ঙসি নই দিল্লীগী মেজর ধ্যান চান্দ স্তদিয়মদা য়ুথ এফেয়ার্স অমসুং স্পোর্তসকী স্তেৎ মিনিস্তর শ্রী কিরেন রিজিজুনা স্পোর্তস ওথোরিতি ওফ ইন্দিয়া(সাই)গী অনৌবা লোগো হৌদোক্লে। থৌরম অদুদা স্পোর্তস সেক্রেতরি রবি মিত্তল; ইন্দিয়ান ওলেম্পিক এসোসিএসনগী প্রসিদেন্ত নরিন্দর বাত্রা অমসুং সাইগী দিরেক্তর জেনেরেল সন্দিপ প্রধান অমসুং মিনিস্ত্রিগী সেনিয়র ওফিসিএলশিং শরুক য়াখি। ভিদিও কনফরেন্সকী খুৎথাংদা লৈবাক শীনবা থুংনা শক্নাইরবা শান্নরোইশিং, কোচশিং অমসুং শান্নবা পামজবশিং থৌরম অদু শরুক য়াখি।

সাইগী অনৌবা লোগোগী মরুওইবগী মতাংদা মিনিস্তরনা হায়খি, শান্নবগী থবক-থৌরমশিংদা সাই মাংজিল থারি অমসুং শান্নবগী থাক ৱাংখৎহন্নবা মরুওইবা এজেন্তনি। শান্নরোইশিংনা মখোয়গী শান্নবগী শীনফম অসি ফজনা হৌবা ঙম্নবা সাইনা শান্নরোইশিংদা দরকার ওইবা মতেং পাংলি অমসুং পুন্সিগী মাইপাকপশিং অমসুং শান্নবদা মাইপাকপা পুন্সি অমা পুরকপা ঙমগনি- শান্নরোই অমনা সাইদা মহাক্কী শীনফম অদু মাইপাক্নপগী খুদোংচাবা ফংগনি। সাই হায়বসি স্পোর্তস ওথোরিতি ওফ ইন্দিয়াগী অশম্বা ৱাহৈ ওইনা তোঙান তোঙানবা মরী লৈনবা লুপশিংগী মরক্তা মসিগী মশক অমা তাক্লি। ভারতকী মচু অহুম অমসুং চক্রগী হিঙ্গোগ মচু হাপচিন্দুনা সাইনা শান্নবগী খ্বাইদগী চাউবা লুপ অমা ওইনা মালেমদা ভারতকী মহুৎশিল্লি।

অনৌবা লোগো অমা দিজাইন তৌবগী থবক পায়খৎপগীদমক স্পোর্তস সেক্রেতরি রবি মিত্তলনা সাই থাগৎখি। অনৌবা লোগো অসিগীদমক ইন্ত্রি মশিং য়াম্না লাকখি।

১৯৮২দা লিংখৎপদগী সাইনা লৈবাক অসিদা শান্নবগী থবকশিং ফগৎহন্নবা মরুওইবা থৌদাং লৌদুনা লাক্লি অমসুং লৈবাক শীনবা থুংনা হৌগৎলক্লিবা শান্নরোইশিং মশক খঙদোকপা অমসুং শেমগৎপগী থবক পায়খৎতুনা লাকলি। অনৌবা লোগো অসিদা সাইনা লৈবাক অসিদা মখোঙদগী হৌনা নহা ওইরিবা শান্নরোইশিং মশক খঙদোকপা অমসুং শেমগৎপগী থবক পায়খৎপগী হোংলক্লিবা খোঙচৎ অসি ফোঙদোকলি।

*****