মধ্য প্রদেশতা মোরেনা শহরগী এন.ঐচ.-৩দা লুপা করোর ১০৮ চংনা শাবা কিলোমিতর ১.৪২০ শাংবা লৈকং থোং অসি  ঙসি লৌউ-শিংউ অমদি লৌমীশিংগী য়াইফ-থৌরাং, খুঙ্গং চাউখৎপা অমদি পঞ্চায়তী রাজ অমসুং ফুদ প্রোসেসিং ইন্দস্ত্রীগী কেন্দ্র মন্ত্রী শ্রী নরেন্দ্র সিংহ তোমারনা লৈবাক অসিদা কত্থোকখ্রে।মুখ্য মন্ত্রী শ্রী শিবরাজ সিংহ চৌহান্না থৌরম অদুদা ময়াই তাংবল লৌখি অমদি কেন্দ্র মন্ত্রী শ্রী থাবরচান্দ গেহলোৎ, শ্রী ফগান সিংহ কুলস্তে, আর.তি.ঐচ.কী রাজ্য মন্ত্রী রিতায়র্দ জেনরেল ভি.কে. সিংহ, লম অদুগী এম.পি.শিং, রাজ্য অমসুং কেন্দ্রগী মকোক থোংবা ওফিসরশিংনা থৌরম অদুদা য়াওখি।

রাজস্থানগী ধোলপুর অমসুং মধ্য প্রদেশকী গ্বালিয়র শম্নবা লৈকং থোং অসি লেপ্নখিবা মতম থা ১৮গী মনুংদা ই.পি.সি. মোদতা লোইশিনখি। ৪-লেনগী লৈকং থোং অসিদা ধোলপুরগী মায়কৈরোংদা মিতর ৩০০ শাংবা অদুগা গ্বালিয়রগী মায়কৈরোমদা মিতর ৩৪০ শাংবা রিতেন্নিং ৱালগা কোন্ননা মিতর ৭৮০ শাংই।   লৈকং থোং অসিগী নাক-য়েৎ অনিমক্তা সর্ভিস রোদ লৈ। লৈকং থোং অসিনা খ্বাইদগী য়াম্না চিনবা মোরেনা শহর অসিদা মী চিনবা হন্থহন্দুনা মতম চংবা অমদি থাও চংবা হন্থহনগনি।

থৌরম অসিদা ৱা ঙাংলদুনা লৌউ-শিংউগী মন্ত্রী শ্রী নরেন্দ্র সিংহ তোমারনা মসিগী প্রোজেক্ত অসি থুনা সেঙ্কসন তৌদুনা লেপ্নখিবা মতমগী মনুংদা মপুং ফানা লোইশিনখিবা অসিগীদমক্তা আর.তি.ঐচ.কী কেন্দ্র মন্ত্রী শ্রী নীতিন গদকরীবু থাগৎপা ফোংদোকখি। মহাক্না রিতায়র্দ জেনরেল ভি.কে.বুসু প্রোজেক্ত অসি নিংথিনা খুমাং লোইশিলহনবগীদমক্তা থাগৎপা ফোংদোকখি। লম্বি অসি শাংদোকরকপা অসিনা মফম অসিগী ত্রাফিক কোমথোকহনগনি।

মুখ্য মন্ত্রী শ্রী শিবরাজ সিংহ চৌহান্না লৈকং থোং অসি শাবগা লোয়ননা পুৱারী অসিদা অহোংবা অমা পুরক্লে হায়না ফোংদোকখি। মোরেনানা কেন্দ্রদা হায়জবা খুদিংমক ফংলি হায়না মহাক্না হায়খি। মহাক্না জিলা অসিদা চাউখৎনবগীদমক্তা পায়খৎখিবা প্রোজেক্ত মশিং কয়া অমা পুথোক্তুনা খংহনখি। মহাক্না মোরেনাগী মীশিংদা শুপ্নতগী চাউখৎপগী ৱারী অসি উবা খক্তা নত্তনা থৱায় য়াওনা শরুক য়াবিনবা হায়খি।

আর.তি.ঐচ.কী রাজ্য মন্ত্রী রিতায়র্দ জেনরেল ভিচকেয় সিংহনা সরকার অসিনা মীশিংগী খুদোংচাহন্নবগীদমক্তা চাউখৎ-থৌরাংশিং পায়খৎনবা হোৎনবিরী হায়না ফোংদোকখি। হৌজিক্কী লম্বি শাংদোকপীবা অসিনা মফম অসিদা অচৌবা শমজিন্ননবগী লম্বি ওইবনা মরুওইবা ওইরি। মসিগী লৈকং থোং অসিনা শাবা অসিনা হান্না মমাংদা ব্লেক স্পোৎশিংদা লম্বিগী খুদোংথিবা থোকপশিং অদু হন্থহনবদা মতেং ওইরগনি হায়না ফোংদোকখি।

*****