এফ.আই.সি.সি.আই অমসুং এ.আই.আই.এম.এস, নিউ দিল্লিগা লোয়ন্না য়ুনিয়ন হেল্থ মিনিস্ত্রিনা শীন্দুনা লৈবাক অসিদা কোবিদ-১৯ লায়েংলিবা লনাই হোস্পিতালশিংগী ভর্চুএল কনক্লেব অমা পাংথোকখ্রে। মসিনা শিবা মশিং হন্থন্নবা কোবিদ-১৯ লায়েংবগী মতাংদা ক্লিনিকেল প্রোতোকোলশিং অমসুং খ্বাইদগী ফবা লায়েংবগী থবকশিংগী মতাংদা খন্ননবগী মফম অমা পীরে।

কোবিদ-১৯না লৈবাক অসিদা অমুক্তা ওইখিদ্রিবা মওংদা হকশেলগী খুদোংচাদবা থোকহল্লিবা চৈরক অসিদা, সরকার অমসুং লনাই ইন্দস্ত্রিদগী মাইকৈদগী মতিক চাবা থবকশিং লৌখৎখি। লৈবাক অসিদা সরকার অমসুং লনাই হোস্পিতালশিংনা পায়খৎলিবা লায়েংনবগী খ্বাইদগী ফবা থবকশিং শরুক য়ামিন্ননবা মীফম অসি পাংথোকপনি। মখোয়গী হোস্পিতালশিংদা কোবিদ-১৯ লায়েংবা মতমদা থেংনরিবা খুদোংচাদবশিংগী মতাংদা পাউদম্নবা মিনিস্ত্রিনা হোস্পিতালশিংগী মীহুৎশিংদা খঙহনখি।

ভর্চুএল মীফম অদু য়ুনিয়ন হেল্থ সেক্রেতরিনা হৌদোকখি। মহাক্না হায়খি কোবিদ-১৯ অনাবশিং ফমুং ফংহন্নবা সরকারনা থবক পায়খৎলি অমসুং মতিক চাবা লায়েং ফংহনগদবনি। অপুনবগী পান্দমদি মী খুদিংমক্তা চুনবা মমলদা অনা-লায়েংবগী খুদোংচাবশিং লাইনা ফংহনবনি। কেন্দ্র সরকার অমসুং রাজ্যশিং/য়ু.তিশিং সরকারশিংগী পান্দমদি শিবগী চাং চাদা ১গী মখাদা লৈহনবনি।

তোঙান-তোঙানবা রাজ্যশিং/য়ু.তিশিংগী আই.সি.য়ু দোক্তরশিংগী লায়েংবগী লৌশিং হেনগৎহন্নবা ই-আই.সি.য়ু, সেন্তর ওফ এক্সলেন্স অমসুং ক্লিনিকেল গ্রান্ত রাউন্দশিংগী খুৎথাংদা এ.আই.আই.এম.এসনা শীন্দুনা তেলি-কন্সলতেসনগী থৌরমশিং পাংথোকখ্রে। মসিনা লাইচৎ লাকশিন্নবা, ঙাকথোক্নবা, ঙন্না খঙদোক্নবা থবকশিংদা মিৎয়েং চংবা হেনগৎহন্দুনা অনাবা ফগৎলকপগী চাং ৱাংখৎলে অমসুং শিবগী চাং তপ্না তপ্না হন্থরেক্লে।

মীফম মনুংদা, শিবা হন্থনবা অতোপ্পা লায়না লৈবা অনাবশিং মতম চানা লায়েংবগী মরুওইবগী মতাংদা খন্নখি। লায়না লৌনবদগী ঙাকথোক্নবা অমসুং স্তাফশিং পুক্নিং থৌগৎনবা হোস্পিতালগী স্তাফশিং অশোই-অঙাম থোক্তনবা খ্বাইদগী ফবা থবকশিং পায়খৎনবা হোস্পিতালশিংদা খঙহনখি। অথিংবা লৈতনা অনাবশিং লৌশিন্নবা হোস্পিতালশিংদা খঙহনখি। খুদম-চাংদমশিং ফংবা লায়েং পথাপশিং অমসুং কোবিদ-১৯ অনাবশিং লায়েংবদা অতোপ্পা অনাবশিং হন্থহন্নবগী লায়েং-কাংলোনশিংগী মতাংদসু মীফম অদুদা খন্নখি।

মখোয়না কোবিদ-১৯ লায়েংবদা থেংনরিবা খুদোংচাদবশিং অমসুং লৌশিংগী মতাংদা লনাই হোস্পিতালশিংগী সেনিয়র দোক্তরশিংনা পাউদমখি। লনাই হোস্পিতালশিংনা পায়খৎলিবা খ্বাইদগী ফবা লায়েং-কাংলোনশিং শরুক য়াখি অমসুং তয়র-২ অমসুং তয়র-৩ সহরশিংদা হোস্পিতাল স্তাফশিং মতেং পাংনবা শীজিন্নরিবা তেক্নোলোজি অমসুং মোনিতর তৌনবা ফংলিবা খুদোংচাবশিংগী মতাংদসু পাউদমখি। মীফম অদুদা লৈবাক শীনবা থুংনা হোস্পিতালশিংগী মীহুৎ ১৫০, সেনিয়র দোক্তরশিং অমসুং ক্লিনিসিয়ানশিং শরুক য়াখি।

থৌরম অদুদা আই.সি.এম.আরগী দিরেক্তর জেনেরেল, প্রোফেসার বালরাম ভারগাবা, এ.আই.আই.এম.এসকী দিরেক্তর, লব অগরৱাল, হেল্থ অমসুং ফেমিলি ৱেলফিয়ার মিনিস্ত্রিগী জোইন্ত সেক্রেতরি, দোক্তর সঙ্গিতা রেদ্দি, এফ.আই.সি.সি.আইগী প্রসিদেন্ত অমসুং এপোল্লো হোস্পিতালগী জে.এম.দি দোক্তর অলোক রোই, এফ.আই.সি.সি.আই হেল্থ সর্বিসেস কমিতিগী চেয়র অমসুং মেদিকা গ্রুপ ওফ হোস্পিতালগী চিয়রমেনসু শরুক য়াখি।

****