দিফেন্সগী লমদা ‘মেক ইন ইন্দিয়া’ চাউখৎহন্নবা ভারত সরকারগী থৌরাং অমা ওইনা , ভারত লান্মীগী আর্তিল্লেরি রেজিমেন্ততা লুপা করোর ২৫৮০গী পিনাকা রেজিমেন্ত ৬ পীনবা দিফেন্স মিনিস্ত্রিগী একুইজিসন ৱিংনা ঙসি এম/এস.ভারত আর্থ মুভরস লিমিতেদ, এম/এস.তাতা পৱার কম্পেনি লিমিতেদ অমসুং এম/এস.লারসেন অমসুং তৌব্রোগা কন্ত্রেকশিং খুৎয়েক পীনখ্রে। পিনাকা রেজিমেন্ত ৬ অসিদা ওতোমেতিক গন এমিং এন্দ পোজিসন্নিং সিস্তেম(এ জি এ পি এস) য়াওবা লঞ্চর ১১৪ অমসুং তাতা পৱার কম্পেনি লিমিতেদ অমসুং এম/এস.লারসেন অমসুং তৌব্রোদগী লৈগদবা কমান্দ পোস্ত ৪৫ অমসুং এম/এস.ভারত আর্থ মুভরস লিমিতেদকী গারি ৩৩০ য়াওরি। পিনাকা রেজিমেন্তশিং অসি ভারতকী অৱাং অমসুং নোংপোক  থংবা ঙমখৈশিংদা থমগনি অমসুং ঐখোয়গী লান্মীশিংনা ওপরেসনগী শেম-শাবা হেনগৎহনগনি। পিনাকা  রেজিমেন্ত ৬ হাপচিন্নবা থৌরাং ২০২৪ ফাওবগী মনুংদা লোইশিনগনি।

লৈবাক অসিদা মশানা পুথোকচবা মচাকশিং চাদা ৭০ য়াওবা খুৎলায়শিং লৈনবা প্রোজেক অসি দিফেন্স মিনিস্তর রাজনাথ সিংহ অমসুং ফাইনান্স মিনিস্তর শ্রীমতি নিরমালা সিতারমন্না অয়াবা পীরে।

পিনাকা মল্তিপল লঞ্চ রোকেত সিস্তেম(এম এল আর এস) অসি দি.আর.দি.ওনা দিজাইন তৌবা অমসুং পুথোকপনি। মসিগী প্রোজেক অসিনা ঙাকশেনগী তেক্নোলোজিশিংগী লমদা ‘অত্মানির্ভর ভারত’ পাংথোকপা ঙম্নবা ভারত সরকারগী মখাদা দি.আর.দি.ও অমসুং দিফেন্স মিনিস্ত্রি অনিগী পি.পি.পি অদু উৎলে।

*****