হরিয়ানা স্তেততা অপুনবা প্রোজেক্ত ১৩৬ পায়খৎপগী মনুংদা লুপা করোর ৬৯৩গী ওইগদবা প্রোজেক্ত ৬৩ লোইশিল্লে অমদি লুপা করোর ১৮৭৫কী ওইগদবা প্রোজেক্ত ৭৩না পায়খৎলি হায়ানা হাউজিং অমসুং অর্বান এফ্যার্স (এম.ও.ঐচ.য়ু.এ.) সেক্রেতরী শ্রী দুর্গা সঙ্কর মিস্রাদা পাউদম্লকখ্রে‍। হরিয়ানাগী ওইনা অপুনবা অয়াবা পীখ্রবা স্তেত এনুএল এক্সন প্লান (এস.এ.এ.পি.) অসি লুপা করোর ২,৫৬৬ন‍ি‍। পঞ্জাব, হরিয়ানা স্তেত অমসুং চান্দিগর য়ু.তি.গী মকোক থোংবা ওফিসিএলশিংগী ওন্লাইন্দা পাঙথোকপা য়েংশিন মীফম অমদা এম.ও.ঐচ.য়ু.এ. সেক্রেতরীনা স্তেত/য়ু.তি.শিংদা লৈরিবা খোঙজেল অদুবা পুক্নীং থৌগৎখি অমদি প্রোজেক্তশিং অদু খোঙলৈ থুনা পায়খত্তুনা মদুগী কান্নবা মীয়ামদা মতম চানা য়ৌহন্নবা  ৱাফমসু থমখি‍। মহাক্না প্রোজেক্ত পুম্নমক সেন্ত্রেল এসিস্তেন্স (সি.এ.) ফংননবা মার্চ ৩১, ২০২১ ফাওবগী শাংদোক্লবা মিসনগী মতম মনুংদা লোইশিন্নবা পাউতাকসু পীখি‍। মদুগী মতুংদা স্তেত/য়ু.তি. লৈঙাকশিংনা প্রোজক্তশিং অদু মখোয় মশাগী মচাক মথুম শীজিন্নদুনা লোইশিনগদবনি‍। হাউজিং অমসুং অর্বান এফ্যার্স মন্ত্রালয়গী মিসন দাইরেক্তশিংগী মথক্তা হরিয়ানা লৈঙাক্কী চীফ সেক্রেতরী মিস কেসনি অনন্দ অরোরা, পঞ্জাব লৈঙাক্কী চীফ সেক্রেতরী শ্রীমতি ভিনি মহাজন অমসুং চান্দিগর য়ু.তি.গী এদমিনিস্ত্রেতরগী পাউতাক্লোয় শ্রী মনোজ কুমার পরিদা মীফমদুদা শরুক য়াখি‍।

চান্দিগরদা অয়াবা পীখ্রবা লুপা করোর ৫৭কী এস.এ.এ.পি.গী প্রোজেক্ত ১২মক্কী (চাদা ১০০) কন্ত্রেক্ত পীখ্রে‍। পঞ্জাবতা লুপা করোর ২,৭৬৭গী এস.এ.এ.পি.গী মনুংদা প্রোজেক্ত ১৮৫ লৌখৎলে অমদি লুপা করোর ২১৩২গী ওইগদবা প্রোজেক্তশিংগী কন্ত্রেক্ত পীখ্রে‍।

য়েংশিন মীফম অদুদা অম্রুতকী নেসনেল রেঙ্কিংদা হরিয়ানানা ১২শুবদা, পঞ্জাবনা ২৬শুবদা অমদি চান্দিগরনা ২শুবদা লৈরে হায়না পাউদমখি‍। স্তেত/য়ু.তি.শিংনা চঙশিল্লিবা খোঙজেলশিংবু থাগৎলদুনা এম.ও.ঐচ.য়ু.এ. সেক্রেতরীনা মখোয়দা মখোয়গী থৌরাং হেনগৎহন্দুনা ফীভম হেন্না ফগৎহন্নবা ৱাফম থমখি‍।

• য়ুমথোঙদা তোতি কন্নেক্সন পীবা: হরিয়ানানা হৌজিক ফাওবদা অনৌবা য়ুমথোঙ লাখ ২.২৯দা তোতি ঈশিং শমখ্রে‍। চান্দিগরনা তোতি কনেক্সন ২০,০০০গী পান্দম ফংখ্রে‍। সেক্রেতরীনা পাইপ নীংথিনা শম্দবদগী ঈশিং য়ুবগী ফীভম লৈহন্দনবা ৱাফম থমখি‍। মহাক্না পাইপ শম্লিবশিংগী কেপাসিতী বিল্দিংগী থৌরাং পায়খৎনবা ৱাফমসু হৌদোকখি‍।
• সিৱরেজ কনেক্সন: হরিয়ানানা সিৱর কনেক্সন লাখ ২.২২ পীখ্রে অমদি পঞ্জাবনা অনৌবা কনেক্সন লাখ ১ও৭৫ পীখ্রে‍। চান্দিগরনা অনৌবা সিৱর কনেক্সন ২০,০০০ পীখ্রে‍।
• খোঙলম: এম.ও.ঐচ.য়ু.এ. সেক্রেতরীনা হরিয়ানা লৈঙাকপু মফম ৩০০দা ঈশিং তুংশিন্দুনা লৈবা ফহনখিবগীদমক্তা থাগৎপা ফোঙদোকখি‍।
• লম্বীগী মৈশিং এল.ই.দি. শিন্দোকবা অমদি ঈশিং পম্পশিংগী ইনর্জী ওদিত: হরিয়ানা হৌজিক ফাওবদা লম্বীগী মৈ লাখ ১.৯৫ এল.ই.দি. শিন্দোকখ্রে, পঞ্জাবনা মৈ লাখ ২.৫১ শিন্দোকখ্রে অমদি চান্দিগরনা মৈ ৪৩,৮৫৩ শিন্দোকখ্রে‍। স্তেত/য়ু.তি.শিংদুদা লম্বীগী মৈ এল.ই.দি.না শিন্দোকপগী থবক থুজিলহন্নবা ৱাফম থমখি‍।
• ওনলাই বিল্দিং পর্মিসন সিস্তেম (ও.বি.পি.এস.): স্তেত অনিমক্না মখোয়গী মিসন সিতীশিংদা থৌওং অসি চৎনহনখ্রে‍। চান্দিগরনা মিসন সিতী পুম্নমক্তা সেপ্তেম্বর ৩০, ২০২০ ফাওবগী মনুংদা ও.বি.পি.এস. চৎনহন্নবা থাজবা পীরকখ্রে‍।
• ক্রেদিত রেতিং: স্তেত অনি অমসুং য়ু.দি.দুগী মিসন সিতী পুম্নমক্তা ক্রেদিত রেতিংগী থবক লোইশিল্লে‍। হরিয়ানা অমদি পঞ্জাব অমসুং চান্দিগর য়ু.তি.দা সিতী ৫/৫না আই.জি.আর. রেতিং ফংলে‍।

মীফম অদুদা মন্ত্রালয়না স্তেত/য়ু.তি.শিংগা মরী লৈনবা ঈ –পাউশিং ফংগদবা মন্ত্রালয়গী মিসনশিংগী অপুনবা দেসবোর্দ অমা শেম্লে হায়না পাউদমখি‍। হায়রিবা খুদোংচাবা অসি স্তেত/য়ু.তি.শিংনা মখোয়গী খোঙজেল য়েংশিন্নবা শীজিন্নবা য়াগনি‍। এম.ও.ঐচ.য়ু.এ. সেক্রেতরীনা স্তেত/য়ু.তি.শিংদা মখোয়গী লৈরিবা খোঙজেল পোর্তেল/দেসবোর্দ অসিদা থাগৎননবা অনৌবা ঈ-পাউশিং চাং নাইনা থাগৎলক্নবা ৱাফম থমখি‍। হায়রিবা দেতা অসি শেন্ননবা, য়েংশিন্নবা অমদি স্তেতশিংগী খোঙজেলগী মতুং এম.ও.ঐচ.য়ু.এ.ইন্না থা-থাগী রেঙ্কিং শেম্ননবা শীজিন্নগনি‍।

অতল মিসন ফোর রিজুবিনেসন এন্দ অর্বান ত্রান্সফোর্মেসন (অম্রুত) ইকায়খুম্নরবা প্রধান মন্ত্রীনা লৈবাকসিগী ময়োললম ৫০০দা ময়োল্লমগী অপুনবা মীশিংগী চাদা ৬০ কোনশিল্লদুনা জুন ২৫, ২০১৫দা হৌদোকখিবনি‍। মসি চহী মঙা চুপ্না হায়বদি শেনবা চহী ২০১৫-২০১৬দগী শেনবা চহী ২০১৯-২০২০ ফাওবদা পীগদবা লুপা করোর ৫০,০০০গী সেন্ত্রেল এসিস্তেন্স য়াওরগা লুপা করোর ১,০০,০০০গী অপুনবা শেনফম লৈবা কেন্দ্রনা স্পোন্সর তৌবা স্কিম্নি‍। মিসন অসিনা থবক পায়খৎকদবা হীরমশিংদি ঈশিং পীবা, সিৱরেজ অমসুং সেপ্তেজ মেনেজমেন্ত, নোংলৈ নুংশিৎকী ঈশিং চিথবা, অশং-অমানগী মফম অমসুং পার্ক অমদি মোতোর পান্দবা ময়োল্লমগী চত্থোক চৎশিনগী পাম্বৈনি‍। মরুওইবা মচাক মথুম শেমগৎপগী মথক্তা মিসন অসিদা চহী মরি চুপ্না পায়খৎকদবা অহোংবা পুরক্নবগী ৱাফমসু য়াওরি‍।

লুপা করোর ৭৭,৬৪০গী অপুনবা স্তেত এনুএল এক্সন প্লানগী মনুংদা লুপা করোর ৩৯,০১১ (চাদা ৫০)না ঈশিং পীবগী লমদা থাদখ্রে, লুপা করোর ৩২,৪৫৬না (চাদা ৪২) সিৱরেজ অমসুং সেপ্তেজ মেনেজমেন্ত সেক্তরদা, লুপা করোর ২,৯৬৯না (চাদা ৪) নোংলৈ নুংশিৎকী ঈশিং চিথবগী প্রোজেক্তশিংদা, লুপা করোর ১,৪৩৬না (চাদা ২) মোতোর পান্দবা ময়োল্লমগী চত্থোক চৎশিনগী পাম্বৈদা অমদি লুপা করোর ১,৭৬৮না (চাদা ২) অশং অমানগী মফম অমসুং পার্ক শেমগৎপদা থাদখ্রে‍। লুপা করোর ৮০,৪২৮গী ওইগদবা প্রোজেক্তশিংগী দিতেল প্রোজেক্ত রিপোর্তশিং (দি.পি.আর.) অয়াবা পীখ্রে, মসিগী মনুংদা লুপা করোর ১১,৫২৩গী লোইশিল্লবা প্রোজেক্ত য়াওরগা লুপা করোর ৬৬,০৭৭গী ওইগদবা প্রোজেক্তশিংগী কন্ত্রেক্তশিং পীখ্রে‍।

*****