হকশেল অমসুং য়াইফ য়ুম্বাল মন্ত্রালয়গী ই-সঞ্জীবনি ও.পি.দি. প্লেৎফোর্ম অসিনা ফংহনখিবা তেলি-কন্সল্তেসন লাখ ৩ শুখ্রে। অচৌবা মাই পাকপা অসি হৌদোকখিবগী থা তরুক্কী অতেনবা মতমগী মনুংদা ফংবা ঙমখিবনি।

কোবিদ-১৯ লায়চৎ মনুং অসিদা ই-সঞ্জীবনি ও.পি.দি. সর্ভিসশিং অসিনা পেতেন্ত-তু-দোক্তর তেলিমেদিসিন য়াহল্লি। মসিনা ফিজিকেল দিস্তেন্সিং তৌবা ঙমহন্দুনা কোবিদ শন্দোকপা লাকশিনবদা মতেং পাংখ্রে লোয়ননা নন-কোবিদকী তঙাই ফদবা হেল্থক্যের পীনবা খুদোংচাশিং ফংহনখ্রে। তেলি-কন্সল্তেসনগী মশিং ৱাংবা অসিনা হায়রিবা অসি মীয়াম্না পাম্নরে হায়বগী শাখি ওইরি।

দিজিতেল ইন্তরেক্সন ১,২৯,৮০১গা লোয়ননা, তামিল নাদুনা হৌজিক ফাওবদা তেলি-কন্সল্তেসনগী মশিং খ্বাইদগী য়াম্বা ওইরি।তামিল নাদুনা ওগস্ত ৯ ফাওবদা ৩২,০৩৫ ও.পি.দি. কন্সল্তেসন রেজিস্তর তৌখিবগা লোয়ননা লম অসিদা মাংজিল থারি অমদি চপ মান্নবা থা অসিগী ১৯ ফাওবদা কন্সল্তেসন ৫৬,৩৪৬ রেজিস্তর তৌখি। রাজ্য অসিনা সেপ্তেম্বর ৮ ফাওবদা কন্সল্তেসন লাখ অমা নকনা (৯৭,২০৪) রেজিস্তর তৌখি। লৌনগনবা লায়না অসিগী মওং অসিনা মরম ওইদুনা হান্না শীজিন্নরিবা হীদাক-লাংথক অসিনা খুদোংথিবা থোকহনবা য়াবা মতম অসিগী লুরবা তানফম অসিদা  প্লেৎফোর্ম অসিনা কোবিদ-১৯না খ্বাইদগী হেন্না শোকহল্লবা রাজ্য অমা ওইরিবা অসিদা তঙাই ফদবা হেল্থক্যের ফংহনখ্রে।

তামিল নাদুগী মতুং উত্তর প্রদেশনা ইল্লি (কন্সল্তেসন ৯৬,১৫১), মতুংদা কেরেলা (কন্সল্তেসন ৩২,৯২১) অমসুং উত্তরাখন্দ (কন্সল্তেসন ১০,৩৯১) লৈখি। রাজ্য মরি অসিগী তেলি-কন্সল্তেসন অসি ২,৬৯,২৬৪ ওইখি (অপুনবা কন্সল্তেসন ৮৯.৭৫%)।

গুজরাত অমসুং জম্মু অমদি কাশ্মিরদা ই-সঞ্জীবনি ও.পি.দি. অমদি ছত্তিসগরদা ই-সঞ্জীবনি (এ.বি.-ঐচ.দবল্যু.সি.) চৎনবা হৌবগা লোয়ননা ই-সঞ্জীবনি শীজিন্নবা রাজ্য অমসুং য়ু.তি.গী অপুনবা মশিং অসি ২৬ শুখ্রে। ই-সঞ্জীবনি ও.পি.দি.দা চাউরাক্না দোক্তর ৪,৬০০ ত্রেন তৌখি অমদি ই-সঞ্জীবনিগী নেস্নেল নেৎৱার্ক্তা নোংমগী চাংচৎ ওইনা কন্সল্তেসন ৬০০০কী মথক্তা রিকোর্দ তৌখি।

ই-সঞ্জীবনি তেলি-কন্সল্তেসন প্লেৎফোর্ম অসি অখন্নবা ওইহল্লিবা হীরম অদুদি প্লেৎফোর্ম অসিগী চল্লাইরিবা অমদি য়েংশিনবগী পথাপ নাইবা মওং অসিনি। রাজ্যশিং অমসুং ইমপ্লিমেন্ত তৌরিবা এজেন্সীগী (সি-দি.এ.সি. মোহলি) মরক্তা অনকপা অমসুং অফবা মরী অমা থম্লি। মসিনা য়ুজরশিংদগী অথুবদা ফীদবেক লৌবা য়াহল্লি মসিনা ইমপ্লিমেন্ত তৌরিবা তিম খুমাং চাউশিনহনবদা মতেং পাংলি। মখা তারকপা ওইনা ই-সঞ্জীবনি অসি মখোয়গী কান্নবা অদুগা মরী লৈননা লেপ্তনা হেনগৎপা খক নত্তনা রাজ্যশিংগী য়ুজরশিংনা পাম্লিবা অনৌবা ফঙ্কস্নেলিতীশিং অমসুং ফিচরশিং হেনগৎলক্লি।

ই-সঞ্জীবনি প্লেৎফোর্মনা তেলি-কন্সল্তেসন সর্ভিস মখল অনি ফংহল্লি মদুদি দোক্তর-তু-দোক্তর (ই-সঞ্জীবনি) অমসুং পেসেন্ত-তু-দোক্তর (ই-সঞ্জীবনি ও.পি.দি.) তেলি-কন্সল্তেসনশিং। অহানবগী অসি অয়ুশমান ভারত হেল্থ এন্দ ৱেলনেস সেন্তর (এ.বি.-ঐচ.দবল্যু.সি.)গী খুত্থাংদা ইমপ্লিমেন্ত তোরি। মসিনা ‘হব এন্দ স্পোক’ মোদেল অমদা খন্দোক্লবা মেদিকেল কোলেজ হোস্পিতালশিংগা লোয়ননা ঐচ.দবল্যু.সি. লাখ ১.৫কা পুন্না তেলি-কন্সল্তেসন ইমপ্লিমেন্ত তৌনবা পান্দম থম্লি। রাজ্যশিংনা মেদিকেল কোলেজশিং অমসুং দিস্ত্রিক্ত হোস্পিতালশিংদা দেদিকেতেদ ‘হবশিং’ লিংখৎনবা খনগৎখ্রে অমদি মসিনা ‘স্পোকশিং’ মদুদি এস.ঐচ.সি.শিং, পি.ঐচ.সি.শিং অমসুং ঐচ.দবল্যু.সি.শিংদা তেলি-কন্সল্তেসন সর্ভিসশিং ফংহনগনি।

হকশেল মন্ত্রীনা এপ্রিল ২০২০দা কোবিদ-১৯ লায়চৎনা মরম ওইরগা অনিশুবা তেলি-কন্সল্তেসন সর্ভিস ‘ই-সঞ্জীবনি ও.পি.দি.’ হৌদোক্তুনা পেসেন্ত-তু-দোক্তর তেলিমেদিসিন য়াহনখ্রে। মসিনা কোবিদ শন্দোকপা লাকশিনবগা লোয়ননা মতম অমত্তদা নন-কোবিদকী তঙাইফবা হেলথক্যের প্রোবিজনশিং পীখ্রে।

*****