ঙসি ভিদিও কনফরেন্সকী খুৎথাংদা হেল্থ অমসুং ফেমিলি ৱেলফিয়ারগী য়ুনিয়ন মিনিস্তর দোক্তর হর্স ভরধন্না দবল্যু.ঐচ.ও সাউথ এসিয়া রিজন(সিয়ারো)গী ৭৩সুবা মীফম শরুক য়াখ্রে। মীফম অদুদা দবল্যু.ঐচ.ও সাউথ এসিয়া রিজনগী দিরেক্তর , দোক্তর পুনম খেত্রাপাল সিংহ অমসুং দোক্তর রোদেরিকো ওফ্রিন, দবল্যু.ঐচ.ওদা ভারতকী  মীহুৎ অমসুং দবল্যু.ঐচ.ও হেল্থ ইমর্জেন্সিস প্রোগ্রামগী রিজনেল ইমর্জেন্সি দিরেক্তরসু শরুক য়াখি।

ভারতকী মহুৎশীল্লিবা দোক্তর হর্স ভরধন্না কোবিদ-১৯গী খুদক্কী ওইনা থৌরাং তৌবগী মতাংদা মিনিস্তরশিংগী রাউন্ত তেবল মীফমদা ৱা ঙাংখি। অহানবদা মহাক্না ভারত্তা কোবিদ-১৯ লায়েংনবা অমসুং তঙাইফদবা কোবিদ নত্তবা হকশেলগী থবকশিংগী লমদা পায়খৎলিবা মরুওইবা থবক অহুমগী মতাংদা ৱা ঙাংখি। মহাক্না হায়খি হকশেল অমসুং হকশেলগী অথু-অকায়গী থৌরাং তৌনবা থবকশিংদা শেন থাদবা হেনগৎহন্নবা লাল্লোংশিং শীজিন্নরে অমসুং তুংদা লাক্কদবা লাইচৎশিং মাংজৌন্না ঙাকথোক্নবা ইন্তরনেসনেল হেল্থ রিগুলেসন(আই ঐচ আর)গী মরুওইবা থবকশিং পায়খৎলে।

২০২০গী জনুৱারিদগী সার্স নোভেলকোরোনাভাইরস-২ ঙাকথোক্নবা অমসুং লাকশিন্নবা ভারতনা পায়খৎলিবা মীয়ামগী ওইবা হকশেলগী থবকশিংগী মতাংদা মহাক্না হায়খি ভারত সরকারনা লম চৎপগী মতাংদা চেকশিনৱাশিং পীখি, কোবিদ-১৯ কেসশিং লৈবা লৈবাকশিংদগী হল্লকপা মীওইশিং ক্বারেনতাইন তৌহনখি, লৈকাইগী থাক্তা থিজিন্নবা চৎন-কাংলোনশিং পীখি, চিংনবা কেসশিং তেস্ত তৌবা, খোঙ্গুল লিবগী থবক কনখৎহনখি, কোবিদ-১৯গী লাইওং উৎতবা অনাবশিং, ফিবম খর ফবশিং, ময়াই ওইবা অনাবশিং অমসুং শাথিবা অনাবশিং লায়েংনবা কোবিদ কিয়র সেন্তর, দিদিকেতেদ কোবিদ হেল্থ সেন্তর অমসুং দিদিকেতেদ কোবিদ হোস্পিতালশিং হায়না মরোল অহুমগী হকশেলগী মচাক-মথুমশিং শেমগৎখি।

মহাক্না হায়খি কোবিদ-১৯ অনাবশিং লায়েংনবা হিদাক-লাংথকশিং অমসুং পি.পি.ই, ভেন্তিলেতরশিং লৈবাক অসিদা পুথোকপা হেনগৎলে। লায়না লৌনবা ঙাকথোক্নবা অমসুং লাকশিন্নবা, তেস্ত তৌবা, লায়েংবা অমসুং মেদিকেলগী অমোৎপশিং লোইশিনবগী মতাংদা কোবিদ অমসুং কোবিদ নত্তবা লায়েংশঙশিংনা ইনগদবা চৎন-কাংলোনশিং ভারতনা শেম্লে। তেস্ত তৌখিবা, হোস্পিতালদা মিং চনবা, দিসচার্জ তৌখ্রবা অনাবশিং, শিখিবশিংগী মতাংদা পাউ পীরক্নবা রাজ্যশিং অমসুং য়ু.তিশিংগী ৱেব পোর্তেল শেম্লে।কোবিদ নত্তবা তঙাইফদবা অনা-লায়েংগী থবকশিং মীয়ামদা ফংহন্নবা রাজ্যশিং অমসুং য়ু.তিশিংদা য়াথং পীখ্রে।

কোবিদ-১৯ লায়েংবা অমসুং তঙাইফদবা কোবিদ নত্তবা হকশেলগী থবকশিংগী মতাংদা  ভারতনা পায়খৎলিবা মরুওইবা থবক অহুমগী মতাংদা মহাক্না হায়খি

(১) জনুৱারিদা লেব ১ লৈরম্বদগী হৌজিক লেব ১৬৭৮ লৈদুনা লৈবাক অসিদা তেস্ত তৌবা মশিং হেনগৎলে অমসুং হৌজিক নুমিৎ খুদিংগী তেস্ত মিল্লিয়ন অমা পাংথোক্লে

(২) লাইওং উৎতবা অনাবশিং, ফিবম খর ফবশিং, ময়াই ওইবা অনাবশিং অমসুং শাথিবা অনাবশিং লায়েংনবা মরোল অহুমগী কোবিদ লায়েংবগী থবকশিং ফজনা ফংহল্লে অমসুং দোক্তরশিংগী মরক্তা মখা তানা হন্না য়েংশিনবা অমসুং অনৌবা ই-পাউশিং পীথোক-পীশিন তৌনরি, অমসুং

(৩) মতম শাংনা লৈরক্লবা অনাবশিং, কেন্সনর অনাবশিং, ঈগী অনাবশিং, মীরোনবীশিং অমসুং অহলশিং অমসুং খুদক্কী ওইনা লায়েংদবা য়াদবা অনাবশিংদা লৈবাক অসিনা কোবিদ নত্তবা তঙাইফদবা অনা-লায়েংগী খুদোংচাবশিং পীরি। মখোলগী হোস্পিতাল খুদিংমক কোবিদ লায়েংবদা শীজিন্নদনবা অমসুং হোস্পিতাল খর অতোপ্পা অথু-অকায়গী হকশেলগী থবকশিংগীদমক খাক্তুনা থম্নবা রাজ্যশিং অমসুং য়ু.তিশিংদা খঙহনখ্রে।

মহাক্না হায়খি ভারত্তা তুংদা লাক্কদবা লাইচৎশিংদগী ঙাকথোক্নবা অমসুং হকশেলগী ওইবা থৌরাং তৌনবা দবল্যু.ঐচ.ওগী ইন্তরনেসনেল হেল্থ রিগুলেসন(আই ঐচ আর)গী মখাদা মতম শাংনা চৎনগদবা লাল্লোংশিং পায়খৎলে। প্রধান মন্ত্রী নরেন্দ্র মোদীনা হৌদোকখিবা “প্রধান মন্ত্রী-অত্মানির্ভর শ্বাস্থ ভারত য়োজনানা”গী মখাদা হকশেলগী থবকশিং মপাঙ্গল কনখৎহন্নবা হেল্থ সেক্তরদা বজেৎতগী শেন থাদবা হেনগৎহল্লে। মসিনা মীয়ামগী হকশেলগী মচাক-মথুমশিং হেনগৎহনগনি, অফবা মগুন লৈবা অনা-লায়েংগী থবকশিং হেন্না ফংহনগনি অমসুং লায়নাশিংগী মতাংদা থিজিনবগী থবকশিং মপাঙ্গল কনখৎহনগনি, লাইচৎ লাকপা মতমদা থেংনবা ঙম্বগী থৌনা হেনগৎহনগনি অমসুং মীয়ামগী হকশেলগী লমদা থিজিনবা অমসুং বাইও-সেকুরিতিগী থৌরাং তৌবা হেনগৎহনগনি।

দোক্তর হর্স ভরধন্না মখা তানা হায়খি রাজ্যশিং অমসুং য়ু.তিশিংগী পুন্না চৎমিন্নদুনা পায়খৎলিবা থবকশিং অসিনা ভারত ‘অত্মানির্ভর’(মশাগী ওক্নবা পুথোকচবা) ওইনবা পান্দম অদু ফংবা ঙমহনগনি। বাইও-মেদিকেল রিছর্স, বাইও-সেকুরিতি পোলিসি, চীঞ্জাক অমসুং হিদাক-লাংথক অশোই-অঙাম থোক্তনবগী লমদা পায়খৎলিবা থবকশিংগী মতাংদা মহাক্না ৱা ঙাংখি। মহাক্না হায়খি সরকার অমসুং প্রাইবে সেক্তরশিংগী মরক্তা মতেং পাংনবদগী ভারতনা মশাগী ওক্নবা পি.পি.ই, এন-৯৫ মাক্স অমসুং অতোপ্পা মেদিকেলগী পোৎলমশিং পুথোকপা ঙম্লে। “মেক ইন ইন্দিয়”গী মখাদা লৈবাক অসিনা শেমগৎজবা তেক্নোলোজি ফগৎহনবদা থেংনরিবা খুদোংচাদবশিং মশক খঙদোক্নবা অমসুং লৌথোক্নবা হেল্থ অমসুং ফেমিলি ৱেলফিয়ার মিনিস্ত্রি অমসুং ফাইনান্স মিনিস্ত্রিনা থবক পায়খৎলে।

****