নেস্নেল এজুকেসন পোলিসীদগী মতাংদা নোংমগী ওইনা ভর্চুএল কনফরেন্স অমা ঙসি পাংথোকখ্রে। রাস্ত্রপতি রাম নাথ কোবিন্দ, প্রধান মন্ত্রী নরেন্দ্র মোদী, য়ুনিয়ন এজুকেসন মিনিস্তর রামেস পোখ্রিয়াল ‘নিসাঙ্ক’, রাজপ্যপালশিং, লেফতনেন্ত গভর্নরশিং, লৈঙাকপশিং, রাজ্যশিং/য়ু.তিশিংগী এজুকেসন মিনিস্তরশিংনা অমত্তা ওইনা পোলিসী অসি ইচম চম্বা চে-চাং অমা নত্তে, লৈবাক্কী অনীংবশিং থুংহন্নবা থৌরাং অমনি হায়না ফোংদোকখ্রে।

প্রধান মন্ত্রী নরেন্দ্র মোদীনা হায়খি মসিগী পোলিসী অসি সরকার খক্তগীনি হায়না খনবা অচুম্বা ওইরোই। ফোরেন পোলিসী নৎত্রগা দিফেন্স পোলিসকুম্না এজুকেসন পোলিসী অসি সরকার খক্তগী নত্তে লৈবাক অদুগীনি।

ৱাফম অসি শৌগৎলদুনা রাস্ত্রপতি রাম নাথ কোবিন্দনা হায়খি খুন্নাইগী কাংলুপ কয়াগী পাউতাক লাখ কয়া লৌদুনা পোলিসী অসি ফজনা শেম্লবনি অমসুং মপুং ফারবা দোকুমেন্ত অমনি। লৈবাক অসি লৌশিংগী তুংনফম মফম অমা ওইনবা পান্দম থমদুনা থৌশিল অসি শেম্বদা লমজিংবগীদমক রাস্ত্রপতিনা প্রধান মন্ত্রী নরেন্দ্র মোদী থাগৎখি।

নেস্নেল এজুকেসন পোলিসীগী মতাংদা পাংথোকখিবা রাজ্যপালশিংগী মীফম অদুদা রাস্ত্রপতি তরাম্না ওক্লদুনা প্রধান মন্ত্রী নরেন্দ্র মোদীনা হায়খি অনৌবা এজুকেসন পোলিসী অসি পায়খৎনবা মসিগী থৌরম অসি য়াম্না মরুওইবনি। নেস্নেল এজুকেসন পোলিসী অসি মীয়াম্না তরাম্না ওক্লি। পোলিসী অসি মীয়াম্না য়াবা অসিনা পোলিসী অমা মাই পাক্নবগী য়ুম্ফমনি। মসিগী থৌশিল অসি লাইরিক তম্বা খক্তগা মরী লৈনদে, মসিনা ২১শুবা চহিচাদা খুন্নাইগী অমসুং শেন-থুমগী লাক্লিবা অহোংবশিং থেংননবা ভারতনা থৌরাং তৌনবনি। আত্মনির্ভর ভারতকী থৌশিল মখাদা লৈবাক অসিগী ওক্নবা পুথোক্নবা পোলিসী অসিনা থৌরাং তৌগনি। মসি মাইপাক্নবা, এন.ই.পি.গী মতাংদা লৈরিবা চিংবশিং কোকহনগদবনি।

প্রধান মন্ত্রীনা হায়খি কর্রিকুলম অমসুং প্রাক্তিকেল, এসেস অমসুং এসেস্মেন্তগী মথক্তা পোলিসী অসিনা লাইরিক তম্বা অমসুং রিসর্সকী লমদা অকনবা মিৎয়েং চংলি। হৌজিক চৎনরিবা সাইজ অমনা খুদিংমক শীজিন্নবগী থৌওং অদু মসিগী পোলিসী অসিদা চৎনরোই।

প্রধান মন্ত্রীনা হায়খি অঙাংশিংনা য়াম্না লাইনা খঙবা ঙমগদবা মওংদা লাইরিক তম্নবা অনৌবা থৌশিল অসিনা কলচর, লোল অমসুং চৎনবীশিং অমতা ওইনা পুনশিনগনি। মখোয়না অপাম্বা নত্তবা হিরমশিংদা তম্নবা মহৈরোইশিংদা কন্না তকশিনবগী হৌজিক চৎনবী অমা লৈরিবা অসি হোংদোক্নবা, নেস্নেল এজুকেসন পোলিসীনা মহৈরোইশিংনা মখোয়না অপাম্বা হিরমশিংদা তম্নবগী মফম অমা পীরগনি। থবক ফংনবা লৌশিং লৈনবা মখোয়দা ভোকেস্নেল এজুকেসনসু পীগনি। মালেমগী থাক্তা ভারত লৌশিংগী মফম অমা ওইনবা থবকশিং পায়খৎকনি। মসিগী মতাংদা, মালেমগী খ্বাইদগী ফবা ইন্সিতিতুৎশিং ভারত্তা লিংখৎকনি। খুন্নাইগী শোৎথরবা কাংলুপশিং খুদোংচাবা হেন্না ফংনবা তেক্নোলোজজীগী পাম্বৈশিং শীজিন্নগনি।

প্রধান মন্ত্রীনা হায়খি চৎন-কাংলোনশিং লাইথোকহল্লে অমসুং শেমদোক্লে। ইন্সতিত্যুৎশিংদা ওতোনোমী পীদুনা মখোয়গী মরক্তা চাংদম্না হেনগৎহন্নবা থবকশিং পায়খৎলে। মসিনা মগুন লৈবা অৱাংবা থাক্কী মহৈ-মশিং ফংহন্নবা ইন্সতিত্যুৎশিং ইথিল পীগনি। সেপ্তেম্বর ২৫গী মমাংদা য়ুনিভর্সিতীশিংগী ভর্চুএল কনফরেন্স পাংথোকলগনি অমসুং নেস্নেল এজুকেসন পোলিসী থবক ওইনা পায়খৎনবা ৱারী শানরগনি।

প্রধান মন্ত্রীনা মখা তানা হায়খি, ঐখোয়গী মাইকৈদগী মনীংতম্বা য়াম্না ঐখোয়না পীরবা মতমদা মসিগী থৌশিল অসি মাইপাকপা অমা ওইগনি। মসিগী থৌশিল অসি লৈবাক পুম্নমক্কীনি অমসুং অকক্নবা সরকার অমগী নত্তে।  মীয়ামগী অনীংবশিংগী মহৈ ওইনা পোলিসী অসি শেম্লকপনি অমসুং মরম অদুনা থৱায় অমসুং হকচাং য়াওনা নেস্নেল এজুকেসন পোলিসী চৎননবা থবকশিং পায়খৎকদবনি।

থৌরম অদুদা রাস্ত্রপতি রাম নাথ কোবিন্দনা হায়খি নেস্নেল এজুকেসন পোলিসীনা লৈবাক অসিগী নহারোলশিং ২১শুবা চহিচাগী দরকার ওইবশিং অমসুং অপাম্বশিং ফংহনবা ঙমগনি।পুৱারী  ওইরবা পোলিসী অসি শেম্বা মহাক্কী মিৎয়েং শানবা থবকশিং অদুগীদমক প্রধান মন্ত্রী, দোক্তর কস্তুরিরঙ্গন অমসুং মিনিস্তরশিং অমসুং এজুকেসন মিনিস্ত্রীগী ওফিসিএলশিং থাগৎখি। থৌশিল অসি শেম্নবা গ্রাম পঞ্চয়ৎ লাখ ২.৫, লোকেল বোদী ১২,৫০০ অমসুং জিলা ৬৭৫দগী পাউতাক লাখ ২ হেন্না লৌখি। করিগুম্বা অহোংবশিং ফজনা পুরক্লবদি, ভারত  লাইরিক-লাইশু তম্বগী সুপর পৱার অমা ওইরক্কনি হায়না মহাক্না মখা তাখি।

নেস্নেল এজুকেসন পোলিসী শন্দোক্না তাক্লদুনা রাস্ত্রপতিনা হায়খি রাজ্যপালশিংনা স্তেৎ য়ুনিভর্সিতীশিংগী চান্সসেল্লরশিং ওইবনা নেস্নেল এজুকেসন পোলিসী থবক ওইনা পায়খৎপদা মরুওইবা থৌদাং অমা লৌগদবনি। কোলেজ ৪০,০০০ রোম এফিলিয়েত তৌরিবা স্তেৎ য়ুনিভর্সিতী ৪০০ রোম লৈরি, মরম অদুনা চান্সসেল্লর অমা ওইনা রাজ্যপালশিংনা হায়রিবা য়ুনিভর্সিতীশিং অসিগা পাউ ফাওনগদবনি অমসুং ৱারী শানগদবনি।

রাস্ত্রপতিনা হায়খি কেন্দ্র অমসুং রাজ্যশিংনা জি.দি.পিগী চাদা ৬ রোম নেস্নেল এজুকেসন পোলিসীদা থাদগদবনি। মপাঙ্গল কনবা গনতন্ত্র চৎপা লৈবাক অমা ওইনবা সরকারগী মহৈ তম্ফমশিং ফগৎহন্নবা নেস্নেল এজুকেসন পোলিসীনা অকনবা মিৎয়েং চঙলি অমসুং মসিনা মহৈরোইশিংগী মরক্তা ফংফম থোকপা হকশিং, থৌদাংশিং, সংবিধানগী গুনশিং ইকায়খুম্নবা উৎনবা ইনোৎ পীগনি অমসুং মরৈবাক নুংশিবা পোকহনগনি।

রাস্তপতিনা হায়খি মসিগী থৌশিল অসিনা খুন্নাইগী অমসুং শেন-থুমগী শোৎথরবা কাংলুপশিংদা অখন্নবা খুদোংচাবা পীগনি। ২০২৫ ফাওবগী মনুংদা প্রাইমারি থাক্কী অঙাংশিংদা লাইরিক ময়েক চৎহনগনি অমসুং মশিং থিবা হৈহনগনি। অনৌবা পোলিসী অসিদা ওজাশিংনা মরুওইবা থৌদাং অমা লৌগনি অমসুং খ্বাইদগী মতিক চাবশিং ওজা ওইনা খনগনি। মসিগীদমক, ওজাশিং ত্রেনীং পীনবা অনৌবা করিকুলম অমামথং চহিদগী শেম্লগনি।

ভোকেসনেল এজুকেসনগী মতাংদা রাস্ত্রপতিনা হায়খি  নোংচুপলোমগী লৈবাকশিংগা চাংদম্নবদা ভারত্তা অপুনবা শিন্মীগী চাদা ৫গী মখা ভোকেসনেল এজুকেসন ফংলি। মরম অদুনা নেস্নেল এজুকেসন পোলিসীনা ভোকেসনেল এজুকেসন অসি মপুংওইবা এজুকেসনগী শরুক অমা ওইনা লৌগনি অমসুং মসিনা অঙাংশিং লৌশিং হেন্না লৈহনবা খক নত্তনা থবক শুবগী ইকায়খুম্নবা লৈহনবা ঙমগনি।

রাস্ত্রপতিনা হায়খি প্রাইমারি থাক্তা মমালোলনা তাকপীগদবনি অমসুং অনৌবা পোলিসী অসিদা লোল অহুমগী ফোর্মুলা চৎনগনি। লৈবাক অসিগী অপুনবগী শক্তম ঙাক্নবা পোলিসী অসিনা ভারতকী লোলশিং, কলা অমসুং কলচরশিং পুক্নিং থৌগৎকনি। মগুন লৈবা এজুকেসন পীনবা, হিরম কয়াগী এজুকেসন অসি মালেম শীনবা থুংনা পাম্নরে অমসুং মরম অদুনা নেস্নেল এজুকেসন পোলিসীগী মতুংইন্না, মতিক চাবা, হৈথোই-শিংথোইবা নহারোলশিং শেমগৎনবা মল্তি দিসপ্লিনারি রিছর্স য়ুনিভর্সিতীশিং হায়বদি ‘মেরু’ লিংখৎলগনি। থৌশিল অসিগী মখাদা পান্দম অমা ওইনা চাউখৎত্রিবা মফমশিংদা অৱাংবা থাক্কী এজুকেসন পীনবা ২০৩০ ফাওবগী মনুংদা জিলা অমমমদা অচৌবা মল্তি-দিসপ্লিনারি হয়র এজুকেসন ইন্সতিত্যুৎ অমা লিংখৎকনি। ভারত অসি মালেমগী লাইরিক তম্ফম অমা ওইহন্নবা থবকশিং পায়খৎলে অমসুং মমিং লৈরবা মপানগী য়ুনিভর্সিতীশিং ভারত্তা হাংদোকপগী অয়াবা পীরগনি।

রাস্ত্রপতি কোবিন্দনা হায়খি মসিগী এজুকেসন পোলিসী মাইপাকপা অসি কেন্দ্র অমসুং রাজ্যশিংনা হোৎনবগী মখা পোল্লি। এজুকেসন অসি সংবিধানগী কনকরেন্ত লিস্তা য়াওবনা, কেন্দ্র অমসুং রাজ্যশিংনা পুন্না থবক তৌমিন্নবা দরকার ওই। রাজ্যপালশিংগী থৱায় য়াওবা থাগৎলদুনা রাস্ত্রপতিনা হায়খি নেস্নেল এজুকেসন পোলিসী থবক ওইনা পায়খৎনবা রাজ্যপাল খরনা মখোয়গী রাজ্যশিংগী এজুকেসন মিনিস্তরশিং অমসুং ভাইস চান্সসেল্লরশিংগা ৱারী শানবা হৌখ্র। পোলিসী অসি পায়খৎনবা রাজ্যপালশিংনা ভর্চুএল কনফরেন্সশিং পাংথোক্কদবনি অমসুং কেন্দ্রগী এজুকেসন মিনিস্ত্রীদগী পাউতাকশিং লৌগদবনি। ভারত লৌশিংগী তুংনফম অমা ওইনা শেমগৎপদা রাজ্যপালশিং অমসুং এজুকেসন মিনিস্তরশিংগী মতেং য়াম্না কান্নগনি।

*****