ভর্চুএল ওইনা মনাশিং য়েন্থোকপা অহানবা থৌরম অমা ওইনা, ঙসি রাস্ত্রপতি ভাবন্দগী ভারতকী রাস্ত্রপতি শ্রী রাম নাথ কোবিন্দনা ২০২০গী নেসনেল স্পোর্তস অমসুং এদভেঞ্জর এৱার্দশিং য়েন্থোকখ্রে অমসুং হায়রিবা মনাশিং ফংলবশিং অসি ভারতকী শান্নবগী লমদা নিংশিংদুনা লৈহৌরগনি হায়খি।

রাস্ত্রপতিনা হায়খি শান্নবগী লমদা ভারত মখা তানা অচৌবা শক্তি অমা ওইরক্কনি অমসুং ২০১৮গী ওলেম্পিক্সতা মেদল য়াম্না ফংবা ঙম্বা লৈবাক ১০গী মনুং চন্নবা পান্দম থম্লি। মসিগী পান্দম অসি ফংবা ঙমগনি হায়না ঐনা থাজবা থম্লি। লৈবাক্কী তোঙান তোঙানবা মফমশিং হায়বদি বেঙ্গালুরু, পুনে, সোনেপাত, চান্দিগর, কোলকাতা, লখনৌ, দিল্লি, মুম্বাই, ভোপাল, হায়দ্রবাদ অমসুং ইতানগরদা লৈবা ওফিসিএলশিং, শান্নরোইশিং অমসুং ত্রেন্নরশিংদা রাস্ত্রপতিনা ৱা ঙাংখি। য়ুথ এফেয়ার্স অমসুং স্পোর্তসকী রাজ্য মন্ত্রী(মনিংতম্বা) কিরেন রিজিজু নিউ দিল্লিদগী থৌরম অসি শরুক য়াখি অমসুং তরাম্না ওকপগী ৱারোল পীখি।

রাস্ত্রপতিনা হায়খি মালেমগী শান্নবগী লমদা কোবিদ-১৯না অকাইবা থোকহল্লে। ওলেম্পিক গেমস য়ৈথোক্লে। ঐখোয়গী লৈবাক্কী শান্নবগী থৌরমশিংসু অকাইবা থোক্লে। শান্নবা অমসুং চাংদম্নবা ৱাৎপদগী শান্নরোইশিং অমসুং কোচশিংগী ৱাখল অমসুং শাজেলগী থৌরাংদা অচৌবা খুদোংচাদবা থোকহল্লে। মসিগী ফিবম অসিদা শান্নরোইশিং অমসুং কোচশিং ওনলাইন কোচিং অমসুং ৱেবিনারশিংগী খুৎথাংদা শম্নবা অসিদা ঐ হরাওই। ঙসিগী থৌরম অসি মালেমগী ওইনা লাইচৎ লৈরবসু শান্নবগা মরী লৈনবা থৌরমশিং মখা চৎথনবগী হোৎনবা অমনি।

মহাক্না হায়খি ঙসি মনা ফংলবশিং অসি মশান্না ২০ হেনবগী শান্নরোইশিংনি। ঐখোয়গী মমাংঙৈগী মশান্নশিং হায়বদি কবাদি, খো-খো অমসুং মাল্লাখাম্ব অসিনা মীয়ামগা শান্নবা নকশিন্নবদা মতেং পাংগনি। ঙসিদি ক্রিকেত অমসুং ফুদবোলগী মথক্তা, বোল্লিবোল অমসুং কবাদিগুম্বা মশান্নশিংগী লিগ তুর্নামেন্তশিং মীয়াম্না পাম্নবা হেনগৎলক্লে।

রাস্ত্রপতিনা হায়খি মরী লৈনবশিং শরুক য়াদুনা শান্ন-খোৎনবা য়োকখৎকদবনি। মসি সরকার খক্তগী থৌদাং নত্তে। শান্নবদা শেন থাদবা অসি লৈবাক শেমগৎনবগী অপুনবা থবক অমনি। শান্ন-খোৎনবা য়োকখৎনবা কোরপোরেতশিং, এন.জি.ওশিং অমসুং মহৈলোয়শঙশিংনা মরুওইবা থৌদাং য়ারিবা অসি থাগৎনিঙাইনি। অপুনবা থবকশিং অসিনা ভারত শান্নবগী লমদা মাংজিল থাবা লৈবাক অমা ওইরক্কনি হায়না থাজবা থম্লি।

শান্নরোই অমনা চহি মরিগী ওইনা শান্নবগী লমদা শিংথানিংঙাই ওইবা শান্নবা উৎপগীদমক রজিব গান্ধী খেল রত্ন এৱার্দ পীরি; চহি মরিগী ওইনা মশক থোকপা শান্নবগী পর্ফোমেন্সশিং উৎপগীদমক অর্জুন এৱার্দ পীরি; মালেমগী লেমজনিংঙাই ওইবা শান্নবগী থৌরমশিংদা মেদল লৌবা ঙম্বা শান্নরোইশিং পুথোকপা কোচশিংদা দ্রোনাচার্য়া এৱার্দ পীরি। শান্নবা চাউখৎহন্নবা থবক তৌরকপা মীওইশিংদা লাইফ তাইম ধ্যান চান্দ এৱার্দ পীরি অমসুং শান্নবা য়োকখৎনবা থবক তৌবা লনাই মীওইশিং অমসুং কোরপোরেতশিং(লনাই অমসুং সরকারগী অনিমক)দা রাস্ত্রিয়া খেল প্রোতসাহান পীরি। ইন্তর-য়ুনিভর্সিতি তুর্নামেন্তশিংদা মকোক তারবশিংদা মৌলানা অবুল কলাম অজাদ ত্রোফি পীরি। মসিগী মথক্তা, লৈবাক অসিগী মীয়ামগী মরক্তা লৈরিবা এদভেঞ্জর স্পোর্তসকী থৌনা শকখঙবা উৎপা ওইনা তেনজিং নোর্গে নেসনেল এদভেঞ্জর এৱার্দ পীরি।

***