প্রধান মন্ত্রী শ্রী নরেন্দ্র মোদীনা নমামি গঙ্গে মিসনগী মখাদা উত্তরাখন্দদা মরুওইবা প্রোজেক্ত তরুক ভিদিও কনফরেন্সকী থোংদা হৌদোকখি।

শ্রী মোদীনা হরিদ্বারদা গঙ্গা তুরেলগী মতাংদা অহানবা ওইনা গংগা অভালোকান ম্যুজিয়ম হৌদোকখি। মহাক্না 'রোইং দাউন দি গঙ্গেজ' হায়বা লাইরিক অমা অমসুং জল জীবন মিসনগী অনৌবা লোগো অমা হৌদোকখি। প্রধান মন্ত্রীনা থৌরম অদুদা 'গ্রাম পঞ্চায়ৎশিংগী মার্গাদর্শিকা অমসুং পানি সমিতিশিং জল জীবন মিসনগী মখাদা' (ভিলেজ পঞ্চায়ৎ অমসুং ৱাতর কম্মিতীশিংগী চৎন-কাংলোন) মাইখুম হাংখি।

থৌরম অদুদা ৱা ঙাংলদুনা প্রধান মন্ত্রীনা হায়খি মদুদি জল জীবন মিসন্না লৈবাক অসিদা লৈরিবা খুঙ্গংগী ইমুং খুদিংদা পাইপকী ঈশিং পীনবা পান্দম থম্লি। শ্রী মোদীনা হায়খি মদুদি মিসন অসিগী অনৌবা লোগো অসিনা ঈশিং মরিক খুদিংমক কন্নবগী ইথিল পীরগনি।

মার্গদর্শিকা পল্লদুনা প্রধান মন্ত্রীনা হায়খি মদুদি মখোয়সু চপ মান্ননা গ্রাম পঞ্চায়ৎনা খুঙ্গগী লমশিংদা লৈরিবা মীয়ামতা নত্তনা সরকারগী মেচিনরীশিংগীদমক মরু ওই।

'রোইং দাউন দি গঙ্গেজ' হায়বা লাইরিক অসিবু নৈনদুনা মহাক্না হায়খি মদুদি গঙ্গা তুরেলনা মতৌ করম্না ঐখোয়গী নাৎ, থাজবা অমসুং ইপা ইপুনা থম্বীরম্বা লনশিংগী মঙাল চাউরবা খুদম অমা ওইবগে হায়বগী মতাংদা কুপ্না তাক্লি।

শ্রী মোদীনা গঙ্গা তুরেলনা উত্তরাখন্দদগী হৌরক্তুনা নোংচুপ বেঙ্গালফাওবদা লৈরিবা লৈবাক অসিগী মীওই চাদা ৫০ রোমগী পুন্সিদা অচৌবা থৌদাং অমা লৌবনা মসিবু লু-নান্না থম্বগী তঙাইফদবা লৈরিবামসিগী মরমদা হায়খি।

মাহক্না নমামি গঙ্গে মিসনবু গঙ্গা তুরেল লু-নালহন্নবদা নত্তনা তুরেল সিবু মথৌ মতীক চানা তৌহন্নবা হোৎনরিবা অপুনবা কন্নবগী খ্বাইদগী চাওবা মিসন অমনি। প্রধান মন্ত্রীনা হায়খি মদুদি মসিগী অনৌবা ৱাখল্লোন অমসুং অনৌবা খোঙথাং অসিনা গঙ্গা তুরেলবু হান্নগী পুন্সিদা হঞ্জিলহনবা ঙমহল্লে। করিগুম্বা অরিবা থৌওংশিংদু অদুম্মক তৌদুনা লৈরম্লবদি ফিবম অসি ঙসিসু অদুম্মক চাদনা লৈরমগনি। অরিবা থৌওংশিংদা মীয়াম শরুক য়াহনবা অমসুং মাংজিল থানা য়েংবা য়াওদে।

প্রধান মন্ত্রীনা হায়খি মদুদি সরকার অসিনা মসিগী পান্দম অসি ফংনবগীদমক মমাই মরি লোঙবা লাল্লোংগা লোইননা চংশিল্লি।

অহানবদা- ফত্তবা অরেম্বা ঈশিংশিংবু গঙ্গাদা তাশিন্দনবা সিৱেজ ত্রিৎমেন্ত প্লান্ত (এস.তি.পি.)গী নেৎৱার্ক অমা শেম্বা

অনিশুবদা- এস.তি.পি.শিং অসি মথংগী চহী ১০-১৫ ফাওবদা চঙগদবশিং য়েংদুনা শাগৎপা।

অহুমশুবদা- গঙ্গা তুরেলগী অকোইবদা লৈরিবা অচৌবা শহর চাম্মরোম অমসুং খুঙ্গং লিশিং মঙারোম্বু ওপন দিফেকেসন ফ্রী (ও.দি.এফ.) ওইহনবা।

মরিশুবদা- গঙ্গা তুরেলগী মরিলশিংদা করিগুম্বা মওং অমদা হেক্তা মোৎশিন্দনবা থৌরাং পায়খৎপনি।

শ্রী মোদীনা হায়খি মদুদি নমামি গঙ্গেগী মখাদা লুপা করোর ৩০,০০০ হেনবগী প্রোজেক্তশিং চৌজিক চত্থরি নত্ত্রগা লোইখ্রে। মহাক্না হায়খি মদুদি মসিগী প্রোজেক্তশিং অসিগী মখাদা উত্তরাখন্দগী সিৱেজ ত্রিৎমেন্ত কেপাসিতী অসি হৌখিবা চহী ৬ লোমসিদা শরুক মরি থোক্না হেনগৎলে।

প্রধান মন্ত্রীনা উত্তরাখন্দদা দ্রেন ১৩০ হেন্না গঙ্গা তুরেলদা তাশিনবা থিংনবা খোঙথাং লৌখৎলে। অয়েংবশিং অমসুং রাফতরশিংগী মমিত্তা অৱাবা ওইরবা মুনি কী রেতী, রিশিকেশতা লৈবা চন্দ্রেশ্বর নাগর দ্রেনবু অখন্ননা পনখি। মহাক্না দ্রেন অসিবু থিংজিনখিবদা অমসুং মুনি কী রেতীদা মথোল মরী ৱাংবা এস.তি.পি. অমা শাগৎপদা হরাওবা ফোংদোকখি।

প্রধান মন্ত্রীনা হায়খি মদুদি প্রয়াগরাজ কুম্ভদা লাকপা লাইনিংবশিংনা অৱাবসি থেংনবনা, হরিদ্বার কুম্ভদা লাকপা মীয়াম্নসু উত্তরাখন্দগী অশেংবা ঈশিংগী ফিবম থেংনরগনি। শ্রী নরেন্দ্র মোদীনা গঙ্গেদা লৈরিবা ঘাৎ চাম্মরোমগী ফজহন্নবা লৌখৎলিবা অমসুং হরিদ্বারদা পায়খৎলিবা অনৌবা রিবরফ্রন্ত শেম্বগী থবক্কী খুমাং চাউশিনবশিগ পনখি।

প্রধান মন্ত্রীনা হায়খি মদুদি গঙ্গা অভালোকান ম্যুজিয়ম অসি লাই খুরুম্বা লাকপশিংগী পুক্নিং শুমহৎলগনি অমসুং মসিনা গঙ্গাগা মরী লৈনবা হেরিতেজশিং মুন্না খঙবদা মতেং পাংলগনি।

প্রধান মন্ত্রীনা হায়খি মদুদি গঙ্গা লু-নালহন্নবা হোৎনবগী মথক্তা নমামি গঙ্গেনা গঙ্গেতিক বেল্ততা লৈরিবা অকোইবদা শেন্মিৎলোন অমসুং অকোইবগী ফিবম ফগৎনবা মীৎয়েং থম্লি। মহাক্না হায়খি মদুদি সরকার অসিনা ওর্গানিক ফার্মিং অমসুং আয়ুর্বেদিক ফার্মিং চাউখৎনবা হোৎনরি।

প্রধান মন্ত্রীনা হায়খি মদুদি প্রোজেক্ত অসিনা চহী অসিগী ওগস্ত ১৫দা লাওথোকখিবা  মিসন দোলফিনবুসু মপাঙ্গল কলহল্লগনি।

প্রধান মন্ত্রীনা হায়খি মদুদি ঈশিংগুম্বা মরুওইবা হীরমদা থবকশিংবু তোঙান-তোঙানবা মন্ত্রালয় অমসুং বিভাগশিংদা শিন্নবা হায়বসি চৎন-কাংলোন ময়েক শেং অমসুং থবক তৌমিন্নবা ৱাৎহল্লি। মসিনা মরম ওইদুনা, ঈথৈ-লৌখোং অমসুং থক্নবা ঈশিংগী খুদোংচাদবা অদুমক লৈরিবনি। মহাক্না নিং তম্লবা মতুং চহী কয়ারোম অসিদা লৈবাক অসিদা লৈরিবা ইমুং করোর ১৫দগী হেন্না থক্নবা পাইপকী ঈশিং পীরমদবদা নুংনাংবা ফোংদোকখি।

শ্রী মোদীনা হায়খি মদুদি জল শক্তি মন্ত্রালয় অসি অসিগুম্বা খুদোংচাদবা কয়া অসি কোকহন্নবা অমসুং মতেং পাংনবা শেমখিবনি। মহাক্না হায়খি মদুদি মন্ত্রালয় অসিনা হৌজিক্তি লৈবাক অসিগী ইমুং খুদিংদা পাইপকী থক্নবা ঈশিং পীনবা থবক পায়খৎলি।

ঙসিদি ইমুং লাখ ১ হেন্না নুমিৎ খুদিংগী জল জীবন মিসনগী মখাদা পাইপকী ঈশিং পীরি। মহাক্না হায়খি মদুদি চহী অমদা ইমুং করোর ২দা থক্নবা ঈশিংগী কন্নেক্সন পীরে।

মহাক্না উত্তরাখন্দ সরকারবু কোরোনা মনুং হৌখিবা থা ৪-৫সিদা ইমুং লিশিং ৫০রোমদা থক্না ঈশিং পীবীরম্বগীদমক থাগৎখি।

প্রধান মন্ত্রীনা হায়খি মদুদি মমাংগী লৈঙাককুম্না নত্তবদা, জল জীবন মিসন অসিনা মখোংদগী হৌদুনা মতোন ফাওবদা থবক পায়খৎলি, মসিদা খুঙ্গংদা লৈবা শীজিন্নরিবা মীয়াম অমদি পানি সমিতি (ৱাতর কম্মিতী)না প্রোজেক্ত অসি পায়খৎপদগী হৌরগা য়াদবা য়েংশিনবা অমসুং মথৌ তৌহনবফাওবা পুন্না য়েংশিল্লি। মহাক্না হায়খি মদুদি মিসন অসিনা ৱাতর কম্মিতী অসিগী মীহুৎ চাদা ৫০দি নুপী শোইদনা ওইহনলি। মহাক্না হায়খি মদুদি ঙসি ফোংলিবা মার্দর্শিকা চৎন-কাংলোন্না ৱাতর কম্মিতী অমসুং গ্রাম পঞ্চায়ৎকী মীহুৎশিংবু অচুম্বা ৱারেপ লৌবদা মতেং পাংলগনি।

প্রধান মন্ত্রীনা হায়খি জল জীবন মিসনগী মখাদা লৈবাক অসিদা লৈরিবা মহৈলোইশঙ অমসুং অঙ্গনৱাদিশিংদা থক্নবা ঈশিং ফংহন্নবগীদমক চহীসিগী ওক্তোবর ২দগী অখন্নবা নুমিৎ ১০০নিগী কেম্পেন হৌরগনি।

প্রধান মন্ত্রীনা হায়খি মদুদি সরকার অসিনা লৌমী, ইন্দস্ত্রিএল লেবর অমসুং হকশেলগী সেক্তরদা মরুওইবা শেমদোক শাদোকপা কয়া পুরকখ্রে।

শ্রী মোদীনা অসিগুম্বা শেমদোক শাদোকপশিং অসিগী মাইয়োক্তা লৈরিবশিং অসি মখোয়গী মাইয়োক্তা লৈ হায়বখক্কীদমক্নি। মহাক্না হায়খি মদুদি লৈবাক অসিবু চহী কয়া পাল্লম্লবশিংনা লৈবাক অসিগী শিন্মী, নহা, লৌমী অমসুং নুপীশিংবু শক্তি পীবীনবা হোৎনবীরমদে।

প্রধান মন্ত্রীনা হায়খি মদুদি হায়রিবা মীওইশিং অসিনা লৌমীশিংনা মখোয়গী পোত্থোকশিং শেন্দোং লৈনা লৈবাক অসিগী মীওই অমহেক্তদা অমসুং মফম অমহেক্তদা য়োলহনবা পামদে।

ওপ্পোজিসন্না ফনা অথিংবা পীজরবসু মীয়ামদা অদুক্কী মতীক কানবা পীখ্রবা জন ধন বেঙ্ক একাউন্ত, দিজিতেল ইন্দিয়া কেম্পেন, ইন্তর্নেসনেল য়োগা দেগুম্বা সরকার অসিগী থৌরাং কয়া পনখি।

মহাক্না হায়খি মদুদি মখোয়শিং অসি সর্জিকেল স্ত্রাইক্কী মাইয়োক্তা লৈখিবা অমসুং লান্মীশিংদা সর্জিকেল স্ত্রাইক তৌখি হায়বগী খুদম পীয়ু হায়খিবা কাংবুদুমক্নি। শ্রী মোদীনা হায়খি মদুদি মখোয়গী ৱাখল্লোন অসি করম্বনো হায়বদু লৈবাক পুম্বদা মসিনা তশেংনা উৎলে।

মহাক্না হায়খি মদুদি মতমগী মতুং ইন্না অথিংবা পীরিবা অমসুং অপনবা পীরিবা মীওইশিং অসি মতম অসিগা চুন্নদ্রে।

******