মালেম পুম্বনা স্পেস অসিবু মিলিতরীগী হীরমদা খুৎকন-পাঙ্গন্নবা হোৎনরিবা মতম অসিদা দাঃ সরাভাইদি স্পেসকী পাক চাউবা অমসুং তোঙান তোঙানবা মওং কয়া অসিনা ভারতকী ওইনদি অথুবা মতমদা চাউখৎহনবা ঙমহনগদবা খ্বাইদগী মতিক চাবা প্লেৎফোর্ম অমনি হায়না খল্লম্মি হায়না ভারতকী রাস্ত্রপতি শ্রী রাম নাথ কোবিন্দনা হায়খ্রে। মহাক্না ঙসি (সেপ্তেম্বর ২৫, ২০২০) স্পেসকী বিভাগ অমসুং এতোমিক ইনর্জীগী বিভাগনা শিনবা দাঃ বিক্রম সরাভাইগী মপোক কুমওন পাঙথোকপগী থৌরমদা ভিদিও মেসেজকী খুত্থাংদা ৱা ঙাংখি।

দাঃ বিক্রম সরাভাইবু নীংশিংলদুনা রাস্ত্রপতিনা হায়খিবদা মীওই খরা অমদি মখোয়গী থৌওংশিং অমসুং পুন্সিনা ঐখোয়গী পুক্নিংগী ইথিল পীরি হায়না হায়খি। “ভারতকী স্পেস প্রোগ্রামগী মপা” হায়না খঙনরিবা দাঃ বিক্রম সরাভাইসু অদুগুম্বা মীওই অমনি। তোপ-তোপ্পা মতিক মগুন লৈবা মহাক্কুম্বা মীওই অসিনা মহাক্কী মাই-পাকপা কয়াবুসু মহাক্কী চম্লবা পুন্সি মহিংনা খুমজিন্দুনা থম্বা মীওইনি। মহাক অসি মালেমগী থাক্তা শকখঙনবা সাইন্তিস্ত অমা ওইবতা নত্তনা ইন্সতিত্যুসন শেম্বা ঙম্বা য়াম্না তাঙনা থোকপা পুংবাগী মতিক মগুন চেনবা মীওই অমনি। মহাক্কী মাই পাকপশিং অসি মহাক্কী মতম লোইশিল্লক্লে হায়না মাংজৌননা খঙবগী মতাগুম য়াম্না অতেনবা মতমদা ফংবা ঙমখি। লাইবক থীবদগী মহাক্কী পুন্সিসু য়াম্না তেনখি। মহাক্না ভারতকী মতম কুইনা সেবা তৌবা ঙম্লম্লবদি ভারতকী স্পেস্কী হীরমদা মাই পাকপসি হৌজিক করম্বা ফিভমদা লৈরমগনি হায়বা খন্নবা য়াবা ৱাফম্নি।

রাস্ত্রপতিনা হায়খিবদা দাঃ সরাভাইনা সাইন্তিস্ত অমা ওইনা করিগুম্বা হীরম অমা য়েংশিল্লবা মতুংদা মদুগী ৱারোল ইশিনবা খক্তদা কৈদৌনুংদা পেন্থোক্না লৈরমদে। মহাক্না চাংয়েং তৌবদা ফংলিবা দেতাশিং শিজিন্নদুনা ইন্তর্প্লানতরী স্পেস্কী মওং মতৌশিংবু হেন্না কুপথনা খঙবা ঙম্নবা মতম পুম্বদা হোৎনদুনা লাকখি। ইং ১৯৪৭ অমসুং ১৯৭১গী মনুংদা মহাক্না লৈবাক্কী অমসুং মালেমগী সাইন্সকী চেফোংশিংদা রিসর্চ পেপর ৮৫মুক ফোঙখি।

রাস্ত্রপতিনা হায়খিবদা দাঃ সরাভাই অসি থবক ওইনা পাঙথোকপা থৌওংশিংদা হেন্না থাজবা থম্বা মীওইনি হায়খি। মহাক্না ভারতকী স্পেসকী প্রোগ্রাম্বু মালেমগী স্পেস্তা চৎপা ঙম্বা লৈবাকশিংগা মান্ননা চৎপা ঙম্নবা লম্বী য়াৎলম্বা নত্তে। থৌওং অমগী ফিভম্বু খরা খরা ওইনা হেনগৎহনবগী মহুত্তা পুম্নমকপু মনিংদা থম্লমদুনা খ্বাই পুম্বগী মকোক ওইনা লৈবগী থৌওংনা হেন্না মহাক্না পাম্লম্মি। মহাক্না ভারতকুম্বা চাউখৎলক্লিবা লৈবাক অসিনা সেতিলাইৎ কম্ম্যুনিকেসনগী হীরমদা হকথেংননা চঙশিনগদবনি হায়বগী থাজবা লৈরম্মমি। মহাক্না লৈবাক চাউখৎহনবদা সেতিলাইৎকী পথাপ্না কয়া য়াম্না মতেং পাঙগদগে হায়বদু মীয়ামদা উত্তুনা তাক্নিংলম্মি। ঙসিদি কোবিদ-১৯গী লায়চৎ অসিনা স্কুলগী মহৈ-তম্বদা অয়েৎপা পীরকপা মতমদা রীমোৎ লর্নিং মোদকী খুত্থাংদা মহৈ-তম্বা মখা তানা চত্থরিবা অসিনা ঐখোয়না মহাক্কী মঙলান অসিগী কান্নবা অদু খঙবা ঙম্লে।

রাস্ত্রপতিনা হায়খিবদা দাঃ সরাভাইগী চহি চাম্মা শুবা মপোক কুমওন অসিদা স্পেস সেক্তরদা শেমদোকপা কয়া লৈবগী ৱারোল লাউথোকপা অসিনা মতিক মগুন লৈরবা সাইন্তিস্ত অসিগী মফমদা ইকায় খুম্নবা উৎপগী মতিক চারবা থৌওংনি হায়খি। দাঃ সরাভাইনা হায়রমখিবা অফাউবা ৱারোল অমদি, “মীওইবা অমসুং খুন্নাইনা থেংনরিবা খুদোংচাদবা কয়া অসিগী ৱারোইশিন পুরক্নবা চাউখৎপা তেক্নোলোজী শিজিন্নবদা ঐখোয়না অতোপ্পা অমত্তগী মখা তারোইদবনি” হায়বা অসিনি। ভারতনা ‘আত্মানির্ভর’ হেন্না ওইনবা হোৎনরিবা অসিদা মহাক্কী ৱারোল অসিগী তসেংবা ৱাহন্থোক খঙবা ঙম্লে হায়না রাস্ত্রপতিনা হায়খি।

রাস্ত্রপতিগী ৱাঙাং য়েংনবগীদমক্তা মফম অসিদা নম্বীয়ু

***