য়ুনিয়ন হেল্থ সেক্রেতরি রাজেস ভুসন্না ভিদিও কনফরেন্সকী খুৎথাংদা রাজ্য ৫ হায়বদি অন্ধ্র প্রদেস, পঞ্জাব, কর্নাতাকা, তামিল নাদু অমসুং উত্তর প্রদেসকী হেল্থ সেক্রেতরিশিংগা লোয়ন্না জিলা ১৫গী হন্না য়েংশিনবগী মীফম অমা ঙসি পাংথোকখ্রে। জিলা ১৫ অদুদি চিত্তোর, প্রকাসাম, মাইসুরু, বেঙ্গলুরু অর্বান, বাল্লারি, কোপ্পাল, দাকসিনা কনারা, দাবাঙ্গিরি, লুধিয়ানা, পাতিয়ালা, চেন্নাই, কোইম্বদোর, সালেম, লখনৌ অমসুং কানপুর নগরনি। হায়রিবা জিলাশিং অসি হৌখিবা চয়োল মরিদা এক্তিব কেস মশিং হেনগৎপা, শিবগী চাং হেনগৎপা অমসুং কোবিদ কেসশিং হেনগৎপা উখি। দিজিতেল ওইনা পাংথোকপা হন্না য়েংশিনবা মীফম অদুদা রাজ্যশিংগী হেল্থ সেক্রেতরিশিংগী মথক্তা দি.সিশিং, মিউনিসিপাল কমিসন্নরশিং অমসুং অতোপ্পা জিলা থাক্কী ওফিসিএলশিং শরুক য়াখি।

তেস্ত তৌবা, পোজিতিপ ওইবগী চাং অমসুং শিবগী চাংগী মতাংদা জিলাশিং অসিগী ফিবম য়ুনিয়ন হেল্থ সেক্রেতরিনা পাউদমখি  অমসুং লাইচৎ শন্দোরকপা লাকশিন্নবা তেস্ত তৌবা হেনগৎহনবা অমসুং অনাবশিং মপুংফানা লায়েংবগী থবক হেনগৎহন্নবা মিৎয়েং চঙনবা য়ুনিয়ন হেল্থ সেক্রেতরিনা শরুক য়াখিবা ওফিসিএলশিংদা খঙহনখি। লাইচৎ লাকশিন্নবা পায়খৎলিবা থবকশিং, খোঙ্গুল লিবা, থিজিনবগী থবকশিং, শিবগী চাং হন্থনবা, চয়োলগী ওইনা হেনগৎলকপা অনৌবা কেস মশিং অমসুং শিবা মশিংগী মতাংদা হায়রিবা জিলা ১৫ অসিগী হৌজিক ওইরিবা কোবিদ-১৯গী ফিবম রাজ্যশিংগী হেল্থ সেক্রেতরিশিংনা কুপ্না পাউদমখি অমসুং মথংগী থাদা পায়খৎকদবা থবকশিংগী মতাংদসু মখোয়না কুপ্না ফোঙদোকখি।

জিলাশিংদা পাংথোক্লিবা আর.তি-পি.সি.আর অমসুং রেপিদ এন্তিজেন তেস্তশিং, এন্তিজেন তেস্ত পাংথোকপদা নেগেতিপ ওইরবা লাইওং উৎপা অনাবশিং অমুক হন্না তেস্ত তৌবা, তেস্তিং লেব শীজিন্নবা, য়ুমদা নাইতোম লৈবগী ফিবম, হোস্পিতালগী ফিবমগী মতাংদা কেন্দ্র সরকারদা পাউদমখি।

মখাগী অকক্নবা থবকশিং অসি পায়খৎনবা রাজ্যশিংদা পাউতাক পীখি :

১. অকনবা থবকশিং পায়খৎতুনা অমসুং মীয়াম থাপ্না লৈনবা নিয়মশিং ঙাক্তুনা অমসুং অকনবা পেরি-মিতর কন্ত্রোল তৌদুনা অমসুং য়ুম-য়ুমদা চঙদুনা থিবগী থবক পাংথোকতুনা লায়না শন্দোকপা লেপহনগদবনি।

২. জিলাশিং তেস্ত পাংথোকপা হেনগৎহন্দুনা ঙন্না মশক খঙদোক্কদবনি, লাইচৎ কন্না শন্দোক্লিবা মফমশিং অমসুং মী কুংনা তাবা মফমশিংদা তেস্ত তৌনবা আর.তি-পি.সি.আর অমসুং রেপিদ এন্তিজেন তেস্তশিংগী মরক্তগী অপাম্বা খনবা য়াই।

৩. য়ুমদা নাইতোম লৈরিবশিং ফজনা য়েংশিনগদবনি অমসুং অনাবা হেঞ্জিল্লকপশিং ঙন্না হোস্পিতালদা লায়েংগদবনি।

৪. অতোপ্পা অনাবা লৈবশিং অমসুং অহলশিং দরকার ওইবা মেদিকেলগী মতেং পীনবা হোস্পিতালশিংদা ঙন্না মিং চনগদবনি।

৫. হোস্পিতালশিংদা হকশেলগী থবক তৌরিবা মীওইশিং লায়না লৌনদনবা অকনবা চেকশিন-থৌরাং পায়খৎকদবনি।

৬. লাইচৎ লাকশিন্নবা মখোয়গী থবকশিং মখা চৎথনবা দিস্ত্রিক কল্লেক্তরশিং অমসুং অতোপ্পা ফম্নাইবশিংনা জিলা অদুগী অকক্নবা থৌরাং শেমগদবনি।

*****