মেদিকেল দিভাইস ইন্দস্ত্রী অসিনা ইং ২০২৫ ফাওবগী মনুংদা য়ু.এস. বিলিয়ন দোল্লর ৫০গী ইন্দস্ত্রী ওইরবা য়ারি।

শ্রী গৌদানা ঙরাং নই-দিল্লীদা “সি.আই.আই. লাইফ সাইন্স কনক্লেব ২০২০”গী হৌদোকপগী থৌরমদা ৱা ঙাংখিবনি।

মহাক্না হায়খিবদা হৌজিক সরকারনা পায়খৎলিবা কারবার নুংঙাইহন্নবা শেমদোকপগী থৌওংশিং অসিনা ভারতপু চাউখৎলক্লিবা শেন্মিৎলোনশিংগী মনুংদগী শেল থাদবা খ্বাইদগী নুংঙাইবা মফম অমা ওইহনবা ঙম্লে হায়খি। শেল-থুমগী হীরমশিং মনুং চলহন্নবা অমসুং শেঞ্জা থুমজা লাকশিন্নবা অমসুং লেবর লো অমসুং কাঙলোনশিং ইনবদা লায়হনবা পোলিসী কয়া অমা থবক ওইনা পাঙথোক্লকপা অসিনা ভারত অসি শেল থাদবা খ্বাইদগী নুংঙাইবা মফম অমা ওইহল্লিবনি হায়খি। ইং ২০১৮-১৯দা ভারত্না মমাং চহিদগী ১৮%গী চাং হেন্দুনা বিলিয়ন দোল্লর ৭৩গী এফ.দি.আই. চঙলকপগী পুক্নিং চীংশিনখি। ফার্মা অমসুং মেদিকেলগী খুৎলাইগী সেক্তরগী মতাংদা মরু ওইনা পল্লদুনা মহাক্না হায়খিবদা মতম অসি সেক্তর অসিদা শেল থাদবগী খ্বাইদগী চান্নবা মতম্নি মরমদি ফার্মা সেক্তর অসিনা ইং ২০২৪ ফাওবগী মনুংদা বিলিয়ন দোল্লর ৬৫ অমসুং ইং ২০৩০ ফাওবগী মনুংদা বিলিয়ন দোল্লর ১২০গী ইন্দস্ত্রী অমসুং মেদিকেল দিভাইস ইন্দস্ত্রী অসিনা চহিদা ২৮%গী চাংদা শাহৌ লৌদুনা ইং ২০২৫ ফাওবগী মনুংদা য়ু.এস. বিলিয়ন দোল্লর ৫০গী ইন্দস্ত্রী ওইরবা য়ারি।

কেন্দ্রগী মন্ত্রীনা হায়খিবদা ভারতকী ফার্মা অমসুং মেদিকেলগী খুৎলাইগী সেক্তর অসিদা মথংগী চহি ৪-৫দা ভারতপু ত্রিলিয়ন দোল্লর ৫গী শেন্মিৎলোন ওইহনবা ঙম্বগী মতিক লৈ হায়খি। ইং ২০২৫ ফাওবগী মনুংদা ভারতকী মেদিকেলগী খুৎলাইগী ইন্দস্ত্রী অসিনা চহিদা ২৮%গী চাংদা শাহৌ লৌদুনা য়ূ.এস. দোল্লর বিলিয়ন ৫০ য়ৌবা ঙম্বগী মতিক লৈ হায়খি। তাল্লক অসিদা ভারত সরকারনা মতমগা চান্নবা ইনফ্রাস্ত্রকচর লৈবা বল্ক দ্রগ পার্ক অহুম অমসুং মেদিকেল দিভাইস পার্ক ৪ শেমগৎনবা অমসুং ভারত শিনবা থুংনা মামেলগী থাক্তা লৈবা সেন্তর ওফ এক্সেলেন্স লৈহন্নবা  তেংবাংলি। অনৌবা মেন্যুফেকচরিং য়ুনিৎশিংনা লৈবাক অসিগী হান্না লৈরবা মেন্যুফেকচরিং য়ুনিৎশিংগা চাংদম্নবগী মান্নবা থাক লৈহন্নবা সরকারনা প্রদক্সন লিঙ্ক ইন্সেন্তিব (পি.এল.আই.)সু পীগনি।

কোবিদ-১৯গী লুরবা তাঞ্জাদা ফার্মা ইন্দস্ত্রীশিংনা তেংবাংখিবা অদুদা মিৎয়েং চঙলদুনা মহাক্না হয়াখিবদা ভারতকী ফার্মা অমসুং মেদিকেলগী খুৎলাইগী ইন্দস্ত্রীনা মতমগা চান্ননা থোক্লক্তুনা থেংনবা ঙমখি হায়খি। অচুম্বা পোলিসী কয়া পুন্সিন্দুনা অচৌবা বল্ক দ্রগ অমসুং মেদিকেল দিভাইস পার্ক শেমগৎপদা তেংবাংদুনা ইরাং অসিবু খুদোংচাবা ওইনা ওন্থোকপা ঙমখি। হীরম অসিদা প্রধান মন্ত্রী শ্রী নরেন্দ্র মোদীনা থৌওং অসিগী অহৌবগী তাঙ্কক্তগী হৌনা মশামকসু য়াওখি। মসিগী কেন্দ্র সরকারগী থৌওং অসিনা অপুনবা শেনফম লুপা করোর ৭৮০০০গী শেল থাদবগী পুক্নিং চীংশিনবা ঙমগনি অমসুং মীওই লাখ ২.৫দা থবক পীবা ঙমগনি হায়না থাজনরি।

মহাক্না মখা তানা হায়খিবদা মীরমদগী পোৎ লৈবা খক্তা ওইরম্বদগী ভারতনা নোঙমদা পি.পি.ই. কিৎ লাখ ৫দগী হেন্না পুথোকপা ঙম্বগী মতিক লৈদুনা মালেমগী অনিশুবা খ্বাইদগী চাউবা পি.পি.ই. কিৎ পুথোকপা ঙম্বা লৈবাক অমা ওইরকপা অসি ভারতকী মীওই মিলিয়ন কয়াগী চাউথোকচনিংঙাই ওইবা ৱাফম্নি হায়খি। মসিগা মান্ননা অতেনবা মতমগী মনুংদা লৈবাক অসিদা শাজবা বেন্তিলেতরসু চহিদা লাখ ৩ পুথোকপা ঙম্বগী মতিক লৈবা ঙমখি। ঐখোয়না এন.৯৫ মাস্ক পুথোকপগী মতাংদসু মরোমদোম লেপচবা ঙম্লে।

শ্রী গৌদানা হায়খিবদা মালেমগী মকোক থোংবা হিদাক পীবা ঙম্বা ওইদুনা লৈনবগীদমক্তা ফার্মা ইন্দস্ত্রীনা আর. অমসুং দি.গী থৌওংশিংদা মিৎয়েং চঙফম থোকই হায়খি। শাহৌ লৌবগী মতিক অসিবু মপুং ফানা শিজিন্নবা অসি ঐখোয়না ভারত্তা অনৌবা হিদাক পুথোকপা নত্ত্রগা মসিগী কান্নবা শেমদোকপগী মতাংদা মাই-পাকপা থৌওং পাঙথোক্ত্রিঙৈ ঙম্লোই। মহাক্না ভারতকী ফার্মা ইন্দস্ত্রী অসিনা কোবিদ-১৯গী বেক্সিন পুথোকপা ঙম্বা অমসুং অহোঙবা মমলদা থাবা ঙম্বা অহানবা লৈবাক ওইগনি হায়বা মঙলান অমা লৈরি হায়না হায়খি।

মহাক্না সি.আই.আই. লাইফ সাইন্স কনক্লেব অসিনা মালেম শিনবা থুংবগী স্তেকহোলদরশিংনা পুন্সিন্দুনা অমসুং মখোয়গী ৱাখল্লোন চুংশিন্নরগা কোবিদ-১৯গী মতুংগী মালেমদা ভারতকী ফার্মাগী কাঙলুপ্তা চাংয়েংনবগী য়ুগ অমা পুরকপদা তেংবাংবগদা প্লেৎফোরম অমা পীনবা হোৎনবগী থৌওং অসিবু থাগৎপা ফোঙদোকখি।

থবক্তগী তোকখিগদরবা অমসুং ত্রাইগী অনৌবা চেয়রমেন শ্রী পি.দি. ভাঘেলা জি; বাইওতেক্নোলোজী বিভাগকী সেক্রেতরী দাঃ রেনু স্বরুপ; দ্রগস কন্ত্রোল্লর জেনেরেল ওফ ইন্দিয়াগী দাঃ ভি.জি. সোমানি; এস.আই.পি.এল.এ.গী একজেক্যুতিব ভাইস চেয়রপর্সন মিস সমিনা হামিদ; সি.আই.আই. বাইওতেক্নোলোজী কম্মিত্তীগী চেয়রমেন দাঃ রাজেশ জেন; সি.আই.আই.গী ফার্মা কম্মিতীগী চেয়রমেন শ্রী জি.ভি. প্রসাদ; সি.আই.আই.গী ফার্মা কম্মিতীগী ভাইস চেয়রমেন শ্রী বিবেক কমথ অমসুং ইন্দস্ত্রীগী মকোক থোংবা মীওই কয়ানা থৌরম অসিদা শরুক য়াখি।