ঙাকশেল মন্ত্রী শ্রী রাজনাথ সিংহনা ওগস্ত ১৯, ২০২০দা নেভেল কম্মান্দরস কনফরেন্সকী হৌদোকপগী থৌরমদা নেভেল কম্মান্দরশিংদা ৱা ঙাংখ্রে। মহাক্না ইন্দিয়ন নেভীগী নুপা অমসুং নুপীশিংবু লৈবাক অসিগী ঈশিংগী হীরমগা মরী লৈনবা থবক খুদিংমক নীংথিনা পাঙথোকপগী অমসুং মসিগী জহাজ অমসুং প্লেনশিং থাদোক্তুনা খুদোংথিবা অমা হেক্তা থেংনবা ঙম্নবা শেম-শাদুন লৈবগীদমক্তা থাগৎপা ফোঙদোকখি।

মমাংদা অমুক্তা থোকখিদ্রিবা কোবিদ-১৯গী লায়চৎনা থোকহল্লিবা খুদোংচাদবা কয়া অসিগী মতাংদা পল্লদুনা মহাক্না ইন্দিয়ন নেভীবু মসিগী খ্বাইদগী চাউবা লৈবাক্কী মীওই য়ুমদা পুরকপগী থবক অমসুং লৈবাক্কী অপাম্ববু নীংথিনা পাঙথোকখিবা “ওপরেসন সমুদ্র সেতু” চত্থখিবগীদমক থাগৎপা ফোঙদোকখি। য়াম্না খুদোংচাদবা সমুদ্রগী ওইবা ফিভমশিং অমসুং কোরোনা ভাইরসকী মতৌগুম্না লাকখিবা শক উদবা য়েক্নবগী থৌওং কয়া মায়োক্নদুনা নেভীনা ইন্দিয়ন ওসীন রিজন (আই.ও.আর.)গী মফমশিংদা লৈবা ভারতকী য়ুম্লোন্নবা লৈবাকশিংদগী চাউরাক্না মীওই ৪০০০ মুক পুরকপদা তেংবাংখি। মসিগা লোয়ননা “মিসন সাগর”গী মখাদা খা-নোঙচুপ থংবা ইন্দিয়ন ওসীনগী মফমশিং (মালদিবস, মোরিসস, কোমোরোস, সেচেলস অমসুং মদাগাস্কার)দা হিদাক লাংথক পীখি। মহাক্না ইন্দিয়ন নেভীনা সিবিল এদমিনিস্ত্রেসন্দা তেংবাংদুনা কোবিদ-১৯ থেংনবা ঙম্নবা ক্বারেন্তাইন সেন্তর শানবা তেংবাংবগীদমক্তা থাগৎপা ফোঙদোকখি।

শ্রী রাজনাথ সিংহনা হায়খিবদা প্রধান মন্ত্রীগী সাগর (সেক্যুরিতী এন্দ গ্রোথ ফোর ওল ইন দা রিজন)গী মিৎয়েং অসিনা ইথিল পীদুনা ইন্দিয়ন নেভীনা মরু ওইবা সেন্সিতিব ওইবা মফমশিংদা মসিগী জহাজ অমসুং প্লেন থাদোক্তুনা লৈবাক্কী অপাম্বা ঙাকখিবা মিসন বেজদ দিপ্লোইমেন্ত নীংথিনা পাঙথোকখি হায়না হায়খি। জুন ২০১৭তগী হৌনা মিসন বেজদ দিপ্লোইমেন্ত হেক হৌখিবদগী মসিগী প্লেন অমসুং জহাজ থাদোকখিবগী থৌওং অসিনা মেরিতাইম দোমিনেন্স এৱিয়ারনেস (এম.দি.এ.) খুমাং চাউশিলহন্দুনা ইন্দিয়ন ওসীনগী মফমশিংদা অথুবা হ্যুমেনিতরিয়ন এদ অমসুং দিজাজতর রিলীফ (ঐচ.এ.দি.আর.)  অমসুং মালেমগী মেরিতাইম খুন্নাইদা ঙাক শেনবগী ইথিল পীবা ঙমখি।

অর্মদ ফোর্সতা অহোংবা কয়া লাক্লিবা অসিগী মতাংদা ৱা ঙাংলদুনা ঙাকশেল মন্ত্রীনা সি.দি.এস.কী পোস্ত শেম্বা অমসুং মিলিতরী এফিয়ার্স বিভাগ/এম.ও.দি. (দি.এম.এ.) শেমখিবা অসি লৈরিবা সর্বিস অহুমসিবু তান চান্নহনবগী মরু ওইনা মায় পাকপা অমনি অমসুং মসিনা য়াম্না মরু ওইনা ওপরেসনগী ওইনা ত্রেনিং পীবা, খুৎলায় লৈবা অমসুং অপুনবগী শক্তম পুরকপদা য়াম্না তেংবাংগনি হায়খি।

ঙাকশেল মন্ত্রীনা হৌজিক চৎলিবা শেনবা চহিসিদা কোবিদ-১৯দগী থোক্লকপা খুদোংচাদবা কয়া থেংননবা শেম শারিবা ইন্দিয়ন নেভীনা মশাগী থবক তৌবা, চলায়বা অমসুং মতমগা চান্ননা লৈবগী থবক কয়া লেপ্তনা পাঙথোক্লি হায়না হায়খি। মসিগী শেলথুমগী ওইবা খুদোংচাদবা কয়া অসি লৈনা লৈনা সরকারনা মখোয়গী সর্বিসকী মতাংদা খুদক্তা থোক্লকপা খুদোংচাদবা কয়া থেংনবা ঙম্নবা ইমর্জেন্সী পাৱরসু পীখি হায়না মহাক্না হায়খি।

ইন্দিয়না নেভীনা সরকারগী ‘মেক ইন ইন্দিয়া’গা চান্ননা ‘আত্মানির্ভর ভারত’তা তেংবাংবা অসিগী খুদমগী মতাংদা ৱা ঙাংলদুনা য়ুমগী পোত্থোক চাউখৎহনবগী মতাংদা নেভীনা মাংথাদুনা লাক্লি হায়না ঙাকশেল মন্ত্রীনা হায়খি। হৌজিক ফাওবদা ঐখোয়না ফংলিবা মায় পাকপশিং অসিগা লোয়ননা ঐখোয়না চৎপা অসি য়াম্না মরু ওইবনি হায়না মহাক্না হায়খি। হন্দক্তা শঙ্গাখিবা এন.আই.আই.ও. (নেভেল ইনোবেসন অমসুং ইন্দেজেনাইজেসন ওর্গ্নাইজেসন) অসি মসিগী মতাংদা পাঙথোকপা খোঙথাং অমনি।

কনফরেন্স অসিবু মায় পাকপা ওইয়ু হায়রদুনা ঙাকশেল মন্ত্রীনা মরু ওইনা মিৎয়েং চংগদবা মফম অমসুং স্ত্রেতজী অসিনা মতেং য়াম্না পাংবা ঙমগনি হায়বগী থাজবা লৈ হায়না মহাক্না ফোঙদোকখি।

ঙাকশেল মন্ত্রীনা য়ৌরকপা মতমদা মহাকপু নেভেল স্তাফকী চীফ এদমিরেল করম্বির সিংহনা ওকখি অমসুং কোবিদ-১৯ লায়চৎ থেংননবা অনৌবা থবক কয়া পাঙথোকখিবগী মতাংদা পাউদমখি। মসিগী মনুংদা নেভীনা শাখিবা খুৎলায়শিং অমসুং অতোপ্পা এজেন্সীশিংনা নীংথিনা শিজিন্নরিবশিং অসি য়াওরি।

*****