ভারতকী হান্নগী রাস্ত্রপতি শ্রী প্রনব মুখর্জী লৈখিদবদা কেন্দ্রগী মন্ত্রীমন্দলনা অৱাবা ফোঙদোকখ্রে ।

শ্রী প্রনব মুখর্জীবু নীংশিংদুনা মন্ত্রীমন্দলনা মিনিৎ অনি তুমিন্না লৈখি।

ঙসি মন্ত্রীমন্দলনা মখাগী ৱারেপশিং অসি লৌখি:

“ভারতকী হান্নগী রাস্ত্রপতি শ্রী প্রনব মুখর্জী লৈখিদবদা কেন্দ্রগী মন্ত্রীমন্দলনা অৱাবা ফোঙদোক্লি।

মহাক লৈখিদবদা, লৈবাক অসিনা শক্নাইরবা লুচিংবা অমা অমসুং ফিদম্নফম ওইরবা পর্লিয়ামেন্তরিয়ান অমা মাঙজরে।

ভারতকী ১৩শুবা রাস্ত্রপতি ওইখিবা শ্রী প্রনব মুখর্জী লৈবাক ঙাকপদা লাম্বা লৈতবা মীওই অমনি অমসুং ফোরেন, দিফেন্স, কমর্স অমসুং ফাইনান্সকী য়ুনিয়ন মন্ত্রীশিং ওইরমখি।

১৯৩৫গী দিসেম্বর ১১দা নোংচুপ বঙ্গালগী বীরভুম জিলাগী অপীকপা খুঙ্গং মিরাতীদা পোকখিবা শ্রী প্রনব মুখর্জী কোলকাতা য়ুনিভর্সিতীদগী হিস্তরী অমসুং পোলিতিকেল সাইন্সতা মাস্তর লোইখি অমসুং য়ুনিভর্সিতী অসিদগী লোগী দিগ্রী অমসু পায়খি। মহাক্না অহানবা ওইনা কোলেজগী ওজা অমসুং পাউমীগী শীনফম পায়খি। মহাক্কী মপানা লৈবাক্কী নীংতম ইহৌদা লৌখিবা থৌদাং অদুনা ইথিল পীবদগী, ১৯৬৯দা মহাক রাজ্য সভাদা খল্লবা মতুংদা শ্রী প্রনব মুখর্জীনা মহাক্কী পুন্সি মীয়ামগীদমক মপুংফানা কৎথোকপা হৌখি।

১৯৭৩-৭৫গী মনুংদা শ্রী প্রনব মুখর্জীনা ইন্দস্ত্রী, শিপ্পিং অমসুং ত্রান্সপোর্ত, স্তীল অমসুং ইন্দস্ত্রীগী দিপুতী মন্ত্রী ওইখি অমসুং ফাইনান্সকী রাজ্য মন্ত্রী ওইখি। মহাক্না ১৯৮২দা অহানবা ওইনা ভারতকী ফাইনান্স মন্ত্রীগী ফম পায়খি অমসুং ১৯৮০দগী ১৯৮৫ ফাওবা রাজ্য সভাদা হাউসকী লুচিংবা ওইখি। মহাক্না ১৯৯১দগী ১৯৯৬ ফাওবা প্লান্নিং কম্মিসনগী দিপুতী চিয়রমেন ওইখি; মসিগা লোয়ননা ১৯৯৩দগী ১৯৯৫ ফাওবা কমর্স মন্ত্রী অমসুং ১৯৯৫দগী ১৯৯৬ ফাওবা মপান থৌরম পুবা মন্ত্রী; ২০০৪দগী ২০০৬ ফাওবা দিফেন্স মিনস্তর ওইখি। মহাক অমুক হন্না ২০০৬দগী ২০০৯ ফাওবা মপান থৌরম পুবা মন্ত্রী ওইখি অমসুং ২০০৯দগী ২০১২ ফাওবা ফাইনান্স মন্ত্রী ওইখি। মহাক ২০০৪দগী ২০১২ ফাওবা লোক সভাদা হাউসকী লুচিংবা ওইখি।

২০১২গী জুলাই ২৫দা শ্রী প্রনব মুখর্জীনা ভারতকী রাস্ত্রপতিগী ওফিস পায়বা হৌখি অমসুং মহাক্কী চহি ৫গী মতম থবক পুরমখি। রাস্ত্রপতি অমা ওইনা, শ্রী প্রনব মুখর্জীনা অৱাংবা থাক্কী ওফিস অসিগী মিংচৎ পুখৎলমখি অমসুং লৈবাক্কী অমসুং মালেমগী থৌদোক-ৱাথোকশিংদা মহাক্কী হৈশিংবা অমসুং মীওইবা খুন্নাইগী খনবা মিৎয়েং অদু উৎখি।

শ্রী প্রনব মুখর্জীনা ভারতকী ইকোনোমী অমসুং লৈবাক শেমগৎপগী মতাংদা লাইরিক কয়া ইরমখি। বেস্ত পর্লিয়ামেন্তরিয়ান এৱার্দ (১৯৯৭), পদ্ম বিভুশন (২০০৮) অমসুং ভারতকী খ্বাইদগী ৱাংবা মনা ভারত রত্ন (২০০৮) য়াওনা মহাক মনা অমসুং ইকায়খুম্নবা কয়া ফংখি।

শ্রী প্রনব মুখর্জীনা ঐখোয়গী লৈবাক্কী পু্ন্সিদা কাউবা ঙম্লরোইদবা মহাক্কী মমি অমা তাহল্লমখি। মহাক লৈখিদবা অসি লৈবাক অসিনা শক্নাইরবা লৈবাক্কী লুচিংবা অমা, অফবা পর্লিয়ামেন্তরিয়ান অমা অমসুং মতিক চাবা রাজনিতীৱালা অমা মাঙজরে।

শ্রী প্রনব মুখর্জীনা লৈবাক্কীদমক পাংথোক্লম্বা থবকশিং মন্ত্রীমন্দলনা থাগৎলি অমসুং ভারত সরকার অমসুং লৈবাক অসিগী মহুৎ শীন্দুনা অৱাবা নঙলবা মহাক্কী ইমুংগী অৱাবদা থম্মোয় শোক্না শরুক য়ারি।”

***