কোবিদ-১৯ লাইচৎ লাকপদগী মমাংদা অমুক্তা লৌখৎখিদ্রিবা চেকশিন-থৌরাংশিং মরক্তা খৌরাংনা ঙাইরক্লবা সংসদকী নোংজু মীফম হৌখ্রে অমসুং ৱাখল তামিন্নদুনা ৱাহন্থোক লৈনা খন্নদুনা মতম নিংথিনা শীজিন্ননবা অমসুং আইন শেম্নবা রাজ্য সভাগী চিয়রমেন এম.বেনকাইয়া নাইদুনা মেম্বরশিংদা তকশিনখ্রে।

ভারতকী সংসদকী পুৱারিদা অহানবা ওইনা, মেম্বরশিং মপুংফানা থাপ্না ফম্বা ঙম্নবা মতম অমতদা হাওস অমগী মীফম পাংথোক্নবা রাজ্য সভা অমসুং লোক সভা অনিমক্কী হোলশিং শীজিন্নখি। হৌজিক রাজ্য সভানা মশাগী চেম্বর অমসুং গেল্লেরিশিংগী মথক্তা লোক সভাগী চেম্বরসু শীজিন্নরে।

মহাক্কী হৌদোকপগী ৱারোলদা শ্রী নাইদুনা হাওসকী মমাংদা এজেন্দা পুথোকখি অমসুং প্রোসিদিংশিং ফজনা পাংথোক্না ঙম্নবা মেম্বর খুদিংমক্তা খঙহনখি। মহাক্না হায়খি লাইচৎ অসি লাকশিন্নবা,শেন-থুমগী ফিবম অমুক হন্না ফগৎহন্নবা অমসুং মহৌশাগী পুন্সিদা হল্লক্নবা মরুওইবা পাউতাক পীগনি হায়না মীয়াম্না মেম্বরশিংদগী থাজবা থম্লি।

অতেনবা মীফম অসিদা শুপ্নগী সিতিং ১৮ খক লৈগনি । মরুওইবা আইনশিং ৱাহন্থোক লৈনা খন্ননবা অমসুং কোবিদ-১৯ লাইচৎ য়াওনা লৈবাক্কী ৱাফমশিংদা মিৎয়েং চঙগনি হায়না শ্রী নাইদুনা ফোঙদোকখি।

নুমিৎ ১৭৫গী মতুংদা মেম্বরশিং উনবদা হরাওবা ফোঙদোক্লদুনা মহাক্না হায়খি চহি ১০০গী মমাংদা স্পেনিস ফ্লু থোকখ্রবা মতুংদা কোবিদ-১৯ লাইচৎ অসি মীওইবা খুন্নাইদা চৈথিং পীবা খ্বাইদগী চাউবা অৱাবা অমা ওইরে। ভারতনা মীশিং খ্বাইদগী য়াম্বা অনিসুবা লৈবাক ওইরবসু, লায়না লৌনবা মশিং অমসুং শিবগী চাং ওনবদা লাইচৎ অসিনা থোকহনবা অৱাবশিং য়াম্না হন্থরি।

মহাক্না হায়খি কোবিদ-১৯ লাইচৎনা অনৌবা চৎনবী অমা শেম্লে অমসুং মীয়াম অমসুং শেন-থুমদা শাথিনা অকায়বা পীরে। দোক্তরশিং, নর্সশিং, পুলিস, পেরামিলিতরি ফোর্সশিং, সেনিতরি ৱার্করশিং, মেদিয়াগী মীওইশিং অমসুং তঙাইফদবা থবকশিং ফংহল্লিবশিংগী শিংথানিংঙাই ওইরবা থবকশিং থাগৎলি। লোকদাউনগী অথিংবা মরক্তা রেকোর্দ ওইনা পোৎথোক পুথোক্লিবা লৌমীশিং থাগৎলি। অথুবা মতমদা সাইন্সতিস্তশিংনা তিকা অমা পুথোরক্কনি হায়বগী থাজবা থম্লি।

শ্রী নাইদুনা হায়খি চৎথোক-চৎশিনগী অথিংবশিং কোমথোকপদগী দিপার্তমেন্তগা মরী লৈনবা স্তেন্দিং কমিতিশিং মথৌ পাংথোকপা হৌরে। মখোয়না লাইচৎ অসিগী মতাংদা য়েংশিল্লে। চহি অসিগী জুলাইদগী রাজ্য সভাগী অসিগুম্বা কমিতি ৭গী মীফম ২৬ পাংথোকখ্রে অমসুং লাইচৎ অসিগী চৈথেং অমসুং লাকশিন্নবগী মতাংদা অপুনবা ওইনা পুং ৫৬ অমসুং মিনিত ৪০ রোমগী মতম চঙনা ৱা খন্নখ্রে।

অগস্ত হাওস অসিগী চিয়রমেন ওইনা ওফিস পায়রকপা চহি অহুম মপুংফারবা শ্রী নাইদুনা হায়খি মসিগী হাওস অসি হেক লৈরকপদগী পাংথোকখিবা থবকশিংগী মতাংদা কুপ্না থিজিন্নবা মহাক্না সেক্রেতরিয়েৎতা য়াথং পীখ্রে।

মহাক্না হায়খি ১৯৭৮দগী ফংবা দেতাশিং য়েংবদা, হৌখিবা চহি ২৫ অসিদা হাওস অসিগী কান্নবা হন্থরক্লি। অদুবু থাজবদি লৈরি। হাওসকী হৌখিবা মীফম অহুমগী কান্নবা চাদা ৯৪.৬০ ওইখি অমসুং হৌখিবা চহি মঙা অসিদা খ্বাইদগী ফবা মীফম অহুম ওইখি। মসিগী ‘অনৌবা চৎনবী” অসি মতম কুইনা লৈগনি হায়না ঐনা থাজবা থম্লি।

চিয়রমেন্না হায়খি রাজ্য সভাগী দিপার্তমেন্তগা মরী লৈনবা কমিতিশিং শরুক য়াবগী চাং অহানবা ওইনা ২০১৯-২০(২০১৯গী সেপ্তেম্বর-২০২০গী মার্চ) মনুংদা চাদা ৫০দগী চাদা ৫০.৭৩ ফাওবা লৈখি। মসি ২০১৭-১৮দা চাদা ৪৪.৮৭ ওইখি।

মসিগী অৱাবা মতম অসি খাংবা কনবা, থকশি-খাশি লৈবা অমসুং অচেৎপা ফিরেপ্না লাকশিনবা ঙমগনি হায়না মহাক্না ফোঙদোকখি।

রাজ্য সভাগী মীফমগী ঙসি অহানবা নুমিৎতা নুংথিলগী পুং ৩দা হৌখি অমসুং নৌনা/অমুক হন্না খল্লক্লবা মেম্বর ১৪ ৱাশক লৌখি।

অনলোক-ফোরগীদমক হোম এফেয়ার্স মিনিস্ত্রিনা ২০২০গী অগস্ত ২৯দা থোকখিবা চৎন-কাংলোনশিংঘী মতুংইন্না নোংজু মীফম অসি শরুক য়াদনবা মেম্বর খরনা ছুতি লৌখি। হাওসকী অয়াবগা লোয়ন্না হায়রিবা মেম্বরশিং অদু ছুতি পীখি।

হিন্দি দিৱাস থৌরমগী মতাংদা চিয়রমেন্না হায়খি ভারতকী লোল খুদিংমক চপ মান্না মরুওই। হিন্দিগা লোয়ন্না ভারতকী লোল খুদিংমক তম্নবা অমসুং য়োকখৎনবা ঐখোয়না হোৎনগদবনি।

হাওসনা মসিগী দিপুতি চিয়রমেন খনখি। রাজ্য সভাগী ১৪সুবা দিপুতি চিয়রমেন ওইনা শ্রী হরিভান্স খনখি। নৌনা খল্লবা দিপুতি চিয়রমেনদা চিয়রমেন্না থাগৎখি অমসুং মহাক্কী য়াইফ-পাউজেল পীখি।

*****