ঙসি ঐখোয়না কোরোনাগী লুরবা তানফম অসিদা ৱারী শান্নরিবা অসিদা  লৈবাক অসিগী হকশেলগী পুৱারীগী য়াম্না অথোউৃইবা  অসি য়াম্না তাঞ্জা চানবনি।

চহি ২গ মমাংদা ঙসিগী নুমিৎঅসিমক্তদা আয়ুশমান ভারত- প্রধানমন্ত্রী জন আরোগ্য য়োজনা হৌদোকখি।

চহি ২খক্তগী মনুংদা য়োজনা অসিদগী লায়রবা অনাবা মীওই করোর অমগা লিশিং কুনমঙা হেন্না লোম্না লায়েংবা ফংহনখ্রে।  

ঐহাক্না ঙসিগী থৌরমসিদগী, আয়ুশমান ভারত য়োজনাদগী লাইরবশিংগী মতেং পাংখিবা দোক্তরশিং, মেদিকেল স্তাফশিংগী মফমদা অখন্ননা থাগৎপা ফোংদোকচরি।

মরূপশিং,

ঙসিগী ঐখোয়গী ৱা খন্নরিবা মতমসিদা তুংদা য়াৎকদবা লাল্লোংশিংগী লম্বি কয়া অমা হেন্না ময়েক শেংনা উরকপগী ৱাফম কয়া অমা থোরক্লি।  

ভারত্তা লায়চৎ অসিগী কেসশিং অসি লেপ্তনা হেনগৎলক্লি হায়বসি অচুম্বনি।  অদুবু ঙসি ঐখোয়না নোংমদা তেস্ত লাক্ষ ১০ হেন্না তৌদুনা ফগৎলকপগী মশিংসু য়াংনা হেনগৎলক্লি।  

রাজ্য কয়া অমদা অমদি রাজ্যশিংগী মনুংদা মফমদুগী ওইবা থাক্তসু খ্বাইদগী অৱাংবা থাক্তা থবক পাংথোকপা উরি।  

ঐখোয়না মসিগী খং-উবা অসিদগী হেন্না-হেন্না পুক্নিং থৌগৎপা তাই। মরূপশিং,

হৌখিবা থাশিংদা কোরোনা লায়েংনবা ঐখোয়না শোমগৎখিবা খুদোংচাবশিং অসিদগী ঐখোয়না কোরোনাগা লান্থেংনবদা য়াম্না মতেং ওইরি।  

হৌজিক ঐখোয়না মায়কৈ অমদা কোরোনাগা মরি লৈনবা ইনফ্রাস্ত্রকচর অসি ফগৎহনবা তাবনি, ঐখোয়গী হকশেলগা মরি লৈনবা, ত্রেকিংগা মরি লৈনবা নেৎৱর্ক অসি হেন্না ফবা ত্রেনিংসু পীবা তাবনি।

ঙসিমক কোরোনাগী অখন্নবা ইনফ্রাস্ত্রকচরগীদমক্তা স্তেত দিজাস্তর রেসপোন্স ফন্দ-এস.দি.আর.এফ. অসি শিজিন্ননবসু ঐখোয়না ৱারেপ লৌরে।

রাজ্যশিং কয়া অমনসুং মসিগী মতাংদা হায়জরকখি।

হৌজিক এস.দি.আর.এফ. অসি শিজিন্নবা অসি চাদা ৩৫দগী হেনগৎহল্লগা ৫০ ফাওবা হেনকৎহন্নবা লেপ্নখ্রে।

ৱারেপ অসিদগী রাজ্যশিংনা কোরোনা লান্থেংননবা শেনফম হেন্না ফংবা ঙমগনি।

মরুওইবা ৱাফম অমা ঐহাক্না অদোম ময়ামদা হায়জগে। নুমিৎ ১-২ লোকেলগী ওইনা লোকদাউন তৌবদা কোরোনা অসি থিংবদা য়াম্না কান্নৈ, রাজ্য খুদিংমক্না মখোয়গী থাক্তা  য়েংশিনগদবনি।

মসিগী মরম অসিনা রাজ্যশিংদা শেন্মিৎলোনগী থবক পাংথোকপদা অৱাবা অমা ওইহনবগদি নত্তেকো?

রাজ্যশিংনা মসি য়াম্না হকচিন্না খনবিনবা হায়জরি।

মরূপশিং,

নিংথিনা তেস্তিং, ত্রেকিং, ত্রিৎেমেন্ত, সর্ভিলেন্স অমসুং ময়েক শেংনা মেসেজিং তৌদুনা মসিদা ঐখোয়না হেন্না মায় ওনশিনগদবনি।

নিংথিনা মেসেজিং তৌবা অসিনা লায়না অসি লাইওং উত্তবা ওইবসিনা হেন্না মথৌ তারি। অসিগুম্বা মতাংসিদা তোকঙাসু শন্দোক্নৈ। মীয়াম মীচমগী থম্মোইদা তেস্তিং অসি লাল্লবরা হায়বগী চিংনবা ফাওহল্লি। মসিদা নত্তনা লায়চৎ অসিগী অরুবা ফীভম অসি তানা ওনবদসু শোইবা য়াওই।

নৈনবা কয়ানা লায়চৎ অসি থিংনবা মাস্ককী থৌদাং অসি য়াম্না চাউই হায়না হায়রি। মাস্ক উপ্পগী হৈনবী থম্বা অসি য়াম্না লুই অদুবু নুতিগী ওইবা পুন্সি মহিংদা মসিগী হৈনবী অসি শোইদনা থমদনা মপুংফাবা মহৈ ফংলোই।

মরূপশিং,

হৌখিবদা খংন-উনখিবা অসিদা রাজ্য অমদগী রাজ্য অমদা পোৎ পুথোক-পুশিন তৌবদা অথিংবা লৈবদগী কান্নদবদা অৱাবা পীদুনা নাগরিকশিংবু অৱাবা পীরে হায়বা অহুমশুবা ৱাফম অমা থোরক্লি। 

মসিদগী মীয়ামগী পুন্সিদসু চৈথেং পীরি অদুগা হিংবদসু চৈথেং ফংহল্লি। হৌজিক ওক্সিজেন সপ্লাইগী মতাংদা হৌখিবা নুমিৎ খরনিদা রাজ্যশিংনা অৱাবা মায়োক্নরি।  পুন্সিবু কনবিগদৌরিবা ওক্সিজেন অসি অরেপ-অখম লৈতনা সপ্লাই তৌনবা মথৌ তাবা থবক খুদিংমক পায়খৎকনি। ভারতনা লুরবা তানফম অসিদা মালেম অসিদা পুন্সি কন্নবা হিদাকশিংগী শোইদবা মওংদা সপ্লাই তৌগদবনি।  মতাং অসিদা রাজ্য অমদগী অতোপ্পা রাজ্য অমদা হিদাকশিং অসি লায়না য়ৌহন্নবা ঐখোয় খুদিংমক্না য়েংশিনগদবনি।  

মরূপশিং,

খাংবা কনবা, মীনুংশি লৈবা অমদি ৱারী শান্নবনা কোরোনাগী মতমসিদা লৈবাক অসিনা পাংথোক্তুনা উৎলিবা অসি ঐখোয়নসু মখা তানা পাংথোক্কদবনি। লায়চৎ অসিগী মায়োক্তা লান্থেংনবগা লোয়ন-লোয়ননা  হৌজিক শেন্মিৎলোনগী মতাংদসু ঐখোয়না অরৈবা পাঙ্গল পুথোক্তুনা হোৎনবগী মথৌ তারে।

ঐখোয়না হোৎনরিবা অসি শোইদনা মায় পাক্কনি, মসি হায়জবগা লোয়ননা অদোম ময়াম্বু হন্না-হন্না থাগৎচরি!

*****