ব্রাজিল, রসিয়া, চাইনা, খা-অফ্রিকা অমসুং ভারত য়াওবা ব্রিক্স এন্তি-দ্রগ ৱর্কিং গ্রুপকী ৪শুবা মীফম অমা চয়োল অসিদা পাঙথোকখ্রে। ভারতকী কাংবু অসি নার্কোতিক্স কন্ত্রোল ব্যুরোগী দাইরেক্তর জেনেরেল শ্রী রাকেশ অস্থানানা লুচিংখি অমসুং এন.সি.বি.গী দেপ্যুতী দাইরেক্তর জেনেরেল (ওপস) শ্রীমতি রাধিকা, মোস্কোগী ভারতকী ইম্বেসীগী ফর্স্ত সেক্রেতরী (ত্রেদ) মিস ব্রিন্দাবা গোহিল, এম.ই.এ.গী অন্দর সেক্রেতরী (মলতিলেতরেল ইকোনোমিক রিলেসন্স) দাঃ বাইভব তন্দালে অমসুং এন.সি.বি.গী দেপ্যুতী দাইরেক্তর (ওপস) শ্রী কে.পি.এস. মলহোত্রাসু কাংলুপ অদুগী শরুক ওইখি। ভিদিও কনফরেন্সকী খুত্থাংদা ওগস্ত ১২, ২০২০দা পাঙথোকখিবা হন্দক্কী চহিগী সেসন অসি রসিয়ানা লুচিংখি।

ব্রিক্সকী মীহুৎ ওইরিবা লৈবাকশিংগী মনুংদা ওইরিবা নিশাগী হীরমশিং, নার্কোতিক নিশা, সাইকোত্রোপিক সবস্তেন্স অমসুং মরী লৈনবশিং অসি মালেমদা অমসুং মফম মফমশিংদা য়োনবগী চৎনবীগা লোয়ননা হীরম অসিনা লৈবাক্কী মনুং অমসুং মপান্দা পীরিবা চৈথেং কয়া অসিগী মতাংদা কান্নবা ৱাফম কয়া মীফম অসিগী মনুংদা ফোঙদোক্নখি। লৈবাকশিং অসিগী মনুংদা খুদক্কী ওইবা ই-পাউ ফাওনবা অমসুং ঈশিংগী লম্বীশিংগী খুত্থাংদা নিশা য়োনবা হেনগৎলক্লিবা অসিবু লেপহন্নবা হীরমশিং অসিগা মতাংদা থেংনরিবা খুদোংচাদবা কয়া অসি মেম্বর লৈবাক খুদিংনা থেংনবা অমত্তা ওইবা হীরমনি হায়বসি খন্নবা অসিদা খঙনরকখি। দার্ক্নেৎ অমসুং অফবা মখলগী তেক্নোলীজী কয়া নিশা য়োনবদা লান্না শিজিন্নরিবা অসিগী হীরমশিং অসিনা মীফম অসিদা অহেনবা মিৎয়েং চংবা ৱাফম অমা ওইখি।

মীফম অসিদা খন্নবদা য়াওখিবা ৱাফম খুদিংমক য়াওবা ৱারোল অমসু মেম্বর ওইরিবা লৈবাকশিংনা থোকখি।

ব্রিক্স অসি ফেদেরেতিব রীপব্লিক ওফ ব্রাজিল, রসিয়ান ফেদেরেসন, রীপব্লিক ওফ ইন্দিয়া, পীপলস রীপব্লিক ওফ চাইনা অমসুং রীপব্লিক ওফ খা-অফ্রিকা য়াওবা ইনফোর্মেল ওইবা কাংলুপ অমনি। ব্রিক্স লৈবাকশিংগী মপাঙ্গল লৈরক্লিবা শেন্মিৎলোন, মালেমগী চাউখৎপা পুরকপদা মখোয়না মরু ওইবা শফু পীরিবা, মখোয়গী মশিং য়াম্না মীশিং অমসুং মখোয়গী লৈরিবা মরাং কায়বা মহৌশাগী রিসোর্সশিং অসিনা মখোয়না মালেমগী থাক্তা ইথিল পীবগী ইথিল ওইরি অমসুং মসিনা লৈবাকশিং অসিবু কাংলুপ অমা ওইহন্নবা শাফু পীরিবনি। ব্রিক্স লৈবাকশিংনা খুৎশম্ননা চৎমিন্নরিবা হীরমশিংগী মনুংদা নিশা য়োনবগা মরী লৈনবা হীরম কয়াদা মতেং পাংনদুনা চৎমিন্নরিবা অসি য়াম্না মরু ওইবা অমনি।

*****