কেন্দ্রীয় অতিক্ষুদ্ৰ, লঘূ আৰু মজলীয়া উদ্যোগ মন্ত্রী শ্রী নীতিন গাডকাৰীয়ে আজি ভিডিঅ’ কনফাৰেন্সযোগে ৰাজস্থানৰ আলোৱাৰ জিলাৰ ভিৱাড়ীত এক প্ৰযুক্তি কেন্দ্রৰ উদ্বোধন কৰিছে৷ প্ৰধানমন্ত্রীৰ আত্মনির্ভৰ ভাৰতৰ প্ৰসংগ উল্লেখ কৰি মন্ত্রীগৰাকীয়ে কয় যে দেশৰ নিৰ্মাণ খণ্ডৰ পৰা মুঠ আভ্যন্তৰীণ উৎপাদনৰ ২২-২৪ শতাংশ আহে৷ তেওঁ লগতে কয় যে শীঘ্ৰে ১৫টা নতুন প্ৰযুক্তি কেন্দ্ৰ গঢ়ি তোলাৰ উপৰি ১৮টা প্ৰযুক্তি কেন্দ্রৰ উন্নয়ন সাধন কৰা হ’ব৷ ইয়াৰ জৰিয়তে দক্ষ মানৱসম্পদ গঢ় লৈ উঠিব৷ মন্ত্ৰী গাডকাৰীয়ে লগতে কয় যে এই প্ৰযুক্তি কেন্দ্ৰসমূহে সংশ্লিষ্ট এলেকাৰ উন্নয়নত গুৰুত্বপূৰ্ণ ভূমিকা পালন কৰিব৷ তেওঁ ৰাজ্য চৰকাৰসমূহ এই কেন্দ্ৰ গঢ়াৰ বাবে প্ৰয়োজনীয় ভূমিকে ধৰি অন্যান্য দিশত সহায় কৰাৰ আহ্বান জনায়৷ মন্ত্রী গাডকাৰীয়ে কয় যে আইটিআই, পলিটেকনিক, অভিযান্ত্ৰিক মহাবিদ্যালয়কে ধৰি বিভিন্ন প্ৰতিষ্ঠানৰ আন্তঃগাঁথনি ব্যৱহাৰ কৰি যুৱক-যুৱতীসকলে তেওঁলোকৰ দক্ষতা বিকাশ কৰিব লাগিব৷

অতিক্ষুদ্ৰ, লঘূ আৰু মজলীয়া উদ্যোগ বিভাগৰ ৰাজ্যিক মন্ত্ৰী শ্রী প্ৰতাপ চন্দ্ৰ সাৰেংগীয়ে কয় যে ক’ভিড-১৯ মহামাৰীৰ ফলত দেশত বর্তমান অর্থনৈতিক সংকটে দেখা দিছে। আত্মনিৰ্ভৰ ভাৰতৰ সপোন বাস্তবায়িত কৰাত এই কেন্দ্ৰসমূহে উৎপাদন আৰু কর্মসংস্থাপনৰ সুযোগ বৃদ্ধি কৰিব৷

অতিক্ষুদ্ৰ, লঘূ আৰু মজলীয়া উদ্যোগ বিভাগৰ সচিব শ্রী এ কে শর্মাই কয় যে এই কেন্দ্ৰসমূহে অতিক্ষুদ্ৰ, ক্ষুদ্ৰ আৰু মজলীয়া উদ্যোগকে ধৰি বিভিন্ন প্ৰতিষ্ঠানক চিএনচি মেচিন, ৩ডি নির্মাণ উদ্যোগ, লেজাৰ আৰু আল্ট্রাছ’নিক মেচিন, ৰ’ব’টিক্সসহ অত্যাধুনিক প্ৰযুক্তি ব্যৱহাৰত সহায় কৰিব৷ অনুষ্ঠানত ৰাজস্থানৰ উদ্যোগ মন্ত্রী শ্রী প্ৰসাদিলাল মীনা, স্থানীয় সাংসদ শ্রী মহন্ত বালকনাথ আৰু সাংসদ সন্দীপ যাদৱকে ধৰি একাংশ বিধায়কো উপস্থিত থাকে৷

******

RCJ/SKP/IA/DB