তুরিজম মন্ত্রালয়না ওগস্ত ২৯, ২০২০দা দেখো অপনা দেশ ৱেবিনার সেরিজকী মনুং চনবা ‘হাম্পি-হৌখিবা মতম্না ইথিল পীবাঃ হয়েংগী পুংফমদা অমুক চঙশিনবা’ মিংথোনবা ৱেবিনার অমা শিনখ্রে। ৱেবিনার অসিনা হাম্পিবু হেরিতেজ অমসুং লমকোয়বগী মফম অমা ওইনা থম্বগী মতাংদা পুন্না খুৎশম্নবা অমসুং মসিগী তঙাইফদবা হীরমসিংগী মরমদা মিৎয়েং চংখি অমসুং মসিগা মরী লৈনবা খুন্নাই, শেন্মিৎলোন অমসুং ইকোলোজীগা ৱাফম কয়াগী মতাংদসু খন্নখি। দেখো অপনা দেশ ৱেবিনার পরিং অসি এক ভারত শ্রেস্থ ভারত প্রোগ্রামগী মখাদা ভারতকী ইনাক খুল্লবা খেৎননা লৈবগী মওং কয়া অমা নৈনবগী থৌওং অমনি।

কিশকিন্দা ত্রস্তকী ফাউন্দর অমসুং ইন্তেক অনেগুন্দি হাম্পিগী কনভেনর ওইরিবী মিস শামা পাৱারনা লান্থোকখিবা ৱেবিনার অসিনা বিজয়ানগরগী ফাওরবা ইকোন কোনবা হিন্দু শাগৈগী খ্বাইদগী অকোনবা কোনুং ওইরম্বা হাম্পিগী শেংলবা অমসুং নীংথিরবা মওং মতৌশিংগী মরমদা নৈনখি। য়ুনেস্কোগী মালেমগী হেরিতেজ মফম অমা ওইরিবা হাম্পি অসি তুঙ্গাভদ্রা তুরেল, অৱাঙবা নুংগী চিঙমাইনা কোইশিনবা অমসুং পাক চাউরবা অকায় অতোই কয়ানা কোইশিনবা মফম অমনি। তোঙান তোঙানবা অর্বান, খুঙ্গং অমসুং ধর্মগী ওইবা শেংলবা পথাপশিংগী চাউখৎপগী ফিভম অসি চহি ১৬০০ হেল্লবা  অমসুং হৌজিক্না অকায় অতোই ওইনা লৈরিবা লানবন, তুরেল মপানগী মফমশিং, নিংথৌরেলগী অমসুং ধর্মগী শেংলবা মফমশিং, লাইনিংফমশিং, লাই খুরুমফমশিং, য়ুম্বীনা থল্লবা কা অচৌবশিং, করিগুম্বা অমবু নীংশিংনবা শাবা স্ত্রকচরশিং, থোঙ লম্বীশিং, ঙাকশেলগী মফমশিং, শা লোয়ফমশিং, ঈশিংগী স্ত্রকচরশিংনচিংবশিংদা উবা ফংই।

থৌরম অসি লান্থোক্লিবা মীওই অসিনা হাম্পিগী পুৱারীদগী হৌদুনা মফম অসিগী মতাংদা তাকপা হৌই। মসিগী মমিং অসি মফম অসিবু শারিবা তুঙ্গাভদ্রগী অরিবা মমিং ‘পম্পা’দগী লৌথোকপনি হায়খি। ইং ১৩৩৬ সি.ই.দা বিজয়নগরগী নীংথৌরেলগী শাগৈ অসি কাম্পিলি নীংথৌরেলগী অকায় অতোইশিংদগী শাগৎপা হৌখিবনি। মসিনা চহি ২০০ হেন্না পানখিবা খা-ভারতকী অফাওবা হিন্দুগী শাগৈ অমা ওইরকখি। বিজয়নগরগী লৈঙাকপশিংনা লাইরিক লাইশু হৈবা অমসুং আর্তকী মরমদা চাউখৎপা কয়া পুরকখি অমসুং অকনবা লান্মী শেমদুনা মসিগী খা অমসুং অৱাংদা লৈবা সুলতানগী মফমশিংগা লান কয়া শোক্নখি। মখোয়না লম্বী-শোরোক, ঈশিংগী থবকশিং, লৌউ-শিংউবা, ধর্মগী ওইবা য়ুমশিং অমসুং মীয়ামগী ওইবা মফম কয়াদা চাউখৎপগী মওং কয়া পুরকখি। মফম অসি ধর্ম য়াম্বা অমসুং মীওই কাঙলুপ য়াম্না লৈবা মফম অমা ওইদুনা হিন্দু অমসুং জেনগী নিংশিং ফুরা কয়া অমগা অমগগী মরক্তা নক্ননা শারমখি। য়ুমশা কৈশাশিং অসিনা আইহোলে-পত্তাদাকল মতমগী মওং চেনবা খা-ভারতকী হিন্দুগী আর্ত অমসুং য়ুমশা-কৈশাগী মওং লৌদুনা শারম্মি অদুবু হাম্পিগী য়ুম শাবশিংনা মীয়ামগী ইরুজফম অমসুং শমু লৈফম ওইরিবা থম্বালগী কোনুং অসিদি ইন্দো-ইস্লামিক্কী  মচল কয়া য়াওদুনা শরম্মি।

বিজয়নগর নীংথৌরেলগী শাগৈ অসিনা খা-ভারতকী লশিং অমসুং মরু-মরাং ললোন ইতিক তৌবগী লম্বী লাকশিন্দুনা য়াম্না নুংঙাই য়াইফবা অমসুং চাউখৎপা ফংখি। ময়াই ওইবা য়ুগকী পুৱারী ইবা মীওইশিংনা হাম্পিবু মরু ওইবা ললোন ইতিক্কী মফম্নি হায়রম্মি। অদুবু বিজয়নগরগী চাউখৎপা অসি কুইনা চৎখিদে। কৃষ্ণদেবরায়ানা লৈখিদবদগী অপুনবা মুস্লিম ৫গী শাগৈগী-বিদার, গোল্কোন্দা, অহমদনগর অমসুং বেরারগী  লান্মীনা মতিক মগুন লৈরবা নীংথৌরেল অসিবু ইং ১৫৬৫দা মাইথিবা পীখি

হাম্পিগী মীয়াম্বু পুক্নিং চিংশিনবা মরু ওইবা মওং মতৌ অসিদা মিৎয়েং চংলদুনা থৌরম লান্থোক্লিবা মীওই অসিনা মফম অসিগী খ্বাইদগী অরিবা নিংশিং ফুরা ওইরিবা ১৫শুবা চহি-চাগী বিরুপক্সা কোনুংগী মরমদা ৱা ঙাংখি। মসিগী মরু ওইবা লাইনীংফম অসি ভগ্বান শিবদা কত্থোকপনি। বিরুপক্সা কোনুংগী খাথংবদা লৈরিবা হেমকুন্ত চিং অসিদা অঙনবা মতমগী অকাই অতোইশিং, জেনগী কোনুং অমসুং ভগ্বান শিবগী মশক চেনবা ভগ্বান নরশিমহাগী নুং অমখক্তগী শাবা মীতম লৈ। নোঙচুপলোমগী শরুক্তনা নুংদা হকপা য়াম্না চাউবা নন্দি অমা লৈ; খা-থংবা শরুক্তনা অচৌবা গনেশকী মীতম অমা লৈ। মীতর ৬.৭ ৱাংবা ভগ্বান নরশিমহাগী মীতম, ঈশ্বরগী শাইওন্নি হায়না লৌনবা মী তংখাই অমসুং নোংশা তংখাইগী মীতম অমসুং অচৌবা লিঙ্গা লৈরিবা অসিগী মতুং ইন্না নুং অমখক্তগী মীতম হকপগী মওং অসি হাম্পিগী মতম অদুগী চৎনবীনি হায়না লৌনৈ।

বিরুপক্সা কোনুংগী মমাংদা লৈরিবা অমসুং মতঙ্গা চিংগী মখোঙ ফাওবা য়ৌবা বিরুপক্সা বজার অসি হাম্পি বজারগী লম্বী খঙনবা খঙনৈ। রাম অমসুং লক্ষমন্না সিতা থীবগী লেপ্তনা চত্থরকপা লম্বী অসিদা মখোয়না সুগ্রিবনা মহাক্কী মন্ত্রী জম্বাভন অমসুনহ হনুমানগা লোয়ননা লৈবা মতঙ্গা চিং অসি থেংনখিবনি। হাম্পি বজারদগী নোঙপোক্তা কিলোমীতর ২ চৎলগা লৈবা মফমদা হৌজিক্না মালেমগী হেরিতেজকী নিংশিং ফুরা ওইরবা ১৬শুবা চহি-চাদা শাখিবা বিত্তল কোনুং উবা ফংগনি। কোনুং অসিদা হক্তুনা লৈরিবা খুৎয়েক কয়া অসি উবদা বিজয়নগর নীংথৌরেলগী খুৎ-শা হৈবশিংগী তসেংবা য়ুমশা-কৈশাগী হৈ-শিংবা অদু উবা ফংই। কোনুং অসিগী য়ুম্বীশিং অসিগী খলশিং অসি অদুক্কী মতিক ফজবা মরম্না মসিদা ঈশৈ-নোঙমাইগী মগুন চেনবা উবা ফংই। মহারানীগী ইরুজফম, হজারা রাম কোনুং, থম্বালগী কোনুং, শমুশিংগী লৈফম অমসুং অতোপ্পা পুক্নিং চিংশিন্নিংঙাই ওইরবা মফমশিং অসি য়েংদনা লান্থোক্তুনা চৎপা ঙম্লোই।

হাম্পি অসি মেদিতেসন তৌবগী মফম্নি অমসুং অয়েকপা লাই মচা অমগুম্মি। হাম্পিগী অকোয়বদা চৎপা মতমদা মতম নাইদ্রবা খোঙচৎ অমা চৎপগী ইথিল ফাওগনি। হাম্পিগী মহৌশাগী হেরিতেজ অসিদা নুং মতুমশিং, স্করব অমসুং অচোৎপা মফমশিং, তুঙ্গাভদ্রা তুরেল, উচেকশিং অমসুং লম্লকী শা-ঙাশিং, ওত্তরগী মফমশিং, তোঙান তোঙানবা লৈ অমসুং পাম্বীশিং য়াওরি। স্নেদলৱুদমুম্বা উশিংদিম  মহৌশানা অদুম হৌজৈ। ঈশিং খায়দোকপগী পথাপশিং অসি য়াম্না ফজৈ অমসুং মসিনা চেং থাবদা য়াম্না তেংবাংই। মীয়াম্না হাম্পিদা উচেক, পুক্নিং হুরবা মহৌশাগী লমদম, তুরেল অমসুং নুংজাউ কয়ানা পুন্সিনবা অমসুং নীংথিরবা মফমগী মশক চেনবা ইকোলোজী য়াংনবা লাক্নরি।

নাৎকী ওইবা হেরিতেজ য়োকখৎপগী হীরমগা মরী লৈননা কিশকিন্দা ত্রস্তনা আই.এন.তি.এ.সি.ঐচ.কা খুৎশম্নদুনা খুনুংগী ওইবা চৎনবী অমসুং কলাশিং হিংগৎহন্নবা থবক পায়খৎপগা লোয়ননা খুঙ্গং য়োকখৎপগী থবকশিংগী মনুং চনবশিংগী মনুংদা এবেন্যু প্লান্তেসন এৱিয়ারনেস কেম্পেন অমসুং মহৌশাগী ওইবা ফিভম য়োকখৎপগী মতাংদা ৱর্কশোপ পাঙথোকপা, মফম অসিদা লৈরিবা উচেকশিংগী মখলশিংগী মরমদা চে-চাং নাইবা, মফমশিং অসিগী ফোতো নমদুনা থমজিনবনচিংবা থবকশিং য়াওরি।

ইং ১৩৩৪দা অনেগুন্দি খুঙ্গংগী মুখ্য মন্ত্রী দেবা রায়না অনেগুন্দিগী অহানবা লৈঙাকপা ওইখি। ধর্মগা মরী লৈনবা হিশকিন্দা শহর অসি ভারতকী য়োংগী ভগ্বান হনুমানগী ময়ুম্নি হায়না লৌনৈ। অঞ্জুনাদ্রি হায়রিবা হনুমানগী পোকফম অসি অনেগুন্দিদগী কিলোমীতর খকরতমক চৎলগা লৈ। অনেগুন্দিগী লম্বীশিংদা চৎপা মতমদা নুপীশিংনা মরু-মরাং তকপা, ময়ুমশিংবু রঙ্গোলিনা লৈতেংবা অমসুং কিশকিন্দা আর্ত অমসুং ক্রাফৎকী দুকানশিংদা য়োন্নবা লফু মনানা খাও লোনবগী থৌওং পাঙথোকপা কয়া উবা ফংগনি।

করিগুম্বা অমা য়োকখৎপা অসি কাংলুপ নাইনা পাঙথোকপা থৌওংনি অমসুং মসিদা খুন্নাইগী থৌদাং অসি য়াওদবা য়াদে অমসুং খুঙ্গংগী য়ুমশিং, অশোকপা নংলবা য়ুমশিং অমসুং মসিবু শেমজিন শাজিন্নবা তঙাই ফদনা চংগদবা পোৎলমশিংগী মরমদা ইশিন্দুনা থম্বগী তঙাই ফদবা লৈ। খুদম ওইনা হায়রবদা হেরিতেজ হোমগুম্বা মীওইশিংনা লৈনবা মফমশিংবু লমকোয়বশিংগী লৈফম ওইনা শিজিন্নবগী প্রোজেক্ত, খুঙ্গংগী লাইব্রেরী, মীয়ামগী মফমশিং, সেনিতেসন তৌবগী থৌরাংনচিংবশিং অসিগী মতাংদা কিশকিন্দা ত্রস্তনা মাই পাকপা কয়া ফংলে। নুপীশিংগী ওইবা পুন্সি মহিং তানবগী খুদোংচাবা লৈহন্নবা মফমশিং অসিদা ফংবা হৈ-শিংবগী মওং অমসুং পোত্থোকশিংদা মিৎয়েং চংদুনা লফু পাম্বীদগী শেম-শাবা য়াবা পোত্থোক মখল কয়া অমা পুথোক্লে অমসুং মসিনা খুঙ্গংগী নুপী ১৫০-২০০ ফাওবদা থবক পীরি।

মসিগী পোত্থোকশিং অসি য়োনবদা ফংবা শেনফমশিং অসিনা মসিগী পুন্সি মহিং পীবগী থৌওংশিং অমসুং খুঙ্গংগী নুপীশিংদা চগা তানবা, মশাদা থাজবগী ইথিল লাকহন্দুনা অতোপ্পা মীওইশিংদা মখোয়না থেংনরকপশিংগী মরমদা হায়বা অমসুং অতোপ্পদগীসু কান্নবা ৱাফম কয়া তাশিনবদা তেংবাংবদা শিজিন্নরি। অমসুং থৌওং অসিনা মফমসিগী মীয়ামগী মরক্তা নুংশি চানবা অমসুং তংদু লৈতাবগী ফিভম অমা লৈহনবদা তেংবাংলি।

 “পর্ফোরমিং আর্তকী খুত্থাংদা এজুকেসন পীবা” খোঙথাং অসি য়াম্না কান্নবা খোঙথাং অমা ওইরি অমসুং মসিগী মখাদা অঙাংশিংনা অহৈবা আর্তিস্তশিংদগী জগোই, ইশৈ তম্বগী খুদোংচাবা ফংলি। অঙাংশিংনা করিগুম্বা অমা য়োকখৎপা, ইকোলোজীগী ৱাখল্লোন কয়া তম্বগী খুদোংচাবা ফংলি অমসুং মসিনা মখোয়দা খুন্নাইগী থবকশিংদা য়াওবগী ইথিল পীদুনা খুন্নাই পুন্না লৈমিন্নবগী তুং কোইবা ইথিল পীরি।

সেনিতেসনগী মনুং চনবা থবকশিংগী মনুংদা মরী লৈনবা খুৎলাই পীদুনা ত্রেনিং তৌবা, চাং নাইনা ৱাই শিৎপা, ফত্ত হাওদি খোমজিনবা অমসুং খায়দোকপা, বাইও ৱেস্ত কম্পোস্ত তৌবা, প্লাস্তিক্কুম্বা অকংবা ফত্ত হাউদিশিং মাঙহনবনচিংবা থৌওংশিং য়াওই। স্কুলগী অঙাংশিং, গেস্ত হাউসকী য়ুম্বুশিং অমসুং খুঙ্গংগী মীয়ামগী ওইবা খঙজিনবগী প্রোগ্রাম কয়া চাং নাইনা পাঙথোক্লি অমসুং খুন্নাই পুম্বনা শরুক য়ানবা হায়দুনা ফত্ত হাউদি শেংবগী থবকশিংসু চাং নাইনা পাঙথোক্লি।

ৱেবিনার অসিবু তেন্সিনবা ওইনা এদিস্নেল দাইরেক্তর জেনেরেল রুপিন্দর ব্রারনা ইশাগী থৌদাং খঙবা মওংদা ইমা পৃথীবিবু চেকশিন্না থম্নবা অমসুং তুংগী চারোন শুরোনগীদমক্তা ঙাক শেন্দুনা থমদুনা শিজিন্নবগী মরু ওইবগী মতাংদা মিৎয়েং চংখি। হাম্পি অসি নোঙথক্কী লম্বী, ত্রেন অমসুং শোরোক্কী লম্বীশিংনা নীংথিনা শম্নহল্লি। সেসন অসি লোইশিনবগী মতমদা ৱেবিনার অসিগী মতাংদা ৱাহং ৫ হংগনি অমসুং মসিদা শরুক য়ারিবা অমসুং মসিবু য়েংলিবা মীওইশিংনা পাউখুমশিং অসি mygov.in দা পীশিন্দুনা মসিগী মতুংদা মাই পাক্লবা মীওইশিংদা ই.-সর্তিফিকেৎ পীগনি হায়বগী ৱাফম অমা লাউথোকখি। ৱেবিনার খুদিংগা মরী লৈনবা ৱাহংশিং অসি তুরিজম মন্ত্রালয়গী সোসিএল মীদিয়া হেন্দলশিংদসু হাপকনি।

দেখো অপনা দেশকী ৱেবিনার সেরিজ অসি ইলেক্ত্রোনিক্স অমসুং ইনফোর্মেসন তেক্নোলোজী মন্ত্রালয়গী নেস্নেল ই.-গোবর্নেন্স বিভাগকা খুৎশম্নদুনা পুথোকপনি। ৱেবিনারশিং অসিগী সেসনশিং অসি https://www.youtube.com/channel/UCbzIbBmMvtvH7d6Zo_ZEHDA/featured অমসুং ভারত সরকারগী তুরিজম মন্ত্রালয়গী সোসিএল মীদিয়া হেন্দলশিংদা ফংগনি।

মথংগী পঞ্জাব হায়না মিংথোনবা ৱেবিনার অসি সেপ্তেম্বর ৫, ২০২০গী অয়ুক্কী পুং ১১দা পাঙথোক্কনি।

*****