ਸ਼੍ਰੀ ਰਾਜੀਵ ਕੁਮਾਰ ਨੇ ਅੱਜ ਭਾਰਤ ਦੇ ਨਵੇਂ ਚੋਣ ਕਮਿਸ਼ਨਰ ਦਾ ਕਾਰਜਭਾਰ ਸੰਭਾਲ ਲਿਆ ਹੈ । ਸ਼੍ਰੀ ਕੁਮਾਰ ਭਾਰਤੀ ਚੋਣ ਕਮਿਸ਼ਨ ਦੇ ਮੁੱਖ ਚੋਣ ਕਮਿਸ਼ਨਰ ਸ਼੍ਰੀ ਸੁਨੀਲ ਅਰੋੜਾ ਅਤੇ ਚੋਣ ਕਮਿਸ਼ਨਰ ਸ਼੍ਰੀ ਸੁਸ਼ੀਲ ਚੰਦਰਾ ਨਾਲ ਸ਼ਾਮਲ ਹੋ ਗਏ ਹਨ ।

ਸ਼੍ਰੀ ਰਾਜੀਵ ਕੁਮਾਰ ਦਾ ਜਨਮ 19 ਫਰਵਰੀ 1960 ਨੂੰ ਹੋਇਆ ਸੀ ਤੇ ਉਹ 1984 ਬੈਚ ਦੇ ਆਈ ਏ ਐੱਸ ਅਫ਼ਸਰ ਹਨ । ਭਾਰਤ ਸਰਕਾਰ ਦੀ 36 ਸਾਲਾਂ ਤੋਂ ਜਿ਼ਆਦਾ ਸਮੇਂ ਸੇਵਾ ਦੌਰਾਨ ਸ਼੍ਰੀ ਕੁਮਾਰ ਨੇ ਕੇਂਦਰ ਅਤੇ ਆਪਣੇ ਸੂਬੇ ਬਿਹਾਰ / ਝਾਰਖੰਡ ਵਿੱਚ ਵੱਖ ਵੱਖ ਮੰਤਰਾਲਿਆਂ ਵਿੱਚ ਕੰਮ ਕੀਤਾ ਹੈ ।

ਸ਼੍ਰੀ ਰਾਜੀਵ ਕੁਮਾਰ ਭਾਰਤ ਦੇ ਨਵੇਂ ਚੋਣ ਕਮਿਸ਼ਨਰ ਵਜੋਂ ਅਹੁਦਾ ਸੰਭਾਲਦੇ ਹੋਏ

ਬੀ ਐੱਸ ਈ, ਐੱਲ ਐੱਲ ਬੀ, ਪੀ ਜੀ ਡੀ ਐੱਮ ਅਤੇ ਐੱਮ ਏ ਪਬਲਿਕ ਪੋਲਿਸੀ ਦੀਆਂ ਡਿਗਰੀਆਂ ਹਾਸਲ ਕਰਨ ਤੋਂ ਬਾਅਦ ਸ਼੍ਰੀ ਕੁਮਾਰ ਦਾ ਸਮਾਜਿਕ ਖੇਤਰ, ਵਾਤਾਵਰਨ ਤੇ ਜੰਗਲਾਤ, ਮਨੁੱਖੀ ਸਰੋਤ, ਵਿੱਤ ਅਤੇ ਬੈਂਕਿੰਗ ਖੇਤਰ ਵਿੱਚ ਕੰਮ ਕਰਨ ਦਾ ਲੰਮਾ ਤਜ਼ਰਬਾ ਹੈ । ਉਹ ਵਧੇਰੇ ਪਾਰਦਰਸ਼ਤਾ, ਵਿਚੋਲਾਗਿਰੀ ਖ਼ਤਮ ਕਰਕੇ ਨਾਗਰਿਕਾਂ ਨੂੰ ਸਿੱਧੀਆਂ ਸੇਵਾਵਾਂ ਦੇਣ ਅਤੇ ਨੀਤੀਆਂ ਵਿੱਚ ਤਰਮੀਮਾਂ ਨੂੰ ਲਿਆਉਣ ਲਈ ਤਕਨਾਲੋਜੀ ਦੀ ਵਰਤੋਂ ਲਈ ਦ੍ਰਿੜ ਹਨ । ਸ਼੍ਰੀ ਕੁਮਾਰ ਫਰਵਰੀ 2020 ਵਿੱਚ ਭਾਰਤ ਸਰਕਾਰ ਦੇ ਵਿੱਤ ਸਕੱਤਰ ਦੇ ਅਹੁਦੇ ਤੋਂ ਰਿਟਾਇਰ ਹੋਏ ਸਨ । ਉਸ ਤੋਂ ਬਾਅਦ 31 ਅਗਸਤ 2020 ਤੱਕ ਉਹ ਪਬਲਿਕ ਇੰਟਰਪ੍ਰਾਈਸਿਜ਼ ਸਿਲੈਕਸ਼ਨ ਬੋਰਡ ਦੇ ਚੇਅਰਮੈਨ ਦੇ ਅਹੁਦੇ ਤੇ ਰਹੇ । ਸ਼੍ਰੀ ਕੁਮਾਰ 2015 ਤੋਂ 2016 ਤੱਕ ਪ੍ਰਸੋਨਲ ਤੇ ਟ੍ਰੇਨਿੰਗ ਵਿਭਾਗ ਵਿੱਚ ਇਸਟੈਬਲਿਸ਼ਮੈਂਟ ਅਫ਼ਸਰ ਰਹਿ ਚੁੱਕੇ ਹਨ । ਇਸ ਤੋਂ ਪਹਿਲਾਂ ਉਹ ਵਾਤਾਵਰਨ ਤੇ ਜੰਗਲਾਤ ਮੰਤਰਾਲੇ, ਕਬਾਇਲੀ ਮਾਮਲਿਆਂ ਬਾਰੇ ਅਤੇ ਡਿਪਾਰਟਮੈਂਟ ਆਫ ਐਕਸਪੈਂਡੀਚਰ ਦੇ ਸੰਯੁਕਤ ਸਕੱਤਰ ਵੀ ਰਹਿ ਚੁੱਕੇ ਹਨ । ਉਹਨਾਂ ਨੇ ਸੂਬਾ ਕੈਡਰ ਦੇ ਸਿੱਖਿਆ ਵਿਭਾਗ ਵਿੱਚ ਵੀ ਕੰਮ ਕੀਤਾ ਹੈ ।

ਸ਼੍ਰੀ ਰਾਜੀਵ ਕੁਮਾਰ ਇੱਕ ਹੁਸਿ਼ਆਰ ਟ੍ਰੈਕਰ ਹੋਣ ਦੇ ਨਾਲ ਸ਼ਾਸਤਰੀਯ ਤੇ ਭਗਤੀ ਸੰਗੀਤ ਵਿੱਚ ਡੂੰਘੀ ਦਿਲਚਸਪੀ ਰੱਖਦੇ ਹਨ ।

ਐੱਸ ਬੀ ਐੱਸ / ਐੱਮ ਆਰ / ਐੱਸ ਐੱਮ