ভারতকা বুদ্ধ লাইনিংগা অচেৎপা মরী লৈনৈ। ভারতকী ময়াইদা লৈরিবা লাইনিং অসিগী লিক্লমশিং মমিং চৎলি অমসুং মালেম শীনবা থুংনা ভারতকী বুদ্ধিস্ত সর্কুইত হায়না খঙনরি। বুদ্ধিজম অমসুং ভাগবান বুদ্ধগা মরী লৈনবা মফমশিং মরাংকাইনা লৈরি অমসুং ভারত শীনবা থুংনা শন্দোক্তুনা মখোয় মশামক পন্থুংফম অমা ওইরে। বুদ্ধগী পুন্সি অমসুং পাউতাকশিংগা মরী লৈনবা মফমশিংদা চৎনিংবগী অপাম্বা অমা মালেমগী লৈবাকশিংদা লৈরিবা বুদ্ধিস্তশিংদা লৈরি।

সক্যামুনি বুদ্ধনা অৱাবশিং লাকশিনখিবা অমসুং লনাই মীওই, ইমুং অমসুং খুন্নাইদা নুংঙাইবা ফংহনখিবা অচুম্বদা মিৎয়েং থমদুনা ২০২০গী সেপ্তেম্বর ১২দা দেখো অপনা দেশ ৱেবিনার পরিশিংগী মখাদা “বুদ্ধগী লিক্লমশিংদা” হায়বা হিরমদা তুরিজম মিনিস্ত্রিনা মসিগী খ্বাইদগী নৌবা ৱেবিনার পাংথোকখ্রে। মহাক্কী পুন্সিগা মরী লৈনবা মফমশিং কোইনা চৎপা অসি মহাক্কী পাউতাকশিং পামজবশিংগী য়াম্না কান্নবা অমা ওইগনি হায়না বুদ্ধনা পাউতাক পীরমখি। অপনা দেশ ৱেবিনার পরিং অসি এক ভারত স্রেস্থা ভারতকী মখাদা ভারতকী ইনাকখুল্লবা খেন্নবশিং উৎনবা থবক অমনি। 

বুদ্ধপাথ/অহিমসা ত্রস্তকী ফাউন্দর ধর্মাচার্য়া সাতুমনা ৱেবিনার অদুদা শরুক য়াখিবশিং ভর্চুএল খোঙচৎ অমা গঙ্গা তুরেলগী তম্পাক শীনবা থুংনা লৈরিবা বুদ্ধনা মঙাল ফংখিবা মফম বোধা গয়া, রাজগিরদা লৈবা ধ্যান তৌখিবা মফম ভলচর পিক, মহাক্কী অঙাং ওইরিঙৈদা লৈরকখিবা কাপিলাবসতু, মহাক্না অহানবা ওইনা পাউজেল শন্দোকখিবা সরনাথদা লৈবা দিয়র পার্ক অমসুং মহাক লৈখিদবা কুসিনগর অসিনচিংবা মফমশিং য়েংহনখি। মীওইবা অমা ওইনা বুদ্ধ, মহাক্কী পুন্সি অমসুং মহাক্না তাক্লম্বশিং খঙবদা মতেং পাংনবা ধর্মাচার্য়া সাতুমনা বুদ্বগী পুন্সি ৱারিশিং অমসুং পাউতাকশিং লিখি।

মহাক হিংলিঙৈ মতমদগী নৎত্রগা সেঞ্চুরি অমা নৎত্রগা অনিগী মতুংদা গৌতমগী মতাংদা অইবা রেকোর্দ অমতা ফংখিদে। অদুবু ৩সুবা সেঞ্চুরিগী ময়াই চল্লকপা, অশোককী ইদিকশিংদা বুদ্বগী মরমদা পনখি অমসুং মরুওইনা অশোক্কী লুম্বীনি পিল্লরদা হক্লম্বশিংদা নিংথৌরেল অশোক্না বুদ্ধগী পোক্নফম ওইনা লুম্বীনিদা লাইখুরুম্বা চৎপগী ৱাফম পনখি অমসুং মহাক বুদ্ধ সক্যামুনি হায়না কৌখি।

বুদ্ধিস্তকী চৎনবী মতুংইন্না খৃস্তগী মমাং ৫৬৩দা লুম্বীনিদা নিংথৌগী ইমুং অমদা বুদ্ধ পোকখি। মহাক অঙাং ওইরিঙৈদা সিধার্থা গৌতম হায়না খঙনখি। মহাক্কী মপা সুদ্ধোদানা, কোসালা লৈবাক্কী সাক্যা শাগৈগী লুচিংবনি অমসুং মহাক্কী মমানা মহারানি  ময়া দেবীনি। মহাক পোক্লবা নুমিৎ ৭গী মতুংদা মহাক্কী মমা শিখিবদগী, মহাক মহাক্কী মমাগী মনাওনুপী মহাপাজাপতি গোতামিনা য়োক্লকখি।

পালি অরিয়াপারিয়েসানা-সুত্তা হায়রিবা খুৎইশিং অসিদা বুদ্ধনা থৱায়গী মরমদা খঙনিংবনা লাংতক্নবগী মতাংদা অঙনবা মতমগী থৌদোকশিংগী মতাং থেংনখি। মহাক্কী পুন্সিদা অহল ওইরকপা, লায়না অমসুং শিবগী মরমদা ৱাখল খনখিবা অমসুং মসিদগী হেন্না ফবা(নিংতম্বা, নির্ভনা) অমা লৈরমগনি হায়না খনবদগী গৌতমনা মঙাল ফংনবা লম্বী থিরকপগী ৱাফমশিং মসিগী খুৎই অসিদা উবা ফংখি। চহি ২৯ শরুকপা মতমদা মহাক অৱা-অনা মশক খঙবা হৌরকখি। পুন্সিগী অৱা-অনা কয়া অসিনা ইথিল পীবদগী, মহাক্কী মপাগী অনিংবগী ময়োক্তা, কোইচৎ চৎপা লাইনিংবা অমা ওইনা হিংনবা অহিংদা কোনুং থাদোক্নবা মহাক ৱারেপ লৌখি।

বুদ্ধিস্তশিংগী অঙনবা মতমগী খুৎইশিংগী মতুংইন্না, ধ্যান তৌবনা মিকপ থোক্নবগী অচুম্বা লম্বীনি হায়বা খঙলবা মতুংদা, গৌতমনা ইশানা ইশাবু কাহেন্না ৱাহনবা নত্তবা “ময়াই ওইবা লম্বী” নৎত্রগা অচুম্বা লম্বী নিপাল পুথোকখি। মহাক্কী মরুপশিংনা মহাক থকশি-খাশি য়াওদ্রে অমসুং মহাক্কী থিজিনবা তোক্লে হায়না থাজবদগী মহাক্কী মরুপ মঙানা মহাক থাদোক্তুনা চৎখিবদগী বুদ্ধনা কনাগুম্বা অমতা শোক্ন-শম্নদনা লৈরম্বা অদু তোকখি। চিংদগী কুমথরকপদা মহাক ৱান্থখি অমসুং সুজাতা কৌবী খুঙ্গংগী নুপীমচা অমদগী শঙ্গোম ক্ষের চাখি।

মহাক্না ধ্যান তৌবগী হৈশিংলবা ওজাশিং উনখি অমসুং মখোয়গী তেক্নিকশিং তমখি। মতম পুম্নমক্তা মখোয়না মঙোন্দা ৱাখলগী শক্তি খক উৎখি অদুবু ৱাখল অসিদি উৎখিদে। অরোইবদা, বুধগয়াদা, মহাক্না ৱাখলগী অচুম্বা মশক খঙদ্রি ফাওবা অমসুং খুদিংমক কান্নবা পীবা ঙমদ্রি ফাওবা ধ্যান তৌদুনা লৈনবা বুদ্ধনা ৱারেপ লৌখি। ৱাখলদা অপনবা পীরিবশিং নমথেক্তুনা নুংথিল ৬ অমসুং নুমিদাং ৬ লেল্লবা মতুংদা, মহাক মশাগী চহি ৩৫শুগদবা চয়োল অমা ৱাৎলিঙৈদা, কালেনগী পুর্নিমাগী অয়ুক্তা মহাক মঙাল ফংখি।

মহাক মিকপ থোক্লবা মতুংদা, অতোপ্পশিংদা মহাক্না ধর্ম তম্বীগদরা নৎত্রগা তম্বীরোইদ্র হায়বগী মতাংদা বু্দ্ব লাংতক্নখি। মীওইবা অসি পংবা, মিহৌ চাউবা অমসুং তুকৎচবা অসিনা অশুক্কী মতিক লাকশিল্লে মদুদি মখোয়না কৈদৌঙৈদা অচুম্বা লম্বী অদু খঙদ্রে হায়বা মহাক খঙখি। অদুবু ঈশ্বর ব্রাহ্মা সাহম্পতিনা মহাক ৱাখল তাহনখি , “মখোয়গী মিৎশিংদা উফুল খর য়াওরবশিংনা” মসি খঙগনি হায়না মরৈ য়েৎনখি। বুদ্ধ ৱাখল লাকখি অমসুং তম্বীবা য়াখি। বরানাসী ময়াদা লৈবা দিয়র পার্কতা বুদ্ধনা লাইনিংবা মঙা থেংনখি অমসুং মহাক মপুংফানা মিকপ থোক্লে হায়না মখোয়দা ৱাখল তাহনবা ঙমখি।

বুদ্ধগী অহানবা ধর্মগী পাউজেল শন্দোকপা অসি ধর্ম চক্র প্রবর্তনা নৎত্রগা আইনগী চকা উংবা হায়না খঙনৈ । মীওইবনা ৱাবগী মরমশিং ঐখোয়গী অপাম্বশিং অসিনা থোকহনবনি হায়না মহাক্না ফোঙদোকখি। মহাক্না অচুম্বা মরি শন্দোক্না তাকখি:

মালেম অসি অৱা-অনা কয়ানা পীক থল্লি। মসিগী অৱাবা অসি অপাম্বনা ওইহনবনি। ঐখোয়না অপাম্বশিং লৌথোকপা মতমদা মসিগী অৱাবা অসি কোকখিগনি। মখাগী অচুম্বা লম্বী নিপাল অসিগী মখাদা অৱাবা কোকহনগনি। মসি পুন্সিগী অৱাবা কোক্নবা অরাইবা অমসুং অচুম্বা লম্বীনি। মখোয় অদুদি অচুম্বা মিৎয়েং, অচুম্বা ৱাখল,অচুম্বা ৱাঙাং, অচুম্বা থবক, অচুম্বা হিংনবা লম্বী, চুম্না হোৎনবা, চুম্না খঙবা অমসুং চুম্না ধ্যান তৌবা অসিনি।

ৱেবিনারদা উৎখিবা মরুওইবা বুদ্ধিস্তকী মফমশিং :

সরনাথ: বুদ্ধ গয়াদা বোধি উ অমগী মখাদা মহাক্না মঙাল ফংলবা মতুংদা বুদ্ধনা অহানবা ওইনা মহাক্কী পাউজেল সরনাথতা লৈবা আর্কিওলোজিকেল কমপ্লেক্স ময়াদা লৈরিবা দিয়র পার্ক অসিদা শন্দোকখি হায়না থাজনরি। মহাক্না লাইনিংদুনা লৈরিঙৈ মতমদা বুদ্ধগা লোয়নখিবা অমসুং তুংদা মহাক থাদোক্তুনা চৎখিবা মীওই মঙা অদু সরনাথতা থেংনবদগী মফম অদুদগী ধর্ম শন্দোকপা হৌনবা সরনাথ খনখিবনি। বুদ্ধনা মঙাল ফংবা মতমদা, মহাক্না খঙলিবা অদু মখোয়না ইহান হান্না খঙগদবনি হায়না মহাক্না খনখি। মরম অদুনা মহাক্না সরনাথ ফাওবা লাকখি অমসুং মহাক্কী অহানবা পাউতাকশিং অদু ধর্মচক্রপ্রবর্তনা সুত্রা হায়না খঙনখি।

রাজগির: মফম অসি মগধ লৈবাক্কী কোনুংনি। মফম অসিদা বুদ্ধনা থা কয়া ধ্যান তৌদুনা লৈখি অমসুং গৃধ্রা-কুতাদা ধর্ম শন্দোকখি। মহাক্না মহাক্কী খ্বাইদগী মমিং লৈরবা পাউজেলশিং শন্দোকখি অমসুং মগধগী নিংথৌ বিম্বসারা অমসুং মশিং থিঙমদ্রবা মীওই কয়া বুদ্ধ লাইনিং লৌহনখি। মফম অসিদা বুদ্ধনা মহাক্কী মমিং লৈরবা অতানাতিয়া সুত্রা শন্দোকখি।

শ্রাবাস্তি : মসি মমাংঙৈগী নিংথৌ পানবা লৈবাক কোসালাগী কোনুংনি অমসুং ভাগবান বুদ্ধনা মহাক্কী লাইনিং য়াদবশিংদা মহাক্কী অঙকপশিং পাংথোকখিবগীদমক মফম অসি বুদ্ধিস্তশিংগী ওইনা শেংলবা মফম অমনি। হায়রিবা অঙকপশিংগী মনুংদা বুদ্ধনা মশাগী মমি কয়া থোকহনবা য়াওখি। মসি বুদ্ধিস্ত আর্তকী মীয়াম্না পাম্নবা থিম অমা ওইরি। মহাক থাজদবশিংগী মফমদা বুদ্ধনা মহাক্কী ঈশ্বরগী শক্তি অদু উৎখি। মহাক্না মুনি অমা ওইনা হিংলিঙৈ মতমগী অয়াম্বা শরুক শ্রাবাস্তিদা লৈখি।

ভলচর পিক: ত্রেনিং পাংথোক্নবা অমসুং পোথানবা মফম ওইনা বুদ্ধ অমসুং মহাক্কী সেবকশিংনা য়াম্না তোইনা চৎখিবা মফম অমনি।

কেসারিয়া : বিহারগী চম্পারন(নোংপোক)জিলাদা লৈবা পাতনাদগী কিলোমিতর ১১০ লাপ্পা কেসারিয়াদা লৈরিবা কেসারিয়া ইস্তূপা অসি বুদ্ধিস্ত ইস্তূপা অমনি। খৃস্তগী মমাং ৩সুবা চহিচাদা অহানবা ইস্তূপা শাখি। কেসারিয়া ইস্তূপা অসি ফিৎ ৪০০ রোম কোনলি অমসুং ফিৎ ১০৪ রোম ৱাংই।

বাইসালি: মফম অসিদা বুদ্ধনা অহুমলক চৎখি অমসুং মতম শাংনা মফম অসিদা লৈখি হায়না থানরি। বাইসালিদা বুদ্ধনা মহাক্কী অরোইবা পাউজেল শন্দোকখি অমসুং মফম অসিদা মহাক্কী নির্ভনা লাউথোকখি।

কুসিনাগর : মফম অসি ভাগবান বুদ্ধগী শেংলবা মফম মরিগী মনুংদা অমনি। বুদ্ধনা মহাক্কী অরোইবা পাউজেল শন্দোকখি অমসুং খৃস্তগী মমাং চহি ৪৮৩দা নোঙ্গাখি অমসুং রামবার ইস্তূপাদা অরোইবা মথৌ-মঙম পাংথোকখি।

ৱেবিনার অদু লোইশিল্লকপদা, এদিসনেল দিরেক্তর জেনেরেল, রুপিন্দর বারনা আই.আর.সি.তি.সিগী মমিং লৈরবা বুদ্ধিস্ত তুরিস্ত ত্রেন মহাপরিনির্ভনা এক্সপ্রেসকী মতাংদা ৱা ঙাংখি। ত্রেন অসিনা খোঙচৎ মনুংদা পেসেঞ্জরশিংদা বুদ্ধ লাইনিংগী হৌরকফম অমসুং পাউতাকশিং তাকখি।

বুদ্ধ লাইনিং অসি মালেমদা মীওই মিল্লিয়ন ৫০০ রোম্না লৌরি অমসুং “বুদ্ধিস্ত সর্কুইত ওফ ইন্দিয়া’ হায়না খঙনদুনা বুদ্ধগী লিক্লমশিংদা মখোয় পুরকপা অসি পাকচাউরবা কৈথেল অমনি।

দেখো অপনা দেশ ৱেবিনার পরিং অসি ইলেকত্রোনিক্স অমসুং ইনফোর্মেসন তেক্নোলোজি মিনিস্ত্রিগী নেসনেল ই গভর্নান্স দিপার্তমেন্তগী তেক্নিকেলগী মতেংগা লোয়ন্না পাংথোকপনি। ৱেবিনার অসিগী থৌরমশিং হৌজিক https://www.youtube.com/channel/UCbzIbBmMvtvH7d6Zo_ZEHDA/featured

অমসুং ভারত সরকারগী তুরিজম মিনিস্ত্রিগী সোসিএল মেদিয়া হেন্দলশিংদা ফংগনি।

 “প্রোমোসন দিস্তিনেসন ৱিথ কুইশিনস” হায়না মিংথোনবা মথংগী ৱেবিনার ২০২০গী সেপ্তেম্বর ১৯গী অয়ুক পুং ১১দা পাংথোক্কনি। মাংজৌন্না https://digitalindiagov.zoom.us/webinar/register/WN_6ydAovSPQtaSCTwzaaNwtw দা মিং চনবীয়ু।

*****