খাদি অমসুং ভিলেজ ইন্দস্ত্রীজ কম্মিসন (কে.ভি.আই.সি.)না ভারতকী ফেশন ইন্দস্ত্রীগী শক্নাইরবা মীওই অমা ওইরিবা শ্রী সুনিল সেথীবু মখোয়গী এদবাইজর ওইনা খনখ্রে। সেথীনা কম্মিসন অসিদা রেদীমেদ গার্মেন্তকী হীরমদা মতমগী খ্বাইদগী অনৌবা দিজাইনগী থৌওংগী মতাংদা পাউতাক পীগনি অমসুং ভারত অমসুং মপানগী লৈবাকশিংদা খাদি চাউখৎহনবদা তেংবাংগনি।

কে.ভি.আই.সি.না থোকপা ৱারোল অমগী মতুং ইন্না শ্রী সেথীগী থবক খনবগী মতম অসি চহি অমগীনি। মমিং লৈরবা ফেসন দিজাইনর মিস রিতু বেরীনা মমাংদা এদবাইজর ওইনা থৌ পুরম্মি অমসুং মহাক্কী তর্ম অসি হন্দক্তা লোইখিবনি।

কে.ভি.আই.সি.না হায়খিবদা শ্রী সেথীনা মালেমগী ওইনা পোত্থোক য়োন্থোক-য়োনশিন তৌবগী হীরমদা দিকেদ মরিদগী হেন্না থবক তৌরকপদা লৈরকপা লৌশিং অসিনা ভারতকী খুৎশা-লোনশা, দিজাইন অমসুং তেক্সতাইল ইন্দস্ত্রীনা চাউখৎলকপা অসিদা অনৌবা অমসুং মাই-পাকপা থৌওংশিংগী খুত্থাংদা মশক থোকপা মতেং য়াম্না পাঙখি। দিজাইনর ৪০০গী মহুৎ শিল্লিবা ফেশন দিজাইন কাউন্সিল ওফ ইন্দিয়াগী চেয়রমেন ওইনা শ্রী সেথিনা ভারতকী ফেশন ইন্দস্ত্রী অসিবু মালেমগী থাক্তা পুখৎনবা কন্না হোৎনদুনা লাক্লি।

 “লৈবাক মনুং অমসুং মালেমগী ওইনা খাদিনা ফেশন ইন্দস্ত্রীদা তুং কোইনা চৎকদবা শাহৌ লৌবা হায়বা অসিগী মরু ওইরবা হীরম অসিগী মতুং ইন্না মহাকপু খনবনি। কে.ভি.আই.সি.না মসিগী পোত্থোকশিং অসিনা মালেমগী প্লেৎফোর্মদা মমিং তানবা ঙমখ্রে অমসুং হৌজিক্তগী হৌনা ঐখোয়না খুদোংচাবা খুদিংদা শেল থাদগনি। খাদিগী খুৎ-শাঁ জৈবা মীওইশিংনা মালেমগী খ্বাইদগী তোপ-তোপ্পা অমসুং খ্বাইদগী মগুন লৈবা ফি শাবা ঙম্মি অমসুং অনৌবা দিজাইনশিং অসি শিজিন্নরগদি খাদি অসি মালেমগী মীওই কয়া অমগী অপাম্বা ওইহনবা ঙমগনি”, হায়না কে.ভি.আই.সি.গী চেয়রমেন শ্রী বিনয় কুমার সক্সেনানা হায়খি।

মসিদা নত্তনা কে.ভি.আই.সি.না হায়খিবদা হায়রিবা থৌওং অসি প্রধান মন্ত্রীনা ভারতকী পোত্থোক শেম-শাবগী সেক্তরগা মরী লৈননা – লোকেলদগী গ্লোবেলদা অমসুং লোকেলগী ভোকেল- হায়না লাউরিবা খোল্লাও অসিগী মতুং ইনবনি হায়খি। হায়রিবা থৌওং অসি ভারতকী খুৎশা-লোনশাগী পোত্থোকশিং অসিগী মতাংদা মীয়াম্না পাম্নবগী ফিভম অমা লাক্লিবা অমসুং কঞ্জ্যুমরশিংনা ফেশন্দা য়াম্না মরু ওইবা পীরকপা মতম অসিগা য়াম্না চান্নবনি।

কে.ভি.আই.সি.না হায়খিবদা সেথিদা মসিগী এদবাইজরগী ফম শিন্নদ্রিঙৈগী মমাংদগী হৌনা মহাক্না ঐচ.ঐচ.ই.সি., নেস্নেল ক্রাফৎ ম্যুজিয়ম অমসুং হস্তকলা একাদমী, তেক্সতাইল মন্ত্রালয়, তুরিজম মন্ত্রালয়, কলচর মন্ত্রালয়গুম্বা সরকারগী বোদিশিংগী এদবাইজর ওইবগী থৌদাং কয়া পাঙথোকখ্রে। মহাক্না নেস্নেল ফেশন ইন্সতিত্যুৎ (এন.আই.এফ.তি.)দা মেম্বর, বোর্দ ওফ গবর্নর ওইনসু থৌ পুখ্রবনি।

******