ভারতকী কম্মর্স অমসুং ইন্দস্ত্রী মন্ত্রী শ্রী পিয়ুশ গোয়ল, ওস্ত্রেলিয়াগী ত্রেদ, তুরিজম অমসুং ইনবেস্তমেন্তকী মন্ত্রী সেনাতর শ্রী সাইমন বিরমিংঘাম অমসুং জপানগী ইকোনোমী, ত্রেদ অমসুং ইন্দস্ত্রীগী মন্ত্রী শ্রী কাজিয়ামা হীরোশিনা ভিদিও কনফরেন্সিংগী খুত্থাংদা মন্ত্রীশিংগী ওইবা মীফম অমা পাঙথোকখ্রে।

মন্ত্রীশিংনা মখোয়গী মার্কেৎশিংবু হাঙদোক্তুনা থম্নবা অমসুং মনিং তম্বা, মওং চুম্বা, পুম্নমক মনুং চনবা, অচান-মীরায় নাইদবা অমসুং তংদু লৈতাবা  ললোন-ইতিক অমসুং শেল থাদবগী অকোয়বগী ফিভমশিং লৈহন্নবা মপুং ওইবা থৌদাং লৌবগী মতাংদা য়ানবা পুরকখি। কোবিদ-১৯গী ইরাং অমসুং হৌজিক ওইরক্লিবা শেন্মিৎলোন অমসুং তেক্নোলীজীগী হীরমশিংদা মালেমগী থাক্তা অহোংবা লাক্লিবা অসি য়েংলদুনা মন্ত্রীশিংনা ইন্দো-পেসিফিক মফমশিংদা সপ্লাই-চেনগী রেজিলিএন্সপু হেন্না মপানঙ্গল কনখৎহন্নবগী তঙাই ফদবশিংগী মরমদা মিৎয়েং চংখি।

সপ্লাই চেন রেজিলিএন্সকী মতাংদা মতেং পাংনবগী তঙাই ফদবা লৈরিবা অসিবু শকখঙলদুনা মন্ত্রীশিংনা হায়রিবা পান্দমশিং অসি খুৎশম্ননা পাঙথোকপা খোঙথাংশিংগী খুত্থাংদা ফংবা ঙম্নবা অনৌবা থবক কয়া পায়খৎমিন্নবগী মতাংদা ৱাফম কয়া ফোঙদোক্নখি। চহিসিগী লোইরকপদা হৌদোক্কদবা অনৌবা খোঙথাং অসিগী মতাংদা মখোয় মখোয়গী  মরী লৈনবা ওফিসিএলশিংদা থৌওং অসিগী অকুপ্পা থৌরাং য়াৎনবসু খঙহনখ্রে। মসিগী পান্দম অসি ফংবদা তঙাই ফদবা কারবার অমসুং একাদমিক্কী মরক্তা লৈনবা মরীগী মরু ওইবশিংসু মীফম অসিদা খন্নখি।  খোঙথাং অসিদা শরুক য়ানবা  খন্নরিবা ৱাফম অসিগী মতাংদা মান্নবা ৱাখল্লোন চেনবা মফম অসদা লৈরিবা অতোপ্পা লৈবাকশিংদসু হায়খি।

লৈবাক অহুমগী মীফম অসিদা ৱা ঙাংলদুনা শ্রী পিয়ুশ গোয়লনা হায়খিবদা কোবিদকী মতুং তারকপা মতমশিংদা ইন্দো-পেসিফিক্কী মফমশিংদা লৈরিবা সপ্লাই-চেন অসি নৌহৌননা শেমগৎলকপা য়াবা মওং অমা লৈরিবা মতম অসিদা অসিগুম্বা খোঙথাং অমগী মরমদা হৌক্নরক্লিবা অসি তসেংনা তান য়াম্না চাবনি অমসুং ঐখোয়না খোঙথাং অসি পাঙথোক্নবা থৌদাং লৌগদবনি হায়খি। ইং ২০২০গী মেদা ভারতকী প্রধান মন্ত্রী শ্রী নরেন্দ্র মোদীনা ভারতনা সপ্লাই চেনগী হীরমদা অচৌবা থৌদাং লৌবগী তঙাইফদবা মতম ওইরবনি হায়না হায়খিবসু লৈখ্রে হায়না শ্রী গোয়লনা মীয়ামদা পাউদমখি।

শ্রী গোয়লনা খোঙথাং অসিগী মতাংদা অসুম্না হায়খি, “ভারতনা ইন্দো-পেসিফিক্কী মফমশিংদা থাজবা য়াবা অমসুং নীংথিনা মথৌ তৌবা সপ্লাই চেন অমা লৈহন্নবা থবক থৌরমশিং পাঙথোকপগী ৱাখল্লোন অসিদা থৱাই য়াওনা শৌগৎলি। করিগুম্বা পোৎলম অমগী মমলদা য়াম্না থুনা অহোংবা নাইবগী থৌওং য়াওনা ইনপুৎশিং সপ্লাই তৌবগী মতাংদা থেংনবা শিংনবশিং অসি শেন্ননবা সপ্লাই চেন অমগী তোঙান তোঙানবা মগুন চেনবগী মওং অসি য়াম্না মরু ওই। ঐখোয়না লমদমশিং অসিদা থাজবা য়াবা তুং কোইনা চৎকদবা সপ্লাইশিং অমসুং মসিগী মতিক চাবা চাংগী নেৎৱর্ক অমা শেমগত্তুনা মফমশিং অসিদা লৈরিবা বেল্যু চেনশিংবু শম্নহন্নবা মরু ওইবা লম্বী অমা শেম্বা য়াই”।

মন্ত্রীনা মখা তানা হায়খিবগী মতুং ইন্না খোঙথাং অসিনা সেক্তরশিংগী চাংদম্নবগী থৌওংশিংসু হেন্না ফগৎহনবদা তেংবাংগনি হায়খি। “খুদম ওইনা হায়রবদা, ঐখোয়না মফম অসিগী দোমেস্তিক বেল্যু এদিসন্দা খ্বাইদগী হেন্না তাংবাংবা পোত্থোক শাবা অমসুং সর্বিস সেক্তর মশক খঙদোকপগী তঙাই ফদবা লৈরকপা য়াই। পোত্থোক পুথোকপগী ফম্বাক্তা খেৎনহনবা পুরকপা অমসুং ললোন ইতিক অমসুং শেল থাদবগী খুদোঙচাবা পীবা অমসুং হেন্না খুমাং চাউশিলহনবগী হীরমশিংগা মরী লৈনবা সপ্লাই চেনশিংগী মথৌ তৌবা হেনগৎহন্নবগী অকক্নবা খোঙথাংশিংগী তঙাই ফদবা লৈববু ঐখোয়না শৌগৎলি”। ললোন ইতিক্কী থৌওংশিংবু দিজিতাইজ তৌবগী থৌওং অসি ললোন ইতিক তৌবদা তেংবাংবতা নত্তনা মসিনা সপ্লাই চেনশিংগী রেজিলেন্সপু শেন্নদুনা থম্বগী মরু ওইবা খোঙকাপ অমনি হায়না মহাক্না হায়খি। হায়রিবা মওংশিং অসিগী খুদম অসি কোবিদকী ইরাংগী মনুংদা রীগুলতেরী এজেন্সী কয়ানা মথৌ নীংথিজনা পাঙথোকপা ঙমখদবা অসিদা উবা ফংখি। “ঐখোনা ইলেক্ত্রোনিক্কী চা-চাংশিং শিজিন্নদুনা ঐখোয়গী তৌবা ঙম্বশিংগা চান্নহন্দুনা চৎপগী খুত্থাংদা কান্নহনবা অসিগী খোঙজেল কায়দনা চৎপা অসি য়াম্না মরু ওইবনি” হায়না মহাক্না মহা তানা হায়খি।

মসিদা থৱাই য়াওবা লৈবাকশিংনা শরুক য়ারকপগী মতাংদা শ্রী গোয়লনা মফমশিং অসিগী সপ্লাই চেন্দা রেসিলিএন্ত ওইবগী থৌওং লৈহন্নবগীদমক্তা থাজবা য়াবা সপ্লাইয়র ওইবগী মগুন চেনবা মান্নবা ৱাখল চেনবা লৈবাকশিংদা মিৎয়েং চংবগী তঙাই ফদবা লৈ হায়খি। মখোয়গা শরুক য়ামিন্নবগী মতাংদা অতোপ্পা তঙাইও ফদবা হীরমশিংদি মার্কেত্তা য়ুম্ফম ওইবা পোলিসী লৈবা, দেমোগ্রাফী, শাহৌ লৌবা ঙম্বগী মতিক লৈবা, হৌজি লৈবা অতোপ্পশিংগী শেন্দোন অমসুং মখোয়গী জিও-পোলিতিকেল স্ত্রেতজীশিংনি।

মফমশিং অসিদা ভারত, ওস্ত্রেলিয়া অমসুং জপান অসি মরু ওইবা থৌদাং লৈবা লৈবাকশিংনি হায়রদুনা শ্রী গোয়লনা ইং ২০১৯গী মনুংদা অপুনবা জি.দি.পি. অসি ত্রিলয়ন দোল্লর ৯.৩নি অমসুং ললোন-ইতিক্কী পোত্থোকশিং অমসুং সর্বিস ত্রেদকী অপুনবা অসিনা মথংশিৎনা ত্রিলিয়ন দোল্লর ২.৭ অমসুং ০.৯নি হায়খি। “অসিগুম্বা মতিক লৈবা ফম্বাক লৈবা অসিগা লোয়ননা ঐখোয়না খুদোংচাবশিং অসি শিজিন্নদুনা ঐখোয়না মফমশিং অসিদা ঐখোয়গী ললোন ইতিক্কী অমসুং শেল থাদবগী শরুক হেনগৎহন্নবা থবক পায়খৎপা অসি য়াম্না মরু ওইবনি” হায়না মন্ত্রীনা মখা তানা হায়খি।

লৈবাকশিং অসিগী মরক্তা লৈনরিবা ললোন ইতিক্কী মরী অসি চাউথোকহনবগী তঙাই ফদবা লৈবদা মিৎয়েং চংলদুনা শ্রী গোয়লনা হায়খিবদা জপানগী ওইনা য়েংলুবদা অখন্নবা পোত্থোক খরগী ওইনা খেৎনবা মমল থোইদোক্না লৈতনা ভারত্তগী থাদোকখিবা অমসুং জপান্না লৈখিবা পোত্থোক কয়া অমা লৈরবসু জপান্না ভারত্তগী পোত্থোক লৈবা অসি য়াম্না অকক্নৈ হায়খি। হায়রিবশিং অসিগী মনুং চনবশিংদি স্তীল, মেরিনগী পোত্থোকশিং, শেম শাবা লোইরবা লৌউ-শিংউ, এগ্রো-কেমিকেলস, প্লাস্তিক কার্পেৎ, ফিরোল অমসুং খোঙউপনচিংবনি। মহাক্না হায়খিবগী মতুং ইন্না হৌজিক হৌদোক্লিবা খোঙথাং অসিনা মরক্তা লৈরিবা অহাঙবশিং অসি মেন্সিন্দুনা লৈবাক অসিসিগী মরক্তা লৈরিবা ললোন ইতিক্কী মরীশিং অসি ফগৎহনগনি হায়বগী থাজবা লৈ হায়খি।

*******