দর্ভঙ্গাদগী দিল্লী ফাওবা নুমিৎ খুদিংগী পাইগদবা ফ্লাইৎশিংগী বুকিং সেপ্তেম্বরগী অরোইবা শরুক্তগী থাবা হৌরগনি হায়না এম.ও.এস. আই./সি., সিভিল এবিএসন শ্রী সর্দীপ সিংহ পুরিনা হায়খ্রে। বিহারগী দর্ভঙ্গা এয়রপোর্তকী গ্রাউন্দ ৱার্ক্কী থবকশিং য়েংশিল্লবা মতুংদা মহাক্না হায়খি মদুদি ফ্লাইৎকী থবকশিং নবেম্বরগী অহৌবা চয়োলদগী ছথ পুজা কুমহৈগী মমাংদা হৌরগনি। মহাক্না মখা তানা হায়খি মদুদি নোর্থ বিহারগী জিল্লা ২২দদি কান্নবা কয়া অমা ফংলগনি।

সিভিল এবিএসন মন্ত্রীনা দর্ভঙ্গা এয়রপোর্তকী খুমাং চাউশিনবগী তাংককশিং দর্ভঙ্গাগী এম.পি. শ্রী গোপাল জী থাকুর, মধুবানিগী এম.পি. শ্রী অশোক য়াদব, এম.ও.সি.এ.গী সেক্রেতরী শ্রী প্রদীপ সিংহ খারোলা, এ.এ.আই.গী চীয়রমেন শ্রী আর্বিন সিংহ অমসুং অতোপ্পা ওফিসিএলশিংগা লোইননা য়েংশিনখি।

দর্ভঙ্গা এয়রপোর্তকী খুমাং চাউশিনবগী ফিবম উবদা অপেনবা ফোংদোক্লদুনা শ্রী পুরিনা হায়খি মদুদি এয়রপোর্তকী অয়াম্বা থবক লোইশিনলে হায়খি। মহাক্না মখা তারদুনা হায়খি মদুদি থুংলফম অমসুং থাদোকফম শঙজাউ, চেক-ইন-ফেসিলিতী, কনভেয়র বেল্তনচিংবশিংসু হাপলে অমসুং লেমহৌরিবা থবক পুম্নমক ওক্তোবর লোইবা ফাওবদা লোইশিনগনি। আর.সি.এস.-উরানগী মখাদা স্পাইসজেৎতা মাংজৌননা লম্বী অসি পীখ্রবনি।

প্রধান মন্ত্রীগী 'হৱাই চপ্পল সে হৱাই জহাজ তক' হায়বা মংলান্না ঐখোয়গী পুন্সিরোল লেপ্পা লৈতনা হোংহল্লি হায়না ফোংদোকখি। মহাক্না হায়খি মদুদি, দর্ভঙ্গাগী মখাগী থবকশিং মপুং ফানা চত্থরিঙৈদা, অতোপ্পা প্রোসেসশিংসু মাংজিল থানা চত্থরি। স্পাইসজেৎনা ফ্লাইৎ কেলিবরেসন তৌবগী থবক ঙসি তৌখি হায়না মন্ত্রীনা দর্ভঙ্গা এয়রপোর্ততা লৈরিঙৈদা ফোংদোকখি।

ঝার্খন্দগী দিওঘর এয়রপোর্তকী ফিবম য়েংশিল্লদুনা শ্রী পুরিনা হায়খি মদুদি দিওঘর এয়রপোর্তকী থবক থৌরমশিং মপুং ফানা চত্থরি অমসুং মতম চানা লোইশিনগনি। মহাক্না এম.পি. শ্রী নিশিকান্ত দুবেগা শাংনা ৱারী শানখি। শ্রী পুরিনা হায়খি মদুদি এয়রপোর্ত অসি অথুবদা থবক হৌরগনি। মহাক্না মখা তারদুনা হায়খি মদুদি সরকার অসিনা মসিগা মরী লৈননা মথং চয়োল ফাওবদা মরুওইবা ৱারেপশিং লৌরবা য়াই।

সন্থাল রিজন্দা নোংথক্কী লম্বীদা শম্নহনবদা নত্তনা পত্না, কোল্কতা অমসুং বাগদোগ্রাগা শম্নগদবা এয়রপোর্ত অসিনা বিহারগী ভাগলপুর অমসুং জমুই জিল্লাগী মীয়ামদা মতেং পাংলগনি।

মন্ত্রীনা হায়খি মদুদি উরান স্কিমগী মখাদা লৈবাক অসিগী মনুং হঞ্জিনবা মফমশিংদা 'সব উরে, সব জুরে'গী খোল্লাওগা লোইননা চঙশিল্লকপা খোংথাং অমনি।

*****