অনন্তপুর-নই দিল্লী কিসান রেল ঙসি এগ্রিকলচর অমসুং ফার্মর ৱেলফিয়ার, রুরেল দিবলপমেন্ত অমসুং পঞ্চায়াতি রাজগী য়ুনিয়ন মিনিস্তর নরেন্দ্র সিংহ তোমার অমসুং আন্ধ্র প্রদেশকী চীফ মিনিস্তর জগন মোহর রেদ্দিনা ভিদিও কনফরেন্সকী খুৎথাংদা লমথাখ্রে। থৌরম অদু রেলৱেজগী রাজ্য মন্ত্রী সুরেস সি.অঙ্গাদিনা থৌরম মপু ওইখি। কিসান রেল অসি সাউথ সেন্ত্রেল রেলৱেজগী গুনতাকাল দিবিজনগী অনন্তপুর অমসুং দিল্লীগী অদার্স নগরগী মরক্তা চেনগনি। থৌরম অদুদা মিনিস্তর তোমার সিংহনা হায়খি কিসান রেলনা লৌউ-শিংউগী শেন্মিৎলোন ফগৎহনবদা মতেং পাংগনি অমসুং জগন মোহন রেদ্দিনা হায়খি রাজ্য অসিগী মমিং লৈরবা উহৈ-ৱাহৈশিং হৌজিক লৈবাক অসিগী অতোপ্পা মফমশিংদা লাইনা য়ৌবা ঙম্লগনি।

মিনিস্তর তোমার সিংহনা হায়খি খুঙ্গং-লায়রবা-লৌমী মতম পুম্নমক্তা প্রধান মন্ত্রী নরেন্দ্র মোদীনা মরুওইনা লৌরি। লৌউ-শিংউগী শেন্মিৎলোন ফগৎহন্নবা অমসুং লৌমীশিংগী শেন্থোক শরুক অনি হেনগৎহন্নবা বজেৎ খুদিংদা কাইথোকখিবা শেনফমশিংগী হৌজিক মহৈ চাবা হৌরে। অতেনবা মতমগী মনুংদা লৌউ-শিংউগী পোৎথোকশিং লৈবাক শীনবা থুংনা পুথোক-পুশিন তৌবা ঙম্নবা চহি অসিগী বজেৎতা কিসান রেল অমসুং কিসান উরান লাউথোকখিবনি। অগস্ত ৭দা, মহারাস্ত্রাগী দেবলালি অমসুং বিহারগী দানাপুরগী মরক্তা অহানবা কিসান রেল লমথাখি অমসুং পাম্নবা হেনগৎলকপদগী তুংদা চয়োল অমদা অনিরক চেনখি। হৌজিক অনিসুবা কিসান রেল অসিনা ফাউদুনা চৎলিবা রাজ্যশিংগী লৌমীশিং কান্নবা ফংলগনি। আন্ধ্র প্রদেশতা অনৌবা এগ্রিকলচর ওর্দিনান্স অমসুং লুপা লাখ করোর ১গী এগ্রি ইনফ্রাস্ত্রকচর ফন্দ থবক ওইনা পায়খৎপা হৌবদা থাগৎলদুনা মহাক্না হায়খি অনন্তপুরদা লম হেক্তর লাখ ২ হেনবদা উহৈ-ৱাহৈশিং অমসুং মনা-মশিং থারি অমসুং কিসান রেলনা লমদম অসিগী লৌমীশিংদা কান্নবা হেন্না পীরগনি। কিসান উরানগী থবকসু অথুবদা হৌরগনি।

চীফ মিনিস্তর ৱাই.এস জগন মোহন রেদ্দিনা হায়খি রাজ্য অসিদা হোর্তিকলচর অসি মরুওইবা থবক অমনি। লৈবাক অসিদা খামেন অশিনবা, য়ুবী, অৱাথবী অমসুং মোরোক পুথোকপদা রাজ্য অসিনা মকোক তারি অমসুং খা ভারত্তা উহৈ-ৱাহৈ খ্বাইদগী য়াম্না পুথোকপা রাজ্যনি। কোবিদগী ফিবম অসিনা মরম ওইদুনা মসিগী পোৎথোকশিং অসি অৱাং ভারত্তা পুবদা খুদোংচাদবা থেংনখি। লোকদাউন মনুংদা অনন্তপুরদগী মুম্বাই ফাওবা অখন্নবা ত্রেন কয়া চেনখি, মরম অদুনা লৈবাক অসিগী মফম কয়াদা হোর্তিকলচরগী পোৎথোকশিং য়ৌহনবা ঙম্লগনি।

রেলৱেজগী রাজ্য মন্ত্রী সুরেস সি. অঙ্গাদিনা হায়খি কিসান রেলনা লৌউ-শিংউগী পোৎথোকশিং অথাপ্পা মফমশিংদা য়াংনা পুথোক-পুশিন তৌদুনা লৌমীশিংগী শেন্থোক হেনগৎহনবা ঙম্লগনি। পুথোক-পুনশিনগী মতম হন্থবদগী পোৎথোকশিং পৎহন্দনা লৌমীশিংনা মখোয়গী পোৎথোকশিং মমল ৱাংনা য়োনবা ঙম্লগনি। মসিনা লৌউ-শিংউগী পোৎথোকশিং মপান্দা থাদোকপদা মতেং ওইগনি।  

থৌরম অদুদা এগ্রিকলচর অমসুং ফার্মর ৱেলফিয়ারগী রাজ্য মন্ত্রীশিং পারসোত্তাম রুপালা অমসুং কাইলাস চৌধুরি , এ.পি সরকারগী মিনিস্তরশিং বি সত্যনারায়ান, এম সনকারানারায়ান অমসুং কে কান্নাবাবু, অনন্তপুরগী এম.পি তি. রঙ্গাইয়া অমসুং রেলৱেজগী সেনিয়র ওফিসিএলশিংগী ভর্চুএল ওইনা শরুক য়াখি।

অনন্তপুর-নই দিল্লী কিসান রেলগী তেন্তকপা ৱাফম

কিসান রেল হৌদোকপা অসিনা য়াম্না পৎকনবা লৌউ-শিংউগী পোৎথোকশিং লৈবাক অসিগী তোঙান-তোঙানবা কৈথেলশিংদা য়ৌবা ঙহল্লগনি। ঙসিদগী খা ভারতকী অহানবা অমসুং ভারতকী অনিসুবা কিসান রেল আন্ধ্র প্রদেশকী অনন্তপুরদগী নই দিল্লীগী অদার্স নগর ফাওবা চেনবা হৌখ্রে। জিলা অসিদা পুথোকলিবা উহৈ অমসুং মনা-মশিং মেত্রিক তন লাখ ৫৮গী মনুংদা চাদা ৮০হেন্না দিল্লী, য়ু.পি, পঞ্জাব অমসুং হরিয়ানাদা য়োল্লি। অনন্তপুরদা পুথোক্লিবা উহৈ অমসুং মনা-মশিংগী অয়াম্বা শরুক রাজ্য অসিগী ৱাংবদা পুথোকখি। মমাংদা মসি লম্বীশিংদা পুখি। কিসান রেল চেনবা হৌরকপদগী মসিনা অপীকপা লৌমীশিং অমসুং ললোনবশিংনা মখোয়গী পোৎথোকশিং অথুবদা, শেন্দোং লৈনা লৈবাক্কী মফম কয়াদা য়োনবা ঙম্লগনি।

অনন্তপুর-নই দিল্লীগী মরক্তা চেল্লিবা খা ভারতকী অহানবা কিসান রেল অসিনা কিলোমিতর ২১৫০গী অথাপ্পা পুং ৪০ গী মনুংদা চেনগনি। মসিদা পর্সেল ভান ১৪ য়াওরি-ভান ৪না নাগপুরগী অমসুং অতোপ্পা ভান ১০না অদার্স নগরগীনি অমসুং অপুনবনা তন ৩৩২নি। অহানবা ওইনা চেনবা হৌখিবা কিসান রেল অসিদা খামেন অশিনবা, লফোই, কোম্লা, অৱাথবী, মুস্কমেলোন অমসুং হৈনৌ পুখি। মসিনা অপীকপা লৌমীশিং অমসুং ললোনবশিংগী য়াম্না পৎকনবা উহৈশিং অমসুং মনা-মশিং পুখি। মসিনা মতম য়াম্না চঙলোই অমসুং লম্বীদা পুবদগী ভারা হোংবা অমসুং অমাং-অতা থোকপগী চাং য়াম্না হন্থগনি।

*****