ঙসি ভারতকী উপ-রাস্ত্রপতি বেনকাইয়া নাইদুনা হায়খি হকচাং কয়াৎ দান তৌবা খ্বাইদগী পুকচেল চাউবা থবকশিংগী মনুংদা অমনি অমসুং মিৎ দান তৌনবা অমসুং অতোপ্পশিং ইথিল পীনবা খঙহনখি।

সাকসাম(সামাদ্রিস্তি, সামতা বিকাস ইভম অনুসান্ধা মন্দল)না শীনবা ‘নেসনেল আই দোনেসন ফোর্থনাইত’ লোইশিনবা থৌরমদা উপ-রাস্ত্রপতিনা হায়খি মিৎ দান তৌবা অসিনা খ্বাইদগী ফবা দান্নি।

মিৎ উদবা অসি হকশেলগী খুদোংচাদবশিংগী মনুংদা অমনি হায়রদুনা উপ-রাস্ত্রপতিনা হায়খি ভারত্তা মীওই লাখ ৪৬ রোম মিৎ উদ্রি অমসুং মখোয়গী মনুংদা অয়াম্বনা চহি ৫০গী মথক্তা লৈবা ঙাক্তনি।

মহাক্না হায়খি চহি অমদা কেস ২০,০০০ থেংদুনা ঙৌদোংগী মথংদা কোর্নিএল ব্লাইন্দনেস অসি মিৎ উহন্দবগী অনিসুবা মরম্নি। কোর্নিএল ব্লাইন্দনেসনা শোকহল্লবা অয়াম্বা নহারোলশিং অমসুং অঙাংশিংনি। মিৎ উদবা অসি কোকহন্নবা ঙন্না লায়েংবা অমসুং কোর্নিএল ত্রান্সপ্লান্তেসন সর্জরি পাংথোকপা দরকার ওই।

কোর্নিএল ত্রান্সপ্লান্তেসন সর্জরি পাংথোক্নবা কোরনিয়া দান তৌবা মীওইশিং দরকার ওই। লৈবাক অসিদা কোরনিএল ব্লাইন্দনেস মুৎথৎনবা মিৎ দান তৌবা মশিং হেনগৎহনবা দরকার ওই। ৱাখল তাহন্দুনা হকচাং কয়াৎ দান তৌবগী মতাংদা মীয়ামগী ৱাখল্লোনশিং হোংহন্নবা অমসুং হকচাং কয়াৎশিং লৌরগা লিদুনা থমফমশিং শেমগৎপা অমসুং জিলা থাক্তা কয়াৎশিং শিন্দোক-শিঞ্জিন তৌনবা সর্জরিশিং পাংথোকপা ঙম্নবা মেদিকেলগী মচাক-মথুমশিং শেমগৎকদবনি।

অতোপ্পশিংগী য়াইফনবা নিংথৌ সিবি অমসুং মুনি দাধিচিনা মখোয়গী হকচাংশিং কৎথোকখিবগী খুদমশিং মহাক্না পীরদুনা উপ-রাস্ত্রপতিনা হায়খি মতম অসিদা হকচাং কয়াৎশিং কৎথোকপা হেনগৎহন্নবা মীয়াম পুক্নিং থৌগৎকদবনি। কয়াৎ অমা কৎথোকপনা, মীওই অমনা অতোপ্পা মীওইশিং খুন্নাইগী য়াইফনবা থবক তৌনবা ইথিল পী। মরুওইনা নহারোলশিংনা চিংনবশিং কোক্তুনা মখোয়গী হকচাং কয়াৎশিং কৎথোক্নবা ৱাশক লৌগদবনি।

মহাক্না হায়খি দান তৌরিবা মীওই অদুদগী হকচাং কয়াৎ লৌবা অমসুং মসি অতোপ্পদা হাপচিনবদা মতম অসি য়াম্না মরুওই। অপীকপা সহরশিংগী মীওইশিং হকচাং কয়াৎ শীন্নবা মেত্রোশিংদা নমদুনা চৎতনবা জিলা থাক্তা সর্জরি পাংথোক্নবা অমসুং কয়াৎশিং লিদুনা থম্নবা দরকার ওইবশিং শেমগৎকদবনি। হায়রিবা থবকশিং অসিনা কৎথোক্লবা কয়াৎশিং ফংবা হেনগৎলক্কনি অমসুং আইন্না য়াদবা মওংদা মেদিকেলগী থবকশিং পাংথোকপা লাকশিনবদা মতেং পাংগনি।

মহাক্না হায়খি সরকারগী হোস্পিতালশিংগী দোক্তরশিংনা খুঙ্গংশিংগী মীয়ামদা মিৎকী চেকশিন-থৌরাংগী মতাংদা ৱাখল তাহনগদবনি। ঐখোয়না লৈবাক অসিদা মিৎ উদবা মুৎথৎলসি।

২০০৬-০৭গী নেসনেল ব্লাইন্দনেস সর্ভেগী মতুংইন্না লৈবাক অসিদা মিৎ উদবা চাদা ০.৩৬ হন্থবদা মহাক্না থাগৎখি। ২০১০দগী হৌরগা ২০১৯ফাওবগী মনুংদা মিৎ উদবা চাদা ২৫ হন্থহন্নবা ‘দব্লিউ.ঐচ.ও গ্লোবেল এক্সন প্লান ফোর য়ুনিভর্সেল আই হেল্থ ২০১৪-২০১৯’গী পান্দমশিং ভারতনা মাইপাক্না ফংবা ঙম্লে।

নেসনেল প্রোগ্রাম ফোর কন্ত্রোল ওফ ব্লাইন্দনেস এন্দ ভিচুএল ইম্পিয়ারমেন্তগী মখাদা মিৎ উদবগী চাং হন্থহনবগীদমক মরী লৈনবশিং উপ-রাস্ত্রপতিনা থাগৎখি। প্রোগ্রাম অসিগী মখাদা ২০১৯-২০দা ঙৌদোংগী ওপরেসন লাখ ৬৪ হেন্না পাংথোকখি অমসুং কোরনিএল ত্রান্সপ্লান্তেসনগীদমক দান তৌরবা মিৎ ৬৫,০০০ খোমজিনখি অমসুং স্কুলগী মহৈরোইশিংদা লেম্না অনোক লাখ ৮.৫৭ য়েন্থোকখি।

নেসনেল প্রোগ্রাম ফোর কন্ত্রোল ওফ ব্লাইন্দনেস এন্দ ভিচুএল ইম্পিয়ারমেন্তগী মখাদা মীয়ামদা মিৎকী চেকশিন-থৌরাংশিং হেনগৎহন্নবা পায়খৎলিবা থবকশিং মিসন অমা ওইনা লৌনবা উপ-রাস্ত্রপতিনা এন.জি.ওশিং অমসুং লনাই মীওইশিংদা তকশিনখি।

মহাক্না হায়খি লৈবাক অসিগী লনাই হোস্পিতাল কয়া মিৎকী চেকশিন-থৌরাংগী মতাংদা অফবা থবক কয়া পাংথোক্লি। কোবিদ-১৯ লাইচৎনা অকায়বা পীরুরবা মতুংদা কোবিদ লায়েংদবা হোস্পিতালশিংদা আই বেঙ্কগী থবকশিং অমুক হৌরকপদা উপ-রাস্ত্রপতিনা হরাওবা ফোঙদোকখি।

তোঙান-তোঙানবা প্রোজেকশিং হায়বদি কাম্বা, প্রানাদা, প্রনাব অমসুং সকসাম সেব সনকুলগী মখাদা হকচাংগী ফিবমদা মীমান্নদ্রবশিং খুন্নাইগী ইচেলদা শরুক য়াহন্নবা থবক কয়া পায়খৎপগীদমক মহাক্না সকসাম থাগৎখি।

ভর্চুএল ওইনা পাংথোকখিবা থৌরম অদুদা সাকসামগী প্রসিদেন্ত দোক্তর দয়াল সিংহ পনৱার, সাকসামগী ভাইস প্রসিদেন্ত দোক্তর পাৱান থাপাক, সাকসামগী ওর্গনাইজিং সেক্রেতরি দোক্তর সুকুমার, সাকসামগী জেনেরেল সেক্রেতরি দোক্তর সন্তোস কুমার ক্রালেতি শরুক য়াখি।

মখাগী অসি মপুংফাবা ৱারোলনি-

 “হকচাংগী ফিবমদা মীমান্নদ্রবশিং খুন্নাইগী ইচেলদা শরুক য়াহন্নবা থবক কয়া পায়খৎপগীদমক সাকসামনা থবক পায়খৎলি হায়বা খঙবদা ঐ হরাওই। তোঙান-তোঙানবা প্রোজেকশিং হায়বদি কাম্বা, প্রানাদা, প্রনাব অমসুং সকসাম সেব সনকুলগী মখাদা হকচাংগী ফিবমদা মীমান্নদ্রবশিং য়াইফনবা থবক কয়া সাকসাম্না পায়খৎপদা ঐ হরাওই।

মসি পুকচেল চাউবা থবক অমনি।

চাউখৎলক্লিবা লৈবাকশিংদা মিৎ উদবা অসি হকশেলগী অচৌবা খুদোংচাদবশিংগী মনুংদা অমা ওইরি। মালেমগী ওইনা মিৎ উদবা মীওই বিল্লিয়ন ২.২ হেন্না লৈরি। মখোয়গী মনুংদা, মিৎ উদবা বিল্লিয়ন ১ রোম মাংজৌন্না ঙাকথোকপা ঙম্বা ঙাক্তনি। মিৎ উদবগী অচৌবা মরমশিংগী মনুংদা রিফ্রেকতিব ইয়রশিং, ঙৌদোং, গ্লুকোমা অমসুং কোরনিএল ওপেকসিতি য়াওরি।

ভারত্তা মীওই লাখ ৪৬ রোম মিৎ উদ্রি অমসুং মখোয়গী মনুংদা অয়াম্বনা চহি ৫০গী মথক্তা লৈবা ঙাক্তনি।নেসনেল ব্লাইন্দনেস সর্ভে(২০১৫-১৯)গী মতুংইন্না, মিৎ উদবা চাদা ০.৩৬দা হন্থরে, মসি ২০০৬-০৭গী নেসনেল সর্ভেদা চাদা ১ ওইখিবনি। দেতা অসিগী মতুংইন্না মিৎ উদবগী অপুনবা কেসশিংগী চাদা ৬৬ রোম অসি ঙৌদোংনা থোকহনবনি।

মিৎ উদবগী অনিসুবা খ্বাইদগী চাউবা মরম্না কোরনিএল ব্লাইন্দনেস(চাদা ৭.৪)না ওইহনবনি। কাংলুপ অসিদা চহি খুদিংগী মিৎ উদবা মীওই মশিং ২০,০০০ হেনগৎলি। কাংলুপ অসিগী মনুংচনবা মিৎ উদবা মীওই অয়াম্বা নহারোলশিং অমসুং অঙাংশিংনি। 

মতিক চাবা থবকশিং পায়খৎতুনা ভারত্তা মিৎ উদবগী থেংনরিবা খুদোংচাদবশিং য়েংশিনবা দরকার ওই। ঐখোয়গী লৈবাক্তা কোরনিএল ব্লাইন্দনেসগী পোৎলুম হন্থহন্নবা মাংজৌন্না ঙাকথোকপা অমসুং ঙন্না লায়েংবা অসিনা খ্বাইদগী ফবা পাম্বৈ ওইগনি। অদুবু, কোরনিএল ত্রান্সপ্লান্তেসন কৌবা সর্জরিগী থবক অমা পাংথোক্তুনা কোরনিয়া শোকপগী মিৎ উদ্রবা অমা মিৎ উহনবা য়াগনি। হায়বদি দান তৌরকপা মিৎ অমদগী লৌবা অফবা কোরনিয়া অদুনা ফত্তবা কোরনিয়া মহুৎশিনবা য়াগনি।

মসিগীদমক, মিৎ দান তৌবা মশিং হেনগৎহনগদবনি। কোরনিয়া দান তৌবা মশিং ৱাৎপদগী, ঐখোয়গী লৈবাক অসিদা কোরনিএল ব্লাইন্দনেস মুৎথৎনবা দরকার ওইবা মীওইশিংদা কোরনিএল ত্রান্সপ্লান্তেসন সর্জরি পাংথোক্নবা চাউখৎলবা তেক্নোলোজিশিং শীজিন্নবা ঙমদ্রি।

অতোপ্পা হকচাং কয়াৎশিং শিনবদসু অসিগুম্বা খুদোংচাদবা থেংনরি হায়বা ঐ খঙলে। চহিগী ওইনা লিভর য়াদ্রবা অনাবা ৮৫,০০০ ঙাইদুনা লৈরি। কয়াৎ শিন্নবা কিদনি য়াদ্রবা অনাবা লাখ ২ রোম ঙাইদুনা লৈরিঙৈদা, শুপ্নগী কিদনি ৮০০০ খক ফংলি। অনাবা লিশিং কয়া ঙাইদুনা লৈবগী মনুংদা থম্মোয়/লং চাদা ১ খক ফংলি।

ৱাখল তাবা ৱাৎপা অমসুং হকচাং কয়াৎ লৌনবা অমসুং শিন্দোক্নবা মেদিকেলগী মচাকশিং মতিক চাদবদগী কয়াৎ দান তৌবা মশিং হন্থবা ওইরমগনি। মসি হোংদোকপা দরকার ওইরে।

নুংশিরবা মরুপশিং,

ঐখোয় ‘বাসুধাইবা কুতুমবাকম’দা থাজবা লৈবাক অমনি অমসুং ‘পুন্না হিংমিন্নবা’ অসি ভারতকী ফিলোসোফিগী থৱায়নি।

সিবি অমসুং দাধিচিগুম্বা নিংথৌশিং অমসুং মুনিশিংনা মখোয়গী হকচাংশিং কৎথোকপগী চৎনবী অমা ঐখোয়গী লৈরি। মখোয়গী ৱারিশিং ঐখোয়গী লাইগী ৱারিশিংগী শরুক অমা ওইবা য়াই, অদুবু খুন্নাইগী অফবা গুনশিং, ফিদমশিং অমসুং সামসকারদা য়ুম্ফম ওইদুনা ৱারিশিং অসি শাগৎপনি। হৌজিক্কী মতম অসিদা মীওই কয়া হকচাং কয়াৎ কৎনবা পুক্নিং থৌগৎনবা হায়রিবা গুনশিং অমসুং ৱারিশিং অসি ঐখোয়না নৌনা মশক তাক্কদবনি।

হকচাং কয়াৎ অমা দান তৌদুনা মীওই অমা মহৈ য়ানবা পুন্সি অমা ফংহনবতা নত্তনা, খুন্নাইগী য়াইফনবা অতোপ্পশিংনা থবক তৌনবা খুদম অমা ওইগনি। নহারোলশিংনা করিগুম্বা চিংনবা লৈরবদি কোকহন্দুনা মখোয়গী হকচাং কয়াৎশিং কৎথোক্নবা ঐনা হায়জরি।

মসিগা লোয়ন্না জিলা থাক্তা ঐখোয়গী মেদিকেলগী মচাক-মথুমশিং ফগৎহনবা দরকার ওইরি। দান তৌরিবা মীওই অদুদগী হকচাং কয়াৎ লৌবা অমসুং মসি অতোপ্পদা হাপচিনবদা মতম অসি য়াম্না মরুওই। জিলা থাক্তা কয়াৎ শীন্নবা সর্জরিশিং পাংথোক্নবা অমসুং কয়াৎশিং লিদুনা থম্নবা দরকার ওইবশিং শেমগৎপা দরকার ওইরি। হৌজিক অপীকপা সহরশিংগী মীওইশিং কয়াৎ শিন্নবা মেত্রোশিংদা চৎপা দরকার ওইরি। হায়রিবা থবকশিং অমসুং কৎথোক্লবা কয়াৎশিং ফংবা হেনগৎহনবনা আইন্না য়াদবা মেদিকেলগী থবকশিং লাকশিনবদা মতেং পাংগনি।

মিৎ তাংবা অমসুং মিৎ ফজনা উদবা থেংন্নবা নেসনেল প্রোগ্রাম ফোর কন্ত্রোল ওফ ব্লাইন্দনেস এন্দ ভিচুএল ইম্পিয়ারমেন্তগী মখাদা সরকারনা থবক কয়া পায়খৎলে হায়বা ঐ খঙলে। “মী খুদিংমক অফবা মিৎ লৈহনবা” হায়বা পান্দমদা মসিগী থবক অসিনা চৎলিবা চহি অসিদা লৈবাক অসিদা মিৎ উদবা চাদা ০.৩ হন্থহল্লে।

২০১০দগী হৌরগা ২০১৯ফাওবগী মনুংদা মিৎ উদবা চাদা ২৫ হন্থহন্নবা ‘দব্লিউ.ঐচ.ও গ্লোবেল এক্সন প্লান ফোর য়ুনিভর্সেল আই হেল্থ ২০১৪-২০১৯’গী পান্দমশিং ভারতনা মাইপাক্না ফংবা ঙম্লে।

অচুম্বা থৌশিলশিং পায়খৎপদগী ভারতনা মাইপাক্না মিৎ উদবা চাদা ২৫ হন্থহনবা ঙম্লে। ফংলিবা মাইপাকপশিং অসি থাগৎনিঙাইনি। মসিগীদমক মরী লৈনবা খুদিংমক ঐনা থম্মোয় শেংনা থাগৎলি।

নেসনেল প্রোগ্রাম ফোর কন্ত্রোল ওফ ব্লাইন্দনেস এন্দ ভিচুএল ইম্পিয়ারমেন্তগী মখাদা ২০১৯-২০দা ঙৌদোংগী ওপরেসন লাখ ৬৪ হেন্না পাংথোকখি।  হায়রিবা মতম অসিগী মনুংদা স্কুলগী মহৈরোইশিংদা লেম্না অনোক লাখ ৮.৫৭ য়েন্থোকখি হায়বা দেতানা উৎলে। প্রোগ্রাম অসিগী মখাদা হৌখিবা চহিদা কোরনিএল ত্রান্সপ্লান্তেসনগীদমক কৎথোক্লবা মিৎ লিশিং ৬৫ খোমজিনখি।

মী খুদিং মিৎ ফনা থম্নবা অফবা মগুন লৈবা থবকশিংগী খুদোংচাবশিং ফংহন্দুনা মিৎ উদবা ঙাকথোক্নবা অমসুং লায়েংনবা পান্দম থম্লিবা ‘নেসনেল প্রোগ্রাম ফোর কন্ত্রোল ওফ ব্লাইন্দনেস এন্দ ভিচুএল ইম্পিয়ারমেন্ত’ ঐনা থাগৎলি।

সাকসামগুম্বা লুপশিং অমসুং লনাই প্রাক্তিসন্নরশিং শরুক য়ানবা পু্ক্নিং থৌগৎতুনা মিৎ চেকশিন্না থম্নবা মীয়াম ৱাখল তাহনবা অসি মসিগী প্রোগ্রাম অসিগী পান্দম অমা ওইবদা ঐ হরাওই। মসিগী থবক অসি মিসন অমা ওইনা লৌনবা ঐনা এন.জি.ওশিং অমসুং লনাই মীওইশিংদা হায়জরি।

মিৎ উদ্রবশিং দেতা মেনেজমেন্তগী থবক ফজনা পাংথোক্নবা সর্ভে এপ্লিকেসন অমসুং কেম্প এপ্লিকেসন কৌবা সোফৱায়র অনি ঙসি হৌদোকপদা ঐনা সাকসাম থাগৎলি।

কোবিদ-১৯ লাইচৎনা অকায়বা পীরুরবা মতুংদা কোবিদ লায়েংদবা হোস্পিতালশিংদা আই বেঙ্কগী থবকশিং অমুক হৌরকপদা ঐ হরাওই।

নুংশিরবা মরুপশিং,

হকচাং কয়াৎ কৎথোকপা অসি খ্বাইদগী পুকচেল চাউবা থবক অমনি।

মসিগী নেসনেল আই দোনেসন ফোর্তনাইদ অসি লোইশিল্লকপদা, মিৎ কৎথোক্নবা, মিৎ দান তৌবা পু্ক্নিং থৌগৎনবা অমসুং অতোপ্পশিং ইথিল পীনবা ঐখোয় ৱাশক লৌরসি।

মিৎ কৎথোকপা অসি নহাক্না কনাগুম্বা অমদা পীবা ঙম্বা খ্বাইদগী মমল য়াম্বা খুদোলপোৎনি- নেত্রা দান, শ্রেস্থা দান।

জয় হিন্দ !

****